網頁

2015年4月20日 星期一

又係 ATC ... 又係投訴 !

20.04.2015

坦白講 , 我真係幾黑仔 , 人地個個返夜都無問題 . 我一返夜就 ATC . 仲要今個月返得幾日夜 , 但就每晚都提心吊膽 . 一返工 , 同事都會同我講 , 又 Delay ...

之前係上海 ATC ( 空中管制又稱流控 ) , 今次係上海加北京都流控 ... 之後又到杭州流控 ... 每晚返工都正係聽到流控 X 100 次 ! 今晚仲要黑到連台北都流控 , 玩我咩 !?

祖國呀 , 祖國 , 搵日唔流控得唔得 ? 就算香港建幾多條跑道 , 增加幾多個閘口都無用 . 一大陸流控 , 全部飛機唔准飛 , 要係香港等 ... 等到何年何月呢 ? 機場飽和 ? 其中一個原因咪係流控囉 . 如果班班機都準時返到準時起飛 , 香港機場又點會飛機迫埋一堆起飛同降落 , 又點會等極都無閘口 ? 又點會明明安排左 46 號閘口 , 因為原先架飛機未走到 , 而後來班機要改到 70 號閘口呢 ?

重申一次 , 地勤同乘客一樣都唔會知道今日閘口安排係邊到 , 以及唔會知點解咁奈都未閘口 ? 唔好再問我 , 問機場管理局 AA 啦 ! 閘口唔係地勤安排架 . 閘口遠 , 你咪行快小小 , 早小小出發囉 , 怪個地勤都無用 , 迫我地安排車 , 更加好笑 ! 機場 Buggy 係要收錢架 , 60 蚊一位 , 閘口遠 , 唔係航空公司問題 , 點解要免費請你坐 Buggy 呢 ? ( 呻完 ... )

最近唔知大家有無睇一單新聞 , 同理心係公司成日講 , 以及成日做 . 今次公司做左好事 , 比左醫藥費 , 仲想令呀毛坐得舒服一點 , 所以免費 Upgrade 佢地一家人 , 結果呀毛仲鬧公司衰 .

成件事呀毛係好慘 , 叫左杯茶 , 又遇到氣流 , 結果茶倒瀉了 . 她受傷了 . 要公司賠償及道歉 . 重點係氣流令茶倒瀉 , 個氣流真係衰 , 投訴佢無錯 . 咁即係要投訴個天 ???

網民眼睛都雪亮 , 發生意外 , 唔係 claim 保險 ? 原來買張機票可以保一世 , 真係好抵買 .

依件事都唔想表態咁多 . 因為我唔可以代表任何一個人講野 . 

但係依件事 , 我睇到香港工作既服務人員有幾慘 . 香港大部份人都係做同服務性行業有關既工作 . 平日自己有幾惡 , 你返工遇到既客會更惡 , 惡性循環 . 將來我地既下一代每日返工應該都係比客 " 小 " . 聽完我既發表 , 大家係唔係應該互相體諒 , 尊重一下服務你既人員 . 人地都有呀爸呀媽 , 如果唔係咩大件事 , 就唔好成日話 " 投訴 " .

相信無人希望自己將來既小朋友生活係 " 投訴 " 文化下 . 將來既小朋友不但買樓難 , 連開開心心咁工作都難 , 香港人 , 唔好自己玩自己人啦 , 唔該曬 !




2015年4月16日 星期四

終於到休息日

17.04.2015

今日係休息日 , 因為股票有少少進帳 , 所以今日要請屋企人出去食飯 . 賺到錢開心之餘 , 亦唔好忘記同屋企人分享一下 !

黎左貴賓室後 , 真係好奈無試過連續咁返 8 日工 . 人手又唔夠 , 又遇正同事放大假 , 無法啦 ! 希望盡快請夠人手 , 可以比我過返以前悠閒既生活 .

剛剛收到公司加人工既信 , 其實依間公司算係咁 , 每年大圍都係 4% , 叫追到通帳 . 我估我今年都係加 4% , 以前未黎貴賓室就會加我 5% , 但因為我唔升職 , 所以每年都只係最低分果個 , 結果相對地花紅同加薪 % 都會係比其他同事少 . 每年掃把都會安慰我話 , " 你明架啦 , 比高分你 , 就要升職 , 所以只可以年年都要你做最偉大果個 " 依個就係現實既世界 .

