網頁

2014年12月29日 星期一

一星期歐洲之旅 * 2015 ( 準備篇 - 火車 )

29.12.2014

每個國家都有自家火車公司 , 好似奧地利係 OBB , 而德國就係 DB . 上網一 Check 就會有很多資料 . 不過個人建議 , 出發前都係要去官網睇一睇比較好 , 官網先最 Update .

喜歡德國 OBB 有很多 Special Offer 比個人或團體 . 一向都知歐洲火車唔平 , 單程 3 個鐘就可能已經賣成 40 - 60 蚊歐元 , 所以好多人出發前都會買定歐洲 Pass , 計落會化算一點 .

但對於唔一定成行既小地勤黎講 , 買 Pass 又麻煩又貴 , 都不及 OBB 網上的優惠 .

長期優惠有三種 , 其實都好抵用 , 唯一唔好就係只可以坐慢車 .

Quer-Durchs-Land-Ticket

1 個人 , 44 歐 , 每加 1 個人 , 就加 8 歐 . 星期一至星期五都可以買到 , 全德國通用 .
好似今次由柏林到慕尼黑 , 坐直車一個人最平都要 92 歐 , 用依張飛都可以去到慕尼黑 , 不過就要轉車 , 轉 4 次 , 全程 10 個鐘 . 兩個人就 52 歐 .

Schönes-Wochenende-Ticket

5 個人以內都係 44 歐 , 正係星期六日先用得 , 全德國通用 . 如果撞正星期六日先由 柏林到慕尼黑 , 就可以平多 8 蚊 .

邦票

德國分唔同邦 , 慕尼黑係南部用 " 拜仁票 " , 今年上網一睇 , 原來加左價 , 1 位 23 歐 , 2 位就 28 歐 , 如此類推 ...

最最開心係 , 發現到柏林到慕尼黑的直車做 Promotion , 今日賣 29 歐 1 位 , 諗都唔洗諗就買左 .

因此大家都係花點時間先到官網睇下先再決定買唔買歐洲 Pass 啦  .








2014年12月28日 星期日

年度回顧 * 2014

29.12.2014

最近開 Facebook , 見到一堆朋友既年度回顧 . 小地勤的朋友大部份都係機場人 , 佢地既回顧同小地勤差唔多 , 都係 " 出外旅行 " 既相 . 每日返工都心理唔平衡 , 成日都要做到好 Helpful 咁 , 慢慢成為習慣 . 但其實遇到麻煩客 , 小地勤都好想閃開 , 好想鬧佢 , 好想拍佢片放上網 ... 不過都係得個 " 想 " 字 .

唔知點解 , 雖然好多時係日記板到呻話邊個邊個客人好鬼衰 , 好鬼麻煩 , 但當年尾要回顧大事時 , 完全記唔起 ! 可能今年太精彩 , 唔開心既事就由佢過去吧 !

一月 - 男友買左對戒 , 話影相同結婚用 . 原來我既手指真係好幼 ...



二月 - 第一次同男朋友去旅行 ( 沖繩 ) . 第一年上佢屋企拜年以及第一次跟佢返澳門見人 , 仲有第一次新年有假放 !



第一年情人節唔洗約朋友 , 可以約男友 ... 第一次情人節咁緊張 , 因為妹妹生得 ! 咁就做左大姨媽 , 從此 , 我要好好愛錫依個小寶寶 ~



三月 - 拍左拖一年 , 飛左去台中影婚紗相 , 第一次咁長時間對住佢 , 對足一星期 ! 佢第一次上我屋企食飯 , 個日落好大雨 , 我屋企水浸 , 佢同我妹夫努力咁通渠 . 個一刻好感動 !



四月 - 平平淡淡咁過 ? 完全無印象發生過咩事 ...

五月 - 佢生日 , 又再出飛去沖繩 , 因為佢正係會去日本 , 不停咁食食食 ...



女皇陛下一百日 , 屋企第一次咁多人一起食飯 , 超開心 !



六月 - 小地勤既生日月 , 每年依個時候 , 我都會放一星期大假去旅行 , 今次係大阪 .



