小地勤日與夜: 小地勤日誌

顯示具有 小地勤日誌 標籤的文章。顯示所有文章

2020年8月19日星期三

無薪假生涯

19.08.2020

今日係 2020 年的第一個九號風 , 小地勤被安排在家工作 . 由今年二月開始 , 小地勤每個月放兩星期無薪假 , 再加埋例假 , 勞工假及大假 , 小地勤每個月返工日數沒有超過八日 .

的確人工減半 , 不足一萬元一個月 , 起初有點不太習慣 , 但慢慢就接受現實了 . 公司對我算不錯了 , 起碼我還是活在貴賓室 , 有些同事早早就被解僱了 , 有些就被停工了 , 有些就被轉部門 , 在政府的保障下 , 相信今年 , 小地勤還是不會有改變 .

從前 , 小地勤工作很忙 , 亦很累 . 放大假才有時間陪囝囝 , 現在我跟一個全職媽媽沒有太大分別 , 每天早上陪吃早餐 , 陪玩 , 陪睇書午睡 , 煮三餐 , 煮藝大躍進 .

之前錯過了囝囝的成長 , 我只能從相片 , 短片中見證 . 現在 , 我終於有份參與 , 我真的很享受當一個媽媽 . 雖然二十四小時照顧 , 沒假期的確很累 , 但囝囝的一句 " 我好鐘意你 , 啾 " , 就是我的動力 .

有誰會明白一個要返工的媽媽 , 每晚下班 , 趕去奶奶家中見囝囝 , 換來的是囝囝無心的一句 " 我不要媽媽 , 我要嫲嫲 " 每次 , 我的心都很痛 , 強忍眼淚地回家 .

大半年的相處 , 我成功爭取囝囝的心 , 現在 , 小地勤一要上班 , 他會有不捨的樣子 , 問媽媽 " 下班會接他回家嗎 ? " 坦白說 , 我真的不想再上班了 , 我只想留在家中陪他成長 .

因為小地勤之前真的沒有時間照顧他 , 他是寄養在嫲嫲家中 , 老人家照顧真的不能要求多多 , 所以囝囝被評估說話不合格 , 這大半年 , 我花了很多時間陪他看書 , 畫畫 , 聊天 . 訓練他的體力 , 由起初不會離地跳 , 到現在識跳舞唱歌 . 由之前不懂圖形顏色 , 到現在中英文都識 .

由之前要人餵吃飯 , 到現在自己吃 , 仲識用杯飲水 . 由之前唔識去厠所 , 到現在開始戒片片 , 著底褲仔 . 由之前唔肯刷牙 , 到現在識早晚叫刷牙 , 識吐水 . 仲越黎越貪靚 , 陪媽媽一起化妝 , 真係大個仔了 .

疾情底下 , 我們長困家中 , 日對夜對 , 感情深厚了 . 去任何地方 , 一唔見小地勤 , 就會問 " 我媽媽呢 ? " 你 , 我都已經識分了 . 假如不是疾情 , 相信我不會有時間見證他的成長 .

某天 , 跟其他同事提起韓國有小朋友中了肺炎 , 要被帶走隔離 , 媽媽不怕死地要陪到底 . 假如換作我 , 我也會這樣決定 . 四月中某天晚上 , BB 發燒了 , 小地勤以為係冷氣凍親 . 零晨收到老公朋友通知 , 老公也發燒了 , 入境澳門時被捉到醫院隔離 , 情況未知 . 老公視像我 , 叫我自己留意體溫 , 又說自己會害死我地 , 小地勤真心被嚇到了 .

幸好擔心了一個晚上 , 只是虛驚一場 , 老公早上的檢測結果是正常 . BB 低燒了一晚 , 中午亦出疹了 , 就是玫瑰疹 , 我才放下心頭大石 .

某天早上 , 囝囝突然流出 "血淚" , 診所叫我即刻帶佢去急症室 . 屯門醫院急症室出名等得耐 , 我孭住佢同一大袋野企係到等左七個鐘頭先見到醫生 . 那天真心累 .

最近又跌傷了 , 夏天令到傷口發炎 , 每日到診所洗傷口 . 養兒一百歲長憂九十九原來就是這樣 . 大家如果睇完小地勤依篇日記 , 記得回家擁抱你的媽媽 , 每個媽媽都係偉大 !

2019年12月28日星期六

28.12.2019

原來媽媽的工作是 24 小時無休止 , 早上要上班 , 晚上湊 BB . 放假做家務兼帶 BB 回娘家見公公婆婆 . 放連假就去日本跑景點 . 一日 24 小時好似都唔夠用 . 上網 , 打日記 , 煲劇 , 睇小說 , 已經沒有這樣的閒情 .

由於放假放多了 , 而工作量沒減 , 工作日數少了 , 自然每天上班也很忙 . 相信大家都知道花花航空最近經常上報紙 . 小地勤沒有太大的感覺 , 因為新聞都追擊了花花航空一年有多了 , 每次都話佢捱唔過 , 但又每次都捱過了 . 作為小員工 , 最重要係有糧出 , 其他既事亦唔輪到我去擔心 .

