網頁

2018年11月29日 星期四

帶著 BB 去沖繩。2018。11月。宜野灣 Apartment (Day 1)

24.11.2018

每年小地勤都會跟老爺奶奶外遊。今年帶埋 BB 一起 standby。雖然小地勤年資比較早,但老爺奶奶機票既排位比較低,所以都作最壞打算,可能要等到傍晚 5 點的航班。幸好,有驚無險,最後飛機起飛前的 10 分鐘抵達閘口,趕到早上 11 點的航班。

往時 11 月是淡季,依幾年好似無淡季了,每天航班都爆滿,誰說香港經濟差 ? 飛機上,小 BB 爆大屎,第一次係咁細既地方換片,塊 BB 板好短,BB 個頭頂住道牆,對腳又唔夠位伸直。原來係飛機上換片是這麼困難。換完片又忙飲奶,幸好飲完奶就訓到落機。如果 BB 喊足全程,小地勤驚比全機人打。

以前,我覺得公司好小家,來往沖繩的航班每人分得一個麵包。現在,我覺得公司好體貼,反正帶住 BB 既媽媽係咁迫既環境下,根本食個飛機餐都有困難。食個包,反而仲方便。

抵達日本,攞行李,攞車,咁就攪左 2,3 個鐘。今次都係訂 OTS , OTS 既 GPS ,老公勁讚,依加多左中文版,而且比以前更準確。我們今次跟叔仔一家同遊,即 6 個大人 2 個 BB 。 OTS 不知為何 Upgrade 了我們其中一架車,由 5 人車變 7 人車。

因為叔仔們的加入,所以我們才早了一天出發,但太遲訂酒店,那霸市的酒店超貴。因此 Book 到宜野灣,坦白講,依邊比較少遊客,因為唔係景點區。小地勤喜歡住 Apartment , 房間比一般酒店大 ,有露台,廚房,坐厠跟浴室一般都分開,很不錯。


小地勤擔心 BB 認床,有水肚不服問題,所以帶曬 BB 用開既枕頭,被舖,帶埋自家水煲及半打有多蒸餾水。結果小寶寶適應能力超強。第一次用花灑沖涼,卻覺得好得意,好享受。小地勤失手,花灑水噴到佢成臉都係,佢都仲好享受,係到笑。仲學人照鏡擺 Post ,笑死人。一放上床,又笑,完全沒有認生。平日香港坐車多數孭住佢,架 car seat 好少攞黎用,但在日本要全程困係 car seat ,佢竟然無喊,仲一路望風景,一路哼歌玩玩具。真係估佢唔到。下次媽媽我就可以唔洗帶咁多野,太好了。


表姐仔話 23 號出 Melody , 佢好想要。姨媽 24 號就衝去食 M 記,只為買份手信比小公主。結果一堆朋友要幫買。。。香港咩都炒得起。難怪香港咁多人唔洗做,都大把錢。


晚上我們在宜野灣商場行街,食飯。在日本,隨便一間餐廳都既好味又擺得靚。喜歡坐 Tatami 位,BB 也可以一起坐,一起吃飯。小寶寶很喜歡吃白飯,日本餐廳一定有米飯,仲可以係超市買 BB 粥或 BB 撈飯用既配料,一般一包約 80 Yen 左右。沖繩,的確是一個很適合與 BB 同遊既地方。




2018年11月23日 星期五

簡簡單單的百日宴

28.04.2018

其實今日 BB 先得 2 個半月大,不過之後又到母親節,老公老爺奶奶又去北海道食蟹,所以我地決定早少少攪百日宴。

小地勤唔係那些喜歡大攪既人,我一心諗住 2 家人食飯就算。老爺卻表示今次可以大攪一下,話補償返我地結婚時攪得太細。其實小地勤結婚都擺左有 10 圍,仲要係酒店,我已經覺得攪得太大。估唔到老爺覺得都唔夠。

老人家抱孫,想請朋友参加,所以老爺話由佢找數。小地勤真係諗都無諗到,2 老咁錫 BB。

場地係老爺決定的,他一直想係巔南大學內間酒樓擺百日宴,BB 未出世,佢已經帶小地勤去過幾次。話希望 BB 將來會有書卷氣。老人家開心,就好了。小地勤最無所謂。奶奶可能見我懶懶閒,就叫我娣婦網上買了點氣球來佈置。小地勤妹妹就專登去日本買左件飲衫比 BB。