其實我好明白 , 但我都係人 , 我都會唔開心 . 我最偉大去成就別人 , 我得到既係咩呢 ? 

工作對我黎講只係消磨時間 , 唔返工 , 唔通日日係屋企炒股票咩 ? 

依 8 日返早 , 我遇到好多黑仔野 , 停電啦 , 壞熱水機啦 , 壞洗碗機啦 , 多 Guests 啦 , 多客啦 , 但就得兩個人返工 . 以前貴賓室細 , 客又唔太多 , 兩個人返工都叫做夠 , 依加 , 我邊夠膽一個人坐係門口 , 點做 ? 我又唔係十對手 , 十把口 , 更加唔係超人囉 , 唉 ... 唯一好采係咁多日都係拍住比較 Senior 既同事仔 , 辛苦得黎 , 個心都比較舒服 , 因為夾口型既同事會令返工更開心 !

停電個日個心受委屈了 , 個種唔開心真係用口呻十萬次都舒解唔到 . 而我更一時唔記得左 Facebook 有管理層 , 將唔開心既野打左係 Facebook 到 . 估唔到高層竟然咁重視員工感受 , 真係令我覺得好意外 . 原來我依個小員工 , 因為熟客仔們既表揚信多 , 而成功跑出 . 真係估唔到表揚信竟然真係有用 , 而我卻一直覺得只係交功課 . 

依 8 日返工 , 辛苦到每日一收工就 1700 食飯 , 2000 左右就訓覺 . 我捱成咁 , 只因有班好同事 . 眼見一個個咁走 , 都幾唔開心 . 因為貴賓室人多了 , 但就唔一定個個夾到嘴型 . 物以類眾係貴賓室亦好明顯 , 因為好同事都會屬於一黨 , 自然地排走曬唔 OK 既同事 . 亦因為咁 , 貴賓室既員工大部份都係非一般咁好 . 希望新請返黎既都係好人 , 而唔惡教 .

某日遇到一位同事黎貴賓室 , 原來佢入行前 , 都有睇我個日記 . 我將依件事同另一個同事講 , 估唔到原來佢都有睇過 . 有人睇 , 仲好過無人睇 , 都幾開心 . 我仲知道左 , 原來舊公司都有位地勤係 Facebook 開左一個專頁寫地勤既生活 . Facebook 的確可以好快令人成為人氣之王 . 不過 , 我就無咁既心力去經營 . 

對我黎講 , 日記板只係比我可以呻下既一個平台 . 唔太出名都有好處 , 起碼唔會好似以前咁野 HR 搵我問野 .

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 ! 轉眼間我已寫了快 200 篇工作上的文章 @@

2015年4月14日 星期二

Sofina 我的另一至愛

14.04.2015

天氣回暖 , 係時候轉返用清爽一點既 Cream . 小地勤其實用平價野多 , 因為以前被 Duty Free Shop 吸引 , 買了又貴又唔好用既產品 , 那次臉上出紅點同起曬粒粒 ... 自問自己皮膚算唔錯 , 我從沒有黑豆及毛孔粗大既問題 , 亦好少出現敏感 , 但個次攪成咁 , 就轉用 Fancl , 之後覺得 Fancl 好貴 , 又改用更平 . 冬天我都只係用黑蓋白底的那個外型唔吸引既最傳統版 Olay , 又平又滋潤 .

夏天 , 我以前會用 Loreal 清爽個隻 Cream , 但簡中都會買少少好野比自己用 , 其實我幾鐘意 Sofina 依個品牌 , 特別係佢既打底霜及化妝品 . 

護膚品就只用過佢隻 Cream , 不過香港都賣得幾貴 ! 因此小地勤每次去台灣都會入定一年貨 , 香港 Sofina 每支都要 250 以上 , 台灣就一般賣 100 蚊左右 , 係唔係好抵買呢 ?

佢都真係幾好用 , 好清爽但又夠潤 . 我早晚都用 , 一般用到兩 , 三個月 , 好抵用 . 下次去台灣 , 大家可以考慮買黎試下 . 最重要係台灣成日都做特價以及有野送 .



2015年4月11日 星期六

突然覺得自己思想好正面 !

