22.10.2015
日期 : 09-13.10.2015
地點 : 千歲。北海道
黎過咁多次新千歲機場都仍然無咩機會認認真真咁行一轉 . 每次到步就趕住去攞車 , 每次離開又買到趕頭趕命 . 今次都一樣係趕住走 , 唯一唔同既係 , 今次我有個半鐘頭時間行下兼食飯 .
一直好想試叮噹餐廳 , 我仲好豪氣咁同老公講 , 唔理幾貴我都要食 .
結果係兩個餐 , 連飲品都唔洗 140 蚊 ! 叮噹個杯係凍飲 , 大雄個杯係熱飲 . 兩杯都係藍梅奶昔 , 堅好飲 !
我坐左唯一一張叮噹藍既圓枱 , 其實我地兩個都唔係叮噹 FANS , 但黎到依到 , 我好似回到小時候 , 腦裡想起的 , 是小學時暑假既畫面 . 以前讀書都幾無憂無慮 .
依間餐廳 , 無咩人 , 可能大家都好趕時間 .
我老公指名要食依個餐 , 大家知唔知依件係叮噹既咩法寶呢 !?
唔好睇佢好似好 Dry 咁 , 超好食 ! 個包好有奶味 !
雖然我唔係 Fans , 但都好有衝動帶走依張紙 .
我就記左個甜品 , 都係超好味 ! 不過食既時候 , 覺得自己好殘忍 , 我界爛左 Doraemon 塊瞼 .
張紙巾都好靚 ! 隻匙都係叮噹 !
對面係小朋友天地 , 好多小朋友係到玩緊 . Doraemon 應該係日本小朋友心中同麵包超人一樣咁受歡迎 !
旁邊有間 Work Shop. 不過我都無咩時間睇下人地做緊咩野 .
另一邊就見到小朋友係到填色 . 仲有大人就係到睇漫畫 .
之後我地行左去精品店 .
叮噹食品 .
叮噹+Hello Kitty , 原來佢地係朋友 ! 我最鐘意係叮噹同 Kitty 係隨意門到伸左個頭出黎既野 .
依堆明信片 , 我下次就會寄比自己 !
成個機場都好似被叮噹入侵咁 ! 好開心 ! 但強調 , 我唔係 Fans , 所以更突顯叮噹既威力真大 .
依邊要收錢入去 , 好想去睇下 , 但我仲要趕飛機 . 唯有留到下次先再黎 .
22.10.2015
今日走了一個同事 . 不捨 !
回想當日個個 In-charge 都話佢唔 OK , 做得唔夠好 , 但又無人會諗下去教好佢 . 當開會時 , 個個講佢做得有幾差 , 而我卻奇怪地只覺得佢係新 , 而唔係差 .
有時 , 我成日覺得 , 既然個新人有問題 , 點解 In-charge 見到都唔開口教佢 , 正係識得背後講或去忍 ? 由幾時開始 , 好似得返我一個去教同事呢 ? 當原有的三個 Leader , 一個升職 , 一個放產假 , 依到就斷層了 .
今日同事離開了 , Last Day 拍我 , 我同佢分析利害 , 結果佢同我講 , 覺得自己太衝動 , 沒想清楚就話唔做 , 可惜已經 Last Day , 沒法再改變 . 假如我不是剛好放婚假 , 可能我可以留到依位好同事 .
係某些人眼中 , 可能佢都仲係唔夠好 , 但係我眼中 , 佢好勤力 , 亦真心唔想我辛苦 , 好肯幫我 . 佢走既時候同我講 , 好鐘意拍我 , 因為我真心為同事好 , 會比同事休息 , 亦好肯教同事 , 係佢心中 , 我先係佢個師傅 . 聽到 , 好感動 .
佢唔會因為我好心提佢 , 而話我針對佢 . 有時 , 好人係好難做 . 亦唔係個個接受我既好意 . 好多人背後一面話羨慕某同事既師傅係我 , 又話好想跟我學野 , 但每當我好言提點時 , 卻不是佢地口中所講咁想跟我學野 .
其實我真係好肯教人 , 因為人地學識左 , 我就可以無咁辛苦 . 但得我一個 , 邊教到咁多新人呢 ? 我好唔明白點解比較 Senior 既同事 , 膽量咁細 , 連比新同事去做下 , 都怕會出事 . 新人唔做 , 永遠唔識 , 做得睇場就要有擔大 , 係對自己無信心 , 定唔識教同事 , 定根本怕事 ?
永遠有問題既同事就要跟住我 , 直到被我教好了 , 成果卻與別人分享 , 其實我都幾慘 . 雖然矛盾地教好一個人 , 我自己都會好開心 , 但眼間其他同事唔幫忙 , 我心裡面都好難過 . 個個都叫我升職 , 好似升左職就可以避開班有問題既同事咁 ... 不過 , 我就自私地覺得 , 升左職 , 我只會更多野做 . 我堅唔想 .
