一個好的結尾

May 14, 2012 8:28 PMPublicPageviews 1022 3            

公司條 London 線開了好一段日子 , 雖然有被編過返依條更 , 但每次都有阻制 - 被改去做其他屎機 . 昨天終於成功做到依班機既睇機 !! 成班機先得 13 個客 , 但卻有一拖三 , 太幸福了 !! CSDM 及 DM 話要送我最後一程 ... 所以全日跟住我做 Duty , 感謝曬 ! 講真 , 多左兩個人 , 幫下手 Check 證件 , 真係幾好 , 哈哈 !!

依個星期 , 唔知係唔係因為心情唔同左 , 成個人好輕鬆 , 連平日很難做既 Rostering , 都變得好容易 . 早上睇機 , 再食兩個鐘飯 , 再到新部門參觀 , 都能夠準時交到個更表比上級 , 係我真的熟能生巧 , 定係我 Hea 左 ??

雖然昨晚有一班機 Delay , 要打一份好長既 Report , 但都無唔開心 , 因為好多同事幫我 , 仲有同事特登過黎搵我影相留念 , 亦收到好朋友們既祝賀 , 真的很感動 ~ 每次聽到同事跟我說 " 捨不得你 " 時 , 其實有少少想喊 ... 其實我只係轉部門 , 但我都知道 , 以後無咩機會見到佢地 .

雖然係依間公司做左唔夠一年 , 但跟一班同事面對過無數個困難既日子 , 無形中令大家團結起來 , 今日自己先行離去 , 把一班好同事掉低 , 真係有少少過意唔去 , 我好無義氣呀 ! 大家 , 對不起喔 ...

明天 , 開始新工作 , 說不擔心是假的 . 我不是聰明人 , 自信心亦不足 . 平日做睇機 , 在別人眼中做得好 , 只是經驗而已 , 經驗的確能令人變得有自信 , 有說服力 .

新工作 , 我從未接觸過 , 而且我要頂替的是新主管的得力助手 , 人家對我有一定期望 , 令我有一定壓力 . 但願自己不會令人失望 . 我又要努力學習去 ! 加油 !

說不出的無奈

May 6, 2012 4:00 AMPublicPageviews 784 3                 

上星期的雷雨再一次玩殘左我地依班地勤 , 全城大 Delay , 機場變成難民營 ! 小妹公司本來就人手不足 , 同事個個有返工 , 就無收工 . 加上鐵鳥又唔夠 , 大 Delay 後 , 幾日都仲受緊骨牌效應 ! 終於捱過了那個星期 , 過了兩天好日子 , 紅閃又再黎 , 雖說那天小妹只是在 Office 編更 , 也替一班同事慘 ! 再一次捱過了 , 又來鐵鳥生病了 , 在外站資源短缺的情況下 , 只有等等等 ... 等到何時才有救 ? Delay 及 Cancel flight 每天都在折磨我們一班地勤 .

昨天 , 小妹做 Group Check-in , 小妹在這公司算是快手之人 , 做完自己既團客 , 亦會幫手清 Q .

有一家八口黎到小妹的 Counter 前 , 證件一堆咁比我 , 又要分證件 , 又要 Check Visa , 後面又開始有少少 Q , 的確有少少心急 , 想再做快少少 , 什麼安全姿勢早就忘得一乾二淨 ! 男乘客說 " 小姐 , 你咁樣一手攞行李 , 小心會整親 Wor , 睇你得個九十幾磅 , 隻手咁幼 , 小心 D 好 , 快唔得幾多 , 無謂整到自己 " 個刻的確有少少感動 , 覺得所有乘客都好可愛 !! 其實當地勤的 , 被客鬧多左 , 有時已經麻木曬 . 乘客既一句關心說話 , 的確可以令我當日心情極好 . 希望每天也遇到 Nice 的乘客 !

