網頁

2016年6月29日 星期三

一星期自駕遊 * 日本北海道登別之旅* 2016年5月 ( Day 3 )





18-24.05.2016

行程 : 二条市場 - 北海道神宮 - 登別 - 有珠山休息站 - 函館

登別係一個好值得到此一遊既地方 , 係到有好多影相位 , 風景真係好靚 , 最重要係費用全免 , 泊車除外 , 500 Yen , 包兩個地方既泊車位 - 地獄谷及大湯沼 .


小地勤 4 月先黎完一次 , 5 月再黎時 , 景色已不同 . 5 月天多左好多色彩 .



時間趕既朋友 , 一般只行地獄谷及商店街 . 小地勤今次預留左好多時間係登別 , 要帶老爺奶奶一次去曬所有必遊景點 .

首先商店街醫肚 , 原因 3 點就全部拉麵店會落場 , 無 6 點都唔會開返 . 衝去上次錯過左既果間拉麵店時 , 遇上 13:00 的閻皇變臉 , 黎左幾次都係第一次遇上 .
時間 10:00 / 13:00 / 15:00 / 17:00 / 20:00 / 21:00 ( 當日的時間表 )


極樂大道商店街主要賣紅藍鬼以及溫泉產品 , 雖然貴一點點 , 但好多都東西只限依到先買到 . 

商店街的特色小店及擺設 .


係到要影既仲有一個祈求合格既鬼以及淋湯鬼藏 , 唔識日文既小地勤一直以為依個係祈求健康既手湯 . 後來先知道係要遊客幫隻鬼淋溫泉水 , 佢就會幫你燒災解病 .


妹妹推介的十級辣拉麵 , 老公話一定要試下 , 基於安全理由 , 我只准佢試 2 級辣 , 結果佢話唔夠辣 ... 拉麵 , 老實一句 " 很普通 " , 只係被 " 十級辣 " 吸引左一下.


食完拉麵回頭向地獄谷進發 . 順便在泉源公園影下相 . 今日無左行雷聲 , 好似水未滾咁 , 所以都無打算影相 .



日本人真係好好 , 見到我地一家四口 , 就主動幫我地影合照 .

沿路一直行入去 , 行到盡頭睇間歇泉 , 佢地兩老睇住水不停滾出黎 , 開心到拍 Movie 留念 .




返停車場再去另一邊大湯沼 , 之前我地行過 2 次唔同路線 , 今次終於可以輕鬆咁到達見的地 .

另一邊係奧之湯 .

沿住大湯沼行去天然足湯 . 唔見樣時都影得我幾靚 T.T



天然足湯係山下 , 風景好靚 , 唔講你都唔會知道依條河係溫泉 .

去完依到所有地方 , 連拉麵都食埋 , 今次都無咩遺憾啦 ! 下次的北海道 , 應該會去開發新地方了 ! 繼續開車向函館進發 , 專登繞登別另一邊行 , 發現一個湖 , 不過人影都無一個 .



平日去開有珠山中途站休息 , 今次都不例外 . 風景都係唔錯 . 四圍都係野花同櫻花 .





2016年6月28日 星期二

當考官的感想

29.06.2016

小地勤做左 Admin 工作都快半年了 , 生活作息非常定時 , 工作亦都早就定好了 . 而依個月 , 最特別既 Duty 係陪掃把去當小考官 . 以下係我個人既感想 .

1. 生活在機場既人 , 薪金由以前叫偏高 , 到後來跟街外普通文員差唔多 , 直到近年叫低卡市價 . 當飛機已經跟巴士一樣咁普及 , 當大家一年都唔知飛幾多次旅行後 , 當廉價航空越倏越多既時候 , 公司為確保收入 , 應該話正常既公司無論賺幾多都好少話會分比員工 , 但當賺少左時 , 就一定會想起 Cut 員工既福利 .