最近很多朋友都跟小地勤聯絡上 , 8 成係問 " 買左機票點算 " , 其餘係關心我的生計 . 小地勤出名慳妹 , 點都有點積蓄 , 就住用的話 , 10 年唔做野都無問題的 . 其實我真係好想全職湊 BB , 好想見證佢既成長 , 只係現實不太容許 . 如果真的機會來了 , 咪回家湊仔囉 . 都無咩好擔心 .

今年既時間好似過得很快 , 話咁快聖誕節就完了 , 又準備到農曆新年 .

我真係好希望係 2020 年到來前 , 可以清左未完成既遊記 . 近來 , 放假多了 , 旅行亦多了 . 趁仲有能力 , 希望帶 BB 去多幾次日本玩 .

2020 年中 , 希望年頭的鹿兒島之旅可以成行 , 我好想帶 BB 去 sun messe日南公園影相 , 亦好想去埋櫻島觀光 .

2020 年再會 ~

2019年4月9日星期二

有隻雀仔跌落水

10.04.2019

從前成日唱 “ 有隻雀仔跌落水, 跌落水, 被水衝去 … “

明明係好慘既歌詞 , 但小時侯既我, 總係唱得好開心 …

最近 , 貴賓室經常被雀仔睇中 , 佢地喜歡站在高處 , 睇準機會飛落黎搵食. 客人都算係咁, 無為此而投訴. 香港地, 好小事, 都好容易變做大事, 大家明白的, 不用我多說.

前幾日又有隻好大隻既黑色雀仔黎到貴賓室搵食. 作為地勤, 好為難, 要係客人投訴前做驅逐行動. 只係我地無諗到, 機管局既方法 , 原來幾殘忍.

最終雀仔跌左落黎, 受傷了! 我地成班同事好自責, 事後檢討, 以後唔攪佢地. 這個機場, 其實係佢地屋企, 我地霸左人地地方, 仲整傷佢地, 又的確係我地太不近人情.

或許係我地既背景音樂吸引左雀仔們, 我地都係時候考慮轉下音樂.

希望機管局無呃我地 , 會放生隻雀仔 …

2019年4月6日星期六

良善地勤, 被客欺

07.04.2019

這是一件很久以前的投訴事件...

某年某月某日, 貴賓室要進行美化改造. 那個晚上, 當值同事跟往常一樣確保關門前沒有乘客藏於貴賓室任何一個角落. 何解用 "藏" 一次, 因為太多經驗告訴我們, 乘客喜歡玩捉迷藏, 目的免費過夜. 特別是那些轉機乘客, 坐第二天早上航班, 黎既時候就坐經濟 , 走既時候就坐商務.

不是乘客錯, 是香港奸商錯, 點解酒店賣咁貴一晚. 是公司錯, 點解我轉機, 明知我要過夜, 但貴賓室不是 24 小時開放. 是職員錯, 點解你地可以收工關門唔比我休息.

講得太遠 ~

安全地將個場交比師傅美化. 我們等了很久, 申請了很久, 終於獲批的美化活動. 勤勞的師傅不停地搬物料進出 , 好幾次又有乘客想衝入黎過夜 , 都被一一勸退. 終於限時前, 師傅完成了基本美化.
早班同事回來 , 聽師傅講解 ...

結果在最裡面的暗角位發現了 3 名正在熟睡的乘客 , 當中 2 位是我們尊貴的會員, 另 1 位是沒有身份的尊貴會員朋友. 同事跟師傅們大驚 , 拍醒客人細問航班 , 心諗 " 大佬 , 唔好玩野 , 唔好同我講 , 你係坐尋日航班 ... "

幸好 , 他們是轉機客人. 人家很有錢的, 只是見你們貴賓室門沒鎖, 才進來看看. 人家知道你不是 24 小時開放 , 誰叫你們門半開 .
同事溫馨提醒客人, 我們店還沒開始開門做生意, 門前已經寫明 " 請勿內進 " . 尊貴客人表示沒看到. 同事邀請客人先離開半小時 , 待我們小店開門才做佢生意 , 並重申他們的朋友是不能內進的, 除非網上付錢 .

整件事, 是我們的錯, 同事當刻應該把事情鬧大, 報警. 而唔係溫馨驅逐.
大佬餐廳呀 , 門半開, 寫明唔入得 , 你都仲當自己屋企, 又飲又食, 仲要帶埋朋友. 你地打劫完我地, 仲要寫信去公司投訴我地趕你朋友走. 個腦有問題嗎 ?

幸好管理層覺得這個時候, 根本不應該仲同客人講 " SERVICE " 而係 " SAFETY " . 仲讚同事咁惡劣既情況仍咁好態度對待每位客人. 客人投訴行為實屬無賴之舉.

這個世界, 西客何其多, 根本不分種族跟地域 ...

如有時間, 好想再分享多一篇, 生日大曬的港女 !!!!

