網頁

2019年2月23日 星期六

首次東京。1月。2019年。回香港(Day5)

12-16。01。2019

今日回香港, 下午3點幾飛機. 早上 Check-out , 吃早餐. 在買車零件的店作最後衝刺. 大人的店, 都有小孩角落, 一樣有育嬰室. 日本, 真係好方便. 起碼出街唔洗帶一大袋野咁行. 香港, 都唔知要幾耐先學到.



帶住 BB 去旅行, 其實很累. 不過很開心. 這是屬於我們的共同回憶. BB 今次亦很合作, 一上飛機就開始訓覺, 訓到 Landing 前醒左, 可能耳仔痛, 開始喊. 好彩我地準備左粒大粒士多啤梨比佢食, 佢掛住食, 先無再嘈. 否則我地兩公婆實比人白眼   .


首次東京。1月。2019年。雷門寺。台場高達(Day4)


12-16。01。2019

小地勤對東京的認知只有雷門寺, 因為常常在Facebook見到同事Post大大個寫住雷門既燈籠. 小地勤對東京一直都不太感興趣, 所以都沒有做過任何資料搜集. 老實講, 人去我去, 去完今次, 都未必再有下次.


早上的第一個行程就係去雷門寺打卡. 原來係到可以遠觀埋晴空塔. 我與我的小情人深情對望. 由你出世個一刻起, 我眼中只有你. 對任何一個媽媽黎講, 孩子比自己的命更重要.

入廟拜神及祈福許願. 每人都求左一支籤. 之後係附近四圍影相.

一班中佬去旅行. 人生可以有幾多個十年. 兄弟十年情. 我老公成日笑話同依班朋友仲親過同自己細佬. 緣份就係咁奇妙.

有無人知道依個建築係咩名堂? 一舊金色既係個頂到. 好奇怪!

由於外面天氣實在太凍了, 大人們決定到商場 Shopping. 唔明點解, 依班男人咁鐘情夾公仔, 其實有咩咁好玩呢? 結果又係夾到一大舊公仔返黎, 攪到無啦啦多左一大箱野寄.

每次去日本, 都被迫去比卡超專門店觀光. 可能我老公都一樣覺得, 每次去日本, 都被迫去 BB 仔專門店觀光. 兩公婆就係要互杷忍讓.



晚上, 我們來到台場. 1 1 高達, 80後既回憶. 小地勤細個都有睇高達, 覺得以前既卡通及動畫好似比現在來的好睇.




當晚, 風很大, 超級凍, 影左幾張相, 就入返商場食飯. 其間, 遇上地震, 好似坐船咁. 當意識到地震時, 個心好驚, 雖然很輕微, 我先唔希望第一次去東京, 一家三口就咁拜拜左. 地震, 真係好可怕.

2019年2月20日 星期三

首次東京。1月。2019年。秩父溫泉(Day3)

12-16。01。2019

今日又係長車程。男人們要到秩父浸溫泉。

我以為我老公又跟朋友走左去,點知佢決定跟住我同BB四圍行。溫泉旁邊有很多餐廳,而且BB設備一流,又有熱水又有床,比香港方便十萬倍。
 
 
黎到秩父已經是中午,突然覺得東京有咁大嗎?後來先發現,我只係東京落機,一直都身處東區外圍。。。不是自己計劃的行程,感覺很悶。現在吃飯都要為BB著想,一定要有適合佢既食飯,就算BB吃飽了,佢見到我地食野,佢無份,佢會唔開心。佢點都要食少少,志在參與。
 



終於有一張一家三口既合照。

其實出面好靜,人影都唔多個。



車站附近先叫做比較旺一點。
 

睇個地圖,好似好多景點咁,但係天氣太凍,都無咩意慾四圍行。

留左係秩父大半日,傍晚又係去買BB物品。晚上,一班大男人幫我睇住BB,放我去酒店大浴場輕鬆下。個心太掛住個囝,浸左一陣間,食埋酒店個拉麵,就急急返房陪我個小寶寶。

