帶著 BB 去沖繩 / 2019 / 十二月 / 四日三夜自駕遊 (Day 1)

11.12.2019

把握年尾 , 最後一飛 ! 轉眼間 , 今次係同 BB 第八次旅行 , 所以都已經駕輕就熟 , 唔會再帶咁多無謂野 . 老公話每次旅行都要同 BB 影張登記閘口既相 , 等 BB 將來睇返知道自己去過邊 . 

沖繩跟香港真的很近 , 約兩小時就抵達 . 今次都係租 OTS 既車 . 每次覺得等攞車先係最花時間 , 每次都要花多兩小時 . 如果只在那霸時行下 , 通常我地都唔租車 , 會選擇坐單軌電車跟行路 . 那霸市好細 , 好多地方都可以用腳行過去 .

最近 , BB 學識左壽司依個字 , 成日一食飯就話自己食緊壽司 , 所以我地到埗即去食迴轉壽司 . 依間店好攪笑 , 食夠一個數就有得玩遊戲 . 隔離台個小朋友抽中禮物 , BB 望住人地好耐 . 好好彩 , 我地都抽中左一次 , BB 開心到比個 V 字 . 今日佢係 22 個月大 .

食飽我地就係 Outlet 行下 , 明知無野睇 , 都次次去 , 都唔知為咩 ! 沖繩個 Outlet 真係無北海道果兩個咁多野買 . 最後連  BB 店都無收獲 . 決定去第二度 .

一直都想搵次係日本食返個靚 Cake 配咖啡 , 所以就四圍 Search 下 . 第一次黎到瀨長島 . 大海 , 好靚 ! 

係到吹下海風 , 真係好舒服 , 好有渡假既感覺 ! 對唔住 , 去沖繩太多次 , 我都已經唔覺得似旅行 , 只係去左一個遠一點既地方買日用品咁 ... ...

依個地方好靚 , 無敵海景 , 藍天白雲 , 再配白色小屋 , 好似去左希臘咁 ! 依到有間酒店 , 有露天溫泉 ... 因為我地望到酒店裡面既人浸緊溫泉睇海景 ... 

地圖顯示 , 依到好多小店同餐廳 . 原來依到好多遊客 , 但小地勤真係第一次過黎 , 都話架啦 , 雖然我黎過好多次沖繩 , 但我唔係專家 , 我過黎只為貪近 , 通常都係為左超市日用品 .

真係好唔熟路 , 仲要推住架 BB 車 , 好多樓梯 . 山上小店外出的大海 , 真係好靚 !

好驚訝睇到飛機升降 ! 其實我都好鐘意睇飛機架 ~ 可惜我 BB 好驚 , 嚇到不停喊 , 一直攬實我唔肯放 .

終於搵到同事話好好食既幸福 Pancake , 好多款式 . 再加上剛吃完壽司 , 但唔理 , 難得黎到 , 點都要坐底係到食 .

網上話要預約 , 但我就咁 walk in , 等左陣就有位 , 可能佢見到我帶住個 BB , 所以就先安排我地入座先 . 我專登叫香蕉 Pancake , 香蕉可以比 BB 食 . 其實我係想要其他款的 , 不過當媽後 , 我都以 BB 為先 .

我覺得依個地方環境好好 , 望住個海食甜品 , 真係好正 ! 可能早機 , BB 唔夠訓 , 繼續好似樹熊咁 . 拿拿聲食完 , 抱住佢走 . 但日落個景又太靚 , 又忍唔住停留左一陣 .

今次行程主要目的係參觀 PARCO CITY , 所以我地就去左果邊行下兼晚餐 . 打後每日我地都有過去買限定版 , 我老公就係一個大細路 .

2019 秋季旅行 / 三日兩夜 / 高雄+台北 (Day 3)

18.11.2019

早上起床 , 先吃早餐 . 晨早一個人去了蜂大咖啡吃了份早餐 , 再買了一杯台灣特飲加鴨舌就回酒店叫醒同房同事 , 佢要買海邊走走 , 原因又係跟台灣的回憶 . 其實我地成班人都好鬼無聊 .

買完就一袋二袋咁入機場 , 大家原先打算坐晚上機回香港 , 最後 ... 大家都係掛住家中的小孩 , 都改了中午飛機回去 . 

因為沒有吃到魯肉飯 , 所以堅持買左個餐 , 急急吃完就趕入閘 . 

