09-11.04.2017
舊年 FOC ( 免費票 , 只需要比機場稅 ) 用剩一套 , 今年 FOC 再來 6 套 , 已經開始為用而去既地步 . 唔用又覺得浪費 , 用又要自己花費 , 所以一訂到平價酒店 , 就要即刻成行 .
今次訂了札幌個間幾受香港人喜愛既 CABIN 溫泉酒店 , 2 晚 2 床房不用 900 蚊 . 本身我係訂左 APA 簿野 520 蚊 2 晚 , 不過諗諗下都係選擇左 CABIN . 對面有泊車場 , 一日 1000 Yen , 自由出入 . 旁邊仲有間好細間既神社 , 附近亦有便利店 .
三日兩夜北海道 , 堅辛苦 ! 下次都係唔咁玩法 , 攰死人 ! 早上 7 點幾飛機 , 自己開架 GOGOVAN 泊機場 3 日 , 仲平過來回坐的士 . 我老公又轉行了 , 依加做 GOGOVAN , 以後都唔洗再 CALL 其他 GOGOVAN 了 , 哈哈 .
香港飛北海道個飛機餐 ... 每次都唔太想食 , 所以先係翠華食早餐 , 禁區間翠華開 6 點的 . 食完就等上機 , 飛左差唔多 5 個半鐘先到新千歲機場 . 日本跟香港有 1 小時的時間差別 .
今次都係 Book OTS 既車 , 由於早左一班機到機場 , 以前起碼 3 點先到 , 依加唔洗 2 點就到 , 多左個幾鐘 . OTS Counter 由以前係樓下 , 轉返去同一層 , 租 Wifi Counter 個邊 , 不過報到完後 , 職員都係會帶返你落樓下個層再上專車去 OTS 攞車 .
小地勤今次係有備而來 , 自己帶定個發泡膠箱裝蟹 , 以及 3 個吉篋 . 去得 3 日 , 衫都唔洗換 , 正係帶訓覺衫同少少日用品就算 , 去程行李重量得 6 KG 都無 .
攞左車 , 即刻開去 BB 日用品店幫我屋企個位小公主入貨 . Birthday 既衫比西松屋貴少少 , 但款式就靚好多 .
我老公好叻夾公仔 , 因為我姨娚囡一句 " 爸爸夾唔到 " , 所以就姨丈出馬 , 幾百 Yen 就攪掂 . 除左依隻公仔外 , 仲有同 Size 的麵包超人 , 以及細 Size 的麵包超人朋友系列 , 咁就帶左一家幾十口返香港. 我家個位小公主 , 由 BB 時代唔鐘意姨丈 , 到依加會行會走會講野 , 知道姨丈夾公仔叻就次次都打電話黎 Order 禮物 , 好現實既 BB 仔 .
今次好有目標 , 所以去左三井 Outlet 買衫買鞋 , 手袋其實都好抵 , 不過我都老了 , 已經無以前咁鐘意名牌子 , 依加我只鐘意平靚正既野 . 去北海道前的一個星期 , 我都有係香港格下價 , 一對 Nike 跑鞋 , 平極都要 500 蚊 , 我係三井既 Nike 店買左一對跑鞋 , 4980 Yen , 其實都幾抵 .
去到三井 , 記住第一件事係到 Information Counter 出示 Passport , 老實講 , 我平日好少上網搵資料 , 係呀妹話我知 , 我先知道有 Coupon , 買野會再多 5 % off . 仲有激安優惠卷 , 可以係網上搵到 , 免稅後再有 discount .
星期日 , 好多餐廳無開 , 所以唯有去拉麵橫町食個拉麵再到激安 shopping . 我地去左比較遠個間激安 , 無咩遊客 , 比較大間同多野買 , 唯一問題係因為遊客少 , 所以當退稅時 , 佢地攪左好奈 , 結果要比現金 , 懷疑職員唔識用銀聯卡 .
其實一直都好想堂食依間鰻魚飯 , 每次都係外賣 , 今次行程既第二晚終於有機會堂食一下 . 即燒即食真係會好味一點 .
每晚都零晨 2 , 3 點先去浸溫泉 , 好似包場咁 , 得一 , 兩個人 , 四月的北海道仲有雪 , 第一晚就遇上了 , 雖然量不多 , 但真係好凍 . 感覺仲凍過歐洲 .
