23-27.11.2014
終於可以離開 Bali , 返香港 ! 係酒店食埋最後一次早餐 , 小地勤就返房執行李 , 而男友就爭取最後一刻 , 又去游水 .
前幾日係酒店附近 , 又被人 " My Friend " 咁跟左成大半個鐘 , 不停話我抽到頭獎 . 係咁叫我去拎獎 , 終於打開黎睇 , 原來我中左 七晚 免費酒店 , 不過算把啦 . 小地勤唔想被人再呃 , 亦唔打算再黎 Bali .
1200 點就 Check-out , 係 Lobby 等 Shuttle Bus , 我地前一日比左 20 萬包車返機場 . 雖然比黎既時候貴左 5 萬 , 但點都好過再比其他人呃 .
1300 上車 , 差唔多 1400 幾先到機場 . 去機場有兩條路 , 去酒店時係行快路 , 回燨場時係行慢路 . 我地班機成 1800 , 所以到左機場先搵 Post Office . 但原來成個機場得一個 Post Box . 就係 Information Counter 前面 .
轉眼返黎香港已經成兩星期了 , 但到現在都仲未收到張 Postcard , 好擔心寄唔到返香港 . 好擔心之前被人呃既郵票根本就係假郵票 .
行完成個機場 , 去左 Arrival Hall 食 Lunch . 今次相信機場唔會呃人 . Menu 每款 5 萬以下 , 飲品就有平有貴 .
餐廳環境 , 好開揚 !
好好味既 5 萬蚊河粉 , 咁多日最好味既一餐 .
男友話咁多日最好味就係依件雞 , 無燒到乾曬 . 5 萬蚊既印尼傳統餐 .
天氣好熱 , 機場冷氣好似唔太夠 . 飲杯青零水都要 2 萬幾 .
慶幸之前有上網睇別人分享 , 先無洗曬所有錢 , 一心以為離境稅係 15 萬 一位 , 點知加左價 , 現在係 20 萬一位 ! 都係個句 , 好采無洗曬所有錢 .
寄完行李 , 攞完登機證 , 過保安檢查前就要比每人 20 萬保護費先出到境 . 比完錢 , 就會貼返張野係地登機證後面 . 亦記住要好好 Keep 住入境時個張表 , 否則都係有麻煩 .
入到禁區 , 又係時候將所有既錢用曬去 , 買左香薰同印尼辣醬 , 最後 , 得返 4 萬 7 , 諗住買杯 4 萬 5 咖啡 , 結果唔找錢 ... 咁又被人昆埋個 2千蚊 , 一蚊都無咁離開 Bali , 返香港 .
1800 準時上機 , 有飛機餐食 , 但我個麵唔太好味 . 印尼口味飛機餐 , 好似怪怪地 .
23-27.11.2014
由中國廟向下行返酒店 , 會經過一個碼頭 , 兩個開放既海灘 .
依個碼頭 , 相信就係可以坐船去附近海龜島既碼頭 . 係到迫左好多旅行團既巴士 .
另外兩個海灘既其中一個之前已經係 " 五日四夜峇里島 ( 第二天 - 向上行 ) * 2014 " 介紹過 , 所以今次就講另一個海灘 .
其實依到係一間大型酒吧 , 但未到夜晚 , 所以無人 . 我地行到行左陣同坐左陣 . 吹下海風 , 踩下沙 , 影下相 , 悠閒咁過左一個鐘 . 大家睇相啦 !
行下行下 , 好快又返到酒店 , 太陽準備下山 , 小地勤亦曾爭取最後一日既機會 , 終於第一次係酒店落水 . 曾經 , 我學左 10 堂游水 , 亦激死左個教練 , 因為得我一個學左 10 堂都唔識游水 . 雖然係咁 , 但起碼個 10 堂終於令我學識左浮 .
我係 BB 池到玩水同半浮半游 , 我男友全程都睇實我 , 因為我的確學極都唔識 , 隨時會浸死咁樣 , 都的確幾嚇人 !
七點左右 , 中國團友開始返黎同落水 , 我地就急急讓返個池比佢地依班文明人 .
又係時候出發去食晚飯 . 今日選了一間露天餐廳 , 仲有人唱歌 , 好有情調 .
今次試左一杯 2 萬幾蚊既西瓜汁 , 咁多杯果汁中 , 西瓜汁最好飲同解渴 .
今次叫左 BBQ Duck , 男友話印尼既肉全是 BBQ , 有時燒得太乾身了 . 邊邊附送既炒通菜 , 超好味 !
上次試食左印尼綠咖哩 , 覺得好好味 ! 今次就試下 , 當地既經咖哩 , 個人覺得綠咖哩好味好多 !
試左間餐廳既推介 , 就係依塊漢堡排 . 一般般 , 因為我唔好肉 . 旁邊塊炸薯反而仲好味 !
今餐都係酒店附近既酒店餐廳 , 所以都係無呃人錢 . 食左 36 萬 , 約 250 幾蚊 HKD , 好合理 !
23-27.11.2014
每天睡到八九點就自然醒 , 之後就披頭散髮咁到樓下餐廳食免費早餐 , 款式都係大同小異 .
