網頁

2017年2月3日 星期五

2017 過肥年

04.02.3017

好似好奈無寫過有關工作上既事情 , 我已經退居幕後 , 相信都無咩人對我現今既工作有太大興趣 .

最近公司爆紅 , 因為高調派花紅 . 市道人人都話好差 , 公司卻先於過年前發左 2 個月花紅 , 近來又話會係 2 月再發多半個月到一個月的花紅 . 合計 3 個月 . 

記得第一年加入公司 , 公司無雙糧依加野 , 就算我以前係 J 公司都一樣係無雙糧 , 大部份地勤公司都係一樣 . 當年公司發了 2000 蚊花紅給我 , 我心諗 , 做左 Airlines 咁多年 , 未見過咁少 . 但當見到全世界話一蚊都無時 , 我先知公司對我有幾好 , 當年聽聞得幾十個同事得到依 2000 蚊 .

公司越做越大 , 第二年就開始派 1 個月花紅 , 舊年我亦分到 2 個幾月花紅 . 今年好多同事係 Secret 鬧唔公平 , 話要擺工 , 覺得自己唔應該分咁少 , 又或者無得分 . 更有好多人話地勤 J 公司跟 H 公司跟 S 公司比依間公司好 .

我由 J 公司過來 , 從沒試過有一年分得多過一個月 , 我係 J 公司係得到上級歡心的 , 我無遲到過 , 4 年幾來 , 只因被別人用左個 Code 而食左一單 Passport 過期 , 就算咁都因為上級鍚我而唔 Warning 我 , 我曾經攞過幾張由航空公司發比我既 Compliment . 我亦係好多同事既師傅 , 但我認 , 我經常 Port Sick , 每個月一出更就攞足 2 日病假 , 一年放多人地 24 日有薪假期 , 因此我從沒怪 J 公司唔比足一個月花紅我 . 

人 , 真係好恐怖 . 當網上無人知道你既真正身分時 , 係 Secret 可以盡情地寫好多惡毒說話 . 同事話 Secret 好好睇 , 但當我見到我既舊戰友不停被人數落時 , 心裡面覺得就算人地真係一句說話得罪左你 , 都唔洗寫 d 咁惡毒既說話掛 . 無掃把唔想日日返工好輕鬆 , 個個都好想做好人 , 佢地當日都係由細做起 , 人地既經驗的確係有幫助過你 , 只係大家覺得係應分而唔認同 . 回想當日依間公司第一日開檔 , 個個都係新人 , 我同我既戰友們 , 為同事寫貓紙做機 , 依加依間公司同事手上攞住既野 , 都係我地當年無私既奉獻 , 所以別覺得掃把無教你野 , 入得黎做既同事都係攞住人地既經驗 , 飲水要思源呀 !

早幾年 , 同事分數由上級決定 , 近年就開始看數據 , 其實人係會有私心的 , 數據最公正 . 不是嗎 ? 小地勤暫時分到 2 . 唔知會唔會有人覺得我做文職 , 無技術可言 , 唔公平呢 ?

我自己自辯一下先 , 我係依間公司 5 年半 , 無請過一日病假 , 遲到係有 ( 12個月遲左 100 分鐘 ) , warning 無收過 , compliment 一堆堆 , 連續得到 3 年 AA 個人獎以及公司優秀服務獎 , 連續 2 年幫公司攞到 Cross-company 大獎 . 我曾經係 counter 坐櫃位 check-in , 做機口 in charge , 做過第一代編更同 duty desk , 再係 lounge 做 in charge , 做 admin . 公司早年上報紙既好幾隻派錢航班 , 我都有份出力過 , 大擺工既日子 , 我除左返 lounge , 仲出山幫手做睇機 . 

咁多年黎 , 我都無升過職 , 做左 5 年幾既小 leader . 我個人認為我戰績咁好 , 公司應該要分 6 個月比我 , 假如有一日分到 6 個月 , 相信公司會倒閉了 ! 

每個人都喜歡將自己放係第一位 , 我都好希望得到人人既歡心同尊敬 , 所以我選擇做好自己既事 , 有空閒亦會幫助同事 , 但我都要面對現實 . 因為從前提醒 , 別人會感激你 ; 現在提醒 , 別人會怪你煩 . 新世代既同事係比較自我 , 我緊記當年十大惡人鬧完我 , 再送我既一句話 " 唔聽話就等客教 " , 依句話真係一生受用 . 

我唔想比客日日鬧 , 所以張開眼睛看看別人既好處去學習 , 而唔係永遠覺得自己個套係正確 . 我相信再差既人都一定有值得別人學習既地方 . 希望同事亦唔好再為個花紅唔開心 , 如果真係咁不憤 , 何不先試下做好自己 , 既然知道公司重視唔遲到 , 唔 port sick , 唔爆鑊既同事而分足花紅比佢地 , 你亦可以加入依個行列 , 假如下年都真係分唔足 , 起碼自己盡左力 , resign 都可以大聲過人 , 係唔係 ?

在此亦祝大家雞年行大運 , 事事順景 , 心想事成 , 恭喜 ! 恭喜 !