男人門就出去食好野。。。我就只係睇相。。。


幸好我老公仲記得我,買左盒士多啤梨比我做宵夜。一月,士多啤梨當造,四圍都賣得好平。

首次東京。1月。2019年。頭文字DCafe(Day2)

12-16。01。2019

今早當所有人都去左車展,我跟BB就留係酒店食早餐及再訓覺。


行程每日都會有買BB物品的商店,因為成班男人都係人地老豆,不停去買買買。。。爸爸睇中依個小背包,但BB唔太鐘意。


正係知道要去一間好遠既Cafe,我仲幻想會有Pancake食以及佈置好夢幻個程。真係好遠,所以係中途站休息下,食少少野。


間Cafe係深山咁。九曲十三灣,差點想嘔。。。班男人就話作為一個車手,一定要揸過依條路。後來我先知,原來依到就係榛名山五連髮夾彎,頭文字D迷必到既地方。


我地黎到既時候,已經接近4點半,天開始黑。我抱住BB想影多張相都難。




Cafe原來無咩野食買,真係正飲咖啡咁樣。班男人好開心,小地勤就陪襯下咁。



大朋友去完車展,再到頭文字DCafe朝聖完,係時候到BB仔車展。

日本真係有好多好新既二手玩具買。老公朋友黎緊生孖B,係到就買左部二手孖B車,700蚊,好新,抵玩。

日本好似好多小朋友設施,一間小店都有兒童區,BB好似好開心咁。

2019年2月12日 星期二

首次東京。1月。2019年。男人們的十年之約(Day1)

12-16。01。2019

小地勤加入花花航空後,坐飛機去日本多過坐巴士去港島。只係去來去去都係日本最南跟日本最北,貪佢洗費無咁貴。今次成功踏足東京,多得老公一班老朋友,話係男人們既十年之約。小地勤死跟過去的,我幫自己同BB出曬機票,老公都唔好意思拒絕我。

1月11號下班,我們一家三口就乘坐零晨起飛的航班,而朋友們就坐早上9點多的。零晨帶住BB飛,好似好殘忍,但小地勤BB,真係好乖,一坐飛機,就會訓到落機。

上機前,到媽媽工作既地方參觀下。比班姐姐們見下真人。無錯,我個仔係一個大眼BB,所以好多人鐘意同佢玩,最重要係,只要有人抱,呀媽都可以唔要。。。

晨咁早就到左成田國際機場。老公話好多野睇的,結果佢自己都講,10年無黎過,好似改變左好多。買唔落手。其實我覺得當你去過日本其他消費平既地方,就唔會再對東京有興趣。係機場搵左個地方比BB繼續訓覺。訓醒就陪佢玩。原先計劃係等埋老公既朋友先去市中心。結果係機場悶到發霉,都係決定買車飛出去行下。


太奈無試過帶住咁多行李行街,去到市區想搵地方放行李,全部Full曬,天氣又凍,得1度,想搵餐廳坐下,卻發現餐廳都超多人,而且坐位非常迫,唔太適合BB入去。

又凍又攰,酒店坐車係去唔到的,早知我地攞左駕車先出發,一心諗住學下坐交通工具。老公拖住2個大篋,1大袋BB野,仲要幫我攞埋手袋。我就孭住10公斤米咁行左半個鐘,搵到M記。。。完成左表姐仔交帶既重要任務。

好後悔今次無帶BB車,諗住自駕,BB車多餘,結果辛苦自己。係M記休息完,差左電,我地發現對面有間Aeon,就全程留係超市閒逛買手信,唔打算再行出去。BB第一次去咁凍既地方。Aeon一定有育嬰室,仲要有熱水同梳化床,我BB係裡面小睡左一個鐘,其間都係得一個媽媽入黎裝過熱水而已。如果係香港,邊有可能比你用咁奈時間。