百日宴既帖,也是由奶奶一手包辦,坐位安排也是由她決定。我奶奶寫得一手好字。我既朋友都好驚訝坐位表係手寫。

小地勤只請了家人,貴賓室不同時期既舊同事,最要好既幾位中學同學,小學同學及我最尊重既 K 哥出席。其餘都係老公老爺既朋友。咁都擺左 10 圍。朋友們都好厚禮,還收到很多金器。坦白講,金太貴了,我都無預朋友們會買金送 BB 。覺得受寵若驚。



整晚小地勤忙住招呼朋友,親戚,照顧 BB ,基本上都無坐底食過野。永遠只有媽媽最愛自己的孩子。當晚,得我媽媽記得小地勤未吃飯,中場抱走 BB , 讓我吃幾口冷飯。世上只有媽媽好。

爸媽終於找到機會跟小寶寶合照。小寶寶太忙了。幸好他整晚都很乖,亦很合作。叻叻豬。


2018年11月21日 星期三

帶著 BB 返澳門。全世界最短纜車。觀光塔下美食嘉年華 (Day 3)

18.11.2018

早上,BB 姑媽跟我們到酒店飲茶。電視正在播賽車表賽,但當地人似看慣了,沒什麼感覺。澳門沒有太多配合 BB 的設施,香港商場的育嬰房沒找到,換尿片既地方也不是必然。

小地勤第一次遇上 BB 街外爆屎片,很徬徨。忘了帶 BB 衣服,BB 全身屎,一個人攪唔掂。幸好老公見我在女厠咁奈,都知道出事了,馬上找來嫲嫲幫忙。忙完一輪,我用自己的圍巾包實 BB ,就打道回府。幫小寶寶沖個靚涼再出發。

做人媽媽,的確是要實戰,相信下次小地勤會做得更好 。小地勤知道自己不是一百分媽媽,但我會慢慢學習,而且 BB 亦會自行適應,人仔的適應能力是很強的。

爸爸帶我們到屋企附近的二龍喉公園坐全世界最短纜車。單程2蚊,來回3蚊。我們買了來回票。其實小地勤是畏高的,可能我情緒影響了 BB , 他亦表現緊張。。。


山上景觀開揚,患有濕疹的 BB 在開揚既環境,皮膚突然由紅變白。空氣質素差導致 BB 濕疹發作,但小地勤我卻經常因 BB 濕疹而被怪罪。當濕疹 BB 的媽,思想要夠正面,內心要夠強大。


在山上行了一圈,爸爸抱住 BB 坐纜車回程。BB 突然無電,爸爸還是興奮拍照。小地勤都係第一次見到爸爸笑容咁燦爛。


澳門朋友推介爸爸到觀光塔下的美食嘉年華參觀一下。BB 可能水肚不服,又爆屎片,女厠排長龍,幸好男厠都有換片板,爸爸跟朋友們,幾個大男人幫忙下,成功換片。抵讚。

美食嘉年華場內不收現金,要先買儲值卡。中銀銀聯信用卡好似話有8折,可惜我地成堆人都無依張信用卡。買好野食,自己搵位坐,附近有好多長台長椅。我地買左成座啤酒,可以係小店內的長台慢慢坐。食左蝦膏雞亦,串燒,炒麵,牛排,喊蛋醬薯條,小地勤唔飲酒,老公買左杯泰式奶茶過我,味道。。。好奇怪。其實場內食物唔算平,不過氣氛幾好,令人好想幫襯。



逗留了兩小時,因為 BB 用盡能量,少何地爆喊,所以我地馬上回家。係嫲嫲到坐多陣,就步行到碼頭坐尾班船回屯門。由澳門回屯門,再坐輕鐵回家,只花了1小時半,比坐巴士的時間快了一倍,果然比錢就可以買時間。

今個旅程能夠坐巴士到澳門,坐船回香港,大三巴影相,跟 BB 坐纜車。很開心很開心。返工再攰,湊仔再辛苦,就算被爆屎片2轉,還是覺得帶著這個小麻煩外遊,是值得的。

在你獨立前,我同爸爸都希望可以繼續拖著你的小手,帶你去看大世界。

帶著 BB 返澳門。大三巴下睡著了 (Day 2)

