網頁

2015年7月31日 星期五

我地永遠接屎波

01.08.2015

最近女排成員都坐我們機回家鄉 . 某天 , 小地勤就遇上了一件麻煩事 .

女排成員被安排到貴賓室休息 , 等候上機 . 當她來到時 , 她第一句是 " 我的行李牌呢 ? " . 小地勤起初以為她的行李牌不見了 , 結果原來另有故事 . 小地勤循例請她先坐下休息 , 由我去幫她瞭解一下整件事 .

原來 Check-in 的那位小地勤 , 應該係新人吧 ! 當時 , 飛機剛換機 , 所有乘客的位置被重新安排 , 那位地勤知道乘客是女排成員 , 是公司貴賓 , 所以在沒有幫乘客寄行李的情況下 , 先給登機證乘客 , 讓她先到貴賓室休息 . 這是那位地勤事後的解釋 .

她應該以為在貴賓室工作的我 , 並不知道 Check-in 的程序吧 ! 無錯 , 我已經沒 Check-in 三年 , 但並不代表我咩都唔識 ! 我曾經做過 Airside , Landside , 甚至 Duty Desk 同編更 , 那位地勤犯錯了 , 卻以為可以騙過我 .

出到登機證 , 又點會出唔到行李帶 ? 電腦記錄不會騙人的 , 明明顯示已出一條行李帶 , 但為何當時要把客人件行李 Hold 係櫃台 ? 相信係掃把與同事溝通出現問題 , 簡單一句 " 同事太新 " , 唔明掃把既指示 . 另一件事係 , 同事由始至終就忘了比返張行李收據個客人 , 再誤道左客人黎貴賓室找我要回那張小小的行李收據 .

一個錯已做成了 , 我只好幫忙補鑊 , 結果再被另一位自以為係 Senior 既同事 Hea 我 , 我一向係電話同客人面前態度都好好 , 結果個同事就比說話我聽 , 一句 " Counter 好忙 " , 我即時強硬咁答 " 你 Check 下個 Record 先好同我講好忙 , 依位係 VIP , 我唔知你 Counter 個同事點同個 VIP 講 , 依加你地再唔攞返個行李牌入黎 , 唔好怪我同 VIP Desk 講返 " .

半小時後 , 仍唔見有 Counter 同事回覆我 , 我再打返去比那位 Senior 問情況 , 結果聽到佢一句細細聲講 " PK , 唔記得左件事 " . 那位 Senior 即時轉口氣話比個 Number 佢就得架啦 , 唔洗行李牌 . 小地勤真係佛都有火 " VIP 堅持要行李牌 , 因為係你同事答應在先 " . 那位 Senior 答 " 又唔關我事 , 我點知 ! " 我就學返佢 " 坦白講 , 更加唔關我事 , 假如一開頭那位同事無發夢就唔會出錯 , 假如係女排入黎前 , 你地就同我地講一聲 , 我都仲識應付 , 假如剛剛你無答應攞行李牌入黎 , 我亦唔會再問 , 麻煩你將行李牌攞入黎 , 否則得失左個 VIP , 係唔係你負責 ? "

一個同事發夢 , 做錯事 , 另一個同事失憶 , 忘記了 , 最後由我跟呀姐講 , 呀姐出面 , 行李牌實會到手 .

當行李牌事件完結後 , 又係那位發夢地勤無啦啦同客人講會 Upgrade 佢 , 仲講到已經 Upgrade 左 , 所以乘客先可以入 VIP Lounge . 實質公司係建議 Flight Full 時 , 首先 Upgrade 女排成員 . 結果又要補多個鑊 .

小地勤唔想分你地出面 , 同我地入面 , 因為大家都係地勤 , 我亦係出面入黎 , 幫得實幫 , 結果我就接左個屎波 , 再被某些想淡化件事既人係呀姐面前講左幾句 , 攪到好似我專登攪大件事咁 !

應該要多謝掃把幫我跟呀姐講返成件事 , 不過掃把就爆左我晨早少客 , 本身我仲睇緊網上新聞 , 本來件事就係 " 搵人比返個行李牌客人 " 就完結 , 結果攪出咁多事 , 你估佢 ( 我 ) 得閒得制想玩野咩 , 佢 ( 我 ) 本身可以好 Hea , 結果為左個行李牌攪左成個鐘 . 重點係當日老闆都係貴賓室內兼同女排成員同機 .

永遠一個錯 , 就推個波出去 , 不幸的是 , 我地鐘意接屎波 , 因為我地真心幫客人 , 結果有時係好心卻屎上身 ... ... 我今次的確做多了 .