今次旅程很瘋狂 , 掉下孩子仍是心掛掛的 , 睇黎都唔會再掉底佢偷走 .

2019 秋季旅行 / 三日兩夜 / 高雄+台北 (Day 2)

17.11.2019

尋晚玩到咁夜 , 無同事肯起身落樓食早餐 . 雖然明知酒店早餐無驚喜 , 但都唔想蝕 , 始終住宿包埋 . 早餐比想像中豐富 , 好彩有食一轉 .

今日我地係無行程的 , 早上是自由時間 , 中午就約返係高鐵站等 . 小地勤拖埋個篋去美麗島站影相 , 影比老公睇的 , 點都要打個卡報到行蹤 . 之後就去左買太陽餅比老爺做手信 , 唔想買手信街既款 , 專登網上搵左間話出名既老店 . 

最重要個包裝唔係平日見開既 , 老爺就會覺得係好野黎架啦 , 人地幫我湊仔 , 自己點都要識做下 . 果然出名既老店都係比較貴 , 比手信街的貴 TWD 250 左右 . 由於附近太多餅店 , 攪到我又買左一堆糕餅返香港 .

路痴的我 , 為免遲到 , 買完手信就急急回集合地點 . 早到的結果就係再買 ! 台灣圖書出名便宜 , 所以又買了一堆兒童圖書 . 再幫大家買埋火車便當 , 真的很喜歡台灣的火車便堂 , 很好吃 , 最愛雞脾魯蛋飯 ,再配埋七仔咖啡 , 其實已經很豐富 .

高雄回台北的高鐵 , 貴過我坐飛機返香港 . 小地勤今次花大錢的原因 , 都係為見另一位舊同事 . 如果大家有睇開我以前的日記 , 就會知道貴賓室曾經有位台灣妹 T 小姐 . 

每次想起她都心痛 , 一個人嫁來香港 , 現在一個人帶住個幾歲大的女兒回台灣重新生活 , 人生無常呀 ! T 小姐住係台北 , 我們一班同事專登去台北約她吃晚飯 . 

今次的旅程的確是瘋狂 , 飛高雄幫舊同事慶生 , 再到台北跟舊同事吃飯 ... 

台北的酒店 , 太貴了 , 所以小地勤訂了西門町的賓館 , 房間很大 , 不過好似鬼片中既凶宅咁款 , 住一晚又要就腳 Shopping , 都唔可以有咩要求了 .

放低行李後 , 我們就各自各在西門町閒逛 , 巧遇貴賓室另外兩位同事 , 她們很緊張地問我們幾時回程 , 坐邊班機 . 因為台北經常爆滿 , 而且上機跟排位 , 我們一班老 Pat Pat 會攪到佢地上唔到機返工 .

在台北沒什麼想買 , 要買都在高雄買了 . 又係圖書 , 文具 , 手信 ... 

晚上準時吃 無老鍋 . T 小姐真的很堅強 , 我們話題都要很小心 , 怕說到她的傷心事 . 

一頓飯 , 大家都好似只顧著吃 , 間中才說兩句 . 依餐飯唔知幾錢 , 因為一向有大食大 , 呀姐係到 , 呀姐請 ! 下次 , 都唔知幾時先會咁大班人一起旅行 . 

晚上閒逛西門町 , 又再買 ... 明明很飽 , 還是去了吃芋圓豆花 , 仲想吃冰 , 可是吃不下 . 回酒店前又到 7 仔買左盒木瓜奶跟萍果梳打 , 每次在台灣都會買 , 就只是為一種回憶 . 

今天很足實 !

2019 秋季旅行 / 三日兩夜 / 高雄+台北 (Day 1)

16.11.2019

最近有介紹香港八十後於高雄開餐廳既報導 , 當中既女主角是我的舊同事 S 小姐. 記得當年 , 她於升職前一刻 , 放棄香港所有 , 跟老公去到台灣展開新生活 . 一去 , 就兩年了 . 

一篇報導 , 令我們想起她 , 所以趁夾到假就一起瘋狂一次 , 來個三日兩夜高雄 / 台北之旅 .

跟以往一樣 , 我們上機前 , 都會先到貴賓室突擊檢查 , 發現錯處就會順便溫馨提示一下 . 香港去台灣 , 仲要係高雄 , 真心近 , 近過我由機場返屋企 . 飛機餐才吃到一半 , 已經做緊準備降落的廣播了 .