11.04.2015

今日睇左依篇報導 , 所以我都有感而發 ...
http://hk.on.cc/hk/bkn/cnt/news/20150408/bkn-20150408173416241-0408_00822_001.html

小地勤也先講一下自己背景吧 ! 我都係草根階層 , 我父母正係識寫自己個名 , 我有 2 個妹妹 1 個弟弟 , 我小時候住屋邨 , 我生長於大家庭 , 一家六口 , 靠我老豆一個人打工 . 知唔知咩叫 " 人窮無親戚 " ? 老豆個邊既人睇我地唔起 , 仲笑我呀媽無仔生 , 後來呀媽點都要追個仔 , 我 6 歲個年就多左個細佬 .

小時候飲可樂 , 一罐 3 姐妹分 , 到後來一罐 4 姐弟分 . 屋邨八婆好多 , 笑我地窮 , 讀小學時 , 我地幾姐妹成日被人蝦 . 那時候我小學三年班 , 兩個妹妹分別係二年班同一年班 , 同一層既小朋友因為父母蝦我地 , 都有樣學樣 , 我地 3 姐妹搭 Lift 永遠出唔到 Lift , 永遠要上到最頂層 , 人地走曬先輪到我地落返去自己個層 .

我無錢補習 , 父母唔識字 , 所以大家姐既我要好努力讀書 , 咁樣我先可以教到細佬妹 . 小學 3 年級 , 我媽媽決定跟爸爸一起去做裝修工人 , 搵錢比我地幾姐妹補習 , 那一年 , 我知媽媽爸爸都辛苦 ,  所以我全班考第一 , 自始我入左精英班 , 做班長 , 做風紀 , 小學年代全級永遠唔過 15 名 . 當然 , 我唔係讀名校 . 因為爸媽都唔想我地再比人蝦 , 所以問人借錢買樓 . 那一年供樓很辛苦 .

中學 , 我係跟同學仔一起考入學試的 , 也不是名校 . 中學所有野都好貴 , 那一年我無再補習 , 中四開始 , 我每個星期六 , 日都要去做兼職搵錢 , 做拉麵店既待應 , 每日返 9 個鐘 , 20 蚊 1 個鐘 , 當時我家境仲差 , 差到要賣樓 , 再搬屋 .

同學仔星期六 , 日就去玩 , 我星期一至五就要趕功課同溫書 , 因為我星期六 , 日係要返工搵錢 . 好好采 , 我係自己學校考到中六 , 七 . 那兩年我放學就要去幫人補習 . 我既好采 , 成為我妹妹既不幸 , 因為我考到 , 所以媽媽問人借錢都要比我讀 , 但妹妹會考 2 個 A , 廿十幾分卻無錢 , 所以佢無得讀 , 要出黎做野 , 那一年佢去左做賣金既 Sales . 結婚前佢係某大型公司既 TOP 5 ! 佢由 6000 蚊做起 .

我身長於應該叫惡劣既家庭 , 我地幾姐妹學歷以我最高 , 都只係得中七 . 坦白講 , 我慶幸英文肥左考唔上大學 , 因為考到我都一定無錢讀 . 讀完都只會差政府十幾萬 .

我第一份工 5300 既文員 , 因為我係 2003 年沙士時中七畢業 . 之後我做左半年 , 搵左另一份工 , 係兼職 Sales , 每個月都有 6000 至 7000 . 2005 年年頭 , 我入左去做機場保安做 CS , 要輪班 , 仲要返 7 日先放假 , 當年仲要日日比 Senior 蝦 , 每日放工我都喊 , 但為左 9000 幾蚊人工 , 我又捱左年半 . 

2006 年我係 J 公司當地勤 , 自始生活開始改變 . 因為我地 3 姐妹都出曬黎做野 , 媽媽終於可以唔洗再做個份 6000 蚊既洗碗 . 而爸爸都仲係做緊個份有工就開 , 無工就等工既裝修工人 . 小地勤打後既生活係點 , 睇開我日記既人應該都知道吧 !

雖然每日返工都被客鬧又受氣 , 但我係要面對現實 , 以我既學歷搵到 2 萬一個月算叫唔錯 . 我沒祈望過父母有閒錢比我去遊學團或比首期我 , 我係靠自己努力 , 將私人時間賣比公司賺 OT . 以前我的家庭總收入約 15000 , 我地無攞綜援 . 小時候 , 因為姐弟多 , 所以父母根本比唔到咩野我地 , 我地既活動係去公園玩 , 去圖書館同返下教會聽故事 . 最開心係老豆買左部單車比我地幾個踩 !

