暢遊東歐@多瑙河的雙子星-布達佩斯

May 20, 2010 10:24 AMPublicPageviews 180 2                    

小妹由 Salzburg 足足坐了 6 小時火車才抵達 Budapest , 大家要留意一點 , 日車每天只有一班 . 車站附近有很多找換店 , 都沒收手續費 , 每家對換率都只是相差一點點 . 由於小妹的舊同學早到 , 並每家格過價 , 所以小妹跟萍果可坐享其成 .
小妹從沒見過這麼多的風車在轉動 , 原來風力發電是這麼震撼人心的一幕 !

文同學既加入令小妹跟萍果輕鬆左好多 , 男孩子力氣大 , 行李全由他負責 . 不知道男孩子是否天生方向感特別強 , 跟著文同學走 , 完全無迷路 . 文同學建議先沿河邊走走 , 欣賞兩岸風光 .
小妹聽說 Budapest 的國會很美 , 在歐洲係數一數二既靚靚建築 . 如果想入去參觀 , 必須一早起身排隊 , 否則都米洗指意入到去 . 英語團時間係 10:00 , 12:00 以及 14:00 . 由於文同學買左部新相機 , 對攝影正直熱衷期 , 常常帶我們到河邊等最美一刻 , 所以小妹才有幸見到陰天 , 晴天 , 黃昏以及夜晚既國會 . 每次旅行時間短 , 國家多 , 很少機會坐下來慢慢欣賞 , 今次行程中朋友既加入令小妹學懂從另一個角度去旅行 .

聽說 Budapest 有成八條橋咁多 , 當中鏈子橋最出名 , 小妹特別喜歡夜晚著曬燈既佢 , 感覺好靚好靚 . 反而朝早既景色唔太特別 . 如果大家遊完山上既景點 , 可以係河邊搵個位子休息 , 順便等佢亮燈 .

Budapest 有兩間大教堂 , 一間叫聖史堤芬教堂 , 而另一間叫瑪蒂亞教堂 . 前者係布市最大教堂 , 免費參觀 ; 後者在漁人堡旁邊 , 因為係皇帝加冕地兼多野睇 , 所以要收錢 .

漁人堡個名已經得意 , 外型又卡通 , 所以萍果好鐘意依個景點 . 想到樓上參觀係要比錢 , 但好神奇地 , 最後一格反而唔洗比錢就入到去 . 由依到望去對岸 , 你會發現 Budapest 真係一個好靚既地方 .

英雄廣場係到過 Budapest 既証明 . 小妹係到遇到香港旅行團 . 有人講 , 匈牙利人其實係匈奴後裔 , 小妹望左廣場上既開國英雄好奈 , 當中有幾位騎馬既英雄真係好似亞洲人樣 !

英雄廣場附近有好多博物館 , 後面仲有個公園 , 係到仲可以浸溫泉 . 如果大家有興趣都可以去浸下 , 大約三百幾蚊港紙 , 不過記住帶泳衣去 .

小妹今次行程成日要向上爬 , 做咁多運動真係好健康 ! 黎到 Budapest , 點可以唔去探下解放女神像 ? 依位女神係咁多景點中 , 位處最高既一個 . 小妹真係好好采 , 之前個天仲好黑 , 好似想落大雨咁 , 但當小妹上到山上既時候 , 個天又光返 !

原來布達皇宮每逄正點都有交接儀式 , 小妹為左省錢 , 行路上山 , 其實上山都唔洗 10 分鐘 , 不過去到山上既皇宮 , 問題就黎啦 , 太多個門口 , 都唔知由邊個門口入 , 小妹一行三人搵左成半個鐘先搵到個正門 , 又剛剛好見到交接儀式 !

皇宮原來已經改為博物館 , 講真小妹博物館去太多 , 現在興趣都不大 , 所以在皇宮四圍逛逛就算 . 旅遊書話獅子係布市既守護神 , 所以無論去到邊 , 都會見到佢既踪影 , 又的確無講錯 , 小妹係城堡見到好多唔同形態既獅子 , 有些睇起黎都幾可愛 .

Budapest 有個大市集 , 上層專賣紀念品 , 下層就係街市 . 小妹最鐘意依個地方 , 好多精品 , 又多地道野食 , 又平又抵 ! 小妹強烈建議大家一定要去逛一下 !

