上年三月同一日 , 我帶住媽媽去北京玩左四日 , 因為時間太趕 , 有些景點行唔曬而令佢心掛掛 , 所以今年趁住老豆放假 , 而我又分到三個月花紅 , 就送多轉北京之旅孝敬一下佢地 . 都話生女好架啦 !
員工機票雖然有上唔到飛機既風險 , 穩陣派既我只會選擇超級淡季先帶父母出外 , 只係千算萬算算少左花紅過後 , 櫃台舊人少 , 新人多 ... 小地勤係 Closing Time 前的一小時已經開始排隊 , 眼見那位新同事走來走去請教別人如何 Check-In 職員 , 佢花左大半個鐘先 Check-In 到 3 位職員 , 而我面前仲有 6 位職員等緊 Check-In . 距離 Closing Time 只有 10 分鐘 , 我面前既 6 位人兄都仲係等緊個同事 Check-In ... 個刻我好慌張 , 心諗大煲了 " 班機咁大吉 , 如果因為同事 Check-In 慢而上唔到機 , 真係唔知點面對呀爸呀媽 " . 識人真係好過識字 , 當我四圍尋找在場同事幫忙時 , 因唔識佢地而一一被拒 , 仲受到白眼 " Closing 又點 ? 職員就係要排職員隊 ... " 心諗 ... 得返 5 分鐘 , 無希望時 , 比我搵到一位認識既掃把 , 我同佢求救 , 人家用左 3 分鐘就 Check-In 完我一家三口 ... 我只想講一句 , 舊人的確好重要 , 希望公司可以留到舊同事 , 亦勸大家一句 , 早一個鐘頭到係唔夠 , 除左會有窒車問題 , 職員 Check-In 太慢 , 仲會有保安檢查奇奈 , 說到底係機場各部門人手嚴重不足 , 你地留意下 , 依加到港等行李既時間只會越來越長 ... 吃力不討好既工作 , 真的吸引力不大 .
順利上機 , 準時到達 . 每次我都係係機場坐 $25 一程既機場快線 , 去到東直門站再轉地鐵去酒店 . 今次亦有係東直門地鐵站買左每人一張 "一卡通" , 即北京八達通 . 按金 $20 , 在北京機場的機鐵站可以退回全數按金連用剩既款項 . 買左佢 , 每次唔洗排隊買地鐵飛 , 直接 Do 入站 , 好方便 .
十二點左右就到左酒店 , 一點未夠就來到天壇公園 . 父母唔餓得 , 幸好對面有間小酒家 , 有魚有菜有飯有湯 , 百多元 , 幾抵食 . 食飽先願起行 . 二點半先正式踏入公園門內 . 淡季聯票 $28 , 1530 就停止賣票 .
門口影低個地圖 , 方便搵厠所 . 依個景點 , 我起碼黎過 4 次 , 所以唔會當失路 . 我們由東門入 , 因為一出地鐵就係東門 .
由東門經長廊行去最出名既景區祈年殿參觀.上天對我很好,每次的北京天空都很藍!
聯票除左包入園區同祈年殿外 , 亦包左皇穹宇 , 回音壁及圜丘 . 其實無旅遊書 , 上網搵定資料都好簡單方便 . 再唔係 , 每個景點都有個介紹牌 , 自己慢慢睇都可以 .
每個女孩子的男神第一名都應該係自己老豆 , 我由細到大都覺得我呀爸好型仔 . 每次幫我做既勞作都一定貼堂 ! 雖然佢近年老左好多 , 突然成頭白髮 , 但我都仲係覺得佢好有型 !!! 其實大部份人都話我似呀爸 , 大家又點睇 ?
爸爸話朋友成日講北京有個地方叫王府井 , 所以今次我就專登帶佢黎見識下 .
我一直想買幅山水畫掛係屋企 , 人地話有山又有水 , 加強運勢 , 一試無妨 ! 由 $80 一幅 , 講到 $30 一幅 , 成交 !