DB 就是 Overbook 時 ( 大陸叫超賣 ) , 要求乘客別坐這航班 . 小妹除了每天要面對 Delay , Cancel Flight , 仲要因為公司為左要數 , 迫班 Sales 不停賣飛 , 公司真係唔識計數 , 導致我地依班地勤日日比人鬧全家 . 人家大柴都會 DB , 但人家散客多 , 多 Noshow . 小妹公司做旅行團生意 , 九成半是團 , 剩下幾多散客 ? 基本上 Noshow 情況極少 ! 偏偏公司次次要 DB 既航班都是只有我地會飛既地方 , 叫我地 DB 人地去邊到 ? 好采深圳有機就還好 , 如果唔係 DB 到明天航班 , 明天一樣是 Overbook , 明天又再重演一次 .

昨天小妹成功找到一名呀太 , 打算 DB 佢 . 小妹每次都好好采找到 DB 對象 , 當然人家係不願意 , 只是看呀太是殺傷力比較低 , 所以才迫佢 . 小妹張大眼說大話 , 跟呀太說飛機無位了 , 要上機已不可能 . 呀太當然說一堆不願意的話 , 又說企位都不打緊那樣的話 . 小妹又說 , 無位就是無位 , 係想企都無 , 趁依加深圳有機 , 你好走 , 如果唔係要等到聽日中午先走到 . 呀太被小妹的話嚇到了 . 所以就答應到深圳去 .

呀太係等我安排之際 , 打左電話問旅行社 , 旅行社話見到飛機有位 , 仲叫呀太比個電話我聽 . 個大陸職員態度勁差 , 所以小妹態度亦好串 . 小妹問 , 你邊到打黎 ? 佢話自己係航空公司職員 , 又話見到班飛機有位 ( 的確有位 , 只係我地要搵定人 DB ) . 小妹好串咁講 " 你是航空公司職員 ? 那我是什麼 ? 你看到飛機有空位 , 但我看不到呀 ! 那你看到 , 你就幫乘客幫登機手續吧 ! 不要叫我來聽 ! 你是賣票的地方 , 對不對 ? 別亂說自己是航空公司職員 ! " 大陸職員說 " 我 22 號已幫乘客訂好來回票 , 你不可以不給位子她 " 我說 " 你知道什麼叫超賣吧 ! 不用我多說吧 ! 誰先來誰先有位子 , 難道你不懂嗎 ? " 大陸職員大聲地說 " 我不管 , 位子你一定要給她 " 小妹回答 " 你不需要管 , 沒有位子就是沒有位子 , 你也管不到 ! 你這麼厲害 , 不先跟乘客 Online check in ? 吵什麼吵 !? 都說超賣 , 沒有位子 , 有位子 , 我會不給乘客嗎 ? 你覺得我時間多嗎 ? 愛找碴 ?? " 之後小妹比返個電話呀太 , 叫佢自己決定走還是不走 .

呀太收線 , 跟小妹說現在馬上走 . 我很好奇職員跟她說什麼 . 呀太說職員叫她別走 , 叫她明天才走 , 她跟職員說 , 我現在去深圳 , 你管不了 . 那刻 , 小妹心感內疚 , 騙了這位呀太 !!!! 幸好突然有 2 位乘客 Cancel flight 以及有一位乘客機票出問題 , 航班位子即時剛剛好 , 小妹當然比返個位呀太啦 . 呀太亦好感激小妹幫佢 ... 幫佢 ? 我是害佢啦 ... 超內疚及無奈 ...

呀太上機前比左張卡片我 , 叫我到雲南可以找她 , 她會帶我吃好的 . 還問了我要地址 , 說寄東西給我 ... 超感動 !! 呀太 , 你知道嗎 ? 我沒你想像中的好 !! 但願你以後不要再坐我們公司的航班 , 不用被我們 DB ... 對不起 !! 我差點害了你 !!

永遠都是人善被人欺 ... 這個世界太不公平了 !!