溫馨提示 : Budapest 車站 information counter 有免費小冊子 , 而且係用中文介紹 , 無旅遊書既朋友 , 可以去攞返本睇下 , 景點介紹得好詳細 .

-完-

暢遊東歐@仙樂飄飄-薩爾斯堡

May 17, 2010 1:44 PMPublicPageviews 202 0                    

小妹對薩爾斯堡既認識源於一套電影 the sound of music . 相信就算無睇過套電影 , 都會有聽過DO-RE-MI 首歌doe , a deer , a female deer , ray , a drop of golden sun , me , a name I call myself ,far , a long long wait to run … 小妹強烈建議 , 去 salzburg 前 , 請先看看這套電影 , 看過後再去 , 會有深一點體會 .

薩爾斯堡因為套電影而好出名 , 連小妹間酒店都大力推銷小妹參加以仙樂飄飄處處聞為題既半日遊 , 但小妹係薩爾斯堡既時間只有一日半 , 根本無可能參加 . 不過 , 小妹都自行去左希布蘭宮搵個仙樂小涼亭 . 其實涼亭就在花園的入口處 , 很容易找到 .
小妹身後那位型男 , 可是真人來喔 ~ 看來這裡是影迷拍到此一遊的重要景點 !

香布蘭宮有個大花園 . 花園很大很美 , 開滿屈金香 , 而且水邊仲有兩隻好惡既天鵝 . 小妹從來不知道天鵝是那麼大支 , 而且也不知道牠們是那麼不友善以及那麼不合作 , 跟牠拍過照也不賞臉 , 還張大個口對住萍果 !

在 salzburg 的日半 , 天氣不太好 , 一直下毛毛雨 , 感覺這地方比較冷一點點 . 香布蘭宮離主要景點很遠 , 而且的郊通不太方便 , 車站離宮殿也有一大段路 , 可能是小妹早落車了 . 跟著地圖走 , 離開了市區 , 進入了郊區似的 , 看到雪山 , 花海 , 有木欄杆的小馬場 ... 真的很美很美 !

你可知道小妹在香港有多久沒見過莆公英嗎 ? 在小妹很小很小時候 , 有見過很小很小支的 , 在這裡隨處都有 , 而且是大大支 , 一吹就散 ! 小妹跟萍果摘了很多支來玩 , 感覺回到小孩時代 , 人大了 , 總愛懷念過去 ... ...

小妹初到 Salzburg 時 , 有少許失望 , 因為它一點電影中的小鎮風情也沒有 , 反而很城市化及商業化 . 整個 salzburg 都會見到莫札特商品 , 也難怪這裡是音樂神童莫札特出生地 , 但很諷刺地莫札特要在死後才能這麼受當地人愛戴 .

講真 , 小妹對莫札特出生地跟故居興趣不大 , 反而附近的美拿堡公園比較吸引 . 在公園逛一逛 , 看著那些不同顏色的屈金香 , 感覺很寫意 . 內裡的法式庭園雖然細小 , 但細小有細小的好 , 一眼看清 , 沒有遺留 !

小妹一直覺得 salzburg 並沒有想像中美 , 直至來到城堡 , 從高處向下望 . 整個城市的屋頂是藍色的 , 很古雅 , 很整齊 . 天陰陰的 salzburg , 多了一份淒美既感覺 !

小妹跟萍果跟著那個 audio guide 由十多位堡主開始 , 接著是刑房 , 再上瞭望台 , 以手拉風琴作結 , 整個行程都是聽國語 , 很親切 !

遊完一圈 , 來到一個遊樂場 . 在這裡 , 小妹發現木馬原來真的是木做 ! 還遇到一班小朋友在玩積木 , 他們對小妹跟萍果很好奇 , 可能沒見過亞洲人吧 ! 看他們玩積木 , 真的很有趣 ! 總羨慕外國的小朋友 , 這個年紀可以從玩樂中學習 , 相反 , 我們香港的小朋友已經要學 A-Z 和寫字了 .

城堡裡有些展館 , 而木偶館是最吸引了 , 這裡的木偶比布拉格看到的漂亮很多 . 而且還可以讓人免費把玩 .

