網頁

2021年6月8日 星期二

小地勤開專頁了

 小地勤好少寫日記,因為湊仔太忙了。

朋友建議開facebook頁專既可分享湊仔心得,又有地方記下兒子進度,的確很不錯。

有興趣交流下湊仔心得的媽媽,可以add我

https://m.facebook.com/小地勤媽媽-109048961394131/

2020年12月8日 星期二

終於有書讀 !!

 08.12.2020

由二月起開始了無了期的半個月無薪計劃 . 小地勤樂於當全職媽媽 , 亦由六月起 , 開始準備上網搵幼稚園資料 , 原來香港幼稚園時期 , 已經開始有競爭 , 原來小朋友面試要睇佢當日心情 , 合唔合老師眼緣 , 識野夠唔夠多 , 媽媽表現都係老師考慮範圍 , 原來面試咁難 !

小地勤係一個放牛媽媽 , 之前掛住返工搵食 , 沒有太在意長輩如何管教 . 依段日子 , 小寶貝大部份日子跟我生活 , 戒了奶嘴 , 早上亦戒了尿片 , 我們真的很遲才起步 , 幸好很快就見成效 .

由於小地勤在家都係比較喜歡靜態玩意 , 所以小寶寶習慣了跟我畫畫 , 睇書 , 我仲會自己整教材去教佢基本知識 . 半年內 , 睇住佢大大進步 , 不再說 BB 話 , 100% 明白大人既說話以及用完整句子回答 .

小 B 亦很好學 , 總是纏住我學習 , 一個月學會了大細楷的 26 個字母 , 我們從看書學習簡單英文 , 看車牌學習英文 , 數字 . 我自己因為喜歡畫畫 , 所以小 B 很快愛上油顏色 , 亦因為咁 , 他學會了十種以上既顏色 , 最近玩廣告彩 , 仲學溝色 .

我不是進取的媽媽 , 我只喜歡學校近 , 所以只報了樓下五間幼稚園 . 當中有一間叫 迦南 (分校) 的確比較多人認識 . 對依間學校 , 只抱住見識下既心態 . 估唔到五間面試後 , 都全被取錄了 , 原來老師都好欣賞我們 . 其中有一位老師欣賞我既環保教學 , 又有一位老師欣賞小 B 既語言及觀察能力 .

小 B 平日都很照顧我 , 會幫手攞野 , 很少嘈吵 , 只會拉拉我手 , 示意我走 . 面試時 , 等了一小時 , 也是跟我說說話 , 拖住我 . 見老師時 , 主動拉開鄧仔比我坐 , 再自己拉開鄧仔坐 . 每個老師都讚佢很有紳士風度 , 很淡定 . 當然 , 佢的確只有兩歲半 , 老師問題太多 , 有時佢亦不合作 , 不回答 .

其實為左面試 , 小地勤每天也有跟小 B 閱讀中文圖書 , 老實講 , 中文比英文難學 , 幸好小 B 可以坐定定 , 記性也不錯 , 三個多月 , 就認到五十個中文字 . 我知道 , 他不算很厲害 , 但當媽的我 , 已經很滿意 . 我們亦會數樓梯 , 現在由 1 數到 30 了 , 看見他每天的進步 , 真的很感動 .

曾經 , 我錯過了小 B 很多成長的第一次 , 現在 , 我們從新出發 , 小地勤已經準備要陪太子讀書了 !


2020年11月1日 星期日

帶著 BB 去沖繩 / 2019 / 十二月 / 四日三夜自駕遊 (Day 3) - 日本睇兒科 / 萬座毛 / 水族館

13.12.2019

每次外遊 , 小地勤都有買保險 , 我個經紀很盡責的 , 通常都即時回覆 . 我同佢講 BB 狀況 , 經紀即刻叫我去睇醫生 , 我擔心溝通不良 , 佢建議我可以開車返機場 , 機場診所一定識講英文 , 仲叫我唔洗擔心 , 全數有得 Claim .