之後就上房睇電視 , 涼冷氣 . 而男友就會自己去泳池游水 , 生活很寫意 . 點知 ... 電視維修中 ! 沒差 , 睡午覺 . 係到既第四日 , 個人已經變得好傭懶 .
睡醒 , 起來 , 食個印尼杯麵就準備出發 . 今日打算去試下當地 Massage . 其實成條街都有唔同大細既 Massage 店 . 尋日被人呃完 , 男友建議搵間大型少少既試做 , 免得再因小失大 . 去左第一晚無呃我地錢既餐廳附屬 Spa 店 .
價錢比之前見到既貴一倍 , 但點都好過之後被人呃 .
其實男友無興趣 , 為左陪我 , 所以佢被迫要 Foot Massage , 而我就選了 Balinese Massage . 其實小地勤之前係大陸同泰國都試過做 Spa , 不過唔太鐘意 . 今次正係按摩都 OK , 接完成個人鬆左少少 , 特別係肩頸 , 終於無咁緊 .
寫明左幾多錢就係幾多錢 , 無呃 . 大型既始終信譽良好 . 本身都諗住尾數 4 千蚊比做貼士 , 結果老闆娘找錢時問我 , 可唔可以比 2 千蚊佢同事做貼士 , 仲話 2 千蚊就 OK 啦 . 想我省了 2 千蚊 !
之後仲當我地係大客仔咁問我地要返邊間酒店 , 安排免費車比我地 . 之前男友已經想行到最盡頭既中國廟睇下 . 因此個司機哥哥就車左我地去個邊 .
有中國人既地方就會有廟同打邊爐 ... 間廟其實無咩特別打左個轉我地就慢慢行返去酒店 . 打邊爐個間店 , 當然無人 , 大佬 30 幾度 , 唔洗錢都唔會想打邊爐囉 !
被人呃得多 , 係唔會再去小店買野食 , 去返連鎖店係最穩陣 .
23-27.11.2014
其實今日主要行程係去 Bali Collection . 行左 ... 我估差唔多兩個鐘 , 聽到行左咁奈都嚇親大家 , 不過 , 作為一個地勤 , 我地既看家本領就係腳骨力非常好 .
對 Bali Collection 既第一個印象係 " 下 , 普通商場 " . 十一月尾既 Bali 都仲係 30 幾度 , 見到聖誕機既一刻 , 覺得有點格格不入 .
係商場涼左陣冷氣就行左出去 , 轉頭一望 , 原來個商場係 Sogo 囉 !
出左 Sogo 有個水池 , 兩邊都賣傳統野 .
佢地既商店仔既格局好似沖繩機場既 Outlet . 有好多大品牌 , 但點計都係香港平 .
行到攰 , 可以黎喂下魚 .
又或者係公園仔到坐下 .
之前係泰國都見到有類似既擺設 , 東南亞既特色 ?
係到仲有間超市 , 有手信同食品 , 但價錢當然唔平 . 不過 , 我都有買少少野 , 因為大型超市唔會呃人 . 有時平 , 計埋比人呃都唔至果個價 .
係到仲有好多餐廳 , 仲會車埋係返酒店 . 我地搵左一間貌似唔貴既餐廳食飯 , 結果就被人呃多左 20 萬 ...
我無貪佢 buy one get one free 既優惠 , 叫杯 2 萬幾蚊既芒果汁就算 . 當地既果汁唔加水 , 結果杯飲品就好結 , 用飲管肯本飲唔到 .
男友就試左佢地既 buy one get one free 特飲 . 一杯要成 4 萬幾蚊 . 一心諗住買一送一 , 計返 2 萬幾蚊都算抵 . 點知比錢時 , 佢地扮曬野 , 話唔係買一送一囉 ! 怪唔知得剛剛見到有一家人 ( 中國人 ) 賣單時攪咁奈 , 原來係理論緊 .
我地叫左個海鮮餐 ( 2 人用 ) , 前菜係沙律菜 .
海鮮餐 , 好似好大盤 , 寫明 39 萬 + 20% service charge , 而當時 , 店員係門外用中文寫明免 20 % service charge , 所以呃左我地依班睇中文既人 . 事後賣單 , 都係個句 , 無講過 , 而門口張 notice 當然亦無左 ! 所以食完依餐飯係發自內心咁討厭依個地方 .
如果正食海鮮應該唔會有飽既感覺 ,所以有配飯 .
個海解餐有龍蝦 ,蟹 , 魚 , 魷魚 ...
賣單後 , 餐廳亦無再提話會免費車你返酒店 . 就算佢主動同我再講車我返去 , 我都唔會相信 ! 好采 Bali Collection 本身每小時都有一架 Shuttle bus 送去各大型酒店 . 當然 , 小地勤公司送的不是大型酒店 , 但附近都有站落車 , 所以返酒店不是問題 .
食左一餐 , 諗住只係 50 萬樓下 , 最後就 60 幾萬先賣到單 . 印尼四處都充滿呃遊客既人 , 感覺很差 .