城堡下有一條招牌街 , 商店的招牌都美美的 , 而且一看就知道是在賣什麼 .

小妹最愛賣聖誕掛飾及復活蛋的店 , 看到這些充滿節日氣氛的東西 , 整個人都開心起來 ! 如果有機會逛聖誕市集就好了 !

除了這條招牌街外 , 山下有一群建築被列入世界文化遺產 . 小妹都有一一逛過 , 想不到一日半的時間可以逛這麼多的地方 .

小妹最愛的不是這些建築 , 反而是那個國際象棋 . 可惜小妹不懂玩 , 不然可以跟萍果對奕 , 看來搬來搬去運動量很大 , 很健康 ~

溫馨提示 : 24 小時的 salzbug card 並不貴 , 而且包括了很多景點入場費用 , 可以考慮喔 ! 另外 , 朋友 K 去了一個名叫 hallstatt 既小鎮 , 原來係好靚好靚既地方 , 不過好似有點兒難去 , salzburg information counter 比到好多資料大家 , 無論有無問題 , 入去一轉必有收獲 !

暢遊東歐@文化遺產-克林洛夫

May 15, 2010 7:39 PMPublicPageviews 1790                 

克林洛夫是一個極具中世紀風情既城鎮 , 被列為世界文化遺產之一 . 小妹於舊同事 facebook 見過當地相片後 , 可以話對佢一見鐘情 .
沿途風光已經咁靚 , 咁有小鎮風情 , 未去到目的地已經好興奮 !

布拉格巴士站 florenc 有車前往 , 車程要成三小時 . 有過溫泉小鎮既教訓 , 小妹早一日已買好車票 , 確定時間 . 小妹坐的是 09:45 開出的巴士 , 差不多一點才抵達 cesky krumlov . 小妹的民宿就在古城廣場附近 , 聖維特教堂旁邊 , 民宿主人給了小妹一條門匙 , 真的很有家的感覺 .

小妹旅遊書的資料不夠新 , 幸好民 宿 太太用有限英語告知小妹要先去古城廣場的 information counter 買定明早前往 Salzburg 的車票 . 一個人車資是 1080 克郎 , 而且每日一班車 ,  09:00 準時開出 , 小心錯過 .
小鎮既古城廣場很細小 , 一眼看完 . 旁邊的雪糕店很便宜 , 一柸才賣 15 克郎 , 而小妹最愛就是酸酸甜甜的青萍果口味 . 從明信片得知 , 山上種了很多萍果樹 , 怪不得萍果口味最受歡迎 , 夠新鮮嘛 ~ ~

克林洛夫城堡有兩樣東西吸引小妹 , 一是熊仁 , 二是鐘塔 . 小妹看著護城河很久才見到熊踪 , 正想拍照 , 牠又不見了 .
在布拉格沒機會爬上塔頂 , 捷克的最後一站一定要完成心願 , 所以小妹就選了城堡的鐘塔 . 才 162 級 , 不用幾分鐘就到頂了 . 這座塔真的很古老 , 而且保存得很好 , 完全沒有為遊客著想而改建內部 , 內裡又黑又窄 , 還有濕氣很重 , 超古舊 !

城堡每一個角落都見到紅屋仔 , 靚呀 !

從高處向下望 , 個鎮比條 S 型河包圍住 , 再配上紅磚屋 , 真係好靚好靚 , 成個童話世界咁 . 個鎮真係好細 , 一眼就睇得曬咁 , 小妹係塔頂仲望到自己間民宿 !

係城堡行左一圈 , 見無咩特別 , 就返去個鎮 , 再四處逛下 . 再一次遇到香港同胞 , 佢地比左張 hostel 地圖我地睇 , 建議小妹上山行下 . 朋友 K 最愛看花花草草 , 趁太陽未落山 , 我地一行三人行左上山 . 小妹都係第一次著住裙同 boots 行山 . 山上既路一睇就知係人行出黎既 , 我地沿住碎石路行 , 行左一個鐘就上到山頂 . 山上有間荒廢左既教堂 , 其實有少少恐怖 , 因為似鬼片既教堂 . 不過山下既風景真係唔錯 , 而且行山對身體好嘛 ~
山腰有好多櫻花樹 , 小妹起初以為右上角係白色櫻花 , 點知原來係萍果樹 . 小妹真係好想見到一個個萍果掛係樹上既樣 , 小妹怕過多幾年 , 會以為萍果係由 supermarket 生出黎 ...

