姬路市 , 小地勤第 2 次過黎 , 今次主要係參觀姬路城及其城下的市立動物園 . 日本原來每個市都有一個動物園 , 無論個動物園大定細好 , 總比香港無 , 來得好 .
舊年我跟老公已經講好明年要帶 BB 來依個動物園 , 貪佢又平又就腳 . 大人每位 200 Yen , BB 免費 . 很多人話帶 BB 旅行辛苦自己 , BB 亦唔會記得 . 小地勤就覺得 BB 每次旅行回家都長大了不少 , 佢好似知道自己去旅行咁 , 每日都好適應我地個行程 , 幾早起身 , 幾夜訓覺都無問題咁 .
我比左張飛 BB , 叫佢自己行入去 , 佢好開心咁攞住把劍殺入去 . 對比北海道的旭山動物園 , 依到地方很細 , 而且動物居住環境亦好迫 .
其實出發前 , 網上評價都知不太好 , 話地方太細 , 動物都困到無咩生氣 . 雖然地方的確唔大 , 但都好多種類 , 有袋鼠 , 獅子 , 老虎 , 北極熊 , 雀鳥 ...
依到有條小河分隔兩個區域 , 其實環境唔錯 . 只係動物居住環境太迫 , 活動空間有限 , 所以動物們都無咩生氣 . 我地當晨咁早係門口等開門 , BB 全程好開心 , 好似依個地方係屬於佢咁樣 , 全程無話要坐 BB 車 , 自己攞住張地圖一路睇 , 一路行 . 其實佢差少少先夠一歲半 .
日本的小孩區域係以小孩角度去建成 , BB 終於落地時唔再正係見到大人對腳 , 佢每行一小段路 , 就見到一種動物 , 有時可能係好特別 , 佢就會叫 " 媽媽 " , 應該係想同我分享 , 很可愛 .
今次旅行後 , 佢開始學人講野 . 最近仲識講 " 獅子 " " 長頸鹿 " " 大象 " . 讀萬卷書不如行萬里路 , 是真的 . 小地勤是放牛的媽媽 , 我沒有讓他去讀 N 班 , 我放假會帶佢去旅行 . 日本很適合小孩 , 大一點 , 如果我仲有能力 , 希望可以帶佢去歐洲 .
原來仲有海獅定海狗 ?? BB 一見佢游過就會發出 " 嘩 " 一聲 . 見到佢地兩父子睇得咁開心 , 我都好開心 . 雖然我好想叫老公幫我地兩母子影下相 , 但老公好似完全對眼正係心心咁望住個仔 , 我就係呀四 , 推住 BB 車兼幫佢地影相 ... 人地話生女會多左個最強小三 , 但原來生仔都係一樣 , 小三係不分男女的 !
BB 很喜歡揸車 , 認路亦好叻 , 睇黎男孩子天生就係好有方向感 . BB 晌車係好似模似樣 , 仲識叫媽媽上車 , 但當爸爸迫上車時 , 佢會趕佢走 , 哈哈 ! 果然是媽媽最親 !
今天早上 , BB 玩得好開心 , 每張相都係笑容滿臉 , 開心到忘了午睡 !
動物園裡面仲有好多收費遊戲 , 如坐小火車 , 亦有摸摸小動物區域 . 摸小動物前要先洗手 , BB 學會回家就要開水洗手的習慣 . 小孩真係大得好快 .