對比起個篇文章既作者 , 相信我係別人眼中應該仲慘 , 我絕對係 " 輸係起跑線 " 既代表 , 但我都仲覺得知識可以改變命運 , 我都覺得只要肯努力 , 生活就會有改善 .

每日返工 , 我被客小完 , 受完氣 , 我思想都好負面 , 但我仍相信只要我肯捱多幾年 , 對將來退休既生活 , 會更有保障 . 

小地勤捱過既苦 , 相信唔係人人都明白 , 所以我好珍惜現在既生活 , 其實我思想真係好正面 ! 我仲遺傳到上一輩既肯捱精神 , 我相信我打後既生活只會更好更好 .

其實我見我班 80 後同學仔都唔係搵好多好多錢個種 , 不過佢地都好肯捱 , 睇住佢地一個一個都係靠自己努力 , 結婚生仔同買樓 . 真係好想講一句 , 只要你肯捱同努力 , 個天係會好好對待你 ! 大家一起加油同努力吧 !




2015年4月10日 星期五

我係老 PAT PAT

10.04.2015

今朝晨早就話熱水機壞左 , 無熱水 . 以前係舊 Lounge 部熱水機都成日壞 , 我地都會自己煲水 , 再用保溫壺出比客人用 . 依加就麻煩好多 , 我只係一個小員工 , 晨咁早就返工 , 仲要晨咁早比個難題我 . 如果廚房大佬唔好玩我 , 一早自己 call 負責同事又或者 call 佢地維修部 , 個問題早就解決左 .

我明知佢諸多藉口 , 原因只有一個 , 當我係妹妹仔 , 打算交個波比我就算 . 我負責人既電話又無 , 大佬又扮唔知負責人電話 . 我都已經明講一句 " 之前你地成日有打比負責人人架 " . 佢一句答我 " 從來無打過 , 就算有打過都無 save 低 " 當我傻的嗎 ? 不過都係個句 , 佢有心唔比個號碼我 , 我唯有晨早 call 我呀姐攞負責人既電話 .

坦白講 , 六點幾就 call 呀姐話水機壞左 , 問佢攞負責人電話 , 正常人接左我電話都燥底 , 呀姐唔小我都算比面 . 呀姐可能厭我煩 , 所以就自己打左比廚房大佬 , 廚房大佬好快就答我整返好 . 我有理由相信 , 佢專登玩我 .

十點幾 , 正當話有 VIP 黎緊既時候 , 突然停電 , 應該係短路 , 我心諗唔係掛 , 唔通又係部水機出事 ? 

第一時間叫同事 call 呀姐 report 左先 , 再叫另一同事繼續 standby 門口等 VIP . 自己就衝去 VIP Room 睇下有無電 , 好采早上好光猛 , 再跑出黎同 standby 同事講照送個 VIP 入房 . 再問廚房大佬咩事 , 佢話有短路 , 打左比電工師傅問點做 . ( 我心諗 , 今朝你唔係話只會 report 我知 , 而唔會打電話做醜人咩 !? )

突然想起兩個 toilet , 得返一盞小燈 , 就叫清潔姐姐唔好比客用 toilet , 實在太黑 , 又有樓梯 , 怕佢地跌到就仲麻煩 , 之後我再去睇下個殘厠 , 見到殘厠盞燈比較光 , 就叫姐姐建議客人用殘厠 . 但兩個姐姐又八掛 , 成日走入廚房睇咩事 . 我唯有叫個 standby 同事改做 standby toilet . 而叫門口比較 senior 個同事睇住門口 , 萬一 VIP 到 , 就叫 VIP 同事送個客入細房 , 我已開左門 .

我唔去送死 , 唔通叫班細既去咩 ? 再走去同客人  say sorry , 建議佢地轉去靠窗位置 , 因為比較光 , 又講曬大話話樓上有工程 , 所以攪到我地停電 balabala ... 

觲畫完 , 又再問廚房大佬試到邊個電制出問題 , 我就估係厠所 , 因為有燶味 , 最後全部燈開返曬 , 果然男厠有燈唔著 , 仲黑黑地 . 呀姐果然係呀姐 , 一開口 , 即刻有人黎再 check . 假如係我 , 就算知要 call 邊個都無用 , 因為我只係小薯仔 , 邊有人晨咁早采我 .

事後同掃把仔沙沙講返依件事 , 佢聽完就話大佬明蝦我 . 我話我知道 , 講多兩句已經 feel 到 . 佢睇制服顏色 , 咁對我 , 都無可厚非 . 其實我好嬲 , 我覺得佢有階級觀念就最好 , 咁麻煩以後唔好同我講 , 我無野可以做到 , 亦無野可以幫到你 . 我只係一個同掃把同價既小薯仔 !!