依張就係同鄉既地圖 , 大家留意一下右下角 , perfect sunsets 就係教堂位置 . 20 mins 係錯架 , 小妹行左一個鐘呀 !

河岸風光很美 , 小妹跟朋友 K 忙著拍照 . 萍果突然跟大家說看緊財物 , 完來剛剛她在拍照時 , 有一女途人走過她身邊 , 並抓著她的相機便想走 . 除左順手牽羊事件外 , 小妹仲遇到一班扮跛既小朋友向小妹乞錢 , 班童黨見小妹唔理佢 , 就向小妹掟樹枝 , 小妹也不甘示弱 , 用樹枝掟返佢地 . 真沒想過在這麼美麗的小鎮裡會發生這樣的事情 !

克林洛夫真係好細 , 主要景點唔洗半日已經行完 . 不過小妹真係強烈建議大家可以係到住一晚 , 休息充足再起行 . 雖然個鎮細 , 但由依個地方返奧地利好方便 , information counter 除左有車去 salzburg , 仲有 vienna 同 liza . liza 係奧地利邊境城市 , 有火車大站 , 小妹見到同車人係到轉火車返德國 , 相信好方便同便宜 .

溫馨提示 : 小鎮既商店好早關門 , 建議買定乾糧前往 , 如果唔係晚上會無野食架 ! 另外小心小朋友同看好財物 ! 仲有 , 民宿熱水有限 , 沖涼要快 , 好快無熱水 , 朋友 K 被迫沖冰水 @@ !

暢遊東歐@布拉格-蕃外篇

May 14, 2010 3:39 PMPublicPageviews 177 8                    

布拉格既木偶劇同黑光劇都好出名 . 小妹原本只打算睇木偶劇 , 因為職員給小妹小童價 , 即半價 , 所以小妹就兩套劇都睇 . 第一晚睇黑光劇 cats , 小妹之前係網上看過黑光劇既片段 , 覺得唔太吸引 , 但原來黑光劇真係好好睇 , 好似睇音樂劇咁 . 依套 cats 係講一隻貓既夢境 , 套劇有好多熒光效果 , 背景歌曲好好聽 , 最重要係英文歌 , 聽得明 , 演員表演既手指貓好得意 . 成套劇比小妹既感覺係活潑同得意 , 睇到小妹好開心 ~

至於第二晚既木偶劇 don giovanni 令小妹有些失望 , 可能係小妹對木偶劇期望過高吧 ! 依套劇係莫札特所作 , 全套劇都係德文 . 好彩小妹之前有睇過故事大綱 , 所以先無同萍果一齊訓著左 . 其實演員好努力咁去表演 , 見到觀眾想訓覺 , 佢地就控制木偶做些生鬼動作 , 可惜小妹唔識欣賞 , 覺得木偶劇好悶 .
如果大家只打算睇一套 , 小妹會建議睇黑光劇 , 因為好睇好多 !

布拉格不能錯過既景點當然係古城廣場 , 查理斯橋以及城堡 . 因為小妹 miss 左既車 , 去唔成溫泉小鎮 , 時間多左 , 所以就沿住條河慢慢行 , 吹下風 , 欣賞兩岸風景 , 就係咁見到間會跳舞的房子 , 間屋好得意 , 好似一男一女拖住手跳舞 , 大家有時間亦可以去睇下 .

原來中央火車站好古典 , 仲有教堂特有既彩繪玻璃窗同圓頂 . 之前睇書話個度有間餐廳食野好平 , 不過小妹去到既時候 , 只見到捷克文 , 圖畫都無張 , 所以就無入去試 . 小妹反而想講下中央車站間 burger king , 個價錢同香港一樣 , 仲抵食過 M 記 !

另外就係查理斯橋下有個小島 , 有得遊船河 , 而且個島都幾靚 , 又唔太大 , 大家假如時間多到唔知去邊好既時候 , 亦可以行返一轉 , 由橋下望返上橋上 , 感覺幾特別 .

