網頁

2017年9月8日 星期五

大肚媽媽的職場辛酸

08.09.2017

公司又步入一個新時代 , 由以前只有 737 機隊 , 發展到 A350 既加入 , 實屬不易 . 不過最近同事既士氣好似唔太好 , 原因係地勤被分出來自立門户後 , 所有花花既福利都沒有 . 近來報導的半個月花紅 , 地勤是沒有的 , 所以地勤同事都無再盼望公司年尾會有花紅分給地勤 . 

小地勤當然都希望有花紅分 , 可以多筆奶粉錢 , 無奈怨不得人 . 當年我的確係簽花花既合約 , 公司發展 , 地勤獨立 , 我被轉會 , 自此福利一減再減 . 的確 , 我已經被賣出去了 , 再一次由航空公司職員成為一名代公司既員工.

唔緊要 , 份工係自己選擇的 , 無人迫我簽轉會 , 當然唔簽就只有轉工 . 我很喜歡這個行業 , 無論客人變得幾惡 , 只要你用對方法 , 身邊出現的 , 大部份都是很好的客人 . 小地勤咁多年既貴賓室工作的確認識了很多客人朋友 , 佢地對小地勤都好關心 , 從沒用高高在上的態度對我 , 這是我自己在工作上的成功 .

貴賓室係開學日亦進入另一個新時代 , 我由第一個 Lounge 工作 , 到舊 Lounge 關門大吉 , 睇住新既 Lounge 成長 , 睇住一班戰友離開 , 到現在同一時間有兩個 Lounge 在運作 , 我的戰友走剩 2 個 , 睇住佢地為左個 Lounge 而日日開 OT , 而我就繼續準時返工 , 準時收工 , 有時都心感內疚 .

坦白講 , 我地經理係一個完美主義者 , 佢第一次帶住 2 個 Lounge , 壓力的確爆煲 . 而我依加又粗身大細 , 我條腰由 23 變成 33 了 , 每日我既工作能力隨住個肚越大 , 就越應付唔到上面交比我既 ad-hoc duty . 大家都知道月頭月尾我係忙到癲左 , 再加上 Lounge 流失率太大 , 每次有人離開 , 我就要交出 Record . 接住有新人入職 , 我要花幾日時間帶完一班又一班既 Training . 我的確應付唔到咁多工作 , 導致我經理開始對我越來越不滿 .

其實我已經盡力去做 , 每日都準時返工清手上工作 , 產檢 , 打風我都唔會 Sick Leave , 只會改一下自己既例假 . 我比任何人清楚公司玩法 , 我重視依份工 , 所以我唔想整花自己個底 , 對上一次我作小產 , Long Sick 左十幾日 , 結果我被公司扣左好多分 , 由以前攞開 9 點幾分到依加得返剛好 8 分 , 仲要係因為我上級幫我爭取 , 我先唔洗攞原先的 7 點幾分 . 我無嬲公司 , 我預左依個係 Sick Leave 既後果 . 不過 , 相信好多大肚媽媽都係替我不值 , 作小產 , 人命呀 ! 公司都扣分 . 這是大公司的玩法 , 亦係大肚媽媽既辛酸 .

我既體力的確大不如前 , 同事都好鍚我 , 好多同事自願 OT 幫我手做一些簡單既對數工作 . 我係心存感激的 , 所以每次月結 , 雖然因小小既錯誤而導致我硬食上頭既責怪 , 我都唔會怪幫手既同事 , 因為原先這是我自己既工作 , 我抽唔出時間去做 , 人地唔熟手 , 就預左會出錯 . 錯左 , 我再改以及跟街外客人說聲唔好意思就好了 . 這也是導致經理唔再信任同質疑我能力既原因 .

最近總覺得經理既不滿好似擴大了 . 我亦由以前可以被鬧完當無事 , 到現在會情緒失控 , 輕易就爆喊 . 尋日仲因為同事出錯 , 我當然首當其衝 , 被怪罪完 , 喊到收唔到聲 , 嚇親班休息緊既同事 , 個個都叫我冷靜 , 怕我動左胎氣會出事 . 佢地仲即刻主動抽一個同事幫我手去攪返好所有 Record , 頂我去休息 , 的確好感動 .