2019年3月24日星期日

麻疹大爆發

24.03.2019

小地勤每日忙返工 , 忙湊仔 , 早就已經與時代脫節 . 最近 , 經常被問到機場麻疹情況 , 又難怪長輩們咁擔心 , 一來小地勤一家都幾常去日本 , 二來小地勤 BB 仲係一個抵抗力唔高既 BB .

3 月 15 日 , 完成了三次日本之旅 , 先帶返 BB 去打一歲麻疹針 , 現在想起 , 都算幸運 . 原來日本 , 台灣 , 泰國都係高危地區 , 而作為母親既小地勤卻帶住一個未打過麻疹針既 BB 外遊咁多次 ...

3 月 23 日 , 衛生署通知航空公司有免費麻疹針幫有需要既職員補打返 . 衛生署呀 ... 23 , 24 號係星期六日 , 無錯 , 地勤係無紅日放假的 , 但你通知既呀頭們係放星期六日的 , 咁你正係通知佢地 , 再由佢地通我地一班前線 , 其實感覺到你地衛生署只係想交功課 . 比人知道你已經通知左 , 職員無黎而受感染絕對唔關你地事 .

3 月 24 日, 小地勤都有去打返支針 , 自己個年齡層係高危 , 再加上我又的確常去日本以及會接觸到乖客 . 原以為 1-2 個鐘就可以完成 , 結果免費是有代價 , 等左一個鐘看到我聽講座 , 其實網上都有得睇 , 但唔明點解唔聽講座就唔准做評估 .

排左一個鐘入到去 , 所謂講座係播片 , 播緊都唔知 , 因為勁細聲 , 個畫面仲細過個電腦屏幕 , 直到被趕去做評估先知已經播完 .

做評估請玥掛隊 , 又排左一個鐘頭 , 好多職員起哄 , 不停聽到有人鬧完一輪 , 就放棄 . “ 唔洗做咩 ? 要人排咁奈 ! “ 職員為香港機場作出努力 , 為乖客航班準時而被迫放棄打針 . 係香港 , 其實仲有一班不計自身安全為大眾服務的人 . 但首當其衝受感染再被咒罵亦係我地 .

好 ! 堅持排隊 , 所謂評估就係問你幾時黎月經以及提醒你打完針的三個月 , 不能懷孕 ! 其實可以打針未呢 ?

評估完就耍再排隊打針 , 好多職員無帶身分證 , 因為衛生署覺得無身分證係唔可以的 . 機場職員 , 唔會個個都可以帶住個袋工作的 , 禁區證就已經係我地既身分象徵 , 其實既然要用身分證 , 點解唔係電郵內提醒要用身分證登記 . 好多職員排完兩轉 , 要跑返出去禁區外的 Locker 攞返張身分證 . 趕到返黎 , 被通知 5 點活動會完結 , 所以 4 點唔再收人 . 但電郵寫住時間是 2 點到 5 點 .

等打針 , 再排左 1 個多鐘頭 , 用左幾秒鐘就打完支針 , 但我就花了 3 個半鐘時間 . 政府免費 , 當然係咁樣 , 唔等得 , 自己出去比錢打囉 , 聽講要五百幾蚊一支針 .

我應該算好彩 , 我有個 24 小時 on call 既經理 , 係佢通知我地 , 我先知有免費針打 , 佢知道我地幾位同事係高危 , 就比我地放低工作先打針 . 的確 , 員工受感染 , 要被隔離的 , 起碼一星期返唔到工 , 身邊既同事亦一樣會被隔離 , 到時無曬職員 , 邊個為乖客服務 ?

2019年2月12日星期二

新年快樂 2019

12。02。2019

話咁快，就過年了。今年過年，好趕，好忙。

感覺聖誕才剛過去，終於做完曬 2018 年既工作，係 2019 年 1 月中放左幾日假期去旅行。

回到香港，又開始 2019 年既工作，什麼預算呀，找數呀，開單呀，不停被人追咁，好趕好趕。

直到某日，我才發現，機場已經換上新年裝飾。係機場工作了咁多年，都仲係覺得香港機場好靚。只可惜每日趕返工，趕收工，沒時間停下來多看一秒。從前當前線，反而有閒情去欣賞機場，去新餐廳吃飯，去新店舖閒逛，現在水都無時間飲。點解我感受唔到升職既好處 ?