2. 簡單地睇左幾個人 CV , 一致要求薪金 $16000 , 這算是市價吧 ? 既然黎得見工 , 應該有到過討論區搵個資料 . 一個沒有經驗既地勤 , 所有航空公司都只會連津貼去到 $10000-$12000 . 地勤主要係靠 OT 生活的 , OT 錢方面 , 每間公司都不同 , 普遍 50-70 蚊一個鐘 . 係未有最低工資的那個年代 , 依個人工算唔錯 , 但時移世易 , 已經回不到以前 . 

3. 外觀對航空界何其重要 ! 好老實一句 , 生得靚女 , 絕對優勝 . 除非佢係啞或者個人好唔整齊同粗魯 , 否則多數會請 . 有次 , 有一位講野完全無尾音 , 套衫又摺起曬 , 不但無化妝 , 頭髮仲好凌亂 , 一入房就將兩個衫袖倦起 , 好似準備同我打架咁 ... 我同掃把對望左一眼 , 大家心裡有數 , 隨便問左幾條問題 , 就請她離開了 . 

4. 當左幾次小考官後 , 覺得街外人工出奇地好 . 小地勤見過一位仁兄 , 佢樣子係依行叫做唔合格 , 但懂韓文 , 佢之前係尖咀做 CS 都有 2 萬蚊 . 小地勤好大路地叫佢用英文自我介紹 , 由佢一開口 , 我就已經知道 , 世上仲有大把人英文差過我 , 強調一點 : 小地勤英文係奇差的 . 到普通話 , 基本上同我差唔多咁差 , Role Play 時又完全 Handle 唔到 . 真係人揀你你揀人 . 小地勤比應徵者們普遍年長 8 , 9 年 , 但穿起制服的我 , 應該無人估到我有 3X 歲 . 眼見應徵者們樣子比年齡成熟 . 反觀有一位同行 , 佢已經快 40 歲了 , 樣子卻只有 28 , 9 , 機場女生大部份都懂得凍齡之術 . 怪不得咁多朋友話出去好易搵到份人工 2 萬既工 , 依加我真係明白同相信 .

最近網上有人問小地勤面試技巧 . 對於一份人工低 , 但要保持專業形像既工作來說 , " 樣 " 好重要 , 生得 " 靚 " 就最好 , 如果自問普通的話 , 不打緊 , 化少少妝 , 頭髮衣服整齊 , 分斜界 , 束馬尾最好 , 條西裙唔好改到短裙咁 . 就算幾緊張 , 都要微笑 , 說話有尾音 , 溫柔欺文既外表係首選 . 

依行好難請人 , 因為人工唔高 , 比較適合剛畢業既應徵者 . 英文 , 對本公司來說 , 簡單溝通到就可以了 , 本公司客路以 " 中國同胞 " 為主 , 因此選擇航空公司時 , 要留意間公司背景 . 小地勤只識廣東話 , 當年成功入到地勤依行 , 主因溫柔欺文既外表 , 生得乖 , 公司係會肯比機會你慢慢浸的 .

時移世易啦 , 唔好人地問 " 點解想加入我地公司 " , 就正係識答  I like travel , such as osaka , tokyo ... . 總之就正係識答 Japan . 要令人對你印象深刻 , 就唔好係人地面前講咁普通既地方 . 老實講 , 你個考官可能一年都唔知飛幾多次 Japan , 如果人地有心為難你 , 問得你再深入少少 , 唔通你答佢 " I don't know " 咩 . 因此建議講下第二樣野 . 

做左 10 年地勤 , 要講份工既利弊有 :
1. 返 shift , 天未光就開工 , 天黑曬都仲未收工 . 打風落雨不但要返工 , 仲要比客圍 , 做出氣筒 .  ( 即好易有長假期去旅行 , 因為紅日 , 大假都係要儲埋一次先准放 . 閒日旅行有幾平 , 大家好清楚 . 即興去短途一轉 , 同同事調下更 , 3 日 2 夜好易成行 . 而且好少出街會人多車多既情況 , 唔洗擔心攪唔到銀行野 . )