我班同事的確係好好 , 而我既好友兼上級 , 亦即刻由另一邊 Lounge 跑過黎安慰我 , 聽我呻 , 這是我繼續返工唔 Sick Leave 既動力 . 曾經我都好有自信可以做好份工 , 我唔係要 100 分 , 我係要做到 101 分 . 負責 ISO 既同事都經常讚我既 Record 好整齊 , 所以幾次既 ISO 都無 Finding . 我雖然無學過 Admin 既工作 , 不過我知道要 Record 整齊 , 每年要 Back Up 所有 Record 一次 , 萬一他朝電腦有問題 , 大家唔會慌失失 . 當然萬一他朝我唔做 , 接手既同事一樣唔會荒失失 .

但最近我真心覺得自己有心無力 , 大肚的確係我自己既事 , 做唔足上級既 ad-hoc duty 亦係我既錯 . 我亦自知自己依加能力不足 , 所以我都去意而決 . 跟住一個不滿意自己既上頭 , 唔好話行運 , 應該連想呃啖飯食一下都難 . 扣埋大假勞工假 , 我下年一月頭就放產假了 , 之後都要等到五月頭先會再返黎 . 到時 , 可能係我解脫既時候 . 依份工曾經令我眼界大開 , 但現在亦令我好痛苦 . 

每一個媽媽都真係好偉大 , 中秋節就快到了 , 大家返工就算幾忙 , 都記住抽空返屋企跟媽媽食個節日飯 . 







2017年8月22日 星期二

小地勤要當媽媽了 !

23.08.2017

去完北海道返香港不久 , 小地勤既身體就開始有變化了 , 無時無刻也很想睡覺 , 起初都不以為以 . 以為玩完即刻返工 , 跟沒休息沒分別 , 所以才有渴睡的感覺 . 到了六月頭 , 我就已經開始懷疑 , 結果去了診所一轉 , 就被告知 " 有喜 " 了 ! 醫生仲讚我叻 , 咁早發現 , 當時才 4 week . 

當日我老公好似接受唔到咁 , 失去聯絡左幾小時 , 不過當佢回家時 , 卻帶住 3 個奶樽 , 真係笑死小地勤 . 洗唔洗咁早去買奶樽呀 ! 老爺奶奶亦好開心 , 因為我叔仔夫婦年頭公佈完喜訊 , 接住又到我地 .

做左三十幾年人 , 以為 " 有左 " 就只要安心等到生 , 就可以了 . 結果係 5 week 開始流啡 , 到 6 week 睇第一次婦科 , 已經話我作小產 , 當晚 , 小地勤已經見紅 , 入左急症 , 訓左 2 晚 , 醫生照到 BB 有心跳 , 就放返我出黎 , 回家訓床 .

出院 2 日 , 小地勤流血了 , 又返左急症 , 把自己跟家人都嚇死了 . 個刻得自己一個 , 好驚 , 護士仲話我血壓高 , 排左無 1 個鐘急症 , 我就已經上左房 . 好彩係仲有心跳 , 但就照到我子宮有血塊 , 比個 BB 仲大 , 係正 BB 旁邊 . 

返到房 , 旁邊的都是等待人工流產的孕婦 , 心裡壓力很大 , 很擔心 . 第 2 日 , 醫生話無野可以做到 , 叫我回家繼續訓床 . 我奶奶每天都上門煮三餐比我食 , 大家都好擔心 , 我亦過意唔去 . 每天我都睡起碼 15 小時 , 沒有作嘔 , 卻胃口不錯 . 停工接近 3 星期 , 7 月才再上班 .

返工工作很忙 , 再忙我都跟自己講 , BB 才是最重要 , 我照休息 , 唔 OT , 工作清唔曬亦都唔理 , 無野重要得過我呀 B ! 我同自己講 , 如果老闆有微言 , 我就請病假唔返工 , 等生完就轉工 , 下定決心後 , 再有責任心的我變成按章工作 , 別人點諗 , 我係唔會理的 .

