網頁

2015年11月16日 星期一

孤獨的路

17.11.2015

其實小地勤個掃把 ( 以後要改口叫佢 " 先掃 " , 因為升職了 ) 對我都算唔話得 , 算少編我返夜 , 無奈我比較黑仔 , 一返夜就中 Delay . 今次連續返左 4 晚夜 , 亦剛好遇上 Bali 火山後遺症 , 晚晚都係 0330 ... 訓覺時 , 已天光 . 我成個日捱左幾晚 , 不但爛臉 , 仲 Feel 到自己好似好唔實在咁 , 對眼又打唔開 , 每個人見到我都得一句話 " 你好似未訓醒咁 " . 仲有十日左右 , 我就擺酒 , 卻被份工攪到自己咁樣 .

最近應該要升職既同事都升了 , 當中我的兩位老拍檔正式升做 " 掃把 " . 佢地本來就係人選都唔會覺得意外 , 為佢地開心之餘 , 卻為自己擔心 . 我依加既心情就係咁 ...

從前 , 有兩個人陪我行一條又直又闊既路 , 從來無人質疑過依條路係錯既 , 我地仲嘗試拉埋其他人一齊行 . 現在 , 我仍係依條路上 , 條路仲係好直 , 但卻越黎越窄 . 眼見多左人向同一地方進發 , 但唔明點解佢地條路卻係灣灣曲曲 . 以前兩個陪步的人 , 已經到左終點 , 得返我原地踏步 , 這是我被迫出來的決定 , 可以怪誰 ? 難道要怪自己人工高嗎 ?

我覺得好孤獨 , 以前係 " 我地 " , 現在係 " 你地 " ... 以前既 " 我地 " 被評為高於水平線 , 現在既 " 我地 " 是不團結 , 少交流 , 道不同不想為謀呀 ! 我錯在高於水平線 , 我錯在沒有去用 " courtesy " 對待不應出現的人 . " courtesy " 永遠不會發生係我身上 , 原因係我用 " soft skill " .

唔知大家明唔明我講緊咩呢 ? 最近開會我都跟 " 你地 " 分開坐了 , 因為我唔再係 " 你地 " 口中既 " 我地 " . 每次未問各自諗需要改善既地方時 , 身旁既人都唔出聲 , 等我講 . 難道我先係要改善嗎 ? 一個識分辨是非既人 , 同時亦懂得 " 指鹿為馬 " , 對我來說 " 指鹿為馬 " 比明辨是非容易得多 .

2015年11月7日 星期六

苦中一點甜

07.11.2015

今年很難捱 , 由年頭開始 Keep 住 ATC Hold , 之後就係雷雨 , 打風 , 軍演再 ATC , 印尼火出爆發 ... 終於捱到年尾 . 以往冬令時間就很少會有天氣問題 , 最多都係簡中北京大雪 . 好景左幾日 , 印尼火山又再爆發 , 每日都被客圍 , 問點解點解 ... 我又想知點解 ! 你地去圍個火山啦 ! 爬上火山口自己問點解 !

全日小地勤都好忙 , 好多突發事 ... 同事新 , 我又要做又要教 , 我連黑瞼同去個洗手間既時間都無 .

係我好灰既時侯 , 有位行錯路既大柴貴賓 R 水吹兼話幫我睇相 . 第一次睇相係全英語對話 . 大叔話一睇我個樣都知道我老公搵到錢 , 又話睇我條眉就知道我又聰明又喜歡 " Thinking " , 又話好多高官都有我依條眉 . 當我同佢 Say thank you 時 , 佢又叫我要再笑多點 , 因為我一笑就會儲到更多錢 , 哄到我鬼咁開心 !

其實小地勤真係好易被人哄到 ! 哈哈 ... 大叔仲話佢從未坐過花花航空 , 但同我傾完計後就好想試坐一次 , 又話希望下次見到我 .

今日真係好忙 , 亦好攰 , 但依位大叔令我覺得依份工都未真係咁差 .

2015年11月5日 星期四

食。買。札幌。北海道度蜜月。2015。十月

06.11.2015

坦白講 , 小地勤去札幌都只係行下街 , 食下野 , 陪老公四圍搵貨賺錢 , 所以都無點再去札幌既景點 .

十月既日本 , 四圍都係 Halloween 既商品 , 好有氣氛 . 日本既包裝真係一流 , 仲要成日都 " 期間限定 " 攪到有一種 , 今次唔買 , 下次買唔到既感覺 .


每個早晨都係去二條食早餐 . 小地勤唔食生 , 所以都只係陪坐或飲碗蟹湯 . 係札幌 , 二條食魚生飯應該係最平最新鮮了 , 中午過後 , 見好多店都會關門 , 所以有買趁早 .






依間店好似好多名人黎過 , 不過我都唔太認識 . 依間店旅遊書都有介紹 , 原因二條真係好細 , 基本上旅遊書講到間間都值得一試咁 , 所以我都唔多信旅遊書 , 行到邊食到邊就算 .

通常傍晚時份 , 我地都會去食壽司 . 日本既壽司其實因為 Yen 平左 , 所以仲平過香港食 . 坦白講 , 依幾年 , 我都無點係香港食過日本野 , 因為做地勤令我可以隨時起飛 .



札幌站 ESTA 樓上既 " 拉麵共和國 " 係每個第一次到札幌既人必去 . 除左因為有好幾間唔同款既拉麵店外 , 另一原因係可以不停咁影相 .

