網頁

2015年9月25日 星期五

小地勤第一次上台分享

25.09.2015

印像中 , 公司每年都有扮獎比一班得到表揚信的同事 . 對比出面既同事 , 貴賓室既小地勤的確比較容易得到表揚信 , 因為我地來來去去都係得幾十個人 , 飛行常客來來去去都係見到我地幾個 , 常客們常常都會寫幾隻字或買野請我地食 . 我地跟客人 , 是朋友關係 , 所以比較容易得到表揚信 .

今年沒印像有被其他同事投票過 , 就直接話攞獎 , 真係有點意外 ! 前幾日先知道得獎後 , 要上台講一分鐘說話 .

內容都係多謝公司 ( 比個獎我 ) , 高層 ( 成日請我地食野 ) , 呀姐 ( 帶左我黎貴賓室 ) 以及我班手足 ( 當我攪緊 Complaint , 就要靠佢地睇住個場 ) . 多謝曬所有人之後 , 就剛好一分鐘 .

老闆同呀姐諗野好唔同 , 呀姐一直唔認同我發放一些唔正面既能量 , 但老闆卻明白依行就係沒想像中美好 .

小地勤好鐘意依行 , 但做左地勤 9 年 , 眼見客人一年比一年惡 . 我將地勤真實面寫出黎 , 就係想比有意加入既新朋友知道 , 地勤工作的確好辛苦 , 而當中既價值係要自己去發掘出黎 . 我好討厭攪 Complaint , 我亦唔鐘意比客鬧 , 但我又真係好鐘意個種攪好曬成件事後既成功感 , 又真係好鐘意同本來話要投訴我既人做朋友 .

想入行 , 現實一句 , 人工唔多 , 亦好受氣 , 但學到既又的確一生受用 . 都係個句 , 加入前 , 停一停 , 想一想 . 想好了 , 就堅持幾年 , 感受下搵錢有幾咁辛苦 . 唔吃過苦既人 , 就總唔學懂珍惜 .


職業病發作 , 總係特別人地既 display , 哈哈 !

2015年9月12日 星期六

2015/八月/重點遊札幌市

13.09.2015

今次住依間酒店 , 係正二條市場隔離 , 一落樓過馬路就到 , 好方便 .

酒店房望出去 , 仲見到狸小路同電視塔 .

每次黎北海道 , 都會黎二條市場行一圈 , 主要賣海鮮 , 乾貨同零食 .


男友堅持要食魚生飯做早餐 . 二條市場內有好幾間食魚生飯的 , 比較便宜同新鮮 .


一個 Set 可以試到 5 樣野食 , 其實都只係 HKD 百幾蚊 , 的確抵食 .


唔食生既我 , 大家分開行 , 佢有佢食魚生飯 , 我有我行狸小路 . 狸小路就係二條對面 .

今次第一次正正式式咁行狸小路 , 由尾行返上頭 . 成條狸小路放左好多狸貓.


行街前 , 小地勤都要食返個早餐 , 由於唔識日文 , 所以成日都亂叫野食 . 個早餐都幾貴 , 成一百蚊 , 但就可以感受下日本既 Cafe 係點樣 . 杯蜂蜜咖啡過甜 ... 日本人果然好甜 !

男友放我自己去行三個鐘頭 , 因為佢要去余市入貨 , 我已經去過太多次余市了 , 想自己行下街 , 格下價 . 可退稅的 7 仔 .

大部份藥店都有退稅同中國 Sales.

條狸小路都幾多野睇 , 之前幾次我都只係重點買野 , 要趕行程 , 依加終於可以輕鬆 Shopping 下 .

小地勤今次太早過黎 , 所以人影都唔多個 , 生果店都仲未開 .

都係孖人牌抵買 , 百幾二百蚊就有交易 , 原來香港孖人牌賣成千幾蚊一把 , 所以小地勤今次買左好幾把刀返黎 , 送屋企人 . 最近屋企人都分開曬住 , 每人都有自己個家 , 買野由以前一份一起分 , 到依加買野要分 4 , 5 份 . 結婚令一個家庭越來越大 . 我成日笑講 , 如果同我呀媽一樣每人生 4 個 , 呀媽就有 16 個孫 , 複式計算真係好厲害.