流啡情況沒改善 , 所以我就去左睇中醫 , 食安胎藥 , 之後情況係改善左少少 . 每天我都吃得又訓得 , 睇住個肚開始大 , 個心都定左 .

7 月中產檢 , 呀 B 已經由一粒豆成左型了 , 生左條臍帶 . 醫生話要生埋胎盤先夠穩陣 . 7 月尾去醫院做唐氏 , 護士話呀 B 好百厭 , 唔合作 , 見佢不停郁手郁腳 , 好得意 .

最近 8 月中 , 再做產檢 , 已經知道係男仔 , 醫生仲話我唔洗增食 , 平常咁就可以了 , 仲話我體重增加得好好 . 唯一係胎盤比較低 , 暫時都係少郁動多休息 .

係醫院期間 , 每日都有孕婦要跟自己 BB 講拜拜 , 亦見到好多高齡孕婦訓床 , 聽過佢地所講既人工受孕既痛苦經歷 . 原來要成功懷孕以及順利生產 , 唔係一件易事 . 能夠當媽的感覺是很好的 , 希望我個小伴子可以平平安安來到依個世界 .


北海道*札幌*2017*五月 - 場外市場/新千歲機場 ( Day 6)

07-12.05.2017

今日就要返香港了 . 早餐係尋晚食剩個隻大蟹 , 啖啖肉呀 ! 食飽就去場外市場個朝市 , 買多一隻大蟹返香港 , 除左蟹 , 仲有帶子同海螺都係超美味 !!!

買完海產後 , 就要開車返機場 , 中途經過大型超市 , 又忍唔住入左去行一圈 , 日本既麵包及糕點真係令人流曬口水 , 所以又買左幾件入機場食 .


預左時間同老爺奶奶係機場慢慢行下 , 老公就自己去搵野玩 , 夾公仔機達人今轉又夾左幾款麵包超人既產品比我姨生女做手信 , 之後再轉戰零食機 , 同事既手信都慳返 , 哈哈 ...

轉眼間就玩左六日 , 終於要返香港捱世界 ... ... 老爺奶奶今次都好滿意個行程 , 佢地話下年要再去多次 , 北海道的確會令人玩上癮 . 下年 ... 好遙遠 , 小地勤都要停飛了 , 2019 年先再起行 !


2017年7月18日 星期二

北海道*札幌/定山溪*2017*五月 - 場外市場/二條市場/定山溪 ( Day 5)

07-12.05.2017

平日我地去開二條市場 , 不過今次就決定去場外市場參觀下 , 睇下有咩收穫 . 結果非常失望 ! 這場地方比較大 , 很多旅遊巴 , 遊客亦多得很 . 逛了一圈 , 價錢絕對比二條還要貴 , 而且當地的店家好像不太喜歡亞洲臉孔 , 所以我們逛了約半小時就離開了 . 場外市場 , 相信沒有下一次 !




距離場外市場不遠的地方 , 有一個海鮮市場 , 大部份是賣生的 , 只有很少的熟食 . 係到就真係有好多意外的收穫 . 我地買左超大粒的新鮮帶子 , 香港起碼要 250 蚊 , 3.5 KG 的長腳蟹以及新鮮的海螺 , 總供花了 1100 港元 ! 

小地勤很專業的 , 我們每次來北海道都預左買海鮮 , 所以會寄一個發泡膠箱同乾冰過去 , 仲會帶自家的 Mini cooker . 咁樣就可以晚晚超市買和牛食 , 又可以將生既海鮮煮熟黎食 .


由於場外市場即開即食既蠔同蝦都太貴 , 所以我地都係返去二條幫襯下 . 依間店門外很多人泊一會車 , 食完即走 , 特別多遊客幫襯 . 小地勤係負責拍照的 , 有份睇 , 唔敢食 . 每件約 150-250 Yen . 老公話好抵好新鮮 , 香港起碼貴一倍 !