我地搵左國際通 Starbucks 前面既 " 小兒科 " . 我們是外國人 , 但收費平過香港 ! 跟香港睇醫生一樣要先係前台登記 , 填資料 . 再等見醫生 . 果然醫生正係講日文 , 好彩日本人都識漢字 , 再加上有個好心既日本姨姨主動幫我地 Translate .

原來 BB 係急性腸胃炎 , 醫生叫我地唔可以比佢飲奶 , 話我處理得好好 , 識得比佢飲 BB 保曠力 . 

由於我有保險 , 所以我需耍收據以及醫生證明 . 證明上面 , 要有小朋友個病以及病症名 . 日本睇完醫生係唔包藥的 , 醫生開左張藥單叫我地係前面藥局買藥 . 當然保險包埋藥費 .

藥粉味道好好 , 我仔好肯飲 , 甜甜地 , 好似果汁咁 . 不過飲左藥 , 人都好眼訓 , BB 都一直訓 .

為左安全起見 , 回到香港當日 , 我都再係機場睇多次醫生 . 


細細姨尋日已經到左沖繩 , 不過 BB 唔舒服 , 就無搵佢玩 . 今日我地早上睇完醫生 , BB 車上一直訓覺 , 我地就向萬座毛進發 . 食左藥 , 又訓左一轉覺 , BB 都精神返曬 .



雖然黎過萬座毛不下數十次 , 但每次都仲係不停影返一樣既相 . 真係好多謝花花航空讓我可以話飛就飛 , 事隔一年先黎寫返之前既日記 , 真心感慨 ! 或許依次沖繩係小地勤最後一次黎沖繩 , 航空界真係大地震 , 每日聽到有同事同行被炒 , 大大間公司都執粒 . 大家都有心理準備 , 但當真係收到通知時 , 都總有不捨 ... ...




BB 對上個次黎萬座毛得九個多月大 , 當時仲好 BB 樣 , 眼大大白雪雪 . 今次黎 , 佢已經唔再 BB 樣 , 識行識走 , 仲識講野 . 真係大得好快 !


我地同 BB 行完一圈 , 細細姨先黎到 , 佢地第一次沖繩自駕遊 , 實唔及我老公熟路 . 我地一起再行左個圈 , 又各自各的行程 .


本來計劃今年會再黎沖繩睇下 , 因為見萬座毛美化成咁 , 想黎打個卡 , 觀光下 . 有邊個會諗到個肺炎會攪咁耐都唔退 . 



第一日到沖繩 , 就已經係 OTS 買左水族館既入場卷 . 假如唔睇鯨鯊 , 其實外面全是免費 , 包括海豚表演都係免費 . 由於 BB 尋日好唔舒服 , 所以我地都一心諗住放棄張飛 . 但 BB 情況好轉 , 所以我地就照入場 .

由於太遲入場 , 剛好過左四點 , 所以仲有得退款 . 不過我地今次就無時間帶 BB 睇海豚表演 , 老實講 , 沖繩既海豚表演比海洋公園的 , 精彩很多 , 好建議帶小朋友去沖繩個水族館玩一下 .

最近係台灣買左一些認知書比 BB 睇 , 當中一本書係教海洋生物 , BB 一黎到 , 見到海星 , 好開心 ! 小地勤成日覺得帶 BB 去旅行一定可以學到好多野 . 實物一定比書本吸引 .






相信生仔既媽媽會發現一件事, 就係小三不分男女 , 你睇我老公 , 眼中只有 BB , 成個痴漢咁 .


今次旅行 , 影左好多相 , 不過我同 BB 的合照好似就少得可憐 . 老公成日正係叫我幫佢同呀仔影相 , 究竟佢仲記唔記得邊個先係佢情人 ... ...



食左兩次藥 , 又無飲奶 , 只食粥同包 , 再加埋咁多野睇 , BB 即刻好醒神 . 自己四圍走 . 見到佢精神返 , 都安落曬 !


