網頁

2016年3月23日 星期三

北京*回香港*2016三月 ( Day 4 )

12-15.03.2016

最後一日係無行程 . 一起身就返機場坐 12 點幾的航班 . 北京機場過關好慢 , 用左差唔多一小時先入到禁區 .

入禁區前 , 係機鐵站退返張 "一卡通 " , 但出左少少意外 , 攪左好多轉先退到 . 老實講 , 人地一句話 " 退唔到 " . 你就要自己想方法 . 去過咁多地方 , 係得香港既 CS 先態度咁好 , 但都仲要比人投訴 . 都係個句 , 係香港做 CS 就好似做呀四咁好難得到別人尊重 . 咁就玩左 4 日 .

最近見到林公子個網介紹左 " 第 30 屆定山溪溫泉溪流鯉魚旗際 " 到時會見到有成 400 條鯉魚旗 , 所以黎緊打算去一轉 . 好期待 !

2016年3月22日 星期二

北京 * 北海公園 / 頤和園 * 2016三月 ( Day 3 )

12-15.03.2016

星期一 , 參觀天安門廣場及故宮 , 因為無做功課 , 所以摸門釘 . 大家要記住 , 星期一大部份市內景點都無開放 . 



去到午門 , 先發現星期一是休息日 . 雖然入唔到去參觀 , 只係門外影張相 , 再圍住個城行左半圈 , 但媽媽仍很開心 .



去唔成故宮 , 唯有帶媽媽去後面的北海公園 , 門票 5 蚊 . 依個公園之前我一直想去 . 但每次都時間唔夠而錯過了 . 

要上白塔參觀係要另收費的 , 所以我地都無上去 . 如果要比錢上頂點睇風景 , 小地勤會推薦故宮後面的景山 . 以前我曾經去過 , 上到頂看到整個故宮 , 會有大地在我腳下既感覺 !















依個公園好大好靚 , 依條長廊仲好似頤皈園個條 . 

仲有人表演 , 我地坐係到睇左好奈 .

之後仲有時間 , 就去左頤和園參觀 . 四年後再來 , 好似開放左仲多地方 . 下一個四年 , 可能都全開放了 . 
頤和園 - 蘇州街 .

殘舊先有古典味 .





同媽媽講左一下依條石舫既典故 , 佢好鐘意聽故仔 . 

今日係北京最後一日 , 因為媽媽話玩左幾日 , 心掛掛屋企 , 所以改做明天早機走 . 本身諗住明天晚上七點機就可以去埋故宮 . 不過 , 老人家可能已經覺得攰 , 雖有下次再黎過 . 最後一站當然係王府井 , 係到我地買左包茶葉以及紅噹噹既小朋友過年衫 . 今次既行程比去日本來得輕鬆 .

北京 * 萬里長城 * 2016三月 ( Day 2 )

12-15.03.2016

第一次去北京係跟團 , 當年係 2008 年 . 第二同第三次去北京 , 已經係自由行 , 當年係 2012 年 . 四年後的 2016 年 , 第四次北京 , 已經好熟路 .

係機場買唔到 " 一卡通 " , 好彩係地鐵站買到 , 用 " 一卡通 " 好方便 , 好似 " 八達通 " 咁 , 按金係 20 蚊 , 我總供入左 100 蚊 , 最後係機場退返 13 蚊 , 因為出左少少意外 , 退唔足 20 蚊 !

同以前一樣 , 要去長城先到積水潭 , 向城樓方向行 , 係城樓下坐巴士直到 . 以前去長城要坐 919 , 依加去長城要坐 877 . 好彩小地勤上 919 時有問一下 , 否則就去錯地方 . 車錢跟以前一樣係 12 蚊一程 .

約一小時就到八達嶺 , 好簡單易去 . 我地仲買左 2 條粟米以及一支旗仔 . 我係唔係好似領隊呢 ?
 


媽媽第一次黎北京 , 當然要幫佢影好多到此一遊照 .

今日天氣好好 , 陽光普照 , 不過好大風以及好旱燥 . 長城風光好靚 , 本來唔打算再比錢入去 , 但又怕媽媽當失路 , 所以我比錢入到去就坐係樓下等佢 . 小地勤係畏高的 ! 媽媽就自己一支箭上左頂 , 佢真係好開心 !