參觀完兩大市場後 , 我們就帶住一打雞蛋去定山溪整溫泉蛋 . 今次中午一點鐘就來到定山溪 , 竟然趕得上這間日式小店 .


好有個性的 , 日賣 50 碗 , 賣完就關門 , 每次我地都望門而嘆 !




今次因為早到的關係 , 竟然食到最後 4 碗 , 我地一 order 完 , 門外就掛上賣完既木牌 !! 喬麥麵很好吃 , 湯底清甜 , 天婦羅亦炸得好香脆 , 現炸係特別好食 , 上台時仲發出吱吱的油炸聲 !! 重點係好平 1000 Yen 一個套餐 , 抵試一下 !



食完就開始參觀定山溪了 . 小地勤來過很多次 , 每次都整溫泉蛋 , 可惜今次公園關門維修中 ... 整排雞蛋唯有帶回酒店 T.T


五月的北海道 , 四圍都係櫻花 . 可惜今日天氣唔太好 , 一直天陰陰 .


每次都話要去行下條吊橋 , 但每次都會錯過了 . 吊橋就係對面 , 今次非去不可 !




條吊橋係二見公園裡面 , 係到仲會見到河童大王 . 其實唔明點解日本人會覺得河童好得意 , 我就覺得佢地生得好惡 , 有點可怕 .



去埋條吊橋 , 都算係行曬大部份出名既景點了 . 下次再去日本 , 都要等到下年年中了 . 不過唔知到時我被人炒左未 ?






北海道的行程很輕鬆 , 傍晚就回札幌 . 因為買左蟹 , 所以都唔打算街外食 . 其實頭一兩次去北海道 , 想食的都試過了 . 有時晚上諗唔到食咩 , 就可以去超市買 . 今次住既酒店係有微波爐的 , 所以當大家買緊魚生 , 壽司時 , 我就買左盒和牛便當 . 晚餐其實很豐富 !


隻蟹真的很有份量 , 個身大過我個頭 , 蟹腳既肉又厚又鮮味 , 真係啖啖肉 . 之後我地再買左隻 4.5 KG 返香港食 , 6 個人都食到飽 !



Mini Cooker 真係好有用 , 唔帶去實後悔 , 其實我好少用酒店的水煲 , 唔洗講大家都會明白點解吧 ! 唔知係唔係我既錯覺 , 日本雞蛋好似比較香 , 小地勤都幾鐘意日本 .


2017年6月30日 星期五

北海道*帶廣/釧路/札幌*2017*五月 - 和商市場/拉麵橫町 ( Day 4)

07-12.05.2017

晨早開車去釧路參觀 , 沿路經過一間手信店 , 就停低休息下 . 整段路好荒蕪 , 便利店都唔多間 , 如果遇上中途站都唔休息的話 , 又唔知要開幾奈車先可以停下 .

戀問館 , 人都唔多個既地方 . 裡面都係賣手信 , 無咩特別 .



旁邊有間小食店 , 新鮮海螺串 , 超級鮮甜 , 有咬口 . 後來在札幌又遇到海螺 , 都忍唔住買左 2 盒返香港 , 真係超鮮甜肉厚兼好食 .

臨走前 , 再影多張紀念照 , 相信依個地方將來唔會再黎 , 實在太遠太荒蕪 !

開左好奈車咁 , 終於黎到釧路 .

網上資料好少 , 有見過介紹和商市場 , 所以就過來開飯 . 樓下有泊車的地方 , 印象中是免費的 .

每人可以去買大中細既飯 , 再每間店買自己想食既魚生 . 日本既市場 , 真係井井有條 , 好乾淨無腥味 . 係到買左好多買基燒元貝 , 後來發現札幌二條都有得買 , 而且價錢差唔多 . 安慰自己說依到買到的元貝是比較大粒的 , 而且好新鮮味美 , 唔係平日香港買到咁硬 , 多汁又軟身 .


