網頁

2016年4月30日 星期六

四月回顧

01.05.2016

每年四月 , 都係我地一班地勤好緊張既月份 , 因為過往都係 4 月升職或加人工 . 小地勤我對職級從來都無興趣 , 職位越高 , 做野越多 , 雖然我自問自己都叫有能力當掃把的人 , 但我唔想孭起依個吃力不討好既責任 .

自從舊人一個一個離開 , 呀姐都為左留我地做左好多野 . 好似佢知道我唔想再輪班 , 都開左個文職位比我 , 仍好到咁 , 我仲有咩資格呻唔開心呢 ? 當然 , 只要我肯唔再固執 , 日子其實都好開心好快樂 . 大家都見 , 小地勤成日去旅行 , 原因咪係呀姐比左好大既自由度我地囉 !

講返加薪 , 公司話平均 3 % , 實有同事話少 , 不過睇返大圍經濟 , 老實講公司今年都仲比份大花紅同事以及仲有人工加而唔係炒人 . 算係好有良心既公司 . 對比起其他航空公司 , 雖然依到係比較辛苦 , 客人都比較麻煩 , 但公司對前線真係唔錯 . 經常買 Cake 買飲品比同事食 , 每個月又有生日會又送禮品 , 就算我結婚 , 又或者同事生 B , 都有送禮卷 , 其他公司應該做唔到 . 至於今年加薪 , 公司對舊同事應該比較好 , 所以跟往年差唔多 , 總之唔係 3 % , 而我亦好滿意 !

四月 , 好似唔多覺聽到有同事話升左職 , 往年依個時候 , 貴賓室都會有好多同事升職的 , 今年可能同事真係未夠資格吧 ! 我地依到的確出現左斷層 , Senior 越來越少 , 貴賓室正在莊大 , 依種情況 , 呀姐都話係預左 , 除左努力請人外 , 都無其他方法 . 

今個月 , 都走左 3 位同事 , 但我覺得影響唔算大 , 可能 3 個都唔係真係做左好奈 , 要搵人頂替真係好容易 .

唔知幾時開始 , 小地勤對所有事都好似有點自身事外咁 , 掃把們都睇得出 , 我唔似以前咁樣 , 每樣事都好關心 . 咁小地勤都已經得到一個好位置 , 當然唔想理太多事 , 我只做返自己應該要做既事 , 而且同事們對我都幾好 , 起碼每次我做頂更掃把時 , 佢地都唔會煩我 , 最多真係攪唔掂先會入房搵我過幾招佢地 . 

我表演得好唔好 , 有無比人搶功 , 又有咩所謂 , 最重要同事唔好被客鬧比客投訴 , 繼而攪到我 , 我就已經心滿意足 . 呀姐講得好 , 當你唔在意人地點諗你時 , 反而會做得更好 .

2016年4月25日 星期一

北海道五日四夜自駕遊*四月2016 ( Day 2 - 余市 / 小樽 / 白之戀人 / 定山溪 )

16-20.04.2016

睇開小地勤日記都知道余市係小地勤每日都必去既地方 . 平日我係余市只會逗留最多半個鐘 , 今次多左呀妹 , 所以定左一小時半既行程 .

跟往日一樣先掃貨 .



再到旁邊試飲 . 老公話之前試飲既都係好野 , 依加當然係平野啦 ! 仲多左果汁試飲 ! 正 !



飲完一圈 , 去另一邊參觀 , 每次去 , 都會有些屋仔突然開放返比參觀 . 同時間 , 又些屋仔又突然唔比參觀 .


黎依到都係補影下相 .



每次都會黎依間屋仔影到此一遊照 .




之前都可以比遊客聞下酒香 , 現在禁止了 .
 
 余市係小地勤眼中 , 最值得一遊的除了上面介紹既酒廠外 , 仲有成日排長龍既外鮮工房 , 抵食之選 . 蟹湯有好多蟹腳先賣幾十蚊港幣 . 咁多海膽既海膽飯先賣七十蚊 , 一定抵過係小樽食飯 .



小樽係由余市返札幌既必經之路 . 小樽最令我有印象係小樽運河 , 音樂盒同半個哈密瓜加雪糕 . 其實妹妹今次係第三次黎北海道 , 佢都話唔洗再去小樽 , 無咩特別 . 因此我地只係小樽運河影張相 , 打個卡 , 就閃人了 .

