每年的五月是老公生日月 , 因此我地每年都會利用公司機票出外一轉 . 北海道的航班現在每天只有一班 , 起飛時間 , 每日都唔同 . 難得的 10 點起飛 , 到達日本才 4 點 , 都仲有時間玩下.
上機前 , 我利用 BOC 信用卡 , 帶曬成家人去我返工既地方參觀.
BOC 跟花花航空有合作的 , 一年可以免費 5 次入貴賓室 , 當然要坐花花航空先有依個著數 . 想知道更多 , 自己網上睇下 .
從前我跟我的伙伴都係小姐們 , 轉眼間 , 我們都升級做媽媽了 . Family Zone 係我們合力想出來的 . 公司 Budget 有限 , 我們只可以用有限 Budget 為小朋友們提供無限驚喜 . 最近我們決定為環保出一分力 , 把家中小孩不玩的玩具 , 帶返公司重環再用 .
大人眼中的無聊玩意 , 卻是小朋友眼中的好玩 . 我囝囝坐定定研究依兩件玩具好耐 . 我安安落落地食左個早餐 , 嘆左杯咖啡 . 賣花讚花香 . 我們貴賓室的飲食 , 以多菜少肉為主 , 有時客人會覺得有點清淡 , 但因為我們希望連小朋友都可以安心進食 .
我囝囝只有 15 個月大 , 早餐時 , 他可以食公司的白粥 , 通粉 , 麵包 , 栗米粒 ... 其實選擇很多 .
如果大家有機會黎小地勤返工的地方 , 建議大家可以去我地既 View Zone 欣賞下停機坪美景 , 嘆返一杯冰凍既 Autus Delight , 這杯特飲名字是我的舊伙伴想出來的 . 這個貴賓室 , 我大住肚就已經有份幫手 , 對這裡 , 我是有一定的感情 . 希望大家亦會喜歡我們的用心 .
大人小孩都愛的木馬椅子 . 除左淨色 , 仲有碎花圖案 , 記住黎到要坐住影返張相 .
今次是我們第 4 次帶 BB 外遊 . 很多人都講 , 攞苦黎辛 , 辛唔辛苦 , 都好睇個 BB 性格 . 小地勤 BB 係適應能力超強的小孩 , 沒有認床的問題 , 對食亦沒要求 , 白飯一樣大啖吃 . 日本水 , 飲過很多次 , 沒有太大問題 , 每天便便正常 . 不過建議大家 , 外遊要帶平安藥以備不時之需 .
你睇 , 爸爸笑得幾開心 . 多左個 B , 旅行的確多左突發事 , 但可以 24 小時對住 BB , 睇住佢既攪鬼行為 , 再辛苦 , 都值得 . 今個行程 , BB 學識數齊人先准開車 .
生日乘坐花花航空 , 係會有一定驚喜 . 空中服務員送我老公一張生日卡 . 驚喜是 , 明知我地係員工 , 都一樣做足 . 其實公司的確有很多有心做既員工 , 我們服務不比大柴差 !
4 點已經抵達新千歲機場 , 不過等攞車花了很多時間 . 最後 6 點才起行前往函館 . 建議大家出發前最好先係千歲 Aeon 補給 , 晚上的道站 , 第一個得一間 7 仔 , 第二個有珠山 , 飲品貴 200 到 300 Yen . 最後我地都無再搵休息站了 , 入夜 , 好大霧 , 成個氣氛好似拍鬼片咁 , 好恐怖 !
終於 10 點半 , 我們到達酒店 . 今次間酒店真係一般般 , 北海道既酒店依 2 年貴左好多 . 我訂的是 2 床房 , 無論一張床定兩張床 , 酒店房都係一樣大 , 所以好迫 . 但今次間酒店 , 三點打後 , 有免費飲料同小食 . 晚上好多人係到食酒店杯麵及飲清酒 . 酒店亦有大浴場 , 但因為我要湊住 BB , 所以得我無去參觀 ... 世上只有媽媽好 , 是真的 !
爸爸仲係學習緊做爸爸 , 但小地勤由大肚一刻起 , 已經要即刻成為一個呀媽 ! 唔會有人同我講 , 慢慢學 , 只會話我做得唔夠好 , 但每個人就好體諒老公 , 話佢係新手 . 世界就係咁唔公平 ! 做人呀媽後 , 小地勤的 EQ 更高 , 唔係用黎應付 BB , 只係用黎對付三姑六婆 . 所以我好明白 , 點解咁多香港女人生完仔都會有抑鬱 , 明明生 B 係開心事 , 卻變成一份壓力 .
咁夜先到函館 , 得返居酒屋 . 今日係老公生日 , 祝佢生日快樂以及早日覺悟 , 唔好再做豬隊友 . 日本居酒屋 , 就算再貴 , 都一定平過香港 , 所以 , 我都真係好少係香港食日本野 . 10 款刺身先 1980 Yen , 叫左兩盆 . 小地勤唔吃生 , 所以最後係返酒店食酒店杯麵 ...
舟車勞動的一天 , 你睇 , 我囝囝咁夜都仲咁醒神 , 所以小地勤真心覺得佢適應能力好強 , 就算生活模式跟平日唔同 , 佢都可以即刻適應到 . 我奉行 , 眼訓自然佢會訓 , 唔洗強迫的 .
其實我諗因為一星期七日 , 當中有三 , 四晚佢住麻麻屋企 , 兩 , 三晚又住我屋企 , 每星期又會去婆婆或者表姐屋企午睡 , 所以自小就訓練到四海為家 . 大人們 , 別低估小朋友既適應能力 , 其實佢地可能比大人更叻豬 . 如果有能力 , 趁 BB 2 歲前 , 一折機票 , 免費酒店 , 帶埋一起去旅行 , 其實辛苦得黎係好開心的 .
就算唔旅行 , 都多點帶小朋友出外玩 , 對小朋友黎講 , 依個世界任何地方都係一樣咁新奇 .
沒有留言:
張貼留言