八月開心事

21.08.2016

休養生息左兩個幾月 , 先再去旅行 , 終於無為去而去的感覺 , 而下次幾時再去 , 我希望可以隔多幾個月先 , 因為去得太密 , 真係有點辛苦 , 亦唔想為左唔浪費機票而勉強去 . 其實做地勤真係唔錯 , 放兩日都可以話早機去台北 , 晚機回香港 . 今時今日 , 想又賺錢又有得玩 , 都唔洗一定要 Working Holiday 啦 , 考慮下做地勤囉 ! 當然都一定有好慘好辛苦既時候 .

過幾日 , 小地勤又飛了 . 今次係 Duty Travel , 雖然我好想留係屋企 , 但難得公司包食包住 , 真係好著數 . 小地勤今次係代表 Lounge 到北京機場參觀以及參加一個同 Service 有關既 Training , 普通話奇差既我都有點擔心影衰 Lounge . 不過呀姐話作為香港既同事 , 我地當然很香港 , 普通話帶有廣東話係好正常 , 叫我平常心去參觀同玩下 .

聽聞 Duty Travel 係來回都坐商務客位的 , 唔知真定假 ? 又聽聞北京個邊間酒店都好 OK , 都唔知真定假 ? 我同自己講 , 一定要帶溫泉粉去浸浴 , 香港水費貴 ! 不過係北京既行程都幾趕 , 晨早 0740 飛機 , 2 日後再晚上 1930 飛返香港 , 每日都九到六上 Training . 相信係一個好難得既體驗 .

由於我既工作越來越多 , 所以呀姐都搵左個同事幫輕一下我 . 其實好感動 , 覺得終於等到好日子了 ! 因為有同事幫忙 , 所以我空閒左 , 因此要幫忙教新入職既同事 . 其實我都好鐘意教書 , 因為每次我教人時 , 可能我說話比較有趣 , 加上我又有好多故事 , 所以同事都唔會話眼訓 . 同事對我教既野有興趣 , 係好有成功感 . 不過 , 平日我都好少主動開口話教人 , 因為我係好尊重上級的 .

公司慣性一有地勤新入職 , Trainer 都會帶佢地成班人咁入黎 Lounge 參觀 . 最近有 Trainer 同我講 , 有好幾位新同事話睇左我個日記板 , 所以加入公司 . 仲話當佢地見到我真人時 , 都好雀躍 . 聽到都好開心 . 希望我無令佢地覺得誤入虎口 , 亦希望佢地可以捱到出頭天 !

每個新人都有被蝦既經驗 , 隨住時間一日一日咁過去 , 新人都會變做舊人 . 請記住自己當日做新人的無奈 , 能夠體諒新同事的苦況 , 唔厭佢地麻煩 , 才能夠成為一位好 Leader . 新同事幫到手 , 自己亦會輕鬆 , 教下人 , 何樂而不為 ?