都唔明點解想好好地打份工 , 正係做返自己野都唔得 , 咩都關我地事咁 . 收工後 , 我都不停安慰自己 , 自我調節 , 唔洗因為人地蝦你而唔開心 . 我大條道理扮傻囉 , 我一個 Leader 仔 , 又唔打算升 , 分數年年排最尾 , 我做又 36 , 唔做又 36 , 我又唔洗供樓 , 又有男友養 , 我份積蓄夠我用十幾年 , 我只係想打份工 , 個個月有錢出 , 返工準時 , 收工準時 , 放兩日假 , 其實就算我即刻唔做都得 . 再一次同自己講 :

我只係打份工 , 以後就扮傻 , 人地 hea 我 , 我就 hea 返人地囉 . 我要做傳說中既老 PAT PAT !! 

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 ! 轉眼間我已寫了快 200 篇工作上的文章 @@

2015年4月9日 星期四

北海道手信

09.04.2015

今日收到同事送的北海道 Mask . 我係一個鐘意收到實用物品做手信的人 . 因此同事每次送我的都是 Handcream , Mask 以及 Soap , 我已經收過好多唔同國家既 Handcream , Mask 以及 Soap , 哈哈 !

一直都好想買依個好似濕紙巾既 Mask 黎試下 , 但每次都無買 , 原因係我家中有成 500 塊以上既 Mask , 同事成日都笑我係 Mask 超人 , 所以每次想買時 , 都同自己講 ... 下次先買啦 ...

平日係沖繩正係見到 白色 , 紅色同黃色 , 好似唔多覺有紫色 . 上面寫住北海道限定以及 " New " . 一打開依包野 , 就見到好多汁 , 用完感覺一定超好 .

依個脾子既 Mask 都幾出名 , 出名在大包裝可以用一個月 , 就算日日用都係百幾蚊一個月 , 堅抵 ! 唯一壞處係一開左 , 頂盡放得個半月 , 我成日諗如果放佢入雪櫃會唔會可以夜得奈 D 呢 ? 即使我超愛用 Mask , 最勤力都只係試過兩日用一次 , 所以如果買大包裝 , 開左又用唔曬就浪費左 .



依間公司出左大包裝無奈都出返小包裝 , 小包裝內有 7 塊 . 依個星期要返奪命 8 日早 , 正好日日用 , 相信就算返 8 日早都唔會臉黃黃 . 

剛剛已經急不及待開左黎用 , 平價護膚之選 . 等我清多 300 塊 Mask , 下次去北海道都買黎送人 . 扣稅後 20 蚊一小包 , 收到的人相信會好開心 ! 


2015年4月8日 星期三

基金可升可跌

08.04.2015

今日放假 , 突然想起份基金 , 轉眼間 , 我已經供左 7 年 , 仲有 3 年就供完 .

我好無聊咁睇下個户口 , 計下佢有無收多左我錢 , 結果 ... 發現左一個好傷心既消息 !

我供左 7 年 , 月供的 , 每個月供 1200 .

1200 X 12 個月 X 7 年 = 100800 .

今日睇個月結 , 發現户口約 15000 美金 , 即大約 11 萬多少少 ...

我用左 7 年時間 ,整個回報竟然得 1 萬蚊 !! 

當年個銀行小姐明明話衰極都有 5% , 係每年 5% , 一般係 10% 回報架 ...

假如我用 4 萬蚊買 10000 服收息股票 , 每年收息約 2500 , 7 年都有萬七蚊 ... 

依 7 年 , 我供既錢去曬手續費到 , 每個月供款都要比手續費 , 當時仲話送 1 萬美金人壽保障 .

送 ? 個個月都要比錢去 run 依個人壽 !

激死我了 ! 所以決定 cut 左佢 , 攞返筆錢出黎仲好 . 

結果電話回覆一句 " 基金可升可跌 " , 正 !

每晚都似坐過山車

08.04.2015

轉眼間就返左 3 晚夜 , 放完今日假 , 聽日會開始我既奪命 8 日早 . 

我自問係屎人一名 , 人地返夜就個個準時收工 , 我返夜就次次撞正上海 ATC ( 流控 ) .