推住BB行超市,佢表現興奮,我相信仍知道自己同爸爸媽媽去左旅行的。返到香港,我先發現,我正係幫BB同佢老豆影相,忘記左自己。。。


係Aeon食埋下午茶,老公班朋友終於黎接我地。終於可以返酒店,間酒店的確好偏遠,其實我唔知自己係邊個區域,正係知道。。。好似係千葉。佢地成班男人係打算去睇車展。

雖然間酒店好偏僻,但好驚訝700蚊竟然有免費泊車兼提供免費早餐。700蚊酒店,仲要由細床房Upgrade左我地去雙床大房。原先覺得好貴,現在覺得賺左。

新年快樂 2019

12。02。2019

話咁快,就過年了。今年過年,好趕,好忙。

感覺聖誕才剛過去,終於做完曬 2018 年既工作,係 2019 年 1 月中放左幾日假期去旅行。

回到香港,又開始 2019 年既工作,什麼預算呀,找數呀,開單呀,不停被人追咁,好趕好趕。

直到某日,我才發現,機場已經換上新年裝飾。係機場工作了咁多年,都仲係覺得香港機場好靚。只可惜每日趕返工,趕收工,沒時間停下來多看一秒。從前當前線,反而有閒情去欣賞機場,去新餐廳吃飯,去新店舖閒逛,現在水都無時間飲。點解我感受唔到升職既好處 ?



可能大部分打工仔同我都係一樣,夾心階層,老闆只要成果,你下面幫倒忙既人卻比正常人多,最後工作量不斷增加,人工卻不見加,怨氣就生出來。今年花紅沒有著落,士氣比以前仲差。有些同事仲不停同我講,如果無花紅,就會辭職。我心諗,有無花紅,你地咪一樣會辭職。有,就等多 1 個月,無,又係要 1 個月通知。我都無心亦無時間去浪費口水係無心做落去既同事身上。

我都開始放棄了。但我經理卻沒打算放棄依班同事咁,仍然是用自己既錢去買零食呀,飲品呀~從前我們不會不停屈經理的,大家都知道,佢都只係打份工。現在的同事係超級過分的,一個月屈人幾次,當老奉咁,見到,都眼火爆。

其實就算我地唔屈經理,佢都一樣會買野請我地食。講起今年,結左婚既同事都竟然係開會時討論起派幾多錢利是。從前雙封 20 蚊,有些比較友好的,會派 50 蚊。2 年,這裡變化很大,走的都走了。從前,我視她們為出生入死的好朋友,現在,對不起,我沒法當現今的同事為好朋友。今年我決定做一個狂人,派 10 蚊。


結婚了的幾位同事平日不會討論利是問題,今年會想起的原因,除了沒花紅,就是歸屬感下降。同一個地方,同一份工作,但隊友卻改變了。開心錢,也有分值得與不值得。對我來說,每個人在我心中都有不同的價位。我。很現實。

小地勤今年無執過屋,又返工又湊仔,真係好忙。我只做到洗衫,掃地拖地這些簡單工作。我自問不是一個稱職既媽媽。年廿八,兩公婆去拍拖食飯,好奈無試過慢慢去享受一餐飯。

一直好想試下屋企樓下既西餐廳,每次路過都見到好多人坐係裡面,令人好想入去試下。果然好好味。一份沙律,2份主菜,2杯咖啡,2百元多。平日,我跟老公都係食茶記。食西餐,好似上世紀發生過既事咁。BB出世後,生活果然大轉變。




食完依餐飯後,又忙足一星期。我的小寶寶生病了,爺爺傷風,傳染埋嫲嫲同BB。小地勤又要返工,好彩老公放一星期新年假,每晚我都沒睡好,BB發燒又嘔,做媽媽既預左無覺好訓,唯有返工午飯時眠一眠。

年三十才想起仲未包利是。團年飯因為大家都病了,所以取消了。但奶奶仍為大家準備了自制盆菜,讓我們在家也可以做節。


就這樣BB病住過年同病住咁過佢既一歲生日。作為媽媽,只希望BB身體健康,百病不侵。結果當BB好轉時,到我開始作病,幸好婆婆過黎幫忙,世上果然只有媽媽好!