網頁

2015年1月16日 星期五

歐洲自由行 * 2015 ( 平價酒店 )

小地勤唔係有錢人家 , 係熟識既地方旅行 , 我會寧願行遠一些 , 住更便宜既酒店 . 當然 , 歐洲太大 , 好多地方我都只係去過一次 , 唔叫熟悉 . 所以每次歐遊 , 酒店星級唔重要 , 最重要係又平又近車站 , 最好 5 分鐘內就到 , 咁就為至 Perfect !

今次全部酒店都係 Agoda 訂的 , 之前都係 Booking.com 或 Hostel World .

03.01.2015 ( 德國 - 柏林 )
Hotel Abendstern HKD 420 ( 一晚兩床房 )
Stuttgarter Platz 8, Berlin, Germany
由機場坐巴士去任何一個地鐵站轉地鐵 U7 線到 Wilmersdorfer Str 就到 . 不過酒店 , 應該係話賓館 , 門面很細 , 好易行過左都唔知 .

臨上飛機前 , 先訂的 . 雖然小地勤一早做好留係多哈既準備 , 但好似今次咁 , 竟然成功上機 , 所以係香港時 , 都搵定一些便宜又近既酒店資料 , 以備不時之需 . 

一睇仲用緊鎖匙 , 就知間酒店要行樓梯 . 驚喜地發現原來係有 lift , 但只經 1 , 3 , 5 樓 ... 地面同 2 樓係無 lift 既 , 所以小地勤要搬行李上酒店房 , 所以每次歐遊 , 我都只係帶細篋以及唔有咁多野去 .

間房好大好乾淨 , 厠所仲好光猛 , 唯一既決點就真係要行好黑既樓梯 .

窗外景色 , 算唔錯吧 . 起碼唔係假窗或貼住對面大樓 .

最鐘意佢包早餐 , 係歐洲 , 大部份酒店無早餐 , 而且街外食早餐都唔平 . 同附近兩間平價酒店比起 , 佢地價錢差唔多 , 但依間酒店就多左個早餐 , 所以我睇中左佢 .

選擇雖然唔多 , 不過食得飽就唔錯 , 起碼每人省左 4 蚊歐羅早餐錢 .



04-06.01.2015 ( 德國 - 柏林 )
Potsdamer Str. 129, Berlin, Germany
坐地鐵 U2 線到 Bulow , 一出站就見到 , 好大間 , 堅係酒店格局 .

間房係 L 型的 , 有好大個窗 , 出面有露台 . 房間又大又乾淨 , 厠所仲有暖氣同好光猛 . 唯一係早餐要收每位 8 歐元 , 所以我地每朝都會出去搵平過 8 歐元既早餐食 .

喜歡露台 , 但依個露台係同人共用的 , 所以唔見有人行出去 . 又可能只係供人食煙用 . 住依間酒店三日都落雨 , 所以都無行過出去 . 窗外景色係街景 , 望住地鐵站 .

07-08.01.2015 ( 奧地利 - 薩爾斯堡 )

Itzlinger Hof Hotel HKD 1202 ( 兩晚雙人床 )

Itzlinger Main Street 11

其實由火車站行過去約 15 分鐘 , 而且係一條直路 . 另一方法就係係火車站前面坐 Bus 3 去到下面依個站落車望去對面就見到 .

依間酒店都係要行樓梯 . 發現奧地利家庭多用黃燈 , 感覺溫馨一些, 但因為間唔夠光猛 , 所以心理上有點影響 , 少少聲就會驚驚地 . 間房都好大 , 仲有一張大 Sofa 床 , 基本上 3-4 個人屈蛇用都夠 . 

近既酒店一係比人訂曬 , 一係就下下 1500 一晚 , 小地勤邊住得起 . 咁唯有今次行遠一點 . 我最欣賞佢既早餐 , Display 得唔錯 . 令到個早餐好吸引 .


仲要有好多茶包選擇 , 旁邊放左好多茶壺 , 比客人成壺咁攞去用 .

環境好典雅 , 仲要連暖氣外面都加一層木 , 感覺好一致 . 


仲要放左部感覺有點舊既鋼琴係到 , 我試玩左幾下 , 音質唔錯 ! 薩爾斯堡果然係音樂之都 .

銀盛上咖啡係薩爾斯堡既傳統 , 估唔到係酒店食早餐都可以感受到當地人有幾重視佢地自家既文化 .

小地勤每朝都艮咁早起身食早餐 , 因為真係好鐘意佢個早餐 . 環境又好 , 食物又多選擇 . 其實好想試佢既 Handmake Chocolate Cake , 但真係太飽 , 每次都食唔落 .

黎到冰天雪地既地方 , 食返隻隻糖心雞蛋 , 成個人又暖又夠飽 . 其實見到小地勤係依間酒店影咁多早餐相就知我有幾滿意個早餐 . 假如佢地間房改用更光猛既燈 , 我會更加滿意 .

09-10.01.2015 ( 德國 - 慕尼黑 )
Hotel Dolomit HKD 1179 ( 兩晚雙床房 )
Goethestreet 11, Munich, Germany

由火車站 Starbucks 個邊方向出去 , 一直行 5 分鐘就到 . 之前小地勤都係住依條街 , 不過就要行 15 分鐘 . 間酒店除左位置同門面好之外 , 其餘都麻麻 . 講真歐洲地方咁大 , 我都係第一次住到咁細既房 . 房間格局完全跟日本那些小房間係一樣 , 連個厠所都同日本既一樣好似搭出黎咁 . 佢唯一一樣唔似日本小房間既野就係 , 比較殘舊同唔太乾淨 , 好采只係住兩晚 . 講真個句 , 小地勤上次住個間 Hostel 都比佢好好多 .

佢唯一好就係近同樓下有間開到 2000 既一歐元店 .




沒有留言:

張貼留言