放到咁靚 , 怪唔知得咁多人花錢係夾公仔上 .

我的另一至愛 , 可惜依間既野都被人搶曬 . 係驚安下面仲有條地下鞋 , 但時間關係 , 我只行左一陣 , 就要返轉頭 . 

傍晚 , 我地又行過 . 其實驚安打橫咁行 , 就會見到 JR 站 .

中途亦會見到個電視塔 .

專登行去 JR 站 , 因為要幫人買野 .

今次終於離開到 ESTA 依個商場 , 可以四圍睇下 . 我仲以為 JR 會同歐洲既大站差唔多 , 結果係無咩野行 .

依隻牛牛令我想起 Salzburg 隻 " 仙樂飄飄 " 既牛牛 .


原來 6 算既日本 Starbucks 平咁多 . 小地勤平日都覺得 Starbucks 好貴 , 以前初入機場時 , 日日都飲 , 後來開始儲錢 , 發現唔飲 Starbucks 省好多 . 今時今日 , 小地勤只飲公司請既 Starbucks .

其實去 JR 站行下 , 仲有一個目的 , 係睇下坐 JR 係唔係真係好貴 . 自從拍拖後 , 次次去日本旅行 , 男友都係開車 , 我就快唔識係日本坐車 , 所以想睇下有無機會偷偷自己跟同事去北海道玩 . 由機場到札幌站要 1070 Yen , 都好抵 . 不過要玩埋函館既話就最好買 JR Pass , 另外札幌來回小樽都好似有一日 Pass , 好似都係千幾 Yen . 


之後又行返去 ESTA . ESTA 有拉麵共和國 , 比卡超專門店 , 藥店 ... 好多野睇 . 絕對係 JR 站附近最吸引人既商場 .

講都唔信 , 原來比卡超真係好有市場 , 都好多人黎依到買野 , 亦好多人叫我地幫佢買野 .




2015年9月11日 星期五

2015/八月/夜遊札幌市

12.09.2015

其實個 " 八月北海道之旅 " 仲未寫完 .

每次去北海道 , 小地勤都好鐘意去簿野影下相同行下 . 每次都會被依兩個招牌吸引左 .


今次仲行左去地舖型既拉麵橫丁 . 就係依兩個招牌前面既東橫 Inn 對面 .


我地就係門口等左都有一陣先入到去裡面食野 .

比佢吸引左既原因係 , 佢同平日佩開得幾片豬肉既拉麵唔同 , 佢有好多餸 . 其實我想食有成舊魷魚個款 , 但賣曬 , 唯有食帶子拉麵 . 我地都係 Share 所有餸 , 男友個碗有蟹腳 , 好多海鮮先 1800 Yen , 差唔多 6 算 , 可以食平日唔捨得食既野 . 如果他日又十算 , 就食最平個款好了 .


食飽卻遇上冬甩店 , 有幾隻款 , 我真係好鐘意食 .

仲買左個布丁返酒店食 , 後來發現並中一個係朱古力片 , 應該比錯左我地 . 聽聞好多節目有介紹過 , 但我都仲係鐘意便利店既布丁同咖啡凍多一點 .


Fancl 既產品係日本沒香港咁尊貴 , 依加六算 , 都有諗過用返佢 .

每晚既指定動作係行便行店買野食同野飲 .

其實札幌真係有好多拉麵橫丁咁 , 行行下又遇到一間 , 依間一樣好多人係門口排隊 . 男友之前都有食過其中一間 , 最鐘意佢開得夠夜以及價錢抵食過拉麵共和國 .



另一間想介紹既係食鰻魚飯 , 超好味 . 就係酒店附近 , 所以有一晚終於買左外賣返去食 .



成條鰻魚既飯盒約 2400 Yen , 依個價錢 , 平日小地勤真係唔捨得食 , 但六算就試下 . 好傳統咁 , 仲要晚晚都見好多人係門口排隊.



睇返個簡介 , 強調我地係唔識日本架 ! 睇圍畫而已 . 應該好有歷史都好出名 . 依間店正係得鰻魚買 , 無其他野食 . 大家有時間都可以黎試下 .