今日天氣好差 , 好大雨 , 又無興趣再行狸小路同 ESTA , 正當煩緊去邊好時 , 黎到白之戀人公園 . 路過咁多次 , 終於有機會參觀一下 .


糖果屋咁 ! 四圍有職員派糖 , 亦有拉糖表演 .


好奇怪既生物 , 但個名就好好聽 .


日本人好似對意大利有情意結咁 , 好多時會見到真實之口 .

教堂既窗真係好靚 .

仲有小飛俠 .

係到仲有好多舊式玩具 .



真跡 ? 睇黎佢老細係玩具愛好者 .

依個白之戀人公園係免費開放 , 路過就可以入去睇下 . 小地勤都有買左少少野幫襯下 .

櫻花蛋卷 , 試完無下次 . 好甜以及好藥水味 . 我對櫻花產品唔太好 .


定山溪係每次都必去 , 喜歡浸浸腳 , 又可以整溫泉蛋 . 今次我地自己帶左 6 隻雞蛋過去 , 可惜雨太大 , 攪到溫泉水唔夠熱 , 浸左半個鐘都仲好生 . 落雨去旅行 , 都幾麻煩 .

平日 , 小地勤係唔會去巴士站個邊浸腳 , 因為人太多 , 兼水唔夠熱 . 今日落大雨 , 人影都無個 , 仲有瓦遮頭 , 所以就呆左係個到休息下 .

天氣唔好 , 都無心情影相 , 魚仔都飛唔起 ... ...


雨好似無打算停 , 仲越落越大 , 去左超市買野返酒店食 , 簡簡單單又一餐 , 海膽 , 魚生 , 壽司 , 和牛以及章魚燒 , 仲有自家製溫泉蛋 , 日本真係好多好野食 !



北海道五日四夜自駕遊*四月2016 ( Day 1 - 三井 Outlet / 簿野拉麵橫町 )

16-20.04.2016

今次主要帶妹妹去玩一下沒有雪的北海道 . 自從 Midfield 大樓正式啟用後 , 小地勤都係第一次踏足依個地方 . 眼見泊左好多公司既飛機係到 , 感到有點自豪 ! 希望終有一日 , 依間公司唔洗再做呀二 , 可以真真正正咁成為香港第一 !

北海道地方好大 , 直到現時為此 , 小地勤雖然去過 4 , 5 次 , 都只係玩左札幌同函館 , 不停地重覆又重覆 . 由香港飛到千歲機場 , 差唔多 5 個鐘機程 , 計埋時差 , 每次快極都要成 4 點先到當地 . 攞完車 , 再返札幌 , 起碼 8 , 9 點 , 咁就無左一日 .

今次小地勤件行李等到最後先出到黎 , 再飛車去札幌三井 Outlet Shopping , 係 Outlet 行得兩個鐘的確唔多夠 . 如果唔去三井 Outlet , 亦可以到 OTS 對面的千歲 Rena Outlet 行下 . 三井 Outlet 勝在比較新款 , Rena Outlet 勝在夠平 .

三井 Outlet  八點關門 , 而餐廳就九點 .


其實自駕遊 , 住邊都唔緊要 . 小地勤一般都住狸小路尾同 ESTA 後街 , 貪一落樓就有野行 , 不過每次返到去都太夜 , 都生曬門 , 所以今次住係簿野 , 每晚 500 蚊 , 包停車場 , 好抵 .

簿野夜晚比較熱鬧 , 每次我都會係門路到影個余市呀叔招牌 , 北海道既相都係重覆又重覆 . 

晚上可以做既野唔多 , 通常都係到拉麵橫町食拉麵 , 咁多間 , 次次都唔洗重覆 !



拉麵同餃子係好朋友 , 每次都要食曬佢地 .



其實每間價錢都差唔多 . 不過就肯定比 ESTA 樓上個 " 拉麵共和國 " 大碗同料多 . 仲比較有傳統風味 .

食完拉麵 , 老公就去行街入貨 , 小地勤跟妹妹當然窩係便利店 , 酒店樓下有 7 仔 , 有 Lawson , 有 Familymart , 仲有 Seicomart ... ... 就算食飽 , 都一定會照買甜品 , 每晚兩個甜品起跳 .