很久沒踏足高雄機場 , 一到埗即刻坐鐵路到酒店 , 很方便 . 

高雄酒店真心平 , 房間亦很大 , 依間酒店跟 S 小姐的小店只有十分鐘腳程 . 非常適合我們 .

今天是 S 小姐的生日 , S 小姐並不知道我們一大班同事會來探班 , 我們帶著蛋糕鬼鬼鼠鼠地向她的小店進發 . 在門外偷望了一會 , 見客人都散去 , 才衝入店內 , 唱著生日歌 , 送上蛋糕 . 

S 小姐比以前精神很多 , 更漂亮了 . 她被我們嚇到只懂傻笑 . 人在異地 , 見到一班老朋友 , 開心就實係架啦 . 

我們在她店內坐了個多小時 , 談談近況 , 再笑話當年 , 傾得很暢快 . 她亦為我們送上小店的招牌食物 , 賣相 , 味道都很好 . 真心推介 . 可惜 , 當小地勤有時間執筆時 , 她的小店已經結業了 , 肺炎令營運艱難 .

記得 S 小姐當日有提到 , 香港搵錢台灣洗是很美好 , 以前一到台灣就係吃喝玩樂 , 根本不會就住就住 . 現在先知台灣搵錢台灣洗 , 原來是艱難的 , 四圍都有賣早餐 , 不到 TWD 50 . 點同人鬥 ? 所以唯有靠晚市 , 總會有花得起錢的台灣人 . 聽她一番說話 , 令想移民既同事都有點腳步 . 幻想跟現實是有落差的 .

為了不阻她晚市 , 我們一班人去了行文具店 , 媽媽級都瘋狂地買 . 買完大家就回酒店休息 . 難得掉低老公跟 BB , 小地勤點會去休息咁浪費 , 即刻衝去火車站買面膜 , 水果乾 , 茶葉 , 飲品 , 總之想買就買 , 半小時買了兩大袋回酒店 . 

在同事眼中 , 小地勤是很慳錢的人 , 她們大部份都係第一次跟我旅遊 , 並不知道 , 我其實好大洗 . 平日在香港不會點買野 , 但一到外地 , 我一定買日用品 , 盡量塞爆個行李篋 .

傍晚 , 我們去了行夜市 , 坦白講 , 每次都只係為去而去 , 每次都無咩野係啱食 , 人又多 , 又熱 , 根本唔會有心機睇野 . 其實小地勤真係好幸福 , 台灣我都已經唔知去過幾多次 , 一折機票 / 免費機票令我坐飛機好似坐巴士咁款 , 亦因為去多了 , 所以跟朋友重遊也不會有咩爭執 , 去唔去觀看已經無咩所謂 .

晚上 , 我們約了 S 小姐在酒店等 , 預左傾通宵 , 所以去埋超市買零食同飲料 , 順便再買點當地麵食回家當手信 . 尿片 , 係我習慣性會買既野 , 但原來台灣尿片仲貴過香港 , 所以都係留返去日本先買吧 !

S 小姐從前都係私家車出入 , 現在卻改以電單車出入 , 我就覺得佢好有型 , 但佢就話花了一段時間才習慣 , 特別係落雨天 , 就會很懷念香港的日子 . 她亦提到生仔既話題 , 計起年齡係時候趕尾班車 , 但小店才稍有成績 , 一生仔 , 又會出現另一個問題 . 唔通真係坐住電單車餵奶咩 ? 返香港生 , 一返都要起碼半年 , 才左一個人手 , 支出又大左 . 生完 ? 又邊個湊 , 唔通帶埋返工咩 ... 人在異地 , 沒有家人幫忙 , 想要三人家庭 , 要諗好多野 !

她今晚帶來很多特色啤酒及她推介的小吃 , 我們都奉陪到底 , 基本上我係唔識飲酒的 , 但就破例一次啦 , 原來我酒量比想像中好 , 起碼飲左兩罐都無醉 ! 

零晨兩點多 , 大家才散去 . S 小姐當然依依不捨 , 佢講好耐無同朋友用廣東話講咁耐野 . 小地勤都好耐無試過咁青春 , 同一大班朋友傾咁耐 . 今晚 , 將會係一個很美好既回憶 ! 相信都唔會再有下一次機會了 . 的確 , 不久就肺炎殺到 , 貴賓室的一班同事都各走各的路了 .