貴賓室擴張 , 由以前一眼望曬 , 到現在睇唔到佢個盡頭 , 地方大左 , 要重新再學過所有野 . 懷念以前地方細細 , 可以煲劇的日子 .



七月 - 當地勤既第八個年頭 , 攞到第一張獎狀 .



八月 - 全公司攞最多表揚信裡 " 排第二名 " , 再一次被肯定 .



因為去唔成沖繩 , 所以返左澳門 , 認認真真咁聽佢講 " 想當年 " . 坐係佢舖到扮下老闆娘 , 其實我份人太心急 , 真係唔鐘意 " 等 " 人黎買野既感覺 .



九月 - 第一次吵大鑊 , 冷戰左幾日 , 直到佢加 " 家用 " , 我先采返佢 ... 識左十幾年既同學仔 , 依個月出嫁 , 我身邊既同學開始一個一個咁嫁出去了 .

十月 - 永遠的十月九 , 每年都要見一下面 ! 每次見面都係回想當日 , 考試 , 受訓的日子 , 依八年都沒變過 .



心血來潮 , 跟同事去韓國睇紅葉 , 探舊同事 .



十一月 - 原定的歐洲之旅改成 Bali 之行 , 都係多得公司送左 4 晚酒店 .



又係時候為女皇陛下採購冬天衣服 . 為左你 , 小地勤成日去沖繩走水貨 !



十二月 - 仲有幾日就過完 , 希望無風無浪咁到 2015 年 !



其實作為一個地勤 , 雖然未能好似空姐咁日日飛去唔同地方玩 , 但起碼都算過得唔錯 . 地勤同空姐既分別 , 應該係我地既旅行係真係放假既日子 , 而佢地既旅行 , 只係工作中途既 break . 老實講 , 做魚翅航空的確福利比較好 , 不過做細公司就同事之間感情比較好 , 返工日日都要對住同事 , 佢地思想簡單 , 其實都係一件好事 .

正如開頭咁講 , 每年年尾想要諗起工作既唔開心 , 有點難 , 因為工作忙到令你沒時間回想不快 . 公司既福利令小地勤可以到外地差差電 . 旅行對一個工作壓力大既人黎講 , 真係好重要 .

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 ! 轉眼間我已寫了快 200 篇工作上的文章 @@
http://www.seewide.com/space-1379-u1967.html

2014年12月23日 星期二

一星期歐洲之旅 * 2015 ( 準備篇 - 多哈 )

23.11.2014

2015 年 1 月 , 會再乘坐友好航空 QR 前往德國-柏林 Berlin . 由於 Standby 機票有機會上唔到機 , 左想右想後 , 還是決定放棄曼谷轉機依個訪案 , 直接香港飛多哈 , 再轉飛柏林 .

跟公司出好員工票後 , 就要打電話比 QR List 名及問 Loading . 暫時由香港飛多哈仲有三十幾個位 , 而多哈到柏林就危少少 , 得返十幾個位 . 回程將由 Munich 直飛 Doha , 再回香港 . 為免行李上唔到機 , 全程要手提 , 不打算寄行李 . 再一次睇到 , 航空公司職員去旅行 , 並唔有大家想像中簡單 .

已經訂了七晚酒店 , 分別係三晚 Berlin , 兩晚 Salzburg 以及兩晚 Munich , 總供七晚 . 但有機會 Standby 成功 , 早左一日到 Berlin , 咁就唯有到時先再究其訂多晚住宿 . 暫時來回機票同七晚酒店加咁多日既保險 , 用左小地勤 5000 蚊 .

為免洗大左 , 我只會帶 600 央歐羅 , 用完就算 !

由於有機會 Standby 唔到要留係多哈 , 唔想浪費一日 , 都搵定少少多哈資料 .

多哈 1 蚊 = 香港 2.12 左右 , 跟杜拜都係差唔多 .

市內交通唔方便 , 坐的士係最好既方法 , 依點亦都跟杜拜差唔多 .

持特區護照可以做落地簽證 , 一位 QR 100 , 如果多一個人就要加 QR 50 .

建議穿長衫長褲 , 當年小地勤唔知死 , 仲著吊帶衫 , 怪唔知得野咁多男人同我 Say Hi .