2015年7月27日 星期一

HI , MY FRIEND !

17.07.2015

今日小地勤有位熟客朋友上機 , Y 小姐跟小地勤係貴賓室認識 , 想當年小地勤剛到貴賓室就遇上公司 "最難捱的某一天" , 當日小地勤被一堆因 Delay 無了期而燥底既客圍左好奈 , Y 小姐見義勇為 , 扮惡人帶走左我 , 之後同我吹水 , 阻止果班人再圍我 , 依個世上的確有好人存在 . 自始 , 每星期五都會遇上佢 , Y 小姐係常客 , 現在更成為我 Facebook 上的朋友 . 能夠跟乘客做朋友 , 其實係一件開心既事 .

今日 Y 小姐又返北京 , 卻遇上北京 ATC , 大家係朋友 , 佢緊係唔會為難我 . Y 小姐的確對公司成日 Delay 好不滿 , 但佢好明白 " Delay 不是地勤錯 " , 仲笑話好彩今日小地勤有返工 , 如果唔係佢實悶死 . 其實我同佢都真係幾老友 , 咩都會傾下 ... 緣份真奇妙 !

正當我跟 Y 小姐吹水時 , 有位銀卡先生跟我 Say Hi . 原來係上星期上海打風 , 受航班取消而自行諗方法解決的那位銀卡先生 , 記得當日銀卡先生仲跟另外三位金卡先生諗住轉飛南京或杭州 , 再一起包車回上海 . 最後得返一位金卡先生陪佢完成飛杭州既計劃 . 可惜當日早上杭州也打風 , 飛機到杭州後 , 嘗試兩次都未能降落 , 結果原機返香港 .

估唔到今日又比我遇上佢 . 同佢傾左陣 , 佢仲話下次要帶手信比我 , 問我鐘意食咩 , balala ... 正當我地講返那晚上海取消後的慘況時 , 另一位金卡先生出現了 . 金卡先生就係因為那一晚才跟銀卡先生成為朋友的 . 見到我 , 佢第一反應係 " 不會又取消吧 ! " 我笑答 " 取消就陪你 Overnight 係到飲可樂 ! " 大家因一班機的取消而成為老友 . 其實當日佢地兩個都有難為過我 , 不過 "不打不相識" , 相信打後佢地都唔會再難為我 . 不過 , 我無當值既日子就唔知佢地會唔會為難我班同事 .

呀姐成日話同乘客打好關係係好重要 , 不過唔係個個人都會咁做 . 我個人比較假 , 對住客人會吹吹水 , 關心一下 , 特別係熟客 , 要令佢知道小地勤係認得佢 . 人就係奇怪 , 被人認就特別有面 , 就算遇上 Delay 都即時當無事 , 面子才是最重要 !

那一晚 , 送走三位熟客 , 就遇上一位自稱同事既 Y class 乘客 , 佢帶住個小妹妹 , 問可唔可以幫佢裝熱水 , 坦白講 "唔可以" . 但見到有小朋友 , 再加上佢有比職員證我睇 , 大家的確係 "不相識" 的同事 , 所以小地勤就心軟 , 幫忙了 ! 仲請位妹妹食糖 .

其實我地唔跟 Company Policy 做野係要同呀姐解畫的 , 別想騙呀姐 , 呀姐好精明 . 小地勤跟呀姐解釋完 "裝水事件" 後不久 , 呀姐就收到那位同事對貴賓室既 "讚美" . 好彩當時我決定幫佢 , 否則可能仲大件事 .

如何處理同一類事件以及如何跟旅客相處 , 真係一門好深既學問 . 想學野唔一定要上堂 , 觀察下其他同事點樣做 , 點樣處理比花錢上堂學理論仲實際 . 這是我個人既睇法 .

2015年7月22日 星期三

第一份賀禮

 
21.07.2015
 
 
小地勤十月就嫁人了 ! 同事去北海道玩 , 給我帶來的賀禮 , 當日在小樽 , 我都有看中他們 , 雖喜歡 , 但不實用 , 所以我就沒買 , 估唔到最後會由同事送我做賀禮 , 打開個刻 , 超開心 !
 
 
我係實際型 , 精品都只買來送人 , 自己捨不得買 , 最後由同事送給我 , 真係好感動 ! 我無諗過同事會買賀禮比我 .
 
 
依個音樂盒首歌係 " 波兒 " , 好鐘意 . 等屋企裝修完 , 我先會放出黎擺 ! 真係好靚 ! 小樽音樂盒貴得有道理 !
 