我的另一個家

Apr 25, 2012 10:26 AMPublicPageviews 837 3                   

最近 Notebook 壞了 , 加上工作真的很忙 , 忙到連訓覺 , 食飯 , 去厠所既時間都無 , 又點會有時間上黎 Update 個日記板呢 ?

公司上兩星期發生了一件大事 , 不但將同事分化 , 亦打擊士氣 . 簡單來說 , 公司把同事的表現用 A-F 來分等 , 得到 A 或 B 的同事就有花紅分 , 其餘同事會怎樣想 ? 一定是擦鞋 , 陪坐 ... 一堆堆不好聽的說話自自然然咁傳出來 . 拿不到 A 或 B 的同事 , 很多時會說 " 以後只做 C 級應做的事情 , 你有你忙 , 我有我 Hea " . 小妹是有錢分的同事 , 但對公司發出的這封 E-mail 也替那些為公司捱生捱死的同事不值 . 講真 , 我寧願無得分 , 反正大家從沒有對花紅 , 雙糧有什麼期望過 ! 公司又何苦要把同事迫到發瘋呢 ?

如果有追開蘋果互動新聞 , 一定知道我公司常常派錢 , 乘客惡以及攪事 , 都是我公司自己種出黎架 ! 怪不得人 ! 大家估我攞 B 的小妹分到幾多錢 !? 答案係 : 小妹分到的不及一個攪事乘客得到的來得多 . 哈哈 !

今日很想跟大家分享一下幾張相片 . 剛入機場做時 , 照片 , 是拍得比較多 , 每個地方都很新奇 , 亦好靚 . 一張 禁區證 令我在機場暢通無阻 . 朋友最鐘意搵我幫佢地買手袋及化妝品 . 去旅行時 , 我亦會帶 Permit 係身 , 因為係機場大部份商店 , 都會提供 折扣 比 Staff , 食飯 , 買雜誌都有得平 .

每次去厠所偷懶或者趕住入閘口做機 , 幾忙都好 , 都會望一下依幅畫 , 好搶眼 , 好靚 . 依幅畫究竟幾時係到出現呢 ? 我已經無印象了 . 諗返起自己廿歲就已經係依個機場做 , 走過又返黎 , 再走再返黎 . 留係機場既時間 , 分分鐘多過我係屋企 . 原來 , 唔經唔覺 , 我已經由呀妹變左做呀姐啦 ...

最近幾個月 , 我常常留在依個小角落埋頭苦幹 , 由早做到夜 . 舊同事帶新同事黎到我個小天地參觀 , 叮囑佢地調更要先搵我簽名 . 新同事見到我既工作 , 好單純咁講 , 好羨慕我可以坐係 Office 編更 . 一個編更既正常工作時間係 1000-1900 , 但實際 1000-1300 我出左去睇機 , 1300-1400 食飯 , 1400-1600 好多時要開會 ... 結果 1600 打後先開始編更 , 而公司係加機不加人 , 我個頭真係爆炸 , 但卻無人知 ... 每日無 2200 都唔洗走 , 你會羨慕我嗎 ?

最近同期間有喜事 , 結果好朋友要長坐我的編更位置 , 我亦要出山做機 . 好奈無對住依幾張紙 , 每次做機人數都有自己份 . 要等到幾時 , 我先可以真真正正咁 " 睇 " 機 ? 這幾天大雷雨 , 香港機場好似難民營咁 , 我每日只訓兩三個鐘就返工 , 工時一般是十二小時 , 跟同事仔們爭取每刻可以訓覺的機會 , 這就是地勤的生活 , 食訓玩 !

大雷雨過後 , 終於天氣放晴 , 結果公司的鐵鳥卻生病了 ... 壞了三隻 , 醫到一隻 , 結果是明智的 Cancel Flight 及 Delay . 其實 , 一兩小時的 Delay , 對我們來說 , 已叫準時了 ! 請別再罵我們了 , 我們做地勤也有呀媽生 , 你鬧我公司唔打緊 , 唔洗 FXXK 埋我老豆老母掛 !? 強國人 , 請以後返工記住帶埋你 Daddy 及 媽咪 !

