網頁

2016年9月15日 星期四

工作的苦與樂

16.09.2016

近來又多左同事同我講 , 有睇過我既日記 , 我都會回覆 " 唔好講出去 " 或者 " 唔好睇啦 " . 如果未入職而想入職 , 我都好推介自己個日記板 , 但如果已經入職 , 睇完後大家可能會因為處於唔同部門而產生矛盾 , 假如仲要好好彩地於同一部門 , 咁我就直頭會有大麻煩 . 最煩係 , 總會有有心人要借我既日記板黎生事 , 笑話我同事把我當偶像 ...

始終我地依個地方比人既印象係世外桃源 . 未入職既人 , 睇多一點工作上既負面事情 , 先再入職 , 落差就唔會咁大 . 如果只係講到依到好好好好咁 , 呃左人地入黎 , 而人地又發現有少少唔好 , 就會將小小既唔好放到好大, 亦走得好快 .

自從新同事多了 , 流失率都多了 , 問題亦一蘿蘿 . 亦自從想同事快上手 , 而比外面同事入左黎 , 依到既紀律都差左 . 好既野 , 要花好多時間先學上手 , 唔好既野 , 2 秒鐘就學識 , 人性本如此 .

記得以前我又要行更 , 又要做 Admin 野既時候 , 人手做事實有出錯 . 每當我計少左同事 OT 或做錯左單 . 旁人都會係客客氣氣地同我講聲 , 可能諒解我身兼多職 . 反觀現在 , 每當我做錯野 , 同事用既言氣不但令我難受 , 亦比較喜歡係我上級面前明講 , 我心裡不快 , 亦只會扮沒事 . 錯左比人發現 , 人地的確唔需要顧及你感受 . 這是現在的同事抱有既態度 . 當然有事求你時 , 態度又會一百八十度轉變 . 看多了只嘆一句 " 心淡 " .

其實我都好怕同事走 , 亦會出盡方法幫手留人 . 有時同事會呻下人事問題 , 但老實一句 , 每個地方都係有人事問題的 , 只係睇下自己點面對 . 忍 , 可能會變本加厲 , 反臉 , 對件事無幫助 , 由其新人又點可以鬧返個舊人呢 ? 一句 " 找死 " ? 既然其他人不能改變 , 只可以改變自己心態 . 多做事 , 少說話 , 啱傾咪講多兩句 , 唔啱傾咪自己閃開囉 . 打份工 , 唔洗咁唔開心架 .

可能我真係上岸了 , 講野都唔同左 . 個人都正面左好多 . 休息充足就當然咩都好 !


2016年9月8日 星期四

三日兩夜在北京上學去 * AUG2016 ( 玩樂篇 )

28-30.08.2016

酒店附近有一個大型商場 - 新世界商場 . 內裡有食店及超市 . 在這裡有專賣北京傳統糕餅的稻香村 , 傳統的糕餅款式很多 , 外型小巧精緻 , 在古時應該係難得的美食 , 小地勤亦跟同事們湊熱鬧 , 買了幾件試吃 . 的確不錯吃 , 只可惜現今的我們太幸福了 , 吃慣西方的蛋糕及甜品 , 已經不會再想吃傳統糕餅 .


第一日下課,小地勤跟兩位同事打的前往最近的景點 -798 藝術區。一直以來都好想找個機會到此處逛逛,終於偷到時間。老實講,小地勤萬萬想唔到今個行程會有時間行景點的。非常非常的高興,覺得自己賺到了。




如果有機會都好想扮下文青,係咖啡廳打等一天。這個園區很大,小地勤時間只有個半小時,因為要回酒店跟同事集合再晚餐。雖然喝逛了一會而已,但已很高興。北京的交通真係好差,常常塞車,明明由酒店去這個景點不用10分鐘,結果回程卻花了半小時兼要比多一倍半既車資。

其實酒店有包早,午,晚三餐,係學院的餐廳吃。每晚公司都會請我們去其他地方吃飯。第一晚是一人一鍋,我對牛,羊肉不好,但來到北京卻再不喜羊都要吃,因為很多人說羊很補身。當然少不了羊肉串,試了一小塊已經頂唔順佢個味!

 第二晚就來到一間吃鴨可出名的大鴨梨。北京的全聚德烤鴨當然出名,卻貴到飛起。當地人會吃便宜坊或大鴨梨。

聽聞這個小吃很有名氣,好似一隻梨,用糯米做而內裡是豆沙,很好吃,不過吃一半就飽,公司每一圍都叫了起碼16道菜,甜品都有3碟,很浪費。

北京人很好辣,這是其中一碟菜,當中有小小粒的雞丁。

酒店包的三餐,不及街外地道。中午盲跑去吃牛肉麵,超大碗18蚊。

第二晚,跟同事打的去天安門後面的前門大街閒逛,買了幾隻桃,每隻約13人仔,仲貴過日本,但看來我是水魚了。又買了對花鞋比媽媽,她當然很高興。其實我對北京的景點都可熟路,今次係我第五次去北京,只可惜逗留時間太短,無論來過多少次,我旅是很想在故宮行下。



能夠在工作的時間當中偷到閒暇去逛景點,是意料之外。公司給我的包食包住3日北京上學之旅,是我在迢裡五年來唯一一次覺得返工是有著數,小地勤今次玩得很開心。迢是一個難忘的工作經驗!

2016年9月7日 星期三

三日兩夜在北京上學去 * AUG2016 ( 學習篇 )

28-30.08.2016

某天 , 呀姐話每個部門要派出一位同事參加 " 真情服務之旅 " . 小地勤多口搭訕 , 結果中獎了 . 出發前 . 心裡很忐忑不安 , 得自己一個 , 實悶死 . 再加上網上看到的住宿 , 真的把我嚇死了 ! 結果當然是我多慮了 .