可能大部分打工仔同我都係一樣，夾心階層，老闆只要成果，你下面幫倒忙既人卻比正常人多，最後工作量不斷增加，人工卻不見加，怨氣就生出來。今年花紅沒有著落，士氣比以前仲差。有些同事仲不停同我講，如果無花紅，就會辭職。我心諗，有無花紅，你地咪一樣會辭職。有，就等多 1 個月，無，又係要 1 個月通知。我都無心亦無時間去浪費口水係無心做落去既同事身上。

我都開始放棄了。但我經理卻沒打算放棄依班同事咁，仍然是用自己既錢去買零食呀，飲品呀～從前我們不會不停屈經理的，大家都知道，佢都只係打份工。現在的同事係超級過分的，一個月屈人幾次，當老奉咁，見到，都眼火爆。

其實就算我地唔屈經理，佢都一樣會買野請我地食。講起今年，結左婚既同事都竟然係開會時討論起派幾多錢利是。從前雙封 20 蚊，有些比較友好的，會派 50 蚊。2 年，這裡變化很大，走的都走了。從前，我視她們為出生入死的好朋友，現在，對不起，我沒法當現今的同事為好朋友。今年我決定做一個狂人，派 10 蚊。

結婚了的幾位同事平日不會討論利是問題，今年會想起的原因，除了沒花紅，就是歸屬感下降。同一個地方，同一份工作，但隊友卻改變了。開心錢，也有分值得與不值得。對我來說，每個人在我心中都有不同的價位。我。很現實。

小地勤今年無執過屋，又返工又湊仔，真係好忙。我只做到洗衫，掃地拖地這些簡單工作。我自問不是一個稱職既媽媽。年廿八，兩公婆去拍拖食飯，好奈無試過慢慢去享受一餐飯。

一直好想試下屋企樓下既西餐廳，每次路過都見到好多人坐係裡面，令人好想入去試下。果然好好味。一份沙律，２份主菜，２杯咖啡，２百元多。平日，我跟老公都係食茶記。食西餐，好似上世紀發生過既事咁。ＢＢ出世後，生活果然大轉變。

食完依餐飯後，又忙足一星期。我的小寶寶生病了，爺爺傷風，傳染埋嫲嫲同ＢＢ。小地勤又要返工，好彩老公放一星期新年假，每晚我都沒睡好，ＢＢ發燒又嘔，做媽媽既預左無覺好訓，唯有返工午飯時眠一眠。

年三十才想起仲未包利是。團年飯因為大家都病了，所以取消了。但奶奶仍為大家準備了自制盆菜，讓我們在家也可以做節。

就這樣ＢＢ病住過年同病住咁過佢既一歲生日。作為媽媽，只希望ＢＢ身體健康，百病不侵。結果當ＢＢ好轉時，到我開始作病，幸好婆婆過黎幫忙，世上果然只有媽媽好！

2019年1月8日星期二

2019 年的展望

09.01.2019

最近花花航空經常上報 , 嚇倒一眾公司既 FANS .

相信無人希望花花航空倒下 . 花花航空令香港人坐飛機好似坐巴士咁簡單 . 價錢便宜 , 服務唔錯 . 好多人一路鬧 , 都一路繼續支持 .

小地勤在花花航空快 8 年了 . 最近朋友問我有無被 Cut 福利 , 老實講 , 沒有 Cut , 反而加多左 4 日大假 , 由以前 14 日 , 加到每年 18 日 , 過多 2 年 , 小地勤就會有 20 日大假 . 機票暫時沒改變 , 仍是一年 6 套免費票 . 人工 , 每年都是 4 月跟大圍咁加 , 相信今年都沒有例外 .

花花改變左小地勤既生活 , 除左在機場返工 , 基本上小地勤都在旅遊 . 2018 年 , 小地勤去左生仔 , 為左 BB 都留在香港 , 無得出去輕鬆下 .

2019 年 , 小地勤已經做好準備 , 訂好曬酒店 , 決定帶住 BB 四圍去 . 黎緊 , 小地勤將會第一次踏足東京依個地方 , 人人都去過 , 我都想去見識下 .

究竟 , 東京有咩咁吸引香港人 , 小地勤真係好想知 . 日本平酒店 , 平消費地區有很多 , 點解一個酒店又貴 , 消費又高既地方 , 可以吸引到咁多遊客 ?

去完返黎 , 再同大家分享 !

2018年12月10日星期一

又到聖誕 2018

10.12.2018

又準備過聖誕節了。今年機場提早左慶祝，11月中已經佈置了聖誕燈飾，讓旅客可以提早感受節日氣氛。

已經忘了係機場過左第幾個聖誕了。小地勤記性越黎越差，人老了，很多事都記唔住。三十出頭，唔認老都唔得。返工越黎越多同一個生肖既同事。再過多幾年，新入職既妹妹仔，分分鐘，我同佢呀媽同一生肖。哈哈。。。

講返近排，公司睇錢好重。所有無為公司帶來收益既洗費，基本上都唔批。就算批，都會左拖右拖，問長問短，無以前咁豪爽。大家都知道，貴賓室同事很喜歡過節，節日返工，客人特別 nice 。

聖誕節是大節，小地勤都花左差唔多 2 個月，先 R 到公司比錢買聖誕裝飾物，仲要寫萬言書同貨比三家先攞到 2 千蚊。真係有血有淚，希望客人今年都會因我地既小手作而開心。

臨近聖誕，又係升職既日子，近年改制，唔係上司去推薦，而係同事去自薦，結果當然有人歡喜，有人愁。公司要求最少係果個職級有一年經驗，先可以自薦升級，但越黎越多同事唔跟遊戲玩法。有時公司都會破例，但唔破例時，其他人就說不公平。