空無一人的長廊 . 每天在這裡來來回回走廿多次 . 機場其實有好多好靚既地方 , 不過唔係個個人都知道 . 影返張相留念先 ! 之後無咩機會架啦 ~



大家係唔係想問我 " 已經遞信 " ? 非也 ! 原來平日唔擦鞋既小妹 , 都可以用實力有出頭天 . 你做既每件事 , 別人原來都睇到的 . 所以 , 再過兩星期 , 小妹就轉部門了 . 轉去邊 ? 賣個關子先 !

原本的確打算唔做 , 亦出曬機票會去日本 , 北京 , 新加坡跟英國 , 看來要退票了 , 哈哈 ! 希望新工作能帶給我另一種體會吧 ! 我要捱下去 ...

1.5 比 200 !!

Apr 5, 2012 12:04 AMPublicPageviews 1100 5                 

我常常覺得空姐的制度很好 , 有 Crew Rest ( 可以唔夠訓 , 就唔洗飛 ) , 設有機組人員限制 ( 唔夠人 , 又唔准飛 ) 以及在機上有休息 . 這全是令地勤們羨慕的 .

聽說 , 每班航機的經濟艙 , 一位空姐要照顧 50 人左右 , 聽落去好似好辛苦咁 . 因為 1 比 50 , 每人要一次水 , 個空姐就要來來回回行五十幾次 , 條腿相信會斷 .

地勤 , 沒有以上的制度 , 所以我們全是鐵人 , 不用吃飯 , 睡覺 , 上洗手間 , 哈哈 ... 訓練多年 , 小妹還是未能在現公司適應到 , 看來要再操一下 ...

嗯 ... 大假連例假 , 足足九天 , 走了一轉星加坡 , 第二天再飛一轉大阪 , 很好玩 ! 那個星期 , 有 " 當地勤真好 " 的感覺 ! 這樣的機票 , 小妹只付出了 700 港元 , 沒聽錯 星加坡 + 大阪 = HKD 700 !! 只有一個 " 抵 " 字 . 玩完回來 , 13 / 17 / 13 / 15 , 知道是什麼嗎 ? 我的工作時數 ... 小妹不缺錢 , 只是公司缺人 , 累透了 , 差足的電不出幾天就用盡了 .

半退出前線的小妹 , 間中都要出去 " 睇機 " . 回來的第一班機 , 有幾忙 ? 看標題就知道吧 ! 小妹跟 1.5 個同事在登機閘口要對 200 位乘客 .

復活節的到來 , 機場可說是淪陷了 , 每個櫃位都排長龍 . 小妹現公司的淪喪情況絕對比別公司厲害 , 同一時段大約有13 - 16 班航機 , Check-in 櫃檯開足 18 個 , 每位同事於 2 小時內要 Check-in 100-130 位乘客 , 個個做到身水身汗 , 木無表情 應該是 人之常情 吧 !

說回那個 1.5 吧 ! 那班機 , 小妹於航班起飛前的 55 分鐘先來到 ( 公司要求一小時前 ) , 心想應該有同事吧 , 怎料沒有 ... 明明編更編了 3 位同事 , 即使當中一位生病了 , 沒加人 , 都應該有兩個吧 !? 距離起飛只有 35 分鐘 , 終於有一位同事趕到來 , 小妹亦放下心頭大石 . 來到現公司後 , 小妹才知道自己有多能幹 , 一拖一做機試過多次 , 但只限於一百客左右的航班 , 大機就真係未試過 !! 一試即刻做到傻左 , 又要 " DO " 登機證 , 又要應 Walkie , Counter 又多多事故 ...

