地勤唔易做

24.1.2014
人係貪心既 , 今次得到過 , 下次必然會再要 . 人亦愛面子 , 跌左落地要拿返紮沙 , 投訴就係佢地既必殺計 !

上年年頭 , 我被某管理層投訴 , 結果有好一段日子 " 被人監視住 " , 感受到咩叫一沈百踩 . 根據 company policy , 任何人要帶 guest 都要事前通知以及得到呀總批准 . 管理層嘛 ! 帶 guest 來 , 我就係太直 , 問清楚才放行 , 結果被訓話 , 內容係 " 我明白同事咁做 , 問清楚係啱 , 但佢態度差 , 明知我係邊個都咁 , 相信佢對客既態度仲差 "

那件事過後 , 我明白到公司錢多 , 由佢 . 呀豬呀狗入黎唔比錢 , 我無必要出聲 . 自己公司既人都係咁 , 更何況 D 客 ?

最近 , 投訴我的那位管理層父母回家鄉 , 當然一句話就可以蓋過 company policy . 他人沒到 , 父母來到 , 搵著我吹水 . 我當時並唔知佢地身份 , 見佢係老人家 , 可能悶 , 就同佢講下笑 . 老人家不停讚我 " 嘴甜 , 很有趣 ! " 事後 , 我才知道佢地真正身份 . 諷刺吧 ! 個仔投訴我 , 老豆就表揚我 .

同一日 , 我又被另一位乘客投訴 . 理由係佢一行七人 , 只有六位係商務 , 另一位係佢助手 . 想買六送一 ! 我好想問 , 如果我去戲院睇戲 , 可唔可以比 6 個人錢 , 7 個人入去 . 最多其中一個人合埋眼 , 全程唔睇 ! 當然比我拒絕了 . 哈 ~ 預左好戲在後頭 , 佢見到我間 vip room 寫住 reserved , 要我比個間房佢地用 . 我當然拒絕 . 你明明見到被人 reserved 左 , 要我開比你 , 仲唔係有心難為我 ?

一個鐘之後 , 佢又走黎 , 話要投訴我 , 原因我專登唔比間房佢用 , 佢已經等左兩個鐘都唔見有人黎 , 所以係我問題 .  多合理既必殺技 ! 我心諗你黎左一個鐘 , 又知兩個鐘無人用 ? 我都唔係第一次比人投訴架啦 , 多一張唔多 , 少一張唔少 . 我今日有兩個選擇 .

一 , 唔放佢入去 , 大家有眼睇 , 食投訴 , 打 report .

二 , 放佢入去 , 叫呀總個 guest 死出去 . 少則被人監視住 , 好似年頭個件事咁 . 大則 , 呀總同你講 " 你 , 明天不用來上班 , 我說的 ! "

我很明智吧 ! 選了 " 一 "

黑開有條路 , 熟客仔又黎啦 ! 熟客仔一向都有少少煩 , 但未至於令我討厭到想用大巴車佢 . 但事緣某次 , 同事好好 service 到幫佢免費 upgrade , 其餘同事就惡夢開始 ! 得過一次 , 次次都要 ! 有一次 , 班機無 overbook , upgrade 唔到佢 , 又出必殺技 . 之後到我撞到佢 , 佢話佢個朋友想轉到 12 點鐘機 , 我一 check system 就知佢想玩野 . 我地當時 booking 2 / 286 , 原因之前打風 , 積左好多走唔到既乘客 , 而飛機只有 24 / 259 , 已經要問 / 迫其他客坐下班機 , 但因為同事出錯 , 唔洗佢 standby 就上到機 , 仲得一想二 .

我明知無可能 , 都做場戲幫佢問 , 再話個實況佢聽 , 結果又係投訴 . 投訴我幫佢問野時講 " 廣東話 " . 真係想爆粗 , 全心玩野 , 大中國主義到嚇死人 ! 有邊個香港人唔係用廣東話溝通 ? 你講國語 , 我同你講廣東話就話投訴姐 , 都費事采佢 . 我當時笑笑口講句唔好意思就打發佢走 .

過左陣 , 佢又攪我 , 問我上次唔 upgrade 佢 , 佢寫個張投訴信去左邊 . 原來佢有心玩我上次個同事 , 而又以為我係佢 , 想玩野 ! 我答 , 我好奈無見過你 , 佢話我講大話 , 我又答我放左兩星期大假 . 佢望多我幾眼 , 之後就話認錯人 . 最後 , 投訴我講廣東話張投訴信 , 佢無比我 .

依件事話我知 , 熟客仔有排玩我個同事 , 擺明玩針對 , 但 upgrade 唔到佢 , 係同事既錯嗎 ? 我已經通知左上級 , 以後 , 所有航班 flight full 都唔會 upgrade 佢 ! 之前同事真係好心做壞事 !

reject 又死 , 唔 reject 又死 ! 依加既客 , 比航空公司養惡曬 . 公司自己攞黎 , 怨不得人 , 但就累及前線員工日日收投訴 . 公司永遠一句 , 你識講野個客咪唔投訴囉 , 我唔洗個客比錢 , 免費請佢坐飛機 , 可能佢就唔投訴我囉 ! 講廢話 !

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 !
http://www.seewide.com/space-1379.html