 

2015年7月20日 星期一

沖繩 5 日 4 夜行程篇

20.07.2015

沖繩係最近香港既日本地方 , 2 個小時機程就到 . 最近 , 小地勤又有同事要到沖繩先駕遊 , 所以叫小地勤比點意見 . 我就幫佢設計左一個 5 日 4 夜既行程 .

第一日 :
預計下午 1600 前到市區 , 天黑前先到波上宮行下 . 波上宮的交通御守聽聞很有效 , 會開車的朋友不訪買返個自用或送人 .

之後 , 我會推介大家去小祿的 AEON ( 2200 關門 ) 以及旁邊的 100 Yen & 藥妝店 . 其實名護那間 AEON 仲大間 , 不過重點行程都係要以方便就腳為主 .

沖繩的店好多 1900 就關門了 , 所以 2200 關門的 AEON 真的很不錯 . 2200 打後 , 就推介大家行國際通 24 小時開的激安之殿堂 ( 每晚無野做 , 就去慢慢行 ) .

第二日 :
先到萬座毛打個轉 , 萬座毛係沖繩必去的景點 , 依到地方唔大 , 1 個鐘 , 咩都夠 .

接住再開上去 , 見的地係美麗海水族館 . 係到到四 , 五點先走都得 .

第三日 :
早上先去首里城行下 . 比夠三個鐘你行 , 咩都行完啦 !

之後再開上去美國村 , 又係行到佢關門為此 , 約 1900 - 2000 左右就關門了 .

如果時間許可 , 去美國村中途可先到燈塔影返張相 .

第四日 :
晨咁早去玉泉洞 , 9 點出門口 , 10 點鐘都到 , 比你玩過 4 個鐘 , 兩點咩都玩完 .

臨走前仲可以去對面個 Cave Cafe 飲返杯 Coffee 先走 .

之後點都要去國際通行下 , 買下手信 .

第五日 :
晨早起身去泊港漁市參觀下 , 之後先返機場 .

其實依個行程都好重點 , 5 日快玩沖繩 . 小地勤真係好推介機場免費既依本旅遊簡介 .

如果唔係自駕遊 , 係機場報返個巴士團玩足一日都好抵 , 平過自己坐巴士去 . 團費每位 5 千至 6 千 Yen . 重點係會去水族館 , 萬座毛以及菠蘿園 , 仲要玩足 0900-1800 .

那霸市內交通好方便 , 坐單軌電車就可以了 .

我個人比較喜歡行 DFS 個邊既商場 , 個邊有好多小朋友野買 , 仲有好多女裝 , 仲有我鐘意既 Fancl .
 

2015年7月18日 星期六

每兩年一次的 DG + Safty

15.7.2015

地勤每兩年最少要上一次 DG ( Dangerous Goods ) 同 Safety , 每次上完都要即時考試 , 其實小地勤已上過好多次了 , 所以好多野都只係聽下就算 . 由於真係上過太多次 , 所以考試都好難會唔合格 , 除非真係亂做啦 !

記得以前係 J 公司 , 小地勤係德航 Team , 所以比其他同事要考多一份卷 . 印象中個份卷係堅難 , 係電腦上睇 , 有成百幾二百頁雞腸 , 仲要睇埋 Movie , 之後再即時考試 , 如果唔合格 , 好似有多一次機會 , 都仲唔合格 ... 死了 ! 要打返去同坐台講 " 麻煩要改 Duty , 因為我考試唔合格 , 要再考多一次 , 約兩小時 ... " 

我地既考試 , 80 分先叫合格 , 我地考試既內容都係工作上唔多會用 , 但又必須要知道既事情 . 如 9 種危險品分類 , 遇到炸彈電話要點樣處理 , 寄行李時要問客人既安全問題 , 有咩係最多客人會帶而唔帶得等等 ... 尿袋 , 其實同火機一樣係唔可以 Check-in , 但就可以 Hand carry 上機 , 原因係依兩件野假如發生小爆炸 , 放係 cabin ( 乘客坐位的那一層 ) , 會即時可以處理 . 如果放係 Cargo ( 放行李那一層 ) , 出事時根本唔會有人知道 , 到知道時已經好大火 , 相信都死緊 .

根據知料顯示 , 飛機好少出事 , 而好多時出事都係因為 " 人為 " . 正如我剛剛所提到既尿袋 , 分分鐘會燒左成架飛機 . 地勤成日要係閘口做證件檢查 , 除左要保障乘客可以順利入境之外 , 另一原因當然係搵下有無人攞假證件 . 恐怖份子依加四圍都有 , 真係防不勝防 .