再咁樣落去，士氣又差，首當其衝，又係我地班舊人帶領得唔好。依加年輕人，好識為自己爭取機會，卻無視責任。小地都覺得唔公平，別人就升職加薪不加辛，小地勤就只有加辛不加薪。但現實就係咁，現實改變不了，只好改變自己既心態。

祝願大家有個快樂既聖誕。

2018年12月6日星期四

見慣風浪，沒害怕

06.12.2018

好奈都無寫過工作上既事情。最近終於有返點私人時間去做自己野。

小地勤平日返工一得閒，就好似隻牛咁勤力，為每個月頭月尾做好準備。某天，同事一言驚醒夢中人。同事說“小地勤你日日都咁勤力去清手上工作，話希望月尾唔會咁忙。結果每個月頭月尾都一樣見唔到係準時收工，一樣做極都做唔曬。你又何苦日日都迫自己唔休息呢？”

諗返生完 B 返黎，工作量比以前多。我曾經懷疑係自己未適應，但朋友都話我根本一返黎就已經上曬手咁，不停執返依半年既屎。無奈公司發展太快，每個部門都在爭取表現，卻把所有文書工作推落貴賓室，再適逢年青一輩做事總唔夠上心，錯了，唔認不單止，總點提都係錯。負責最後把關的我，每個月好似癲婆咁搵錯處再修正。有時，我無眼屎乾淨盲，寧願 delete 曬，再做過。重做，比搵錯處再改正來得容易。

臨近年尾，公司市氣奇差，不單試過遲出糧，仲不停 cut 航點，cut budget 。最後，傳出公司唔掂，就快倒閉既消息。人心惶惶下，幾位最高領導人請辭。不加薪，不發花紅的消息從不同既部門傳出。

老實講，花花剛慶祝完 12 周年，小地勤亦已經係 3 朝員老，見慣風浪。當年花花 delay 滾雪球咁，地勤大霸工，飛機無錢找數，無清潔，無推機。。。咩都齊。間公司都未玩完。今次又算得了什麼?

機場永遠等人用，一間玩完咪去另一間囉。怕什麼?

或許，今次捱得過，又係加薪留人既時候，有危便有機。

2018年1月30日星期二

2018 年入院記

31.01.2018

轉做文職後的小地勤 , 真係唔明點解比以前做前線時更忙 , 更多煩惱以及更唔開心 . 可能我對自己的確係有一定要求 , 每當我做好一件事 , 加給我的 , 不是讚賞 , 而係更多更多的額外工作 . 上頭對我太信任吧 ! 有時 , 我都會心裡不停反覆地問一句 " 公司仲有大把人 , 點解次次都係加比我做 ? 點解無人體諒下我個肚已經籮咁大 ? " 心理調節完後 , 都係繼續默默做 .

正當我為 2017 年年尾努力埋數同清數 , 又要為 2018 年既所有野去作準備 , 但又要應付一堆唔知係咩 , 本身唔係我負責既事既時候 , 我被同事既感冒菌傳染了 . 係 2017 年既最後一日開始作病 , 但因為太多野未清曬 , 而接手我工作既同事 , 每一個都係話要係我放產假前先放放左假 , 怕到時無假放 , 結果我都係病住咁返 2018 年既 1 月 1 號 . 返完個一日之後 ...

我半夜就入左醫院了 , 感冒 , 胃炎 , 子宮收縮同出血 ... 當時我未夠 35 周 , 係醫院 , 我食咩都嘔 , 最後嘔埋黃膽水 , 醫生轉左 3 隻止嘔藥比我都無效 . 嘔住咁去完成所有既檢查 , 胃痛到唔再覺得肚痛 .

終於當晚轉左另一特效藥 , 我先止到嘔 . 之後就係醫院住左 2 個幾星期 . 醫生本身想要我 37 周就催生 , 但後來見我休息左 2 星期 , 突然止左血 , 情況穩定返 , 就放返我返屋企休息 , 叫我等作動先再入院 .

坦白講 , 如果真係未夠 35 周就生 , 呀仔得個 4.4 磅 , 我會好怪責自己的 .

當我係醫院的時候 , 不停回覆同事既問題 , 話曬我的確未交低好所有野 , 當然 , 就算我之前講左幾多次 , 同事一日見我人係到 , 無幾多個係會上心聽 , 個個都一心諗住拖到最後先 . 其實我既工作應該係厭惡性 , 無人想接 .

平日大家覺得好簡單既野 , 當要佢地做時 , 個個都話原來好難好複雜 . 上頭應該都好頭痛 , 因為佢地無諗過平日我係真係做突左 , 依加其他同事接手 , 上頭好似唔太滿意同事表現 , 不過我自己都自先身難保, 我都係好好地專心養胎算 .

1 月 1 號返完工之後 , 我就病假 , 2017 既大假 ( 一日都未放過 , 因為太忙 ) , 2017 未清完既勞工假 ( 因為 2017 年時 , 被催放 2016 既大假 ... ) 以及 10 星期產假和 2018 年既大假 ( 我唔用左佢 , 相信要等到 2019 年先有得放 ) 一次過咁放到 5 月中先會再返工 .

