網頁

2018年6月16日 星期六

你的第一個農曆新年

16.02.2018

同事笑話我個囝同我一樣咁識計數 .

佢既出世 , 令我今年免稅額多 10 萬 , 佢既出世令我大條道理咁避年 , 但又收到好多利是 , 哈哈 ...

作為媽媽 , 你似唔似我都唔緊要 , 最重要你永遠開心快樂 , 無病無痛 , 我就心滿意足了 . 媽媽給你的第一封利是 , 我會幫你儲起佢 , 再作穩健既投資 , 希望你將來唔會為錢而煩惱 .


產後抑鬱

09-15.02.2018


回到家中的第一晚 , 屋企好靜 , 好掛住個囝 , 眼淚又係忍唔住咁不停流 .

我同自己講 , 就算平日大 Delay , 被客圍攻 , 我都頂得住 , 今次 , 我一樣頂得住的 , 坐月係唔可以係咁喊 .

我無請陪月 , 又遇上過年 , 本來奶奶話會黎幫我 , 但 BB 未返屋企 , 當然唔會有人想起我吧 ! 為左個囝有奶飲 , 我要自己煮飯比自己食 , 又要泵奶 , 又要洗定 BB 衫 , 執下屋 ... 其實唔覺得自己似坐月 .

每日 5 點 , 我就由頭包到落腳咁去醫院探個囝 . BB 訓係箱到 , 2 個姑娘要照顧十幾個 BB , 見到有父母黎 , 就會叫父母自己照顧返個 BB . 我同我老公雞手鴨腳咁幫佢換片 , 一打開 ... 竟然係屎片 , 對新手爸媽黎講 , 換片已經難 , 仲要係空間有限既箱裡面幫一個插住針既 BB 換片 , 好驚整痛佢 , 結果係攪到呀仔成身屎同尿 , 又要換衫同換被 , 被姑娘黑臉 .

其實真係幾唔好彩 , 係屯門醫院 , 我竟然無遇到幾個好人既姑娘 , 每一個都好似好忙 , 好唔想理我咁 . 我自問都唔係麻煩 , 仲會幫手照顧旁邊既媽媽 . 有時 , 我會諗 , 工作量太大先令姑娘咁態度唔好 , 又可能佢地對份工無咩熱誠 , 入職只係為左高人工 . 正如我份工 , 工作量大 , 所以好多同事都被人話黑口黑臉 , 唔夠訓又的確好難笑得出 .

順產唔代表唔攰 , 生完身體的確比較虛 , 每次出完去探個仔 , 返到屋企 , 我全身都會起風懶同出疹 , 以前我從來未起過風懶 . 我老公都勸我唔好去醫院 , 話我都要照顧好自己 . 但我真係好掛住 BB , 所以傷口再痛 , 個身再痕 , 我都堅持每日傍晚就攞住一堆物資去醫院 .

每次見到 BB 插住針 , 我都係會喊 , 覺得個囝好可憐 , 覺得自己好不幸 , 人地 D BB 仔又無咁既問題 , 我自己個囝就攪成咁 , 個排情緒好差 .

正當我煩緊呀囝既事 , 又到我呀媽出事 , 屋企既事令我更煩 . 現在回想起當時既情況 , 其實我應該係有輕微既產後抑鬱 , 好彩終於捱過了 .

與 BB 的首次分離

06-08。2。2018


正當小地勤天真地以為生完 BB 就是完結的時候,結果當然沒想像中簡單。

新手媽媽,傷口仲痛,病房爆滿,姑娘不足,根本唔會有人去理你。自己獨自照顧 BB , 不停餵奶,換片換到亂曬大籠,完全唔知要點做。幸好我囝好乖,病房 BB 輪住喊,我囝基本上無點喊,即時瀨屎瀨尿都無嘈,晚上亦乖乖自己訓覺。其他 BB 大喊,嘈到佢訓覺,佢都只係眉頭深鎖左幾下,完全不當一回事,繼續訓。

屯門醫院姑娘出名惡,我亦預左,所以我都無打攪過佢地。我起初仲思想好正面,覺得自己好幸運,傷口雖然痛,但行得走得,仲腸胃暢通無便秘,生囝過程亦沒想像中的痛同順利。BB 係產後房比其他 BB 大隻,每次答人地話係順產,差唔多 8 磅,我都好自豪,覺得自己咁細粒,但養到個囝咁大隻先出世,真係好有成功感。

2 月 7 日晚上 9 點,換屎片,見有血絲,我即刻同姑娘講,但姑娘無理我,正係話餵多 d 人奶就無事。晚上 11 點我再幫 BB 換片,睇住佢痾左少少血出黎,我又走去搵姑娘,姑娘話正常。我今次攞埋條屎片比佢睇,佢先好緊張黎望下。

姑娘即刻話我點解唔早出聲,我答 9 點我已經出左聲,你地話正常。唔夠10分鐘,兒科醫生黎左,帶走左 BB 檢查,個刻我好驚。半個鐘後,醫生話 BB 被送左去兒科,要同我分開,我安慰自己無事的,BB 被帶走,咁我咪可以好好休息。不過講就容易,眼淚都係忍唔住流出來。整晚我都訓唔著。好擔心會唔會就咁就無左個 BB 。

2 月 8 日早上,姑娘話傍晚 5 點半我就可以出院,反問我 BB 情況如何,我答唔知道,無人話我知我應該點做。姑娘話佢地唔係兒科個邊,所以都唔清楚,叫我過去兒科個邊睇下。BB 跟我同一層病房,兒科姑娘確認我身份後,帶我去見 BB . 見到 BB 訓左入箱 ,插住針,個刻我可以用情緒失控黎形容,姑娘講既野,我正係聽到炎症指數偏高,其他既都聽唔入耳,眼淚不停流,個身係到震,完全講唔到野。姑娘仲冷淡地講一句,洗唔洗咁激動。。。我諗我 EQ 真係比正常人高,咁都無爆佢,只係繼續流住眼淚話轉頭帶尿片同濕紙巾過黎。

之後我唔敢再一個人去睇個囝,因為我真係好驚。5點鐘探病時間,老公黎左,佢陪住我去睇個仔,我又爆喊,不過今次個姑娘好好多,安慰話種左菌,腸胃無問題,不過未搵到邊個地方發炎,所以要停食奶,吊營養針,叫我唔洗擔心,話營養針比奶仲好營養,又話呀囝訓得又精靈,好快可以跟我返屋企。

就咁樣,我老公同奶奶就接走左我,留低左 BB 係醫院,一住就住左 9 日。