無薪假生涯

 19.08.2020

今日係 2020 年的第一個九號風 , 小地勤被安排在家工作 . 由今年二月開始 , 小地勤每個月放兩星期無薪假 , 再加埋例假 , 勞工假及大假 , 小地勤每個月返工日數沒有超過 八 日 . 

的確人工減半 , 不足一萬元一個月 , 起初有點不太習慣 , 但慢慢就接受現實了 . 公司對我算不錯了 , 起碼我還是活在貴賓室 , 有些同事早早就被解僱了 , 有些就被停工了 , 有些就被轉部門 , 在政府的保障下 , 相信今年 , 小地勤還是不會有改變 .

從前 , 小地勤工作很忙 , 亦很累 . 放大假才有時間陪囝囝 , 現在我跟一個全職媽媽沒有太大分別 , 每天早上陪吃早餐 , 陪玩 , 陪睇書午睡 , 煮三餐 , 煮藝大躍進 . 

之前錯過了囝囝的成長 , 我只能從相片 , 短片中見證 . 現在 , 我終於有份參與 , 我真的很享受當一個媽媽 . 雖然二十四小時照顧 , 沒假期的確很累 , 但囝囝的一句 " 我好鐘意你 , 啾 " , 就是我的動力 .

有誰會明白一個要返工的媽媽 , 每晚下班 , 趕去奶奶家中見囝囝 , 換來的是囝囝無心的一句 " 我不要媽媽 , 我要嫲嫲 " 每次 , 我的心都很痛 , 強忍眼淚地回家 .

大半年的相處 , 我成功爭取囝囝的心 , 現在 , 小地勤一要上班 , 他會有不捨的樣子 , 問媽媽 " 下班會接他回家嗎 ? " 坦白說 , 我真的不想再上班了 , 我只想留在家中陪他成長 .

因為小地勤之前真的沒有時間照顧他 , 他是寄養在嫲嫲家中 , 老人家照顧真的不能要求多多 , 所以囝囝被評估說話不合格 , 這大半年 , 我花了很多時間陪他看書 , 畫畫 , 聊天 . 訓練他的體力 , 由起初不會離地跳 , 到現在識跳舞唱歌 . 由之前不懂圖形顏色 , 到現在中英文都識 . 

由之前要人餵吃飯 , 到現在自己吃 , 仲識用杯飲水 . 由之前唔識去厠所 , 到現在開始戒片片 , 著底褲仔 . 由之前唔肯刷牙 , 到現在識早晚叫刷牙 , 識吐水 . 仲越黎越貪靚 , 陪媽媽一起化妝 , 真係大個仔了 . 

疾情底下 , 我們長困家中 , 日對夜對 , 感情深厚了 . 去任何地方 , 一唔見小地勤 , 就會問 " 我媽媽呢 ? " 你 , 我 都已經識分了 . 假如不是疾情 , 相信我不會有時間見證他的成長 . 

某天 , 跟其他同事提起韓國有小朋友中了肺炎 , 要被帶走隔離 , 媽媽不怕死地要陪到底 . 假如換作我 , 我也會這樣決定 . 四月中某天晚上 , BB 發燒了 , 小地勤以為係冷氣凍親 . 零晨收到老公朋友通知 , 老公也發燒了 , 入境澳門時被捉到醫院隔離 , 情況未知 . 老公視像我 , 叫我自己留意體溫 , 又說自己會害死我地 , 小地勤真心被嚇到了 .

幸好擔心了一個晚上 , 只是虛驚一場 , 老公早上的檢測結果是正常 . BB 低燒了一晚 , 中午亦出疹了 , 就是玫瑰疹 , 我才放下心頭大石 .

某天早上 , 囝囝突然流出 "血淚" , 診所叫我即刻帶佢去急症室 . 屯門醫院急症室出名等得耐 , 我孭住佢同一大袋野企係到等左七個鐘頭先見到醫生 . 那天真心累 .

最近又跌傷了 , 夏天令到傷口發炎 , 每日到診所洗傷口 . 養兒一百歲 長憂九十九 原來就是這樣 . 大家如果睇完小地勤依篇日記 , 記得回家擁抱你的媽媽 , 每個媽媽都係偉大 !