2. 唔太睇學歷 , 經驗比較重要 . ( 依行係幾公平 , 高學歷只係用黎考管理層而非前線 . 小地勤做左 10 年 , 由一個 1 仔 ( 最低層 ) 做到依加 Leader 仔 , 一個出期唔升職既小 Leader 人工都會每年增加 , 所以年資跟人工係成正比的 . 我比同級既新 Leader 人工高起碼 3 千 , 唔好爆我出黎 )

3. 階級觀念都幾重 ,你既職級令你係公司有一定既地位 , 航空公司套制服唔同級會唔同色 . ( 心計同是非比出面公司少 , 每日返工遇到既同事都可以唔同 , 做完一班機就可以同佢講拜拜 . 同階級都好團結 , 好幫忙 , 會有好多真心既朋友 )

4. 客人越黎越麻煩 , 比少少錢就當自己係皇帝 , 行行都係一樣 , 但依行特別多人以為自己係皇帝 . ( 訓練到急才 , EQ , 氣度 , 真係一身受用 )

5. 人工低 , 工作量多  , OT 到無朋友 ( 多勞多得 , 捱到既供樓都無問題 , 還學費一年就可以還完 . 無咩時間去街 , 日日得閒都訓覺 , 省唔少錢 . 返工時間過得好快 , 不停機過機 , 好充實 )

6. 福利任睇醫生 , 碌公司卡 , 生暗倉都去攞藥膏 . 除左別人認識既一折機票任出之外 , 仲有 FOC (只比機場稅既免費票) , 旅行令人增廣見聞 , 眼界大開 . 每個月都飛一轉台北 , 曼谷 , 沖繩 並不難 ! 每年一次歐遊亦好普遍 ! ( 小地勤一年 6 , 7 次旅行算少 , 其他同事仲過份 )



平得太過份

28.06.2016

人生第一次飛到歐洲 , 已經是 9 年前既事 . 當年公司要求員工做滿一年才可以出 EK 航空的一折機票 , 記得那時候 , 去英國的機票起碼 8 千蚊以上 . 3 千幾蚊就可以去到歐洲 , 對當時所有人黎講係夢幻既事情 .

不久 , 金融海瀟 . VS 航空出位價 3300 直飛英國 , 小地勤跟一位志同道合的朋友 , 二人成行 .那一年香港經濟好差 . 聽聞好多大公司都炒人 , 但小地勤沒有擔心過去完旅行會失業 . 地勤 , 永遠都人手不足 ... 可能地勤依一行唔能夠令人大富大貴 , 但依行就算市道再差 , 都好少炒人 . 當然 , 爆大鑊除外 .

無數次既歐洲之旅 , 見證住街外機票越做越平 ! $3274 這個價錢 , 仲平過買張北海道機票 ! 員工既一折機票都要起碼 $3300 呢 ! 航空公司點樣生存 , 當飛機做到好似巴士咁普及既時候 , 乘客既質素就每況愈下 . 無論地勤或空姐既薪金亦不再好似從前咁令人嚮往 , 少左新血加入 , 又留唔住舊人 ... 就算起多幾個機場或增加多幾條跑道 , 咁又點 ? 有設施 , 無人做 , 真係要全部自動化咩 ?

幸好 , 就算街外機票點平都好, 都仲未係人人受惠 , 日子咁爛 , 除左返自由工外 , 相信都無咩人可以隨便請到咁多日假期 , 話飛就飛一轉 ! ( 給大家參考一下的超平價日子 )

2016年6月23日 星期四

一星期自駕遊 * 日本北海道札幌 / 函館之旅* 2016年5月 ( Day 3 )

18-24.05.2016

行程 : 条市場 - 北海道神宮 - 登別 - 有珠山休息站 - 函館

其實有札幌一直踩到函館只需 3 小時 , 小地勤老公亦經常重覆咁做 . 今次同老人家一起 , 沿途就加下行程 , 等佢地可以伸展一下 .

