相信黎到函館 , 大家都知道要去朝市逛下 . 記得第一次黎北海道 , 已經幾年前 , 當時所有野都好平 , 就算 BBQ 一隻長腳蟹 , 都唔洗 5000 Yen , 啖啖肉 . 食完果次之後 , 無再係函館朝市見過有咁抵既蟹 . 自始 , 我地轉戰札幌場外市場的朝市 . 可惜今年的蟹唔靚 , 店家明講得 4 , 5 成肉 , 而且吃起來 , 水溶溶的 , 跟之前吃過既啖啖肉差太遠 , 有點失望 .
日本既渠蓋都靚過人 , 五顏六色 , 好吸引人的注意 .
現在的朝市的確定價比之前高 , 唯一沒變的是樓上的海鮮飯 , 仍是 500 Yen 一款 .
依位領隊今個行程多多事幹 , 係要我地坐最入個張台 . 我地見無人 , 由佢自己一個坐過去 , 我地坐返比較方便出入既外圍 , 結果佢食飯又識走返過黎搵食 , 食完又走返去佢心儀果張台繼續坐 , 仲好認真咁睇餐牌 , 笑死我 .
釣墨魚很多人都會黎玩 , 今次係釣得最平既一次 500 Yen , 每日價錢都唔同的 , 的確係海鮮價 . 你睇 , 幾多人排隊 . 其實今次小地勤真係無點影相 , 因為要陪住個仔 , 唔可以四處慢慢影 . 唔打緊 , 我都去過咁多次 , 影黎影去都只會重複 .
釣完 , 有師傅處理 , 即刻做成刺身 , 即食 . 好新鮮 .
食完早飯 , 釣完墨魚 , 再係外圍行下 , BB 原來好驚熊仁 , 爸爸仲笑到咁開心 .
星期日 , 原來函館都興擺地攤 , 行左一圈 , 見似係賣二手野 , 真心覺得 , 香港人真係好有錢 . 幾何會聽到有人講著二手衫褲 .
今年天氣比較熱 , 早左見到赤肉哈密瓜 , 500 Yen 一小塊 , 買左比 BB 試下 , 以為佢鐘意食 , 所以後來買左一個返酒店 . 點知呀囝唔比面 , 唔再肯食 . 有時 , 做父母成日會以為買最好最貴比個小朋友 , 叫愛 . 但你喜歡的 , 你給予的 , 並不一定係小朋友想要 .
下一站係路過而已的山川牧場 , 自駕遊就係咁好玩 . 見到靚景 , 就落車影相 . 見到好食 , 就落車去食 . 第一眼被吸引係因為雪糕 . 北海道牛奶好出名 , 奶制品亦超好味 .
停車位置 , 就見到一間牛舍 , 所以覺得好真實 , 覺得牛奶就係來自依班牛牛 .
睇黎我囝囝對大舊過佢會郁既動物 , 都有恐懼感 , 你睇佢走得幾快 , 連呀媽都唔要 ... ... 被拋棄的母親 T.T
好想試牛奶 , 可惜我係事後睇相先知 . 當時小地勤同 BB 去左睇雪山 . 如果大家會去果邊行下 , 可以當依個牧場係休息站 , 停下來飲支奶 , 欣賞下美景 , 先再趕行程 .
老公買左杯咖啡味既雪糕比我 , 我好鐘意飲咖啡 . 奶奶就士多啤梨味 , 老爺就奶昔 , 老公就桃味 . 無論咩味都好 , 其實牛奶味偏重 . 但坐係外面既木造椅子 , 對住雪山食雪糕 , 好正 !
其實個度環境真係好靚 , 但我無影相 . 大家自己想像下藍天白雲 , 雪山草地 , 滿地小花 . 香港人很少機會接觸大自然 . 睇住 BB 係草地行黎行去 , 又攞住條草係到咬 , 係香港其他人實話骯髒 , 其實我平日見到 , 反應都不太大 , 所以經常被人話我係 Hea 媽 ...
鹿部町的間歇泉公園 , 大人入場費係 300 Yen . 其實我地一心係黎試溫泉蒸 . 食物不可以外帶 , 要幫襯佢地 , 我地買左蠔 , 雞蛋 , 豬肉片配雜菜 . 蠔超好味 , 好鮮甜 , 食左 3 盆 ! 1000 Yen 5 隻 . 真心推介 !
有職員看守的 , 所以唔好諗住混水摸魚 , 做個有品的旅客 . 職員會問你想自己一手一腳做定佢幫你的 , 難得黎到 , 就勁係自己黎啦 !
印象中 4 點半 , 就關門了 . 職員會將個蒸汽出口鎖上 , 安全為上 .
溫泉蒸是不收入場費的 , 但要係幫襯佢地既食物 . 而間歇泉公園入場貴就 300 Yen . 本身興趣不大 , 但一場黎到 , 四圍得依個景點 , 咁就入去睇下 .
叫得做間歇泉就係不定時地出現 , 大自然好奇妙 . 其實係到有驚喜的 . 就係可以一邊等間歇泉表演 , 一邊足湯 .
我無諗過 BB 鐘意玩水成咁 , 佢見我地坐係到浸腳 , 已經企圖伸手落去玩水 , 所以我幫佢換短褲仔 , 比佢一起感受下 , 用水幫佢洗下腳仔 , 體驗下 .
點知佢趁我地幫佢影相時 , 伸埋對腳落水 , 仲好開心咁踢下踢下 , 既然佢覺得唔熱 , 就由佢啦 . 熱的話 , 佢應該唔會咁做 . 三代同堂去旅行 , 一起見證住 BB 的足湯初體驗 . 旅行 , 增進感情 , 創做共同回憶 .
臨走前 , 打返個卡作記念 , 希望你大個時 , 睇返相 , 仲會記得小時候 , 我地有幾咁錫你 .
大沼國定公園 , 傍晚時份先黎到 , 商店關門了 , 旅客散去了 , 公園回復一片寧靜 , 黃昏時間黎到公園散步 , 很舒服 .
我只想帶住 BB 四圍去玩 , 見到佢跑呀跑 , 跌低左 , 抬高頭 , 繼續笑 , 我好開心 . 因為佢唔係正係識得扮咸叫媽媽 , 佢係一個樂天的孩子 . 唔想迫佢做大人 .
那一年 , 我跟老公第一次手拖手黎到大沼國定公園散步 , 有分 2 條路線 , 20 分鐘的及 1個小時的 . 那一次 , 我見到依對雪糕公仔 , 我好想有自己的孩子 .
轉眼間 , 我第 3 次黎依個公園 , 今次 , 我抱住我的小情人 , 跟依對公仔合照 .
家人見到我分享的相片 , 笑話我好似年輕時既呀媽 , 抱住細佬影相咁 . 其實 , BB 的確幾似佢舅父仔 . 相信將來會同舅父一樣 , 係 183cm 的男孩 !
如果大家有時間 , 不妨黎大沼國定公園散下步 , 吸收下新鮮空氣 . 依到風光如畫 . 其實北海道真係一個四季分明 , 又風光如畫既好地方 .
食草的小孩 , 我就係咁 Hea , 天生天養 . 我返工已經好忙 , 如果我連湊仔都要咁緊張 , 又要做資料搜集 , 又要讀兒童心理學 , 我怕我會有精神病 . 請不要再批評我不是 100 分媽媽 . 人是沒有完美的 . 不是嗎 ?
可能知道要離開了 , 憂鬱的少年 , 好不捨 !
沒有留言:
張貼留言