多哈其實無咩野睇 , 不過如果去到 , 小地勤會想去 :

1. Museum of Islamic Art , 一來免費入場 , 二來係貝律銘設計 , 三來係海邊 , 四來睇博物館可以涼冷氣亦好安全 .

2. Souq Waqif 當地既舊市集 , 可以好好感受一下呀拉伯風情 , 好多特色及傳統物品 , 唔買都可以睇下 .

相信去兩個地方都夠消磨一日 , 晚上當然返機場搵地方訓再 Standby 第二日班機 ^^ !

聖誕節 , 如何過

23.12.2014

今天放假 , 明顯話比大家知 " 聖誕節 " , 24 , 25 同 26 , 小地勤都係要返工 .

今年聖誕節將會同過去幾年一樣 , 要為乘客準備聖誕禮物 . 好高興今年唔再正係派 , 而係有份做包禮物技工 .

餅係由老闆整既 , 當然唔會送客 ~ 老闆整的送同事 . 廚師整的才送客 . 首先小地勤要裝餅 , 一個一個餅放入袋 , 再封口 . 


之後再將包好既靚餅放入禮物包中 , 一個小時 , 小地勤包了差唔多七十個 ...


再將禮物包封口放好一盒盒 ... 每日要派 50 個 , 以及要同乘客影相 , 比公司宣傳用 .


剛收到消息 , 今日公司 X'mas Party , 無出席的小地勤好似抽中獎品 , 希望唔好係機票 , 希望係有用既禮卷 , 百佳 , 惠康 , 萬寜就最好 .

明天係貴賓室同事交換禮物的日子 , 唔知今年小地勤又會抽中邊位同事既禮物 , 期待 ...

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 ! 轉眼間我已寫了快 200 篇工作上的文章 @@
http://www.seewide.com/space-1379-u1967.html


與同事過冬

22.12.2014

22 號係今年冬至正日 , 雖然無得同屋企人食飯 , 但兩位當日有返工既媽媽都真係超關愛同事 .

掃把本來返中午十二點 , 但突然早左返黎 , 原來去左買壽司比同事食 , 幫我地要返工既同事做冬 .



不食生的我 , 掃把也沒忘記 , 另外買了一盒熟食給我 , 真係好體貼 !



晚上 , 準備收工 . 另一位媽媽又為我地每人送上一碗湯圓 , 真係好溫馨 .



好同事真係可遇不可求 ! 雖然有時工作上出現好多不如意既事 , 但整體黎講 , 貴賓室工作係開心的 ! 

祝大家冬至快樂 !!!

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 ! 轉眼間我已寫了快 200 篇工作上的文章 @@
http://www.seewide.com/space-1379-u1967.html

2014年12月18日 星期四

一個也不能少

19.12.2014

最近天氣冷了很多 , 小地勤也突然病到了 , 到今天才回復精神 .

同事豬豬已經 Last Day 左 , 掃把好快手咁請到一位新同事 , 最近也見過她了 , 感覺是那種很聽教聽話的女孩子 . 由於新同事未還要受訓一小段日子 , 所以去完旅行後 , 小地勤有兩星期都要返 Off - OT , 即係無得放假 , 要返工 . 

最近 , 豬豬同事走後 , 本以為會世界和平 . 但唔知點解某同事又開始出現問題 , 她工作表現跟情緒一樣起復 , 她每次表現唔好 , 都只因 " 戀愛大過天 " . 她最近成日玩失蹤 , 話病就病 , 累其他同事要 OT 黎頂佢個位 . 其實我地係一 Team 人黎架 , 每日返工都係人手剛剛好 , 一個同事頂一個同事食飯同休息 , 少一個人 , 工作多了 , 休息少了 , 你 , 有無想過其他同事既感受 ?

同事之間 , 一起相處了起碼兩年 , 小地勤對住班同事多過對屋企人 . 唔明白點解最近依位同事要咁玩野 , 可能佢覺得呀姐對佢唔夠好 , 但這不是同事錯吧 ! 你話射就射 ( 射波 = 請病假 ) , 真係唔理班同事死活 .