上年年中 , 好幾次既飛機失事 , 全是人為 . 香港機場亦有飛機失事既事件 , 可能大家都唔一定記得或知道 . 某年打風 , 專飛台灣的華航客機就因 landing 失敗而失事 . 成架飛機反轉左 , 依件事有人死左 , 有人受傷 . 事後 , 有人話因為行李磅得唔足 , 手提行李亦太多同太重 . 每次地勤同大家收 overweight 既錢時 , 大家都係鬧 . 有時地勤好心 , 放了大家 1-5 kg , 每人 1-5 kg , 電腦仍然只可以入你地 20 kg ( 因唔想收你地錢 ) , 無事就最好 , 有事大家就唔好怪人 . 

飛機能否成功起飛同降落 , 平衡係好重要 ! 別再問點解前面咁多位都唔比我坐 , 因為今日前面過重 , 一堆人走上前頭 , 會令飛機失去平衡 . 你想死 , 無人想陪你死 !

學某某人講 , 拉勻一世 , 坐飛機只係佔人生好短好短既時間 , 何必要轉黎轉去 , 為左個幾 kg 同個位而唔開心 ?

每個地勤都希望大家平安出發 , 平安回來 . 相信所有既航空公司職員比乘客更希望航班準時或早到 ! 有邊個會明白我地一班前線員工唔係正係面對你一班 Delay 機 ? 我地被人鬧 Delay 就快鬧到無感覺 , 我地好明白乘客要搵人出氣 , 搵人鬧 , 但小地勤勸大家一句 " 動手 " , 閣下會死緊 , 機場四圍都係收音既 CCTV . 

亦溫馨提示大家一句 , 係機場講粗口其實係犯法 , 平日我地一班前線無報警係我地大量 , 假如有一日閣下因為 Delay 而爆粗繼而被人拉左 , 唔好話小地勤無提醒過大家 . 


2015年7月12日 星期日

當所有問題一次過遇上

13.07.2015

最近返了三晚夜班 , 每日去上班的心情都是沈重得很 . 何解 ? 原因有四 ...

1. 香港打了第一個 8 號風
2. Bali 火山可能爆發
3. 上海打風
4. 杭州打風

三日 , 小地勤都面對這幾個問題 , 最慘係 4 個航點 , 公司都有機 .

8 號風 , 當我們決定取消晚上航班時 , 個風竟無料到 , 其他公司都決定試飛 . 而我公司的乘客出名夠 " 強 ", 唔飛 , 佢地會覺得唔正常 , 可能佢地真係爛命一條 , 不怕死 . 旅行又預左 Shopping , 佢地出名大把錢 , 但卻省買保險 , 天氣問題 , 你搵航空公司攞餐卷 , 已經係 Extra 比的 , 仲想仕送埋酒店 , 唔好獅子開大口囉 !

Bali 火山隨時爆發 , 飛機係收到消息前 , 已起飛了 . 飛到過去 , 機場關閉 , 無得降落 . 你自己都有眼睇 , 你鬧都無用 , 打爛張台都係飛唔到 . 坦白講 , 每次遇上依種事 , 地勤都好想令個客打暈自己 , 無眼睇 , 即時訓醫院同收工 . 打後幾日 , 都一堆客問點解 , 點解 ... 你去問個火山同鬧個火山啦 !

上海打風 , 乘客又係發爛 , 有用嗎 ? 上海個機場一向天晴都出事 , 更何況天氣差 ? 我都好想問點解 ? 點解香港要增加大陸航線 ? 點解增加左之後 , 香港機場再不及以前風光 ? 點解返工日日都要圍住個上海轉 ? 點解人工唔加 , 客人增加唔緊要 , 但文化修養卻大不如前 ? 點解點解 ... 點解我要做地勤 ?

杭州打風 , 上海飛唔到 , 班強人話要試杭州 , 結果都係 Return Bay ( 即飛出去後 , 原機飛回來 ) ! 公司想取消又怕了班強國人 , 只可以一拖再拖 ... Delay 下去 .

面對依幾個問題同時發生 , 小地勤真係心身疲累 .

三晚既其中一日 , 有一位坐我地 Y/CL 機卻是大柴的 xx 會員乘客走黎叫我地幫手做少少野 . 我地已經好 Extra 咁幫左佢 , 佢仲要為難我地 , 重申她是一位姓何的港女 . 我地係負責貴賓室 , 而重點係何港女並唔係我地高級會員及 C/CL , 我地大條道理唔幫 , 但一時心軟還是幫她打了個電話去確定佢件行李情況 , 同事已經好好咁提佢要早少少到閘口確認一下件行李 , 結果 ...