尋晚食完個晚飯 , 一坐落黎 , 同事就同我講全部 Delay , 坦白講都無咩感覺 , 因為公司搵日唔 Delay 都難 , 總之被我趕到 Last Bus , 我就心滿意足 .

九點幾 , Last Flight 既 3 位乘客入左黎 , 明知佢理機實 Delay , 但一日被出 Delay 消息 , 一日唔可以同個客講 , 明明有早一班機 , 但都唔可以幫佢轉 , 心諗今晚死緊 .

就係依個時候 , 我又出古惑了 , 有時不得不講大話同吹到件事好大單 , 咁先會有人理下我地 . 我私心就係想早收工 , 其次先係想幫個客 . 總之最後個客又上到早一班機 , 我又可以準時收工 , 大家都皆大歡喜 .

上到巴士 , check 左一下 , 班機已經改左做 零晨兩點四十五分 先飛 , 但架飛機要 零晨兩點二十幾分先到 , 邊有可能 45 分準時起飛 ?

每日返夜 , 心情都因上海機場而大起大跌 . 麻煩大家遇到 Delay 唔好再鬧地勤 , 要鬧就鬧上海 . 點解成日空管 , 點解要攪到香港準時率大跌 ? 假如香港唔開咁多飛大陸既航班 , 基本上可以做九成半準時 .

睇住姐妹公司飛好少大陸航線 , 所以就攞到 number 1 準時航空公司既美譽 . 可惜要公司唔飛大陸 , 係無可能既事 ! 

因為一篇文章 , 小地勤又好似回到以前 Yahoo 年代咁 , 開始多返人黎我個日記板到睇 . 好開心知道原來仲有好多人想加入地勤依個行業 . 其實心情好矛盾 , 依份工有好亦有唔好 , 令人想加入係唔係害左人地呢 ?

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 ! 轉眼間我已寫了快 200 篇工作上的文章 @@


2015年4月4日 星期六

澳門三日遊 * 2015 三月 (四)

10-12.03.2015

四圍遊黎到盧九公園 , 附近有間講茶既博物館 . 雖然唔係好大 , 只有兩層 , 不過都算多野睇 .

一入去就見到一個用黎請人飲茶既茶桶 . 以前既人都幾豪氣 , 成桶咁請 .

有少少茶具展出 , 我好鐘意白底藍紋既茶具 , 好有清朝既特色 .

以前賣茶既全個步驟 . 由種茶開始 , 到採茶 , 炒茶 , 再攞去賣 , 以至出口 .

以前茶樓既點心紙 , 物價升左好多 ...

二樓係用黎開講座時才用 . 不過個擺設得好似以前大户人家既大廳咁 .

係到行左一圈之後 , 一行出去就係盧九公園 . 春天到了 , 四圍都開滿杜鵑花 .


依個公園雖然好細 , 但盡顯中國庭園既特色 .
迴廊 :

翠竹 :

假山一角 :

花燈 :

仲有一個小展覽廳 . 有中國畫 .


有葉畫 :


有花燭 :

有麵粉公仔 :

每個樣都唔同 , 以前既人 , 個樣有點奇怪 .


好鐘意雪景 :

件小朋友傳統衫好靚 , 好得意 .

咁就係澳門過左兩日 , 好輕鬆 !

2015年4月3日 星期五

澳門三日遊 * 2015 三月 (三)

10 - 12.03.2015

每次返澳門都好鐘意黎依到行下 .

沿住海邊咁行 , 心情會好好 . 對面就係大陸 . 依條路線都好多野睇 .

上次行到盡頭 , 間廟已經關門 , 今次終於可以行入去睇下 . 好傳統 , 好細間 .


仲行埋上去望下 . 依到個風景都唔錯 , 只可惜今日天氣麻麻地 .

開車經過 , 就入左去睇下 .

個公園好大 , 但就無咩人 , 職員仲多過遊客 , 係澳門打份政府工真係唔錯 .


依到本來有兩隻熊貓 , 都係由大陸送贈 .

因為得兩到兩隻珍貴熊貓 , 所以澳門就起左依個公園 .

入去睇熊貓係要比錢 , 而且都唔平 , 仲要有一隻已經死左 .

所以係到行左一圈 , 我地就走人 . 有個小小動物園 , 免費的 , 但動物都不見了似的 , 可能早就死左 ...


最後去左威尼斯人到睇下 , 每次黎 , 都好懷念係意大利去旅行既日子 . 那些年已經很遙遠 ...