小妹行程本來好緊湊 , 但因為功課做得唔好 , 無 check 過溫泉鎮既車幾點開 , 結果趕唔到十點鐘車 , 去唔成溫泉鎮 , 所以先咁多時間留係布拉格 . 去溫泉鎮要三個鐘車程 , 而且差唔多每四個鐘先有一班 , 所以大家記住前一日好買定車票 , 會無位架 ! 雖然去唔成溫泉鎮 , 但古城廣場附近係有得買溫泉餅 , 仲有好多口味 . 不過買完之後 , 小妹先發現 supermarket 都有得買 ... ... 又做左水魚 !

暢遊東歐@建築博物館-布拉格

May 12, 2010 6:40 PMPublicPageviews 221 2                    

小妹之前睇左套交響情人夢認識左布拉格依個地方 , 再加上好少聽人講去東歐 , 所以決定黎依到見識下 . 臨出發前 , 小妹係圖書館借左好多本書睇 , 先知道布拉格有好多唔同時代既建築保留左係到 , 所以被稱為建築博物館 . 雖然小妹對建築風格無咩認識 , 但為左準備依次行程 , 書睇多左 , 無形中亦學多左野 , 最少我識得咩叫歌德式 , 咩叫洛可可 ...
小妹最鐘意靚既野 , 見到間屋畫都咁靚 , 唔影返張相留念點得 ? 咁多間屋當中 , 右下角間屋係最特別 , 遠睇以為係用磚砌出黎既牆身 , 近睇先知原來係畫出黎架 , 畫到道牆咁有立體感 , 就算小妹係門外漢 , 都知道牆唔簡單 ! 小妹覺得布拉格真係一個充滿藝術氣息既地方 , 亦係小妹去過最有古典味既城市 .

小妹係布拉格見到最多就係俄羅斯娃娃同木偶 . 捷克以前係共產國家 , 唔知依個係唔係見到俄羅斯娃娃既原因呢 ? 另外 , 小妹仲覺得布拉格比維也納更加似音樂之都 , 可能係依到見到太多同音樂有關既野 , 只要你係古城區兜一轉 , 你就會明白小妹點解會咁講 . 小妹真係好鐘意布拉格 , 雖然佢係一國首都 , 但同其他大城市好唔同 , 依到既保育真係做得好好 .

布拉格既景點好集中 , 根本唔洗坐車 . 小妹記得第一日到布拉格 , 拖住件行李 , 一出車站就見到國立博物館 , 由火車站行過去都唔知有無用到 5 分鐘 . 對小妹黎講國立博物館既作用係路標 , 只要見到佢就唔會當失路 . 依個景點我只係影左相 , 因為興趣唔大 . 小妹跟萍果最大興趣係搵一間多野買既 supermarket . 係國立博物館前面既大直路有一間百貨公司 , 地底就有一間 supermarket , 小妹每日都會係到買零食 .

火藥塔 , 叫得依個名以前一定係用來放火藥既地方 . 係 supermarket 個邊轉入去就會見到 . 根據資料顯示 , 依個塔係皇帝加冕遊行時既起點 . 小妹本來打算入去睇下 , 但發現依到原來係一間餐廳 , 被人折停左入唔到去 . 緣份真係一種奇妙既東西 , 小妹有位舊同學兼舊同事 , 剛好同一時間去歐洲 , 結果 , 小妹跟她就在沒有約定既情況底下遇見了 , 由本來二人行變成三人行 . 朋友 K 間 hostel 就係係依到附近 , 好似叫 rosemary , 係一間價廉物美既 hostel 啦 ~

睇完鐘樓之後 , 小妹行返出去大直路 , 向人多既地方進發 . 行左無奈又到左天文鐘 , 剛好係正點時間 , 會有十二門徒表演 . 小妹一行三人企左係天文鐘前面欣賞 , 有些遊客就行左上天文鐘個頂到欣賞我地睇表演 , 好攪笑 ! 其實所謂既 show 只係十二門徒輪流轉出黎同大家 say hi , 好快就播完 . 完結時有個著士兵衫既職員係鐘樓上吹啦叭作結 .