我老爺每餐都要食蟹 , 佢話自從來過北海道 , 先知咩叫又平又大又多肉 . 今個月要食蟹食到厭 , 咁返香港就唔會再想買貴蟹食 .

因為我唔食生 , 所以老公燒左幾隻生蠔比我 , 老爺亦專登買蒸蟹同炸魚 , 其實佢地成家人得我一個唔食生 . 難得佢地咁就我 .


食完個飯 , 已經要開車返札幌 , 要三個多小時 . 今次札幌 , 我地係住返中島公園個邊 , 果間酒店 , 我地住過 3, 4 次 . 間酒店平靚正 , 不過唔太方便 , 所以就唔介紹比大家啦 . 

上年老爺食完拉宧橫町的並中一間燒肉拉麵後 , 一直好回味咁 . 其實 4 月我都有去果間拉麵試下 , 不過就覺得一般 . 估唔到今次再去 , 卻好食到令人估唔到 ! 可能個師傅唔同左既關係 , 上次個師傅太年輕了 .


拉麵既朋友係餃子 , 每次都會點餃子 . 我老公好食得 , 有時會加大 , 有時會加多碗飯 . 拉麵店唔怕食唔飽 .



2017年6月12日 星期一

北海道*美瑛/富良野/帶廣*2017*五月 - 幸福車站/帶廣神社/帶廣市 ( Day 3)

07-12.05.2017

黎過北海道都有 7-8 次 , 最近幾次都已經唔再落函館 , 多數留係札幌市買下食下 . 今次學人去一帶一路 ( 帶廣及釧路 ) , 旅遊書既資料很少 , 網上亦無咩人介紹 , 不過唔打緊 , 未去過就去見識一下吧 !

Tripadvisor 介紹左幸福車站及帶廣神社 . 我地先來到幸福車站參觀.

五月頭 , 風很大 , 亦很涼 , 溫差又大 , 大家還是穿厚一點衣服吧 ! 難得見到一小片小花 , 影呀影呀 ~


這是一個沒遊客的景點 , 附近亦沒商店 , 沒有台灣的火車小鎮咁熱鬧 . 其實我都好多年沒到台灣旅遊了 , 可能都係時候去掃下夜市 , 行下書店 .



有火車做背景 , 當然係時候拍返幾張紀念照 . 最近我又肥左唔少 , 不過同事都話我越來越有福相 , 其實肥都唔係壞事 .


架火車內部可以隋便參觀 , 不過裡面好焗好熱, 仲幾大塵 .

幸福鐘 , 總係想去敲一下 . 無人會厭幸福多吧 ~


影完相就四圍行下 , 真係好荒蕪咁 , 人都唔多個 ...



我地都有寫底願望 , 貼好後 , 就回帶廣市 . 附近仲有一個叫愛國車站 , 不過估計差唔多 , 所以我地就無去 . 如果大家有興趣 , 可以去埋參觀 .


回到帶廣市 , 先到帶廣神社拜拜及買御守 .

帶廣神社都係無遊客 , 今次選擇既地區比較少遊客 , 點影相都得 .

帶廣神社其實唔大 , 行完一圈影相都只係花左半小時 .


我地買左塊許願牌回家做紀念品 .


帶廣市 JR 站 , 到此一遊 .

附近有台屋 , 不過就可能好早關門 !?


人地話帶廣名物係豚丼 , 既然講到咁出名 , 相信都好難會有一間係難食 , 所以我地隨便去左一間 , 真係超好味 . 食完依碗飯 , 我地決定下次一定要再黎帶廣行下 .


酒店附近算係幾旺 .

我地食完豬肉飯就返酒店浸溫泉 , 浸完又行返出去食宵夜 . 其實好抵食 , 大堆頭壽司飯先 1200 Yen , 海鮮 Set 先 1000 Yen .


食完仲送 2 條香蕉 , 香蕉平日賣 100 Yen 一條架 , 感覺賺左 . 返酒店再浸多轉溫泉先訓覺 , 今次行程好輕鬆 .