賭場真係好多大陸人 , 中國人真係好鐘意賭錢 ...

行左一圈 , 就走人了 .

黎見工 , 是這種態度嗎 ?

04.05.2015

最近人手超級不足 , 仲要黑到係依個時候先黎特別多 Guest , VIP , 拍攝以及大 Delay , 正常人都會有微言及負面情緒 , 我除了擔心再有同事唔做而做死我之外 , 亦好擔心咁樣捱落去我自己都頂唔順 . 

掃把其實好落力去請人 , 但都未請到合心水的 . 其實要請一個地勤 , 每間公司都因非常等人用 , 而標準低左好多 , 基本上有眼耳口鼻 , 四肢健全 , 識少少英文就已經會請 .

在舊公司時 , 某掃把同我分享她請人的準則 , 因為人手真係好唔夠 , 所以識答 " Yes " 及 " No " 就已經請 . 可惜 Training 左唔夠一星期 , 已經有一位新人唔做 . 原因係 Training Notes 全是英文 , 她看不懂 . 兩星期後 , 第一個考試就已經有一半人唔合格 , 要重考 ... 正常來說 , 只有一次重考機會 . 想當年 , 小地勤那一班 , 沒人要重考的 , 個個都係一次過 Pass . 我們的合格分數為 80 分 , 基本上錯 4 條就要重考 . 依加大部份人都有大學學位 , 但點解會攪成咁 ?

講返依幾日掃把有幾努力咁 Call 人黎見工 , 無奈貴賓室地勤跟外面的地勤有一點分別 , 不能有眼耳口鼻 , 四肢健全就請返黎 . 坦白講 , 我地日日對住唔同老闆以及野蠻乘客 , 點都要有返小小要求 .

某天 , 小地勤接到一個電話 , 內容如下 :

我 : 請問是見工者 ? 那約了什麼時間來見工 ?
她 : 好似聽日 , 總之我依加黎緊 , 依加就要即刻見 .
我 : 負責見工的那位同事今日沒上班 , 你要轉時間嗎 ? 可以留電話以及話我知你約左聽日幾點 ?
她 : 我唔記得約左幾點 , 總之我依加想見 , 你去 Check 下咪知我約左幾點囉 .
我 : ( 心裡想 " 小 " 佢 ) 我唔係負責見工的 , 所以我查唔到 , 咁麻煩你留電話 , 我通知負責同事 Reply 你 .
她 : 下 , 要留電話 ... 我唔太想留囉 .
我 : 你唔留電話 , 負責同事又點同你轉時間呢 ?

我將依件事同掃把講完 , 唔洗問 , 都知唔會請佢啦 . 掃把就叫我打返比佢同佢講 " 唔洗黎 " .

我 : 唔好意思 , 負責同事話 Interview 已經 " 取消 " 左 , 你聽日唔洗黎 .
她 : 我係要轉時間唔係要取消囉 ! 即係我唔打黎問你地都唔講 " 取消 " 左啦 ! 你邊間公司 !? 我指你地屬於邊間航空公司 .
我 : 我地屬於 " 花花航空 " .
她 : 你地依加咩態度 , 話取消就取消 .
我 : 唔好意思 , 我只係負責傳話 , 總之 " 聽日你唔洗黎見工 " . 88 ... ( 馬上 Cut 佢線 )

黎見工 , 但唔知自己約幾點 , 已經唔 OK , 仲要連見邊間公司都唔知 , 我真係想問佢 " 點做功課 " . 廿五 , 六歲都仲聽唔明 " 已經取消 " 咪代表 " 唔請你 " , 連 In 都覺得浪費我地時間 . 到最後仲要問我 " 咩態度 " , 個刻勁想串佢 " 你黎見工 , 想我比咩態度你 ? "

依加既人 , 真係好奇怪 ! 
想人地請你 , 麻煩態度好少少 , 基本功課都要做下掛 . 地勤依行 , 應該話航空界依行 , 好重視言行舉止 , 你正正常常 , 又乖巧樣 , 就算語言唔太 OK , 好似當日小地勤咁背個英文自我介紹 , 背到一半唔記得左 , 笑一笑 , Say Thank You . 咁就入左行啦 ! 

有心加入 , 請做多一點功課 , 我地真係好需要正正常常既新力軍加入 ! 我都唔想做死自己囉 !

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 ! 轉眼間我已寫了快 200 篇工作上的文章 @@