公司的確唔會無左邊個同事就停止運作 , 我亦唔需要想太多 . 等再返工時 , 先再諗去向吧 ! 我依加只需要食同訓 , 最近檢查 , 醫生話 BB 已經有 7 磅多 , 所以應該 40 周前要催生出世 , 我係細碼媽媽 , BB 因為我控制住食量先由大碼去返中大碼 . 希望我可以自己生到佢出黎 , 唔洗食 " 全餐 " !

2017年12月1日星期五

又係沖繩＊2017＊十一月＊仔仔大豐收

04-06.11.2017

航空公司要求懷疑 28 週的女士提供醫生證明才可以坐飛機 , 為免麻煩 , 小地勤於 26 週時 , 又再飛了一轉沖繩 . 2017 年的免費票也終於用完了 ! 沒浪費喔 !

10 月的沖繩 , 主要係去格下價 , 今轉的沖繩 , 就向住上次既目標進發 , 買呀買呀 ! 係宜野灣商場買左一大車物品 . 老公一直對日本既 Car Seat 念念不忘 , 每次係香港商場 , 佢都會有意無意帶我去睇 Car Seat , 下一句通常係 " 你睇 , 香港賣好貴 " . 應該係想洗我腦 , 再等我答應 " 買 " , 既然佢咁想買 , 今轉沖繩就由佢啦 ! 大特價 8 千幾 Yen , 用到 4 歲 , 的確抵玩 .

其他地勤媽媽推介的 , 佢地講話好平好抵 , 每次都一定要掃 , 所以小地勤都掃左好多返黎 , 相信夠用 3 個月 , 只要坐完月 , 我依位新手地勤媽媽就可以飛一次 2 日 1 夜 , 買完就返去 . 其實我都好想係水貨店或網購 , 不過又怕被人呃 , 又怕買到假野 . 既然我既機票根本唔值錢 , 咪用左佢囉 . 相信這是所有地勤媽媽既任性行為 , 搵個藉口去 Shopping .

BB 洗衣液及 BB 洗奶樽液 , 計返每包不用 25 蚊 . 香港賣幾錢 ? 其實我都唔太清楚 , 小地勤真係好少係香港買野 .

其實其他地勤媽媽已經送左 3 舊人奶皂比我仔仔沖涼用 , 但我都買左 2 包 BB 沖涼兼洗頭既泡泡 , 主要係比仔仔洗頭用 , 和光堂聽聞深受日本媽媽喜愛的 . 其他地勤媽媽一再勸小地勤唔好咁懶 , 為左仔仔好 , 應該用棉花同食水幫佢清潔用 , 但坐月期間 , 我都唔想因為自己同仔仔麻煩到奶奶 , 所以都買定 BB 專用濕紙巾 . 個盒連一包濕紙巾其實幾貴 , 要成廿幾蚊 , 反而補充裝 8 包先賣 50 蚊 . 我見萬寧 3 包都要賣成 60 蚊 , 所以唔買唔得 .

仲發現左一支 BB 專用除嗅同除菌既噴霧 , 約 25 蚊 , 所以買來試下 .

宜野灣有一間好大間既遊戲機店 , 老公手痕 , 夾返黎 . 基本上仔仔既衣服鞋物 , 都係用表姐 , 堂姐及一眾同事比我既環保物資 . 如果唔係我老公既堅持 , 相信仔仔唔會有全新既物品 . 其實小地勤係唔係太菇寒呢 !?

其實香港都有得買 , 不過既然去開就順便買埋 . 橙色個盒係日本媽媽十大喜愛產品 , 換完片片揸 Pat Pat 用 , 賣成 3 千 Yen 的 , 網上講到成份好天然 , 好過凡士林 , 所以我都買來試一下 . BB 仔初出世 , 用好少少既產品 , 大少少應該無咁敏感 , 就可以咩都亂試下 . 其實我依個呀媽都幾無常識同亂黎 , 所以大家唔好學我 .

其實我 Post 自己買既用品 , 反而係想睇下其他媽媽有無更好意見比我 . 小地勤的工作好忙碌 , 好困身 , 平日返工根本無咩時間上網搵資料 , 放假係屋企又要做家務同執返個位比仔仔 . 我無好緊張 , 但都知自己唔夠準備充足 , 我都預左自己有排學 . 或者等仔仔出世 , 佢自然會教識我點做 , 哈哈 ... ...

其他地勤媽媽送左一堆用剩既初生尿片比我 , 老公朋友又送左 6 箱細碼尿片比我 , 所以我地都只買中碼尿片 , 好多人話尿片唔可以咁早買 , 會潮左 . 但我又覺得依加都秋冬啦 , 咁乾燥 , 唔怕啦 . 就算平日係超市藥房買 , 你咪一樣唔知人地放左幾奈 . 我既思維 , 好似同大部份人唔太一致咁 . 今轉搵到平貨 , 每包一千零幾 Yen . 點解用依個品牌 , 因為表姐仔由細到大都係用依個牌子 , 我依位姨媽每次飛日本都會幫佢買 1 , 2 包 , 所以表弟都跟住用 , 實無錯 .