長城人好多 , 所以我叫媽媽行另一邊 , 個邊無咩人 . 我就係樓下四圍影相兼等佢 . 我地係長城逗留左 3 個多小時就坐返 877 返去 .



時間尚早 , 所以帶左媽媽去行前門大街 , 個人比較喜歡前門大街多過王府井大街 . 前門大街有好多特色野睇 .

除左行大柵欄外 , 亦有行另一邊美食街 .

一直想帶媽媽去食北京填鴨 , 但媽媽話貴 , 唔肯去 , 好彩比我發現有細盒裝買 , 就買左盒外賣試食 .

媽媽話北京既粟米同香港食到的唔同 , 係佢細過食的那一種 , 所以佢每日都話要食一條 . 媽媽另一至愛係冰糖葫蘆 , 以前賣 5 蚊 , 依加賣 10-15 蚊 . 洗唔洗咁貴 ? 不過 15 蚊我都仲食得起 ! 媽媽又係每日食一條 , 好似小朋友咁 .

媽媽樣樣都話貴 , 唔食又唔買 . 所以我就迫左佢去買對新鞋 , 係咁游說佢買 . 平日係香港買對鞋比佢要成 300 幾蚊起 , 依加 2 對先300 蚊 , 好抵 ! 結果係橫街見到仲平 ... 我足足買貴左一百蚊 ...

我同媽媽每日 7 點就返酒店 , 到對面商場食飯 , 每晚 9 點充訓覺 , 每日早上 6 點就起身 , 好健康既生活 ! 去長城的確要早起 , 否則時間不夠用 .

2016年3月21日 星期一

四日北京重點遊 * 2016 三月 ( Day 1 )

12-15.03.2016


曾經答應帶父母到北京玩 , 但一直忙自己的事 , 所以一拖再拖 . 今次我跟老公都是同一日放假 , 但就分開各自玩 . 佢有佢同朋友去沖繩 , 我有我跟媽媽去旅行 .


以前 , 小地勤都愛住故宮附近的超便宜旅館 , 但跟媽媽出外 , 就決定住機鐵站三元橋的 IBIS , 貪佢係國際連鎖 , 結果比以前住過的最谷 IBIS 相差十萬八千里 . 不過我個人認為位置的確唔錯 .


三元橋的 IBIS 對面有一大型商場 , 每晚都係商場食三餸飯 , 才賣 20 人仔左右 , 很好味 . 媽媽對街外食物不太好 , 總之正食 " 飯 " .


坐早上七點幾的航班 , 約十一點抵達北京 , 排隊過關花很多時間 , 之後就坐 25 人仔的機鐵 , 坐一個站就到三元橋機鐵站 , 它同時亦係地鐵站 , 所以小地勤話依間 IBIS 位置真係好好 !


怕媽媽唔慣依當地野 , 小地勤仲帶左個 Mini Cooker 同幾包麵 , 總之唔會餓親老人家 . 三月的北京仲凍 , 不過尚可接受 .


第一站先到天壇公園 , 小地勤黎過天壇公園好多次 . 今次再黎變化不大 , 門票亦無加價 , 三月係淡價 , 所以門票比旺季平 .


天壇最出名的有三 - 祈年殿 , 皇穹宇回音壁以及圜丘的天心石 . 小地勤真係可以做導遊 , 我全程帶住媽媽四圍睇 , 見到佢企係天心石到許願 , 真係好開心 .


每次見到這些古色古香既門窗 , 都忍唔住影低佢 , 其實真係影遣好多次 , 所以我手機只係得媽媽既相 , 自己就一張都無 .


係天壇公園行左快三個鐘 , 就去下一站奧運公園 , 見的當然係鳥巢同水立方 . 媽媽話唔入去參觀 , 門口影張相就夠 , 都的確係無野好睇 , 都費事入去 .

2016年3月19日 星期六

收山前的得獎感受

20.03.2016


近年行事業運嗎 ? 好似頻頻攞獎 . 看見公司的扮獎典禮越攪越大 . 可見公司真係越黎越賺錢 , 亦越黎越出名 . 唔知到我退休時 , 依間公司有無機會打低龍頭大佬 , 成為香港 No. 1 航空公司呢 ?