Service 的確是人手足夠才能提供的 , 登機時只有一拖一 , 要令一班機準時都已經有難道 , 公司還想要求我們什麼 ? Final Call 時 , 另一位同事終於趕到來 , 真是感恩 . 其實 , 人手不足不能怪 " 坐枱 " , 也不能怪 " 編更 " , 要怪就怪公司沒人 , 究竟幾時先人手多一點點呢 ? 小妹真的不貪心 , 我只要細機一拖二 , 大機一拖三就心滿意足 , 別下下一拖一 , 好不好 ? 會做死人架 !

空姐 1 比 50 ; 地勤 1 比 1XX , 當地勤羨慕當空姐的 , 是有其原因架 !!

我的近況 On Call 16 小時

Mar 9, 2012 7:55 PMPublicPageviews 9544                   

這兩星期 , 公司加開了一班高雄 , 三班台北 , 一班倫敦以及一班南京 , 報紙寫會請四百名空姐 , 而地勤呢 ? 飛機多了 , 人手仍然是一樣 , 正確一點是少了 ( 辭職嘛 ) . 整個星期都是由小妹編更 , 努力編呀編 ... 變不出人來 , 只好編自己出去睇一轉機 , 再回來編更 . 高層對加開新航線非常緊張 , 亦讓小妹一起開會 , 一起討論人手安排的事情 . 咁大個女 , 做左咁多年野 , 都係第一次開會 !!! 房內全是 DM 呀 !! 小妹有點格格不入 ...

某位 Office 工作的同事看小妹編更 , 小妹就怨了兩句 , 編得再好 , 明天也會改的 . 原因突發事太多了 , Delay 就已經可以改變整個流程 , 但這是我預計不到的 , 我只可以盡力而為 . 同事聽了就說 , 那不如建議公司減短我的編更時間 , 好讓我出去幫幫手做機 . 小妹的回答是 , 我每天編更都要 OT , 原因是早上要做睇機 , 中午又要開會 , 飯都無時間食 , 想唔 OT 都唔得啦 ! 我編唔出個更 , 同事明天返咩 ? 同事的回覆是 " 原來編更都要出去當一轉睇機 " . 這星期我比以前更忙更忙 . 每天工作 16 小時以上 , 我真的很辛苦 !

 很多時 , 編好了更 , 突然加了 VIP , 又突然改了航班時間 , 沒完沒了地編好再改 , 改好又再改 ... 某幾天我編更編到想喊 , 係堅想喊 . 每個同事見到我都是說 , 你又沒吃飯 ? 你瘦了很多 . 你好慘呀 , 加油 ... 感動 , 但安慰不了我 . 我真的很累 .

這是我這星期的近況 . 昨天公司又再開會 , 今次說會加多人手 , 只說昨天已有 30 人來見工 , 希望真的請到一些肯捱願學的人 .

昨天跟有份請人的掃把說了幾句 , 希望可以給有意加入的朋友作參考 . 小妹本想推薦一位朋友來公司做的 , 但那位掃把卻說不會請 , 原因就不說了 . 但這件事告訴我一點 不是掃把冷血 , 而是她看人很準 !! 她在這行多久了 ? 你是什麼人 , 說真話說假話 , 難道她不知道嗎 ? 即將來面試的 , 奉勸不要背文章 , 沒用的 . 或許說話隨心一點 , 勝算還會比人高 .

再過一星期 , 小妹就放大假了 , 會帶媽媽走一轉星加坡 , 終於等到休息的日子 , 回來再跟大家分享 ~

這個位位子有一半時間是屬於我的 , 因為我係編更專員 ...

我們不想做炮灰

Mar 9, 2012 12:43 PMPublicPageviews 11072               

很想跟大家分享一件事 , 而這件事不是要針對 " 一眾空姐們 " , 真是議事論事而已 .