我期待左好多年既一張相 , 一直都好想帶 BB 黎睇鯨鯊 . 當媽之後 , 更想帶 BB 重遊所有我去過既地方 . 我好希望 , 每個景點 , 都有我們一家三口的合照 . 



十二月 , 四圍都已經有聖誕裝飾 , 去過咁多次水族館 , 卻第一次玩到咁夜先走 , 原來著曬燈既水族館係咁靓 !




回程 , 路經商場 , 又比 BB 去活動一下 , 坐車太耐怕佢會悶 . 其實小地勤 BB 一向都好乖 , 又跟慣我地旅行 , 平時再長途既車程都會自己坐定定睇風景 , 不過晚上無風景睇 , 佢就一定要拖住我隻手 , 可能晚上開車 , 車內外都太黑 , 佢都會有點害怕 . 


晚飯跟細細姨吃暖暮拉麵 , 唔知邊個話好好食 , 所以今次終於去試下 . 不過我就覺得都係紅燈區個邊既拉麵店比較好吃 .



2020年10月9日 星期五

帶著 BB 去沖繩 / 2019 / 十二月 / 四日三夜自駕遊 (Day 2)

12.12.2019

近年去沖繩 , 都住同一系列的 Apartment . 喜歡在市場買和牛 , 再回 Apartment 煎 , 而且房間比較大 , 仲有露台曬衫以及浴室有乾衣功能 . 

半夜 , BB 嘔奶 , 以為佢係海邊吹到風 , 點知原來病左 , 我地兩公婆都唔知 . 早上見佢又自己攞包包食 , 又飲水 , 就掉以輕心 . 結果一出車 , 係車上飲左支早餐奶 , 佢又嘔 .


每次出遊 , 我都有帶平安藥 , 包括退燒 , 傷風及咳 . 見佢再嘔 , 返酒店餵左轉傷風藥比佢 , 覺得佢海邊食左風及比飛機嚇親 , 所以一飲奶就嘔 . 因此我地只餵麵包 , 即食粥以及和光堂的 BB 保曠力 , 最怕佢脫水 .

藥力下 , 佢需要休息 , 所以我地只推 BB 車出去國際通行下 . 國際通依個位 , 又轉商場了 .


國際通都係賣手信既地方 , 我地今次又再四圍行 , 去到新既牧志市場 . 裡面格局跟以前差唔多 , 都係二樓食肆 .



BB 睡覺了 , 所以我們就係到午飯 . 有聽過沖繩豬手很好吃 , 的確 , 超好味 ! 



老闆仲話可以係樓下買野上黎食 . 牧志的海鮮突然比泊港漁市場平 , 而且仲有好平又靚既和牛買 . 小地勤係唔食生 , 老公自己一個食曬 , 應該好滿足 .



每次係日本 , 都會飲咖啡奶 , 其實好甜 , 但每次見到 , 都係會買 ...


見 BB 訓醒又好似無咩事咁 , 但都唔想同佢出去太遠 . 尋晚到依加 , 嘔左兩次 , 好彩有 Apartment 有乾衣 , 但老公都乖機話要買衫比佢 , 所以帶左佢去 Aeon 行下 . Aeon 通常點都有少少 BB 遊戲區 . 見到佢悶悶不樂 , 其實我好擔心 . 小地勤同老公講 , 如果佢再嘔多次 , 我帶佢坐聽日早機返香港 .


無飲奶下 , 再加上食左點藥 , BB 有返精神 . 晚上我們又到 PARCO CITY 晚餐 . 晚餐完就回酒店處理一大堆衣物 . 早上 BB 嘔時 , 嚇親自己 , 好驚 , 抱實我 , 好自然小地勤成身都係嘔吐物 , 我見到都想嘔 , 但又唔可以推開佢 , 咁會令個仔仲驚 . 做人媽媽 , 再嘔心既野都要攪 ... ...