網頁

2013年12月7日 星期六

2012 遊大阪@第一天

May 6, 2012 11:08 AMPublicPageviews 1254                 




放大假 , 第二擊係遊大阪 . 今次係小妹第一次探訪依個櫻花名城 , 本來是想到沖繩走一轉 , 但唔知咩原因 , 沖繩個 Book load 係出發前上升左好多 , 擔心上唔到機 , 所以臨時改去大阪 . 日本對好多朋友來說 , 是一個瘋狂購物既好地方 , 但小妹對買野既興趣不大 , 所以三萬 YEN 應該夠用架啦 ! 睇景點及吃飯 , 其實花不了太多錢 , 無謂既揮霍並唔係小妹旅遊既宗旨 , 我只希望到所有出名既景點走一轉 , 留下美好回憶 !

賣下廣告先 , 其實我地朝早既航班一般都準點架 ! 因為本公司有最強勁既地勤人員 , 我地個個都係快手之人 , 為左唔想打 Delay Report 以及唔想回頭隻機有大量屎客 , 我地個個都會好努力咁做到準點起飛 , 大家可以放心坐我地 " 早上 " 既航班 ~ 好 ! 大阪 ~ 我來了 ~



從前有說 , 香港快運會走 Budget 路線 , 只提供小食 , 但現在卻是小妹公司只提供 Cookie 以及 Bun . 對旅遊的人來說 , 飛機餐是必影的 , 好食與否並不重要 , 最重要係有得比佢地食 , 食完再講一句 " 都話飛機餐唔好食架啦 ! " 小妹自問對食無咩要求 , 食得飽就可以了 . 而且一心打算要食 Bun , 結果有餐食 , 真係喜出望外 ! 香港人 , 別多多要求 , 又要平 , 又要正 , 依個世界邊有咁好架 ? 請多多珍惜現擁有的 , 有得比你食就好食啦 , 到時得返 Delay cookie , 你想要個難食既餐都無 .



飛機真係偉大發明 , 縮短左地域既限制 , 其實香港跟日本既距離 , 只係睇場戲既時間咁遠 . 個餐才食完無奈 , 就已經黎到大阪既上空 . 原來日本係咁既樣 ! 第一次見面 , 幸會啦 ~ 聽聞大阪個核電站會開返 , 難道依個係導致日本 Loading 下降既原因 ? 其實老土都要講句 , 有時 D 野係整定既 , 係要選中你 , 去到邊都係走唔甩 , 無謂畏首畏尾 !

曾經睇過一本書 , 講到住係魚港既人 , 都擁有大無畏精神 , 一生熱愛探險 . 香港都算係一個港口 , 小妹都擁有探險既勇氣 , 我既願望就係踏足每個我想去既地方 . 工作儲錢 , 放假玩樂 ! 即時覺得 Delay 被客圍都不打緊 ! 最緊要放假有得玩 !


終於抵達關西機場 . 過關時 , 前前後後被人 Check 截停左五次 , 點解 ? 點解 ? 唔通因為我係第一次黎日本 , 所以 Check 我 Check 得特別嚴 ? 去過咁多次旅行 , 都係第一次被人要求開篋檢查 . 原來日本被 London 仲嚴格 ... 又或者我無化妝 , 特別樣衰 ??



明明已經三月尾 , 何解會咁凍 ? 唔通我有溫差 ? 尋日仲身處 32 度既新加坡 , 今日就黎到只得 15 度既大阪 ! 咁凍既天氣唔知仲有無櫻花睇 ? 黎到日本 , 睇唔到櫻花 , 邊算黎過 ? 聽同事話買 Kansai Pass 好抵 , 所以就買左 5000 YEN 三日 , 我要用盡佢 !

依間酒店係我出發前一晚於 Booking.com 到訂既 , 住 3 晚連稅不包早餐雙人房只需 1980 , 預左日本酒店貴 , 你地覺得呢 ? 黎酒店本來好簡單 , 就係搭到新大阪站 , 再係出口四樓下坐酒店 Shuttle bus 就到 , 結果係言語不通既地方 , 問唔到架 Shuttle Bus 係邊 , 亦好神奇地 I-Phone 顯示 No Service , 想用 Translate 都唔得 ... 結果用最原始方法 , 睇地圖行過去 . 每行一個街口就問人是否向前行 , 除左睇得明日本人指我向前行外 , 基本上我連行幾多個街口再轉都唔明 . 原來識英文係無用架 ...

