網頁

2013年12月16日 星期一

地勤是什麼 ?

2010年9月17日下午2:59公開累積瀏覽 2473 7                    

每次穿起制服在街上走過 , 耳中總聽到 " 空姐呀 ! " 的聲音 , 小妹每次都想跟他們說 " 我不是空姐 , 我是地勤 ! " . 每回朋友眾會 , 都會問 " 你是魚翅還是龍仔 ? " , 小妹都要解釋除了魚翅 , 龍仔外 , 還有很多地勤公司囉 !
究竟空姐跟地勤有什麼不同 ? 最易理解就係一個在天上工作 , 一個在地下工作 . 機場地勤有好多種 , 搬行李叫地勤 , 做清潔叫地勤 , 送餐上飛機都可以叫地勤 , 總之一句係機場做而又唔洗好似空姐咁跟飛機走都可以統稱做地勤 .
講完一堆野 , 可能大家最想知都係航空公司地勤究竟係做咩 , 咁大家睇清楚啦 , 工作量之多 , 希望唔好嚇親有意投身此行既朋友 . 航空公司地勤有分禁區內( 俗稱 Airside ) 同外 ( 俗稱 Landside ) .
首先跟大家介紹一下何謂 Landside ?  Landside 同事就係幫各位 Check-in 行李果位小姐 . 航班起飛前三個鐘 , 可憐既 Landside 同事就要化好個妝 , 著好套制服 , 係天未光就要返到機場聽掃把 ( Supervisor ) Briefing , Briefing 內容包括當日航班機種 , 客人數目 , 有無 BB 仔 , 有無輪椅客以及貴賓等等 ... 一堆一堆數字以及客名 . 係未訓醒既情況底下 , 記咁多資料並唔容易 . 準備上 Counter 前要準備一堆有用物品 , 如一圈圈行李帶 , 會員申請表 , 十萬種表格 , 十多種貼紙 ... 帶齊所有物品 , 才可以上路 . 到左櫃位 , 一坐就係一至兩班機既時間 , 閒閒地都要三至六個鐘不等 , 視乎當日天氣情況如何 , 乘客有否準時 ( 麻煩早到 ) , 由外站飛來既機有無遲到等等因素 . 當一位乘客來到櫃位 , 檢查證件是否有效 , 幫客人寄行李 , 安排機位係最基本要做 , 當然實際並非如此簡單 , 正如小妹常常講 " 邊有咁多 Window Seat ? 我地個架係 Airbus 唔係 UFO 囉 " . 唔好以為 Check-in 完一堆客就可以閃人 , 仲有一大堆 Paper Work 等住你做 , 務求令你忙到斷氣 !
好啦 , 係時候介紹一下 Airside 同事啦 ! Airside 工作有三 , 一登機閘口 , 二到港機口 , 三貴賓室 . 登機閘口表面做下登機廣播 , 檢查證件 , 收登機證同機票 , 實際上意外既事日日有 , 死人 , 政要 , 遲到又麻煩既乘客 , 仲要臨上機先話依樣唔見個樣唔見 , 總之好似欠左佢咁 , 誓要令你隻機 Delay 為此 . 到港機口就係到閘口接機 , 無事發生時就不停重覆 " Welcome to HK " , 有時發生時 , 就同個客狂奔十幾個閘口趕下隻機 , 總之用盡所有方法騙佢上機就完成任務 , 否則就被佢咬住全日唔放 . 假如遇上大 Delay , 仲要安排乘客住酒店 , 唔好以為乘客去左酒店整件事就完成 , 你極有可能要做領隊 , 由出機門個刻陪到去酒店 , 再等第二日 Call 佢地起身 , 帶佢地返機場 Check-in , 再返 Office 打 Report , 工作時間大約 24 小時左右 , 少 d 精力都唔得 ! 而貴賓室既同事 , 話個個客都以為自己高人一億等咁 , 佢係主人你係狗 , 點到你傻咁 !
唔知大家聽完小妹講之後 , 仲有無興趣加入依個行業呢 ? 如果你想好似空姐咁飛來飛去 , 做地勤並唔係一個踏腳石 , 唔會因為你做過地勤而易些考到空姐 , 希望大家唔好有個錯覺 . 亦想同大家講 , 空姐老左或大左肚係唔會落地做地勤 , 大家性質唔同 , 無可能互換角色架 !
小妹亦想重申一次 , 雖然地勤工作並沒有大家想像中咁悠閒 , 但無疑係一份多姿多采既工作 , 畢竟機場係一個小小世界 , 可以擴大你既眼光 , 訓練你既 EQ , 最重要係地勤都有一折機票架 !

沒有留言:

張貼留言