成日都話山水有相逢 , 成日聽佢講無幾多真心朋友 , 其實無真心朋友係因為自己大自我 , 太自私 , 看不到別人吧 ! 就算唔做 , 都唔洗咁 ? 他日真係唔做 , 你唔通唔諗住保持聯絡 , 繼續做朋友 ?

有時都明白 , 工作辛苦 , 又無自由 , 好多時都會想炸病唔返工 . 以前小地勤也經常請病假 , 但現在依間公司 , 請病假只會辛苦了其他同事 , 所以我真係做唔出 .

依兩日病到死死下 , 退唔到燒 , 我都仲堅持返工 , 為既都係同事 , 唔想少一個人 . 當然 , 我地都有個好掃把 , 專登放少半日假都返黎頂我走 . 某程度上 , 依個部門真係好好 , 好在同事團結 ! 我真係唔希望再有同事唔做 ... 希望佢玩完野 , 就會諗通返 .

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 ! 轉眼間我已寫了快 200 篇工作上的文章 @@
http://www.seewide.com/space-1379-u1967.html

2014年12月16日 星期二

五日四夜峇里島 ( 第五天 - 離開 ) * 2014

23-27.11.2014

終於可以離開 Bali , 返香港 ! 係酒店食埋最後一次早餐 , 小地勤就返房執行李 , 而男友就爭取最後一刻 , 又去游水 .


前幾日係酒店附近 , 又被人 " My Friend " 咁跟左成大半個鐘 , 不停話我抽到頭獎 . 係咁叫我去拎獎 , 終於打開黎睇 , 原來我中左 七晚 免費酒店 , 不過算把啦 . 小地勤唔想被人再呃 , 亦唔打算再黎 Bali .


1200 點就 Check-out , 係 Lobby 等 Shuttle Bus , 我地前一日比左 20 萬包車返機場 . 雖然比黎既時候貴左 5 萬 , 但點都好過再比其他人呃 .


1300 上車 , 差唔多 1400 幾先到機場 . 去機場有兩條路 , 去酒店時係行快路 , 回燨場時係行慢路 . 我地班機成 1800 , 所以到左機場先搵 Post Office . 但原來成個機場得一個 Post Box . 就係 Information Counter 前面 .


轉眼返黎香港已經成兩星期了 , 但到現在都仲未收到張 Postcard , 好擔心寄唔到返香港 . 好擔心之前被人呃既郵票根本就係假郵票 .



行完成個機場 , 去左 Arrival Hall 食 Lunch . 今次相信機場唔會呃人 . Menu 每款 5 萬以下 , 飲品就有平有貴 .


餐廳環境 , 好開揚 !


好好味既 5 萬蚊河粉 , 咁多日最好味既一餐 . 


男友話咁多日最好味就係依件雞 , 無燒到乾曬 . 5 萬蚊既印尼傳統餐 .


天氣好熱 , 機場冷氣好似唔太夠 . 飲杯青零水都要 2 萬幾 .


慶幸之前有上網睇別人分享 , 先無洗曬所有錢 , 一心以為離境稅係 15 萬 一位 , 點知加左價 , 現在係 20 萬一位 ! 都係個句 , 好采無洗曬所有錢 .


寄完行李 , 攞完登機證 , 過保安檢查前就要比每人 20 萬保護費先出到境 . 比完錢 , 就會貼返張野係地登機證後面 . 亦記住要好好 Keep 住入境時個張表 , 否則都係有麻煩 .


入到禁區 , 又係時候將所有既錢用曬去 , 買左香薰同印尼辣醬 , 最後 , 得返 4 萬 7 , 諗住買杯 4 萬 5 咖啡 , 結果唔找錢 ... 咁又被人昆埋個 2千蚊 , 一蚊都無咁離開 Bali , 返香港 .


1800 準時上機 , 有飛機餐食 , 但我個麵唔太好味 . 印尼口味飛機餐 , 好似怪怪地 .


2014年12月15日 星期一

五日四夜峇里島 ( 第四天 - 行沙灘 & 露天餐廳 ) * 2014

23-27.11.2014

由中國廟向下行返酒店 , 會經過一個碼頭 , 兩個開放既海灘 .

依個碼頭 , 相信就係可以坐船去附近海龜島既碼頭 . 係到迫左好多旅行團既巴士 .