年頭 , 轉做文職工作 , 很多人都說 " 可惜 " " 浪費 " . 其實每個人係不同年紀就會進入不同既階段 , 小地勤都總不能成世企係前線招呼客人吧 ! 收山後 , 呀大都比左好多唔同工作我 , 如頂班教 Training . 老實講 , 我都好鐘意教書 . 好多人都話出面既師傅仔做得半年就帶新同事 , 自己都唔識 , 點會教得好新人 .


那小地勤都算係老 Pat Pat , 一個係依行做左 10 年既我去教下 Training , 應該唔會有人質疑我既能力唔夠掛 ! 所以根本就唔應該 " 可惜 " , 我呀大成日話 " 得自己識自己做得好 , 只係一個好員工 " " 教識人先係一個好領袖 " .


這就是公司扮給我的獎狀 , 可能係最後一次了 . 現在得到的獎都是以前種落的 , 現在才收成 .


小地勤以前係真真正正既航空公司職員 , 但公司要發展 , 所以又轉左做代理公司了 , 所以名都改左 . 依間地勤公司成日都會比驚喜同事 , 今次仲整左個人樣 Cup cake 送我地一班攞獎同事 . 真係唔捨得咬自己 .

2016年3月5日 星期六

Prado 博物館附近*西班牙2016 (Day 6- Madrid 食買Hea 的一日)

22.01.2016

本來小地勤今日既行程亦係去古鎮 , 但見另一伴興趣不大 , 所以決定取消原有行程 , 留係馬德里 Hea 遊 .

訓到好晏先出門口 , 無所事事下 , 去幫妹妹買東西 . 每次黎歐洲 , 總係一堆人叫我幫買名牌 . 我個人對名牌早就無熱誠 , 亦懶得幫外人攪退稅 , 只係兄弟姐妹不好推 . 用左我幾個鐘時間左問右問 , 終於完成任務 .

其實係 Prado 博物館附近有好多名店 . 既然黎到 , 唔買都可以入去朝聖 , 格下價 . 對比之下 , 法國比較平 . 講完 .

買完野 , 去找吃的 , 沿路經過一個公園仔 .


搵食既路上 , 行下影下 , 停下望下咁 ... 早知時間多成咁 , 就留兩三日去轉葡萄牙 .



 之後睇中一間好平既餐廳 , 就入左去休息.

每個 Lunch Set 只賣 10.9 歐 . 當然無尋日古城既 Lunch Set 咁好食 , 但都唔錯 . 有前菜 , 主菜 , 甜品以及餐前餐後飲 . 講緊只係 HKD 80 , 香港應該無可能吧 !

前菜 , 吸收尋日經驗 , 我叫個湯算 , 唔想一黎就一大盆通粉 ! 個湯好似豬骨菜乾湯 .

我老公的前菜是西班牙海鮮飯 ...

主菜的雞真係一般般 , 反而牛就真係好好味 . 我地留意到 ... 成個餐廳既人都係食魚同牛 ... 


甜品係布丁 , 但佢地既布丁同香港的大不同 .

係餐廳遇上一位自由行既日本大叔 , 佢一見到我地兩公婆就好開心 . 誤認我地係日本人 ... 之後大家都有傾左陣 . 見佢不停問人 Menu 上既食物係咩 , 餐廳幾點開 , 我估佢係出旅遊書的 . 一個人去旅行時 , 遇上黑頭髮既人 , 談上幾句就會開心足全日 . 我明白的 , 因為我都試過獨自出走 .

Prado 博物館個邊有條路通往火車大站 . 無所事事下 , 決定去打個轉 . 中途又遇上另一大型博物館 - Sofia .

亦遇上次前食過一次好正宗西班牙海鮮飯的小店 , 原來佢個 Lunch Set 仲抵 . 只賣 8.6 歐 . 究竟係小地勤錢多左定歐洲餐廳真係平左呢 ? 點解從前去歐洲 , 總覺得餐廳貴 ?


終於黎到馬德里最大既火車站 - Atocha . 外型同一般火車站差唔多 . 裡面商店亦唔多 .



唯一最特別就係裡面好似亞熱帶森林咁 .


晚上就去返 SOL 站既超市買野同行街 , 堅持行到 9 點先返酒店 , 成個行程都好悠閒 !