表姐仔既衫褲鞋物 , 玩具以及用品 8 成半來自日本 , 因為佢有個地勤姨媽 , 而佢媽媽亦經常用姨媽機票飛日本購物 . 表姐仔最愛係 Birthday 及 Aeon 買物資 , 所以表弟仔都會跟住 , 佢買過咩 , 我就買咩 , 唔洗煩 .

BB 枕頭係我地尋到既寶 , 1000 Yen , 仲要 made in Japan , 仲要有 2 個功能 , 一面係冬天用 , 一面係夏天用 , 超抵超實用 .

熊仔水溫器 , 係奶奶建議買的 , 話比仔仔沖涼時用 , 買定無壞 .

今轉都係無買野比自己 , 正係買野比仔仔同屋企人 . 我依加肥左咁多 , 都唔方可以扮得靚 , 所以都唔洗攪好自己 , 定仔仔出左世 , 我坐完月 , 先再執返自己個樣 , 哈哈 ...

我的確係懶到出汁既媽媽 !!

2017年10月20日星期五

秋天 , 總是悲傷 !

21.10.2017

對上一篇文章提到 , 公司沒有分 0.5 花紅給地勤 , 大家一心以為都已經過左整整一個月 , 一點風聲也沒有 , 都打定輸數 , 覺得地勤是被公司拋棄了的一群 , 結果公司卻突然把花紅傳入同事的户口 , 的確是驚喜的 .

小地勤已經懷孕 6 個月了 , 工作仍是很吃力 , 忙及很多很多 Ad-hoc Duty , 真係力不從心 . 上頭每次都係一句 , 分發出去 , 但又可以分發給誰呢 ? 如果同事做錯 , 而我係唔洗首當其衝被責怪 , 其實我都好想將所有野交曬出去 . 始終無人係會打死一份工 , 我亦唔係咁冷血 , 話走就走 .

天氣剛開始轉涼 , 就有兩位舊同事 Resign , 今年是我做的第 21 及 22 位離職同事 . 回想以前 , 一年都無一個人會 Resign , 究竟今年發生左咩事 ? 其實我心裡有數 , 但我不會再講了 , 講多都係煩 . 留下來的舊同事 , 每一個都問我幾時放產假 , 話要係我放產假前先合照 , 因為 Bonus 後都會走 ...

為什麼 , 以前我們大家一起工作 , 一起捱 , 雖然辛苦 , 但氣氛是很團結 , 很開心的 . 人工 , 坦白講 , 唔算好 , 但大家仍留在這裡 , 可見大家並不看重錢 .當有一日 , 唔再看重錢的同事 , 跟你說 , 人工不好 , 不願留下 . 如果你相信 , 只可以說你單純 .

小地勤仲有兩個多月就開始放四個月既產假 , 到現在仍沒找到適合的人選去代替我的工作 . 可能我的確是可有可無 , 上頭對我放產假時工作的交接 , 感覺不太當一回事 . 平日可能我真係做得太多 , 跟得太足 , 到最後亦只有我一個著緊同擔心 . 眼見時日無多 , 既然如此 , 明知找來的同事有點粗心大意 , 亦唔理咁多 , 教左先算 .

放完產假返到黎 , 會係一個點樣既工作環境呢 ? 我不敢想 , 每次一諗到 , 我就好唔想再留係到 . 我對依行並沒有反感 , 亦唔係厭倦 , 就算我真係離開依間公司 , 坦白講 , 我未必會去做文職 , 我亦好大機會出外做 CS . 直到現在 , 我還是真心喜歡依份工作 , 只係覺得跟自己一起打拼既同事都離開了 , 我留下 , 又有何作為 ? 有些事情 , 唔係我一個人可以改變 , 但如果每次出事 , 都只係我一個人既錯 , 這又算是什麼理論 .

就算我認係我錯 , 那個錯就會解決了嗎 ? 如果真係要為件事好 , 的確係要搵出問題所在 , 而唔係搵個人認錯就算 . 我又講得太多了 .

在此祝福兩位舊同事 , 前程錦繡 , 亦好感謝你們這幾年陪伴我一起成長同打併 , 後會有期 !

2017年9月8日星期五

大肚媽媽的職場辛酸

08.09.2017

公司又步入一個新時代 , 由以前只有 737 機隊 , 發展到 A350 既加入 , 實屬不易 . 不過最近同事既士氣好似唔太好 , 原因係地勤被分出來自立門户後 , 所有花花既福利都沒有 . 近來報導的半個月花紅 , 地勤是沒有的 , 所以地勤同事都無再盼望公司年尾會有花紅分給地勤 .

