倒退中的香港國際機場

26.05.2015

小地勤睇住 2 號客運大樓建起 , 過多幾年 , 可能又要睇住佢被人執左 , 傷感 ! 老實講句 , 2 號客運大樓唯一一個用處就係多左櫃位 Check-in , 之後已經諗唔到佢仲有咩用途 .

最近香港天氣好差 , 小地勤返左 4 晚夜 , 被玩足 3 晚 ... 最痛苦個晚收零晨 0430 . 原因要多謝香港國際機場 , 雷雨 ATC hold , 大家都明白 , 連乘客都有眼睇天氣有幾差 , 有耳聽到個警號無停過 !

紅色警號一響 , 所有地勤都要離開停機坪 , 找一個安全地方暫避 ! ( 別怪我們 , 我們也是人 , 中左雷係會死人架 )

黃色警號一響 , 地面只可以有限度地運作 ! ( 我地地勤比一班樓下既叔叔好好多 , 雖然大家都係地勤 , 起碼我地年年人工都叫追到通脹 , 叔叔們個行 , 坦明講一句 , 有無人會比自己既仔女去做 ? 代表有錢都請唔到人 , 更何況公司唔出錢 , 更請唔到人 , 人地賺既錢真係有血有淚 )

起第三條跑道對所有機場員工來說 , 應該係惡夢 . 講返前幾晚小地勤既辛酸事 , 大家就會明白 ! ATC 過後 , 大量飛機延誤 , 不能起飛 . 雖然有飛機慢慢降落 , 但降落後根本沒有一個登機閘口比乘客離開飛機 . 

航空公司運作係一架飛機回來 , 落客 , 再上客 , 再飛出去 . 

可惜依幾日飛機到了 , 落唔到客 , 亦上唔到客 , 只可以 Set Delay . 機管局不停播 " 由於天氣惡劣 , 大部份航班延誤 , 請與地勤人員聯絡 " 聯絡地勤有用嗎 ? 不夠登機閘口搵地勤做咩 ? 機管局好野 !

降落到既飛機 , 被留係停機坪起碼 3 個鐘以上先有閘口 , 到佢有閘口 , 一班地勤極速工作 , 可惜目的地機場不是 24 小時開放 , 人家機場關閉了 , 飛機被迫留在閘口 , 直到當地機場重開先可以再飛 ... 又再循環無閘口 ...

一堆飛機把停機坪都泊到無曬位 , 上空想降落既飛機要繼續係上空飛到有位先可以降落 , 好彩可以降落就要等 3 個鐘先可以真正到港 , 唔好彩就一直繼續上空等 , 飛到無油 , 被迫急降澳門 , 海口 , 廣州 !

一個早就車位唔夠既停車場 , 依加要加多一個入口 , 增加用量 . 好笑 ! 

香港同航空有關既職位 , 人工根本唔高 , 出面做份文職 , 人工都多過我地幾千蚊 , 又要輪班 , 又要對住一班野蠻客 . 有邊個父母會將自己既小王子小公主送入黎 ? 機量增加 , 員工加辛唔加薪 , 一個人做十個人野 , 就算再有熱誠也要為半斗米折腰 , 我唔食 , 我屋企人都要食飯 , 迫到個個都轉工 ... 我十萬個支持大柴擺工 !

作為香港其中一間大公司 , 如此賺到盡 , 大家可能覺得空姐們攪事 , 影響到閣下既旅程 . 另一方面睇 , 一間公司肯被員工迫到要加返人工 , 代表其他小公司都要跟 ! 唔好忘記 , 大公司減人工時 , 其他唔關事既公司都會跟人地減 . 小地勤唔知點表達 , 不如大家諗下歐洲國家 , 員工成日擺工 , 所以佢地員工福利好好 , 返工亦有最基本既休息時間 . 相信 , 你地明我想講咩 !

可能會有人覺得小地勤實幫返同行講說話 , 但我唔係係大柴工作 , 大柴玩野 + 機場唔夠閘口 , 其他航空公司所有員工都一樣受影響 , 無限 Delay , 只因無閘口 , 花花乘客出名野蠻 , 小地勤無著數 ! 眼間香港機場依十年既轉變 , 真係感慨 ! 

眼間以前入職 8 千蚊 , 到依加入職都係 8 千蚊 . 以前一日返工做 4 班機 , 返 9 個鐘 , 天氣差先幫幫忙 OT . 到現在一日返工做 1X 班機 , 有返工無收工 , 訓到 6 個鐘已經要感恩 , 天氣好唔好都要 OT . 小地勤好有熱誠 , 好鐘意依行 , 所以我係依個機場做左 10 年 . 但我老了 , 我頂唔得好奈 , 亦無咩新血想加入 , 加入既都只係為左做一兩年 , 玩完就走 .. 機場跟航空業都好快玩完 !