1. 我是大柴的 xx 會員 , 我叫你做就做啦 !
( 我是花花的職員 , 我識你條鐵 ! )

2. 你地竟要我去閘口確認行李 , 你依加搬過黎比我睇咪得囉 !
( 我地係負責貴賓室 , 唔係負責地牢 , 都痴線 )

3. 你地比你地私人電話我 , 我轉頭係大柴貴賓室再打比你地攪店佢 !
( 你都識講係私人啦 , 我點解要話你知我幾號電話 )

小地勤當時既真實心聲 , 但卻沒說出口 !

香港人打工 , 受氣程度相信排全世界頭幾名 . 惡性循環 , 你點對人 , 人點對返你 , 客人越來越惡 , 依行越來越無人想加入 , 香港機場係世界排名榜 , 好快就會再跌幾級 . 原因 , 不再是設施好不好 , 而係嚴重決少人手 . 到時大家去旅行 , 可能要飛機起飛前的 4 個鐘報到 , 因為 check-in counter 得返幾個職員去 check-in 幾十班機 . 到時仲會同你講 service ? 小爆你就可能會 !

依篇嬲爆既地勤心聲 ! 我係人 , 唔係你家中個呀四 !

2015年7月1日 星期三

2015/六月/北海道自駕遊/狸小路加不停的魚子飯*第五日

13.06.2015

最後一日係北海道 , 亦係時候留係狸小路買手信 . 去完狸小路買野就係附近行下 .

之後遇上一大堆穿上際典衫既人 . 

見咁多時間就企左係到睇表演 . 真係好有氣氛同好熱鬧 .

旁邊既人都好守禮 , 前排既人都坐低 , 唔會阻住後排既人欣賞 .

其中一隊出場 , 搖曬旗咁 , 音樂仲好強勁 .

每隊妄服都唔同 .

跳得好整齊 .



突然一秒鐘 , 套衫轉左紅色 , 全場拍曬手 . 睇左成個鐘頭 , 之後又返狸小路到搵食 .

男友比門口個魚子飯吸引左 , 所以堅持食依間 .

事後係明智決定 , 依餐食左 450 蚊 HKD . ( 無化妝 , 個眼圈的確幾嚇人吧 ! )

間餐廳既裝飾似賣西餐 , 但卻是食日本野的 . 



我地叫左 6 碟野 . 佢最推介係依個 " 不停加 ~ 不停加 ~ " 既魚子飯 . 要跟加魚子既師傅 " 打氣 " 架 . 我男友被人嚇呆左 , 唔識叫人停 ... 結果攪成咁 ! 流曬出黎 .

另一推介 , 樓梯魚生 ( 2人份 ) ... 我有試好少少 .

另一推介有機蔬菜沙律 , 有個好似芝士醬咁 , 超好味 ! 個外型仲要好得 !

食極都仲有 , 好抵 !

因為怕唔飽 , 所以叫左小小熟食 . 雞塊 .

北海道好出名既薯仔 , 個醬又係超好味 .

炸味精蟹肉 , 不過要熱食先好味 !

食咁多野都唔洗 450 蚊 , 仲有表演加不停既魚子 , 超值 .

2015/六月/北海道自駕遊/富良野及旭川*第四日

12.06.2015

離開花田後 , 我地去左哈密瓜休息站 , 就係花田既不遠處 .

依到有好多哈密瓜及其產品買 . 係機場 , 我都見到好多人手提哈密瓜返香港 , 坦白講真係好甜好好味 .

係到買左杯哈密瓜雪糕沙冰飲 , 因為天氣真係好熱 .

坐係鞦韆搖下搖下咁飲沙冰 , 好似好寫意咁 ! 不過就因為咁樣曬一曬 , 我就燶左 .

臨走前 ,又食左個哈密瓜嗜喱同哈密瓜流沙包 . 我覺得個包怪怪地 .


離開富良野後 , 仲有好多時間 , 所以近近地去左旭川一轉 . 朝聖一下那條拉麵村 .有好多間拉麵店 , 好難選擇 .





係到食一碗拉麵比札幌平同份量多 .

依到仲有個拉麵之神及其神社 , 真係笑死我 . 不過睇得出日本人真係好鐘意食拉麵 .


影完張相 , 就離開旭川返札幌 .

晚上去左一間狸小路附近既居酒屋 , 一心以為有熟有唔熟 , 結果得好少熟野食 .


以下係其中一份熟野 , 我仲叫左個蟹湯飯 , 不過忘了拍照 .

男友話依個飯不及函館食到的平及新鮮 , 依一餐跟想像中一樣食唔飽又貴 .