17.11.2018

澳門賽車日,封路了。幸好老公家可以步行到大三巴。澳門路窄,而且多階梯,推著 BB 車,路很難行。當地人總愛避開手信街,我們繞去後街,約 20 分鐘,抵達大三巴。

坦白說,小地勤到澳門次數,5隻手指數得曬。大三巴是澳門最出名的觀光景點,因此小地勤很期望可以在這個景點下,拍一張一家三口的照片。對上一次回澳門,是剛拍拖,見家長。現在,抱著 BB 回澳門,感覺自己很幸福。


小寶寶在大三巴下睡著了,但無損我兩興奮心情。或許 BB 細,他對今次外遊沒記憶,但小地勤跟老公卻永不會忘記。小地勤希望趁住 BB 細,帶著他四圍去。男孩,志在四方,總有一天,BB 長大了,就不願會再跟著我兩。在這之前,我要創制造更多屬於我們這一家的美好回憶。

晚上,澳門朋友接我們一家去參加小兄弟百日宴。第一次在香港以外參加宴會。印象中跟香港吃一圍沒太大分別。從前,吃飯是相機先吃。現在吃飯,是 BB 先吃。照顧 BB 吃日本買來的單次粥仔,外帶很方便的,在西松屋,Birthday都有得買,款式極多,才100Yen一包,用熱水坐暖,就可以吃,味道非常好,小地勤每包都有先試吃。

很羨慕小兄弟媽媽,年輕貌美,不用工作,有工人跟出跟入。反觀自己,不願再打扮,每日忙工作,放工忙家務,放假忙湊仔。已經忘了多久沒有化妝買衣服。等 BB 長大,我才可以變回從前的我。


2018年11月20日 星期二

帶著 BB 返澳門。三日兩夜。港珠澳大橋初體驗 (Day 1)

16.11.2018

16號晚,等到屯門碼頭的尾班船都開出,爸爸才下班。

門面三日,實際兩日,第一次帶 BB 外遊,小地勤竟然拖了一個 26 吋大篋加一個大背包再加一架戰車。小地勤好緊張,擔心 BB 水肚不覆,所以小地勤帶左起碼 3千 ml 既水返澳門。辛苦了爸爸。

屯門坐機場巴士 (A車),機場過後就是口岸,行車時間約1小時。到步,身份證出境。小地勤為了方便帶 BB 旅行,所以早就為 BB 申請了特區護照連身份證。加埋回鄉證,BB就可以四圍外遊了,不受阻。回港證已經沒什麼作用,所以我沒有申請。

出境後,有自助售票機,每位65元,3歲以下兒童不佔坐,不收費。剛好遇上交更,等了十多分鐘才有巴士。原來前往澳門的巴士是單層,幸好我們排隊頭,不用再等下架車。眼見已經晚上11點,對面前往珠海的人龍仍然散不了。厲害。



晚上坐巴士,兩旁黑漆漆的,大橋既壯麗風光沒感受到。BB 第一次坐巴士,表現新奇興奮,眼碌碌的,完全沒有睡意。約40分鐘車程,抵達澳門入境大樓。老人家說,到埗要掉底1蚊交路費,但小地勤忘了,所以離開澳門時,才後補路費。



一出大樓,就看到入市區的巴士。爸爸是澳門人,一到步,朋友們就來接送。出口岸的路竟然只有一出一入兩條線,怪不得每日有行車上限。由屯門經港珠澳大橋到澳門,花了兩小時多,優點是價錢比坐船便宜一半,而且是24小時,算是方便。


2018年11月13日 星期二

孩子,對不起 !

14.11.2018

準備結婚前 , 有聽過一些關於小朋友在天空偷看未來媽媽既故事. 那時候, 我就在想, 究竟我會被那個小天使選中呢?

妹妹曾經問過 3 歲多的女兒, 你為何選擇我當你媽媽. 小公主答, 因為媽媽靚. 妹妹問, 有其他小朋友覺得媽媽靚嗎? 小公主很激動地答, 個到好黑, 我唔會被其他小朋友選擇你, 你一定要係我媽媽! 依番對話好似聽落好奇怪, 但一個得 3 歲多既小女孩卻充分表現了對自己媽媽既執著.