係到有日本既鳥居 , 懷舊既郵筒 , 傳統既日式小店 .



仲有個火車站係到 , 人又唔多 , 點影都得 .

 日式既建築同室內擺設 .


曾經我希望試食曬咁多間拉宧店先再投票 , 但食過一次後 , 就無再返轉頭食 .

原因係我愛上去街頭既 " 拉麵橫丁 ". 係薄野 , 我遇上兩條拉麵橫丁 , 而依一條就特別多日本人 , 街頭賣的 , 果然比商場的有風味同平 !

其實比拉麵共和國更多選擇 .

我地又係亂入一間 , 間間既價錢都差唔多 . 又大碗又多料又好味 ! 最重要係開到好夜先關門 !



另一間我好鐘意去既餐廳係之前介紹過 . 今次我地又再黎 . 個 Menu 唔同左 .

要幫手打氣的魚子飯 ! 多到流出黎 ! 見到都開心 !

依個雜菜煮海鮮超好味 , 又唔貴 ! 裡面有帶子 , 三文魚 , 魷魚同大蝦 !


依個雞排都好好味 ! 雖然個外表就有點平化 , 不過都值得一試 . 依餐係三百蚊左右 , 係唔係好抵食呢 ! 不過佢好似開到 0000 就關門的 .

我一向都鐘意買名信片 , 今季郵局限定 . 係唔係好靚 . 次前我地仲買過父 , 母親節版本 , 都好靚 . 

北海道 " 熊出沒注意 " , 無諗過真係會有野生動物出現係公路上 .

就算天寒地凍都仲會好想係日本便利店買雪糕 , 每晚唔食一次 , 總覺得差少少 .


 其實粟米雪糕都幾好味 , 真係好粟生架 .

依包魷魚餅超受歡迎 , 但唔係四圍都買到 , 好味過蝦餅好多 .

終於清左北海道個遊記 , 小地勤下轉北海道要等過左雪季 .

機場的一角

06.11.2015

某天 , 我終於在機場的一角找到自己張相 ! 機場租金好貴 , 難得係依個吋金呎土既地方佔有一小個框框 , 真係好光榮 .


欺凌事件常有發生

05.11.2015

航空界傳統文化係重視等級及 DOJ ( 入職日 ) . 大部份航空公司 , 唔同等級既人 , 制服顏色都有少少唔同 , 做掃把既黑同事臉 , 好平常 . 同級但早你一日入職 , 蝦你有幾出奇 . Senior 比 Hard Time 新人 , 日日都有發生 .

某天 , 有位空中大家姐黎到貴賓室 , 遇上小地勤我 . 明顯地想 " R " 貴賓室 , 唔明點解 " 機頭 " 又係咁 , " 大家姐 " 又係咁 . 佢地既文化係覺得自己跟天空一樣高 ? 其實小地勤每日都面對大大小小既唔同人 " R " Lounge . 見得最多係 " 我識你老闆 " 以及 " 我黎自你地老豆公司 " 既偽商務艙乖客 . 坦白講依兩種人真係好難應付 , 我成日都要係佢地面前扮傻同做戲 , 仲要套佢地口風 , 再自己分真假 , 好多時都係搭上搭識老闆 , 但無人可以担保話你知 , 幾時真係會遇到一個堅係老闆既朋友 . 從前的一件事 , 令我明白到公司要前線員工跟足 Company Policy 做野 , 但其實就有好多呀總指住個鼻就可以為難前線 , 所以要學點樣炸傻扮懵 .

開始離題 !

事發經過就係空中大家姐唔知點解覺得用 Staff 黎大我就可以入貴賓室 . 小地勤一向都係笑住口既假人 , 見佢係職員 , 為左貴賓室口脾 , 就算我心裡覺得幾煩 , 都會假扮幫忙 . 問佢見的係唔係想要水 , 大家同事 , 比支水你 , 有幾難 ? 但大家姐全心 " R " Lounge , 好心問佢有無申請公司張卡 , 卻串小地勤一句 " HK Bank only ! " 問佢係唔係想搵地方休息 , 建議佢到旁邊的 Public Area , 卻抄我名兼話我比無意義既 Suggestion .

其實我都知道佢用抄我名兼投訴我黎想迫我放行 , 但小地勤都只係打份工 , 大家都係公司同事 , 都係做前線 , 點解空中大家姐要比 Hard Time 我呢 ? 難道做地勤就可以令空中呀姐們睇我地唔起 ?

如果佢唔係抄我名話投訴我 , 我都唔會同呀頭打小報告 . 個空中大家姐一定唔知道當時我個主管睇住佢點比  Hard Time 我 , 而我又一直 EQ 好高咁全程無黑瞼兼比建議佢 . 最後係小地勤呀頭 Send E-mail 比空中呀頭要一個解釋 . 那位空中大家姐認左抄我名只係嚇我 , 而唔係真係要投訴 . 點解大家同一間公司 , 佢要嚇我 ? 好白痴既答案 . 如果我係佢 , 被人為左一件事而照肺 , 都估到 " 野 " 左部門 , 仲唔答 " 抄佢名係想表揚佢 ! "

結果好似空中大家姐被人開左 File , 入左係佢個 Record 到 . 欺凌事件的確常有發生 , 今次小地勤好好彩 , 有呀姐們力撐 ! 希望依件事可以起到小小阻嚇作用 , 唔想再有空中呀姐又或者機頭再黎發我地班小地勤脾四 !