幾經辛苦 , 行左廿分鐘 , 終於黎到酒店 , 好光鮮呀 ! 平日我住開平平酒店 , 除左跟團住得好 D 之外 , 平日我都只要求有張床 , 有個厠所就 OK 架啦 , 相信間房應該唔錯 !


聽過好多人講 , 日本既酒店房係好細間既 , 都唔係真係好細 ! 我覺得好 OK , 個厠所仲好乾淨 , 見到一系列既 Shishedo 產品 , 心諗 , 早知唔帶沖涼洗頭用品啦 ! 間房我就好滿意 , 有機會再黎亦會訂返佢 . 大家又覺得如何呢 ?



其實對大阪既第一印象係好似台灣 ... 坐地鐵時 , 又覺得好似香港 . 所有人都著得好嚴肅 , 上班一族全是西裝 , 車廂中既人全部都好安靜 , 而且木口木面 , 好似無咩生氣咁 . 朋友話日本自殺率好高 , 生活亦好艱難 . 我就覺得因為佢地自細就被軍訓慣 , 守紀律 , 個個為左唔想被人排斥 , 都好似倒模咁 , 失去自我 . 從前 , 未黎過日本 , 總覺得日本樣樣都好 , 但坐左一程車後 , 卻覺得做日本人真係好辛苦 . 我好想大聲喧嘩呀 !



除左中午食左個飛機餐外 , 打後都搵路 , 無心情搵食 . 在酒店安頓完後 , 即時向出名既心齋橋出發 , 有無攪錯 ? 才八點多 , 大部份食店都關門 ... 見到得返依間食店未打烊 , 即刻衝入去食個晚飯 . 打開餐牌先發現原來依間食店旅遊書有介紹 , 佢叫自由軒 , 我覺得幾抵食 , 70 幾蚊一個晚餐 , 其實跟香港差唔多 . 邊鬼個話日本食野好貴架 ??



其實依個固力果人一 D 都唔靚仔 , 但見本本旅遊書都有佢個樣 , 好似唔同佢影張相就無去過大阪咁 . 原來佢每半個鐘頭就會發光一次 , 睇完佢發光之後 , 就繼續四圍逛 . 一心以為可以係固力果專門店買到好日本既零食 , 但結果是失望而回 . 所有零食包裝得好靚 , 就好似去左零食物語咁 , 唔覺得有咩特別 . 生於香港依個大都市 , 實在是太幸福了 ! 好似咩都見過曬咁 .



日本人真係好鐘意櫻花 , 真既櫻花我仲未係日本見到 , 但四處都搵到假櫻 , 勁 ! 假既都已經咁靚 , 相信真既應該係超靚 , 希望櫻花唔怕凍 , 快 D 開啦 !



行左一陣 , 已經覺得日本人對外在要求嚴謹 , 店面既裝潢好花心思 , 外表要夠嗆 , 務必搶去所有人既視線 . 店內既東西都包裝得好靚好靚 , 令人有想買既衝動 . 怪唔知得 , 咁多人黎到日本都要大出血啦 !! 遊客區果然唔同 , 附近都打烊了 , 但依到就人來人往 , 好熱鬧 ! 當我同朋友係到不停影相時 , 有一班西裝男跟我地搭訕 , 完全唔知佢地講咩 , 之後小妹問佢識唔識講英文 , 佢講左句 No , 就繼續同我地講日文 , 仲追住我地 , 真係嚇鬼死 ! 第一次係外國遇到傻佬 , 都咪話唔驚 ...



未黎過日本都會知道四天王拉麵 , 基本上見親同事去大阪既相必定見到佢 , 可惜我已吃飽 , 唯有等明天先來一試 ... 是次行程 , 一定要食拉麵 , 鰻魚飯 , 豆腐料理 , 大阪燒 , 壽司以及章魚丸 . 黎得幾日 , 都唔知食唔食到咁多野 !



超大型廣告板 , 影完細版 , 再影返個大版本 . 的確好嗆 , 好耀眼 !



四圍都係大型廣告板 , 五光十色 , 好熱鬧 ! 好日本街頭呀 ~ 最想行既藥店全部都關門了 , 唯有明天請早 ...

沒有留言:

張貼留言