返工如同打仗

02.04.2017

新既貴賓室即將開幕 , 大家都好似打仗咁 , 每日除左要做自己手頭上既工作外 , 經常要開會討論 . 其實自從我升左職後 , 工作比以前更排山倒海咁 , 每日返工 , 我都要做好多我未學過 , 未做過既野 , 的確無形中係學多左野,但我既壓力亦大左好多.

依間公司極速地發展緊 , 而我就開始腳步緩慢 , 已經跟唔上 . 一來 , 我已經唔再係當年無家室可以 On Call 36 小時既呀妹 , 依加既我只想輕鬆打份工 , 準時返工 , 準時收工 , 放工同老公食飯睇電視 . 二來 , 我已經小有積蓄 , 唔想再咁辛苦工作 . 咁樣既我 , 又邊好意思同並肩作戰既隊友呻呢 ? 佢地個個都好似鐵打咁 , 為工作努力奮鬥 , 而我卻好想急流勇退 .

近來 , 可能 3 個月既 Bonus 效應 , 好多 CV 出現 . 見識到好多野 , 有些人面試比我感覺唔太 OK , 原來卻搵緊 2 萬幾蚊一個月 . 有些人條件非常優越 , 卻只是來此搵一份跟我同職級既工作 . 條件唔好 , 係街外唔代表搵唔到錢 , 令我更想出去搵份輕鬆工作 . 條件優越的 , 如果職級同我一樣 , 我亦會感到好大壓力 , 因為最近我發現自己根本唔勝貴賓室任掃把一職 .

未升職前 , 大家都話工作不變 , 如果工作沒改變 , 我覺得自己係勝任的 . 但我地既掃把 , 每日要做既工作 , 除左開會 , 出唔同既 Handling , 處理唔同既大小事務外 , 亦要經常同外界去介紹我地既貴賓室 , 我自問係英語及國語有限公司 , 面對每日被 Project , 整 PowerPoint , 聽住一堆我唔明既 T&C , 計 Budget 既困擾 ... 坦白講 , 我深受打擊 , 因為全不是我的專長 . 其他掃把做到而自己做唔到 , 我都唔好意思拖累人 .

近來一個又一個同事既離職 , 負責教書既我 , 負責計糧既我 , 睇住 Resign 既 File 裡面不斷增加既新 / 舊同事既 Record , 其實我已經灰到極點而不說 . 作為掃把 , 要正面 , 要發放正能量 , 但其實我只係一個普通又感性既人.

我呻既對象只有我老公一個 , 佢都建議我 , 如果真係太大壓力就休息下先再慢慢搵工 . 做女人其實真係幾好 , 可以靠老公養 . 過幾日 , 貴賓室會有大事發生 , 坦白講 , 我未做足準備去面對 , 所以 , 我想放下所有工作 , 離開一下 ...