某天某幾位同事被挑出來跟空姐們一起上堂 , 當然是那些有關待客之道的堂 . 大家平日對空姐總是充滿幻想吧 ! 溫柔 , 有禮 , 聰明 , 能幹 , 但她們也只是人 , 當然有些空姐天生就是這種性格 , 但有些卻是表現人前才會做出來的 . 小妹沒有怪她們的意思 , 只是想說出實況 .

上堂的其中一題題目是 " DUP Seat " , 即有兩位客人都說自己坐同一位子上 , 請問如何解答 . 小妹公司的空中主管答案是 " 賴落 D Ground ( 地勤 ) 到 . " 他身後的小蕃薯補充一句 " 唔好講 " 賴 " , 根本係佢地錯 . " 小妹的同事說 , 地勤只有四位同事 , 而他們就人多勢眾 . 態度惡劣到連教課的那位也忍不住喊停他們 , 並加一句 " 看來空姐跟地勤關係惡劣 ! 就當是地勤錯了 , 那空姐們你會怎做 ? " 答案是 " 有禮地叫乘客等候 , 並立即叫 Ground 入黎攪掂佢 . " 聽後簡直 著火 !!!

小妹明白 , 我司的空中主管跟別家公司的不同 , 小妹指的是年資及經驗 , 但他們的答案簡直 " 離譜 " . 他們的這番說話會即時令乘客著火 , 並發洩在地勤身上 , 地勤在飛機被乘客捉住罵而走不了 , 結果是航班延誤及收到一堆投訴 .

地勤的主要工作就是為乘客解決問題以及為空姐們善後 . 其實 DUP Seat 原因有很多 , 當遇到 Dup Seat 時 , 請先看看兩位乘客登機證 , 看看是不是真的是這航班 . 因為有些乘客是轉機的 , 即是會有一張舊登機證 , 會不會乘客坐了舊位 ? 另一原因是旅行團領隊的問題 , 他們常常會為乘客改位 , 是不是領隊寫錯了 ?

當然我們做地勤的也會出錯 . 很多時是航班 Flight Full , 把乘客升到商務 , 而地勤於乘客登機時忘了告訴乘客 , 這亦是最常見的 Dup Seat 原因 . 其實很多很合作的空中主管都會即時看客單 , 看看那位幸運兒被選中了 . 而少部份要求地勤入來 , 原因只有一個 , 他們忙 , 沒空 , 地勤你地自己死掂佢 . 一般小妹入內都會再要求客人出示登機證 , 並即時指出這位子是誰 , 再拉開被 Upgrade 的幸運兒 , 慢慢跟他說 . 而小妹每次對幸運兒的說法都是一樣 " 先生 , 你好好采呀 ! 我地今日 Flight Full , 所以選中你上商務 , 麻煩你跟我到商務位坐 . 不要告訴別人喔 ! 因為不是每位乘客都好似你咁好采架 . 你記得返去買采票 , 你咁好運 , 實中 ! " 乘客聽後的反應都是 " 中左六合采 , 一定返黎請你飲茶 ! "

試問乘客遇到 Dup Seat 而空姐們卻叫他等等等 ... 又或者說 " 不知道 , 我叫地勤入黎 " 又或者是 " 地勤次次都係咁 , 攪出 Dup Seat , 我幫你搵佢 " , 假如你是本航班的乘客 , 你們聽到後的反應會是什麼 ? 相信是稱讚空姐 Helpful , 並投訴地勤吧 !

又假如空姐答案是 " 請等等 , 可能是電腦出錯 , 我地去查一下 " 之後再找地勤入內解釋 , 相信乘客不會一來就向我們發火 , 問題亦容易解決很多 , 乘客一樣會覺得你們 Helpful 去表揚你 , 同時地勤不是要表揚信 , 我們只是不想被投訴 , 更不想因空姐們的一句說話成為炮灰 . 請各空中小姐們做做好心 , 一句動聽說話就能拯救可憐的我們 .