每次我話小公主似爸爸, 佢一定會喊 "我唔要似爸爸, 我要似媽媽" 笑死, 但好可愛.

當我期待以久既小天使來到依個世界, 我都好想問佢, 點解選中我? 可惜佢仲係連爸媽都未識叫既 BB.

產假完結, 跟 BB 分開, 每日趕住去奶奶家中探望佢, 再拖住疲憊既身軀返屋企. 回家就很冷清很空虛, 而且每每都有內疚及謙意. 當你開始長大, 我發現我錯過了你好多個第一次, 我只能靠老爺奶奶傳比我既相片, 短片去見證你既成長. 我經常擔心, 你唔會認得我. 雖然你每每會用笨拙既行動去證明, 你知道我是你媽媽, 一見到我, 就咩人都唔要, 正要我抱. 好重, 但好幸福 !

Facebook 見到一篇文章 " 孩子, 對不起" . 的確, 很對不起, 你很愛我, 我亦很愛你, 但我不能夠好似其他媽媽咁樣偉大到拋開所有, 放棄工作, 擁抱你.

我不夠極端 我很理性
放下工作 我養不起你
拿起工作 我陪不了你

A Level 題目, 每日出現 " 愛情 " 與 " 麵包 " , 我不會解答. 我做不到 100 分媽咪 , 請你原諒我, 但別放棄我 !

2018年11月10日 星期六

做人媽媽要內心強大


11.11.2018

產假後, 以為自己會花很長時間才能適應工作, 結果所有事都好似沒有改變過, 除左我多左個囝. 從前 OT 咪 OT, 沒什麼好記掛的. 現在寧願用埋飯鐘去做野, 只為準時收工.

BB 轉眼間就 9 個月大了, 已經忘記左佢之前未戒夜奶時, 我有幾咁辛苦既日子. 那個時候, 一晚起床十幾次, 不停餵奶換片, 攪到成身屎既日子, 好似好遙遠.

2, 3 個月大時, BB 被證實患有濕疹, 我被 3 姑 6 婆一日重覆幾十次, 怪我依樣個樣, 連老公都話係我人奶有問題, 無支持, 我亦想放過自己, 開始減少餵人奶, 結果 BB 咪一樣繼續有濕疹. 我細妹反而安慰我話, 我有人奶餵, 仲要順產, 已經比佢叻. 妹妹係食全餐, 傷口痛到 1 個月無抱過 BB. 網上太多人太極端, 我唔係唔愛我 BB, 但我亦愛自己, 我迫死自己, BB邊個照顧 ?

唔夠訓, 再正面也會有情緒問題, 有一晚, BB 喊左好奈, 點抱都唔肯, 我個隊友繼續睇電視. 我已經唔想再理個 BB, 我好狠心關房門, 自己走出廳, 我隊友先入去攪 BB, 冷靜左半個鐘, BB 都仲係喊到無停口, 我最終係成晚抱住佢訓.

第二朝, BB濕疹大爆發, 之前都只係臉仔, 今次成個心口都出水, 痴住件衫, 我即刻帶佢去睇醫生. 個刻我好後悔, 尋晚我唔應該鬧情緒, 原來佢個身好痕, 所以喊到唔收聲. 照顧濕疹 BB, 壓力會好大, 媽媽個內心真係要非常強大先唔去反 3 姑 6 婆台.

個囝我生, 唔通我想攪到佢有濕疹再辛苦自己咩 !?不過, 我還是忍下句, 我自問自己 EQ 真係好高. 依張相, 每次睇返都好心痛.

 
就算我識唔識湊個 BB 都好 , BB 還是靠自己慢慢長大. 有時長輩又會話 BB 瘦, 因為話 BB 食好少奶, 每次聽完就算, 心諗每個人食量都唔同架啦, 我咪又係細食. 醫生就話 BB 係中碼同偏高, 如果佢又肥又高, 我依個細碼媽媽點抱得起佢. 最近 BB 又長高了, 比一歲 BB 仲要高, 班長輩先無咁多說話講.

 
 
新手媽媽永遠都好無助, 不過唔緊要, 捱完頭 半年, 咩都唔會再記得. 湊 BB, 唔係考試, 做唔到一百分, 咁又點? BB 都會靠自己長大. 默然回首, BB 已經坐得好好, 識得玩玩具, 濕疹亦在控制範圍內, 算很不錯了.