小地勤當然都希望有花紅分 , 可以多筆奶粉錢 , 無奈怨不得人 . 當年我的確係簽花花既合約 , 公司發展 , 地勤獨立 , 我被轉會 , 自此福利一減再減 . 的確 , 我已經被賣出去了 , 再一次由航空公司職員成為一名代公司既員工.

唔緊要 , 份工係自己選擇的 , 無人迫我簽轉會 , 當然唔簽就只有轉工 . 我很喜歡這個行業 , 無論客人變得幾惡 , 只要你用對方法 , 身邊出現的 , 大部份都是很好的客人 . 小地勤咁多年既貴賓室工作的確認識了很多客人朋友 , 佢地對小地勤都好關心 , 從沒用高高在上的態度對我 , 這是我自己在工作上的成功 .

貴賓室係開學日亦進入另一個新時代 , 我由第一個 Lounge 工作 , 到舊 Lounge 關門大吉 , 睇住新既 Lounge 成長 , 睇住一班戰友離開 , 到現在同一時間有兩個 Lounge 在運作 , 我的戰友走剩 2 個 , 睇住佢地為左個 Lounge 而日日開 OT , 而我就繼續準時返工 , 準時收工 , 有時都心感內疚 .

坦白講 , 我地經理係一個完美主義者 , 佢第一次帶住 2 個 Lounge , 壓力的確爆煲 . 而我依加又粗身大細 , 我條腰由 23 變成 33 了 , 每日我既工作能力隨住個肚越大 , 就越應付唔到上面交比我既 ad-hoc duty . 大家都知道月頭月尾我係忙到癲左 , 再加上 Lounge 流失率太大 , 每次有人離開 , 我就要交出 Record . 接住有新人入職 , 我要花幾日時間帶完一班又一班既 Training . 我的確應付唔到咁多工作 , 導致我經理開始對我越來越不滿 .

其實我已經盡力去做 , 每日都準時返工清手上工作 , 產檢 , 打風我都唔會 Sick Leave , 只會改一下自己既例假 . 我比任何人清楚公司玩法 , 我重視依份工 , 所以我唔想整花自己個底 , 對上一次我作小產 , Long Sick 左十幾日 , 結果我被公司扣左好多分 , 由以前攞開 9 點幾分到依加得返剛好 8 分 , 仲要係因為我上級幫我爭取 , 我先唔洗攞原先的 7 點幾分 . 我無嬲公司 , 我預左依個係 Sick Leave 既後果 . 不過 , 相信好多大肚媽媽都係替我不值 , 作小產 , 人命呀 ! 公司都扣分 . 這是大公司的玩法 , 亦係大肚媽媽既辛酸 .

我既體力的確大不如前 , 同事都好鍚我 , 好多同事自願 OT 幫我手做一些簡單既對數工作 . 我係心存感激的 , 所以每次月結 , 雖然因小小既錯誤而導致我硬食上頭既責怪 , 我都唔會怪幫手既同事 , 因為原先這是我自己既工作 , 我抽唔出時間去做 , 人地唔熟手 , 就預左會出錯 . 錯左 , 我再改以及跟街外客人說聲唔好意思就好了 . 這也是導致經理唔再信任同質疑我能力既原因 .

最近總覺得經理既不滿好似擴大了 . 我亦由以前可以被鬧完當無事 , 到現在會情緒失控 , 輕易就爆喊 . 尋日仲因為同事出錯 , 我當然首當其衝 , 被怪罪完 , 喊到收唔到聲 , 嚇親班休息緊既同事 , 個個都叫我冷靜 , 怕我動左胎氣會出事 . 佢地仲即刻主動抽一個同事幫我手去攪返好所有 Record , 頂我去休息 , 的確好感動 .

我班同事的確係好好 , 而我既好友兼上級 , 亦即刻由另一邊 Lounge 跑過黎安慰我 , 聽我呻 , 這是我繼續返工唔 Sick Leave 既動力 . 曾經我都好有自信可以做好份工 , 我唔係要 100 分 , 我係要做到 101 分 . 負責 ISO 既同事都經常讚我既 Record 好整齊 , 所以幾次既 ISO 都無 Finding . 我雖然無學過 Admin 既工作 , 不過我知道要 Record 整齊 , 每年要 Back Up 所有 Record 一次 , 萬一他朝電腦有問題 , 大家唔會慌失失 . 當然萬一他朝我唔做 , 接手既同事一樣唔會荒失失 .

但最近我真心覺得自己有心無力 , 大肚的確係我自己既事 , 做唔足上級既 ad-hoc duty 亦係我既錯 . 我亦自知自己依加能力不足 , 所以我都去意而決 . 跟住一個不滿意自己既上頭 , 唔好話行運 , 應該連想呃啖飯食一下都難 . 扣埋大假勞工假 , 我下年一月頭就放產假了 , 之後都要等到五月頭先會再返黎 . 到時 , 可能係我解脫既時候 . 依份工曾經令我眼界大開 , 但現在亦令我好痛苦 .

每一個媽媽都真係好偉大 , 中秋節就快到了 , 大家返工就算幾忙 , 都記住抽空返屋企跟媽媽食個節日飯 .