我亦明白空姐們工作辛苦 , 航班延誤 , 她們不一定有錢收 . 但地勤是延誤 OT 有錢收 , 她們怨我們是正常 . 但針無兩頭利 , 延誤了 , 空姐們有 Crew Rest , 地勤呢 ? 一班航機延誤 , 可以讓我們上演 ON CALL 36 小時 , OT 錢與睡覺 , 你會選那一樣 ? 希望你們聽後 , 心裡會平衡一點點 . 各位聽後 , 相信明白何解地勤都不及空姐 " 正 " 吧 ! 睡眠不足又怎 " 正 " 得起 ?

不中聽的請別回覆 , 但別攻擊我 , 這只是我個人的感想 , 我並沒有對空姐們不敬 , 最少我每次開門比佢地都會笑容好好並主動 Say Hello ! 但得到的卻是 30% 機會率黑臉 , 而 20% 機會率沒反應 .

退出前線 ?

Feb 24, 2012 9:50 AMPublicPageviews 8263               

轉公司後 , 每天都是挑戰 . 過了六個月的 " 睇機 " 生涯後 , 小妹開始退出前線 , 長駐 Duty Desk ( 我們稱坐枱 ) . Duty Desk 工作比想像中忙及困難 . 做 " 睇機 " 都只是 " 睇 " 實自己的幾班機 . 而 Duty Desk 卻要 " 睇 " 實全日航班 ! 公司不是大型航空公司 , 但每天大約有 60 班到港及離港航班 . 仲要張枱只有我一個人坐 , 有幾忙可以想像到吧 !

我的工作簡單來說是確保 Departure 有足夠人手做機以及 Arrival 有人接機 , 亦即是 J 公司的 MP 工作 . 另外 , 我亦要接聽所有關於 Airside 的電話 , 包括其他航空公司的查詢以及新同事的一堆問題 . 還有 , 我要不停 Check e-mail , Check Landing , Check 駁機 , 跟機管局要求閘口 , 提醒其他睇機航班要留意的事情 ... 一堆一堆事情 . 每日下班 , 我都是 " 殘爆 " .

現在 , 我還是過度期 , 還在適應中 . 希望同事別怪我安排出錯 ... 公司人手其實不足 , 所以沒 Delay 的日子 , 都只是剛好夠人 . 正常來說 , 細機要一拖三 , 大機要一拖四 , 接機最好一拖二 . 人手不足 , 就要自己想方法解決 , 那班機少客就 Cut 同事 , 到港航班沒特別就一個人去接 , 有時根本沒安排到人 , 只好叫 Departure 同事去接一下 , 接完再回 Departure 好了 . 個腦轉呀轉 ... 快爆炸了 !

剛剛開始了另一新挑戰 - 編更 ! 當天壓力很大 , 一來是第一次 , 二來明天是自己坐枱 , 編得唔好 , 明天就要自己受返 , 問責制好處是自己不會為收工而亂來 ! 小妹一向都好采 , 今次亦不例外 . 最近上海及台中都大霧 , 飛機不是飛不了 , 要回香港 , 就是強行落在別的地方 , 回不來 , 同事被乘客罵個狗血淋頭 , 一個字 " 慘 " . 在同事眼中 , 小妹真的好采 , 不用到前線受氣 .

而小妹所謂的一向好采是 - 每回剛落更都是大 Delay , 試問我才剛開始 , 本以有難道 , 現在大 Delay , 要加人 , 更是難上加難 ! 平日人手已不足 , 現在如何可以運用技巧 , 變出人來 ? 結果 , 編到晚上十點多才回家 ... 小妹 , 不停安慰自己 , 第一次就是這樣 , 大 Delay 多 VIP , 今次都編得出條更 , 將來一定覺得好簡單 , 好快會上手 , 我要堅持下去 ...

Duty Desk 同事亦安慰小妹說 , 在 Office 用 " 腦力 " , 總好過在前線 " 受客氣 " , 希望我能夠早日學會這個道理 .