小地勤囝囝係幾個月大時 , 確診患有濕疹 . 當時唔算嚴重 , 只係兩邊臉頰 , 醫生建議轉低敏奶粉或全人奶 . 其實大部份醫生 , 都唔會開奶粉名 , 靠媽媽們自己決定 . 當時 , 朋友建議小地勤可以試下 "雀巢®超級能恩®1號配方奶粉" . 一用就用到依加 .
奶粉我只係萬寧買 , 原因機場有好多間萬寧 , 反而初生嬰兒奶粉根本唔會打折 . 慳錢的小地勤 , 每回趁信用卡有回贈時 , 就會用 9 折或 95 折入定一堆現金卷 , 再用現金卷買奶粉 , 慳得一蚊得一蚊 .
當然 , 人奶是最好的 , 這個牌子只是給不夠奶水的媽媽作一個參考 . 母嬰健康院姑娘話 , 初生嬰兒奶粉可以一直食到一歲先去轉靠大號數 . 小地勤就係等 BB 打完 1 歲針後 , 確保 BB 無不良反應才轉了 2 號 . 其實雀巢熱線的姐姐就建議我可以直接轉 3 號 , 不過小地勤都係覺得一步一步慢慢轉 , 打算等 BB 打埋歲半針後 , 才再轉 3 號也不遲 .
BB 越食得多奶 , 濕疹情況越嚴重 . 已經發展到全身都係 , 明明 1 秒前仲好光滑 , 1 秒後就可以大轉變 . 差到出曬黃色既水 , 水乾了 , 痴住左件衫 . 小小的一個人仔 , 只能夠喊 . 那時候 , 醫生告訴我 , BB 是中上嚴重 , 打後只會更加嚴重 . 心裡面很難受 .
這是其中一張相片 ... 突然發到又腫又紫 , 表皮裂開 . 作為媽媽幾咁心痛 .
小地勤不停去搜集濕疹資料 , 試過好多浸浴偏方 , 帶 BB 睇過好多次醫生 , 試過醫生的藥膏 , 街外聲稱防濕疹的 Lotion , 花左唔洗錢 , 但都未有太大改善 .
醫生話有便便 , 好似排毒咁 , 確保 BB 有便便係其中一個方便 . 現今係講半歲前不能飲水 , 那時候我不理會了 , 5 安奶就 5安半水 , 假如未見便便就 5 安奶 6 安水 . 務求令佢水份充足 , 易有便便以及細胞充滿水份 , 相信皮膚就會好 .
益生菌一向對排便都有效 , 所以我買了古保濕敏淨益生菌 , 一盒得 30 包 , 約 300 蚊一盒 , 我決定比 BB 食足 2 年 . 只要便便去得好 , 身上就唔會積住咁多毒 . 這個牌子是屈臣士獨家的 , 每回打折 , 小地勤都會掃 8 盒 .
由 6 個月起 , 小地勤仲買埋開奶茶比 BB 飲 . BB 要清下熱氣 , 起初我試半包 , 另一半就隔日再比 BB 飲 . 由 1 個月飲 2 包 . 到現在一歲了 , 每隔 10 日就飲一包 . 打針前的兩日 , 亦會比佢飲一包 , 可能清左內熱 , 之後 2 次打針都無再發燒 . 這是奶奶教我的 .
為左方便奶奶 , 所以小地勤買沖劑 , 不過奶奶喜歡自己煲粟米心水 , 意米水 , 冬瓜皮水比 BB . 目的都係清下熱 .
加固後 , 小地勤最愛蒸蕃薯比 BB 食 , 食完蕃薯 , 好快就有便便 . 坦白說 , 小地勤在日本買過很多次蕃薯回來比 BB 吃 , 但味道不及我在香港街市買到的咁好 . 唔一定日本野係最好的 , 不過就好多時係最貴 .
除左內服後 , 皮膚保濕真的好重要 . 小地勤試過好多款 Lotion , 效果都唔太好 . 最後 , 我買了 QV lotion , 貪佢平 , 又大支 . 一大支 , 一公升 , 做特價時 , 不用 200 蚊 , 所以我就唔再試其他品牌 . 慢慢地 , BB 皮膚開始受到控制 .
我覺得沖完涼 , 要即刻塗全身 , 隔一陣再補一下 , 總之得閒就幫佢補一次 . 雖然做左咁多野 , 都一樣會突然紅一大片 , 我會先用煲過既水 , 濕棉花 , 再塗 Lotion , 只要我勤力一點 , 幾個鐘後又會靚仔返 . 唔好用生水 , 要用煲過既水 , 或者買生理鹽水 .
偏方試過金銀花 , 龍眼葉 , 人奶浴 ... 好多好多 , 其實無話好唔好 . 濕疹每個人既成因都唔同 , 所以每個人都有唔同方法去應對 . 暫時我個人覺得片糖最見效 . 冬天太乾燥時 , 我就會落 1 片 . 片糖好平 , 好易買到 , 亦好滋潤 .
另外要留意下屋企既清潔 , 保持空氣流通 , 小地勤屋企雖然多窗 , 但低層單位 , 無對流 , 所以 BB 每次返屋企都會突然發少少出黎 , 反而住係奶奶既高層單位時 , 空氣流通 , 好少有紅 . 知道左後 , 小地勤唯有 BB 一回家就開空氣清新機或風扇 , 等空氣流動下 .
如果都唔見好轉 , 就會帶佢落去樓下公園 , 吹風散步 , 小朋友都愛去街街 , 一出街 , 心情好 , 情緒好 , 皮膚問題自然好 . 假日 , 我地一家人會去海邊吹下風 , 散下步 , 盡量唔去商場 .
濕疹 , 醫生話未必可以完全根治 , 但只要控制到 , 唔好成日爆發 , 已經好成功 . 既然避唔到 , 只有勇敢面對 .
轉眼間 BB 已經 14 個月大了 , 會行會走 , 亦好靚仔 , 哈哈 ... 戀子的媽媽 !
沒有留言:
張貼留言