佢地真係好鐘意吃生 , 我老爺年輕時亦經常帶我老公出海捉海鮮 . 今次北海道之旅奶奶話要食蟹食到今年唔會再想食 . 香港賣的日本蟹 , 聽聞好貴 . 小地勤好少出街 , 所以對香港既地道或物價 , 真係唔太清楚 .

近來覺得二条市場好抵買 , 再加上當造的季節 , 真係平到唔相信 . 一箱 6000 Yen , 即 400 蚊就有 3 隻蟹再加一樽野 .

隻蟹佔左一個箱 , 好實肉 ! 仲有得講價 !
 
 之前見過賣 300 - 450 Yen 一隻 , 依個月就賣 100 - 250 Yen , 難怪我老公咁興奮 !


隻蝦極新鮮 , 好似 200-300 Yen 一樣 . 係碟到都仲識郁 , 未死架 ! 我就覺得有點恐怖 , 但佢地就食得好開心 ! 佢地食依堆野前 , 已經係条市場每人食左一個海鮮井 , 真係好厲害 .

最後 , 我老爺買左 5 隻蟹話當午 / 晚餐 !!! 五月的二条市場係會令人買到瘋癲的 !!!

逗留札幌既時間唔多 , 而札幌令我印象最深就只有神宮依個景點 . 佢間神社同沖繩 , 大阪好唔同 , 所以來朝聖一下 .  

沒有櫻花的大道 , 希望搵一次見到佢開花 .

無論幾時黎 , 都見到一大堆人 , 所以依個景點絕不能錯過的 .

小地勤影過無數咁多次 , 都仲係影緊佢 ...

拿拿拿 ... 橙色個位就係我老爺 , 黑色個位當然係我奶奶 . 雖然佢地已經退休年齡 , 但 keep 得幾好 , 仲好後生 .

雖然無櫻花 , 但 5 月天就係花期到 , 好多開得好靚既野花 .

佢地有佢地四圍影相 , 小地勤就去左六花亭到食早餐 . 小地勤每次都要黎依到食返一個燒餅 , 今次仲買多件豆沙包 , 日本既豆沙包真係超好味 !

溫馨提示下大家 , 唔好掛住影相 , 否則會比鳥鴉搶食 . 我隔離台既台灣人自拍時 ... 就出事了 ! 佢虎視耽耽左我好奈 , 迫到我成個燒餅塞落口 !

抵達函館個晚 , 我地買左 2 盒冬甩去食 , 原因我想換 2 個鬆弛熊冰袋 . 又冬甩又食蟹 , 點會唔飽 . 食飽後 , 我帶左佢地去我至鐘意行既驚安超市 . 小地勤今次既目標係唔要買錯 Made in China 既產品 , 去到日本點可以唔買返 Made in Japan 既物品呢 ?

小地勤早就買左依塊吸水板黎玩左半年 , 今次諗緊洗唔洗再買多塊大 size .

士多啤梨平成咁 , 怪唔知得係門口見到好多人攞住幾盒 . 日本既士多啤梨真係好難會難食 . 價錢既平貴只係在於 " 甜 " 定 " 激甜 " . HKD 28 蚊 , 唔買都對唔住自己 .
 

好鐘意買擦擦筆比朋友做手信 , 十幾蚊一支 , 仲有咁多花款 .




聽聞日本絲襪質感好好 , 見日本女仔穿得好自然 . 之前小地勤做前線時只可以買 120 釘以上的台灣黑色絲襪 , 今次終於可以買日本絲襪試下 . 一試上癮 , 著左好似無著咁自然呀 ! 5 對先 499 Yen , 幾蚊 HKD 一對 ! 抵買 !

香港好似賣成 130 蚊 , 我見好多日本藥店都賣 1600 Yen , 係得依到先買 1200 Yen , 所以都買左 2 盒 , 夏天會特別想用 .

夏天時 , 我都唔揸 cream , 所以最近用得比較快 , 有野送時 , 小地勤一定會買 . 大家有無咩好野覺得係必買呢 ? 記住推介比我 !