出發前 , 行李當中放了零食 , 杯麵 , 小水煲以及兩本書 . 溫馨提示一下 , 中國境內對其他書很敏感 , 建議唔好帶書 , 有機會被人抽查問話 .

坐 07:40 的北京航班 , 公司對 Duty Travel 的同事都很好 , 假如商務客艙有空位 , 就會根據同事的入職次序來分發位置 . 14 位同事一起出發 , 爭 5 個商務位 , 小地勤是繼大呀姐後 , 最早入職的一位同事 , 所以我成功坐到商務位 .

作為貴賓室員工 , 我係有職業病的 , 對 Setting , 餐具及空姐們的服務都很留意 . 從觀察去學習係自我提升既另一好方法 . 坐慣經濟位的小地勤 , 難得享受到不錯的服務 , 亦明白到為何金 / 銀卡會員們 , 每天也問 " 有無得 Upgrade " . 公司的商務客艙所提供的服務不比其他公司差 , 但卻比其他公司便宜 . 大家有機會都可以試下 .


第一日到步 , 北京同事迎接我們去吃午餐 . 大陸的生活都好正常 , 大部份人最遲 1 點就已經會午餐了 .

午餐後 , 再帶我們在機場四圍游 . 難得地有去到 Terminal 1 , 眼間只有呀媽航空既航班 , 真心覺得好厲害 . 在大陸 , 會員或商務客位以上都專享另類  Check-in 服務 , 好似皇帝咁 , 尊卑分得好清楚 . 之後參選左一個 Transit Lounge , 但跟我想像的差太多 . 還是我們貴賓室做得比較好 , 只是地方不及大陸的大而已 .

再到行李區參觀 , 由於今個行程沒有行李部的同事 , 所以在這裡只留待了 10 分鐘就離開了 . 這個環節並不順利 , 亦充分睇到中國人的 Service 真的不及香港 . 在行李區逗留時間是 10 分鐘 , 但進出行李區卻被保安玩左 2 個鐘 . 事件都過去了 , 亦不想多提 , 免得在日記板上打的說話害慘北京的同事 .


而小地勤公司安排的酒店就在上堂旁邊 . 雖然要自己先比錢 , 但返到香港公司就會再比返我地 . 一個人住咁大間房 , 其實都幾浪費 . 間房好新正 , 所以自己一個人都唔驚 . 浴室亦好大 , 每日一邊沐浴 , 另一邊就開定熱水轉頭浸腳 , 好正 !


小地勤最遲先 Check-in 房間 , 反而攞到高樓層既房 . 北京地方真係好大 !

我就係係依間學院返學 . 今次難得可以感受一下係大陸返學既校園生活  , 其實好開心 . 而我亦係第一日就搵定幾個同學仔相依為命 . 亦好開心認識左唔同部們既同事 .

每天早上 7 點左右 , 離開酒店房 .

穿過花園長廊 .


來到吃早餐的地方 . 假如是學院的人 , 他們會在這個餐廳吃分發的早餐 .

而我是外來的 , 所以被安排另一餐廳吃自肋早餐 . 早餐都是很健康及飽肚的食物 , 因此沒有咖啡奶茶 , 只有豆漿牛奶 .

8 點半正式上堂 . 返學的地方就在酒店後面的大樓 .

課室有提供熱水 , 茶包及咖啡粉 . 桌上有我地既名字 , 有筆有 Notebook , Notes 及老師的一本著作 , 2 日的課程要 3 千港元 . 公司花了錢在小地勤身上 , 小地勤當然會努力學習 .

北京腔的老師一點也不老師 , 開口說話似大媽 . 這就是文化差異 . 雖然老師講課既聲調好似鬧交咁 , 但佢講既野係幾正確 . 每當佢講一些理論 , 小地勤亦會想起以前對客時亦用過 , 課程令我明白到 , 我自己的確好有經驗 , 但沒有理論的幫助 , 係好難跟同事分享出去 . 將老師的理論結合自己的經驗 , 再教授比新同事 , 應該會令新同事更加容易吸收 .

課堂上老師舉了很多事例 , 亦分享了段片 . 再一次的文化差異 . 小地勤聽完一些事例後 , 係完全唔明白點解可以發生係機場內 , 因為在香港根本不會有這樣的事發生 . 自豪地講一句 , 香港的地勤不但專業 , 亦警覺性很高 , 而且大部份都係真心對客 . 所以唔好再鬧我地唔幫手 , 假如閣下肯比錢 , 好多問題都解決到 , 但如果唔想比錢 , 我地只能夠提供建議 , 的確咩都做唔到 . 假如大陸機場 , 話個實情你知 , 係唔會有人理你的 . 你對佢地態度唔好 , 唔幫你分分鐘仲鬧返你 .

8 點半的課 , 9 點 45 分就會小休 , 12 點前一定放飯 , 下午 2 點先再上學 . 每日吃完飯 , 就回酒店午睡 . 在中國返學 , 進度不會好似香港咁快 , 比較輕鬆 . 下午 5 點就下課 . 一點也不辛苦 .

影大合照時 , 很多人都想排第一行中間 , 可以跟老師最接近 . 小地勤很好運 , 被安排在老師後面企 , 哈哈 ... 有找到我嗎 ?

3 日的北京之旅 , 很開心地完結 . 回程因 C Class Full , 所以大家原本都沒機會 Upgrade , 結果轉機型, 轉了大飛機 , 最後差唔多所有同事都被 Upgrade 了 .