天文鐘其實係位於古城廣場 , 而依個廣場最吸引小妹既就係魔鬼教堂 . 小妹覺得佢個外型好似卡通片巫婆住既地方咁 . 小妹覺得依個廣場好大 , 圍住佢既屋都好靚 , 怪唔知得好多人都話依個廣場係歐洲最靚既 . 小妹係到玩尋寶遊戲 , 搵到好多書上記載過既建築 , 不過我都只係認得個樣 , 唔記得個名 , 哈哈 !
古城廣場跟查理大橋好近 . 未出發前 , 見到網上既人話想影得條橋靚 , 就要朝早五點鐘出門口 , 因為條橋實在太多人 ,  好難影到個靚景 ! 好彩小妹今次旅行未係旺季 , 所以人唔算太多 . 歐洲黎講七八月就係旺季 , 如果大家唔想每到一個地方都只係睇人既話 , 記住避開依兩個月啦 ~ 再者淡季去旅行 , 機票住宿樣樣平 , 有何不好 ?

布拉格有好多道橋 , 當中以查理斯大橋最出名 , 一來條橋夠古老 , 二來佢係皇城必經之路 . 橋上又好多人賣藝 , 完全滿足小妹睇免費表演既願望 . 最令小妹開心既事係遇到紅衫老伯同佢架音樂車 , 依位老伯係好多本介紹布拉格既書上出現過 . 對小妹黎講 , 佢係查理斯橋既景點之一 , 影唔到佢既相會好失望 !
講返重點 , 橋上有好多以聖經故事為題既雕像 , 因為小妹都有聽過聖經故事 , 所以沿途都可以同朋友仔分享下 . 究竟人一生有幾多個秘密 ? 又有無人唔想行運呢 ? 係橋上你會得到答案 . 其中有一個雕像被人摸到 “ 令立立 “ , 說法有二 , 摸左佢之後 , 你既秘密成世都無人會知 ; 摸完佢之後 , 你會行好運 . 見到咁多人排隊摸佢 , 小妹跟萍果又怎能錯過 ?

沿住查理大橋條路向山上行 , 就會黎到城堡 . 小妹一路行 , 一路看餐廳既價錢 . 原來同一款餐 , 城堡山下既餐廳會比古城既餐廳平少少 , 假如大家想吃傳統餐可以到城堡山下吃喔 !
小妹又要重複一次咁講 , 景點好集中 , 行左都無三十分鐘就到左山上既城堡 . 紅屋仔應該係捷克標誌 , 一來到山上 , 見到既係一片紅磚屋頂 , 好似去左童話世界咁 , 再加上當日天氣好好 , 任何角度影 , 都影到一張張明信片 !

未入門口 , 小妹已經瘋狂咁影相 , 個景實在太靚啦 . 聽聞布拉格城堡士兵套制服係名師設計 , 仲成日換款 , 唔知個傳聞係真唔係 ? 小妹覺得做士兵就好慘 , 明明想笑又唔笑得 , 仲要企咁奈 , 依份工真係好難做 .

第一次見到維也納聖堤反教堂既時候 , 小妹已經覺得間教堂生得好高 . 今次見到聖維特教堂 , 感覺仲震撼 , 真係一山還有一山高 ! 個教堂又係免費開放 , 小妹同朋友好守規距咁排隊入去 , 點知被一班外國團打尖 , 個 leader 仲要大大聲咁同小妹講 group first . 打尖仲大聲過人 , 不知所謂 ! 外國人唔見得有幾文明 !

人地話布拉格係百塔之城 , 小妹都好想搵座塔行下 , 從高處欣賞布拉格 . 明明旅行書話聖維特教堂既高塔係開放既 , 但就搵唔到個入口係邊 , 結果行唔成 . 反而搵到腳軟 , 坐左係到望住間教堂發呆 .

世事就係咁 , 好多野唔一定係睇正面 , 有時背面都好靚 , 為左搵個門口上塔頂 , 行左去教堂既後面 , 個景都唔錯 !

城堡裡面仲有一個好出名既黃金巷 , 因為佢係卡夫卡既家 . 小妹唔係卡夫卡迷 , 再加上裡面只係賣紀念品 , 所以就無入去參觀 . 反而行左去一個 king garden 既花園睇花花草草 , 原來要睇櫻花唔一定要去日本 , 布拉格都有 . 小妹以前聽人講過日本人去旅行會帶埋櫻花種子 , 而布拉格又咁多日本人學音樂 , 怪唔之得有咁多櫻花樹啦 !