另外兩個海灘既其中一個之前已經係 " 五日四夜峇里島 ( 第二天 - 向上行 ) * 2014 " 介紹過 , 所以今次就講另一個海灘 .

其實依到係一間大型酒吧 , 但未到夜晚 , 所以無人 . 我地行到行左陣同坐左陣 . 吹下海風 , 踩下沙 , 影下相 , 悠閒咁過左一個鐘 . 大家睇相啦 !






行下行下 , 好快又返到酒店 , 太陽準備下山 , 小地勤亦曾爭取最後一日既機會 , 終於第一次係酒店落水 . 曾經 , 我學左 10 堂游水 , 亦激死左個教練 , 因為得我一個學左 10 堂都唔識游水 . 雖然係咁 , 但起碼個 10 堂終於令我學識左浮 . 

我係 BB 池到玩水同半浮半游 , 我男友全程都睇實我 , 因為我的確學極都唔識 , 隨時會浸死咁樣 , 都的確幾嚇人 !

七點左右 , 中國團友開始返黎同落水 , 我地就急急讓返個池比佢地依班文明人 . 

又係時候出發去食晚飯 . 今日選了一間露天餐廳 , 仲有人唱歌 , 好有情調 .


今次試左一杯 2 萬幾蚊既西瓜汁 , 咁多杯果汁中 , 西瓜汁最好飲同解渴 .


今次叫左 BBQ Duck , 男友話印尼既肉全是 BBQ , 有時燒得太乾身了 . 邊邊附送既炒通菜 , 超好味 !


上次試食左印尼綠咖哩 , 覺得好好味 ! 今次就試下 , 當地既經咖哩 , 個人覺得綠咖哩好味好多 !


試左間餐廳既推介 , 就係依塊漢堡排 . 一般般 , 因為我唔好肉 . 旁邊塊炸薯反而仲好味 !


今餐都係酒店附近既酒店餐廳 , 所以都係無呃人錢 . 食左 36 萬 , 約 250 幾蚊 HKD , 好合理 !

五日四夜峇里島 ( 第四天 - Balinese Massage ) * 2014

23-27.11.2014

每天睡到八九點就自然醒 , 之後就披頭散髮咁到樓下餐廳食免費早餐 , 款式都係大同小異 .


之後就上房睇電視 , 涼冷氣 . 而男友就會自己去泳池游水 , 生活很寫意 . 點知 ... 電視維修中 ! 沒差 , 睡午覺 . 係到既第四日 , 個人已經變得好傭懶 .


睡醒 , 起來 , 食個印尼杯麵就準備出發 . 今日打算去試下當地 Massage . 其實成條街都有唔同大細既 Massage 店 . 尋日被人呃完 , 男友建議搵間大型少少既試做 , 免得再因小失大 . 去左第一晚無呃我地錢既餐廳附屬 Spa 店 . 


價錢比之前見到既貴一倍 , 但點都好過之後被人呃 .


其實男友無興趣 , 為左陪我 , 所以佢被迫要 Foot Massage , 而我就選了 Balinese Massage . 其實小地勤之前係大陸同泰國都試過做 Spa , 不過唔太鐘意 . 今次正係按摩都 OK , 接完成個人鬆左少少 , 特別係肩頸 , 終於無咁緊 .


寫明左幾多錢就係幾多錢 , 無呃 . 大型既始終信譽良好 . 本身都諗住尾數 4 千蚊比做貼士 , 結果老闆娘找錢時問我 , 可唔可以比 2 千蚊佢同事做貼士 , 仲話 2 千蚊就 OK 啦 . 想我省了 2 千蚊 !

之後仲當我地係大客仔咁問我地要返邊間酒店 , 安排免費車比我地 . 之前男友已經想行到最盡頭既中國廟睇下 . 因此個司機哥哥就車左我地去個邊 .

有中國人既地方就會有廟同打邊爐 ... 間廟其實無咩特別打左個轉我地就慢慢行返去酒店 .  打邊爐個間店 , 當然無人 , 大佬 30 幾度 , 唔洗錢都唔會想打邊爐囉 !


被人呃得多 , 係唔會再去小店買野食 , 去返連鎖店係最穩陣 .