網頁

2015年6月15日 星期一

2015/六月/北海道自駕遊/有珠山/函館溫泉*第一日

09.06.2015

花花飛北海道既航班時間每日不同 , 今次比上次早左差唔多一個鐘起飛 , 結果卻是同一時間到 , 流控係乘客同前線人員既惡夢 .

入境千歲機場後 , 見到叮噹歡迎你 . 亦係時候用機場既免費 Wifi . 叮噹手持屋仔個邊係服務櫃檯 ,有好多免費旅遊簡介 , 而另一邊係租借 Wifi , 小地勤專登照張相比大家參考下 . 我地租最平依個 1296 Yen , 只限北海道既城市先收到 , 山區就收唔到 .

如果租車 , 要去叮噹手持屋仔個邊 , 過左間便利店再落樓下既中間位置 , 會有一個 Information Counter . 以下租車公司都係搵佢 . 

坐巴士有問題都可以搵佢 , 旁邊有部售票機 , 唔太難用 , 亦影左幾張相比大家參考下 . 





第一日既天氣好差好差 , 橫風橫雨 , N-Box 既車內裡空間好大 , 缺點係開唔得快 , 男友自知架車係公路阻路 , 所以都不停讓人先行 , 下次可能都係租返架快少少既車 .

去函館行普通道路要六個鐘左右 , 所以決定比 4 千幾 Yen 行收費道路 , 都要行 4 個鐘 . 小地勤唔識開車 , 男友一個開 4 個鐘都幾辛苦 , 怕佢會訓著 , 所以我要不停同佢講野 . 仲有排都未到函館 . 由千歲市去函館差唔多 300 公里路 . 早知係登別或洞爺湖住一晚 , 咁就會無咁辛苦 .

中段佢真係停唔順要休息下 , 而我個肚都打曬鼓 , 全日正係食左個飛機餐 . 有珠山係最後一個休息站 , 點都要落車去個洗手間以及買補充品 .

被哈蜜瓜吸引左 , 都幾好飲 , 其實係日本又真係好難搵到難飲既飲品 . 便利店款式好多 , 每次都要諗好奈先決定到 .

依間便利店仲有熟食買 , 我指既係烏冬 , 拉麵個種 . 仲有好多精品 .

難得路過有珠山 , 影左兩張相 , 真係橫風橫雨 , 當時路邊顯示 11 度 , 大佬 ! 六月仲 11 度 , 真係凍到我手震 , 對焦唔到 .


幾經辛苦黎到溫泉旅店 , 好舊 , 不過基本既都有 . 小地勤間房 720 蚊一晚 , 包兩餐 , 可惜第一日已經錯過左個晚餐 . 間房都算望海 , 很不錯 . 咁既價錢 , 算超值 !


我無機會享用 , 而男友就講到好正 , 話有三個池 , 其中有個係紫色 , 仲有個露天風呂 , 佢忍唔住三個都試下 , 聽到我真係好想試 ...

酒店餐飯錯過了 , 唯有出外搵食 , 函館比札幌仲要早關門 , 基本上 1930 就全關了 , 連激安都只開到 0000 . 開車真係方便 , 開左一圈 , 終於遇上吉野家 . 香港就食得多 , 日本就未試過 .

款式無香港咁多 , 不過人地 24 小時又的確係值得讚 , 好方便 . 雖然係咁 , 不過我都唔希望香港再有行業係 24 小時 , 真係好辛苦 .

怪唔知得好多人話日本吉野家比香港既好食 , 的確 , 分別在於每粒飯都有牛肉汁 , 而唔係之後倒落去 . 

訓覺前似支函館奶 , 小地勤去旅行就會飲奶 , 因為真係好平 , 又健康 .

坐飛機同開車就用左一日 , 北海道真係好大好多地方值得去 .

沒有留言:

張貼留言