世界好似好唔公平咁 , 實幹型既只會越黎越多野做 , 相反 , 就繼續無所事事 . 現實果然不如人意 .
21.10.2015
日期 : 09-13.10.2015
地點 : 函館。北海道
師奶地勤第一次浸溫泉 . 上次黎函館 , 我都有住溫泉酒店 , 但就無勇氣咁坦蕩蕩去浸溫泉 . 今次比左咁貴既酒店錢 , 唔浸真係好蝕底 , 所以當晚我就同自己講 , 你唔望人 , 人唔望你 . 當咩都睇唔到 , 原來沒我想像中尷尬 , 仲大開眼界 .
今次依間酒店房好大間 .
洗手間同浴室係分開的 , 不過每日都浸溫泉 , 所以都無用過間浴室 .
師奶地勤第一次住咁好 , 不但有客廳同廚房 , 仲有個衣帽間 .
露台都有呀 ! 風景都唔錯 , 起碼唔係對住另一大樓既洗手間 . 我以前係沖繩的確間房對正對面公司個厠所 .
每朝早既早餐都好豐富 , 有刺身同魚子飯 , 當然亦好多熟食及沙律 .
係函館大部份既時間落大雨 , 我終於有機會正 Shopping . 係 JR 站行下 , 不過原來 JR 站係無野睇架 .
本來一心諗住唔落雨就去多次五稜角公園 , 睇下搵唔搵到紅葉 . 去唔成唯有買張明信片 .
每次開車經過都好想落車影張相 .
臨走前 , 終於遇上好天氣 , 可以慢慢影 . 對面就係函館山 .
北海道 :
函館 :
好大風大浪 , 大海真係好靚 .
依條步行徑既風景真係好靚 . 海風令人好舒服 , 聽下海浪聲的確好 Relax !
見依個地方要收錢參觀 , 但人影都唔多個 , 仲要好細間咁 , 所以影張相就算 .
19.10.2015
小地勤要改名做師奶地勤了 . 結婚的第二日 , 就展開北海道之旅 . 今次係我第四次到北海道 , 而今次主題係睇紅葉 . 十月的北海道 , 已經 10 度以下 , 都幾凍 . 而今次我地去左兩個地方搵紅葉 . 一 , 札幌定山溪 ; 二 , 函館大沼國定公園 .
札幌定山溪 :
其實之前都有介紹過依個地方 . 佢係最近札幌既溫泉小鎮 , 除左出名溫泉 , 仲有河童同紅葉 . 十月中 , 開始少少紅 , 相信過多兩星期就會成個山頭都見紅 .
小地勤之前已經黎過 , 所以好熟路咁直去買雞蛋 , 再一次既自製溫泉蛋 .
係依個地方 , 起碼有三個免費足湯 , 識玩一定要去定山溪公園內的那一個 .
一來旁邊浸雞蛋 , 二來個足湯又夠熱 .
三來風景又唔錯 . 雖然未紅 , 但金黃都好靚 .
河童小鎮點可以唔搵河童影返張相 ?
函館大沼國定公園 :
依個地方都有紅葉睇 , 而且風光如畫 , 又有兩條步行徑 . 趕時間既小地勤只行左 15 分鐘個條 , 而另一條 50 分鐘的 , 就留待明年再行吧 !
15 分鐘 , 繞湖一圈 .
湖光山色 .
師奶地勤與小火山 .
少少紅葉 .
沒有一個會拍照的老公就只會出現一堆見不得人的相片 .
中途美景 .
終於搵到幾棵不錯的紅葉 , 而影出黎又唔會背光的位置 .
完成一圈 , 拍張到此一遊照 .
出發前 , 記住先到 Information Counter 攞份免費地圖 .
25.09.2015
印像中 , 公司每年都有扮獎比一班得到表揚信的同事 . 對比出面既同事 , 貴賓室既小地勤的確比較容易得到表揚信 , 因為我地來來去去都係得幾十個人 , 飛行常客來來去去都係見到我地幾個 , 常客們常常都會寫幾隻字或買野請我地食 . 我地跟客人 , 是朋友關係 , 所以比較容易得到表揚信 .
今年沒印像有被其他同事投票過 , 就直接話攞獎 , 真係有點意外 ! 前幾日先知道得獎後 , 要上台講一分鐘說話 .
內容都係多謝公司 ( 比個獎我 ) , 高層 ( 成日請我地食野 ) , 呀姐 ( 帶左我黎貴賓室 ) 以及我班手足 ( 當我攪緊 Complaint , 就要靠佢地睇住個場 ) . 多謝曬所有人之後 , 就剛好一分鐘 .
老闆同呀姐諗野好唔同 , 呀姐一直唔認同我發放一些唔正面既能量 , 但老闆卻明白依行就係沒想像中美好 .
小地勤好鐘意依行 , 但做左地勤 9 年 , 眼見客人一年比一年惡 . 我將地勤真實面寫出黎 , 就係想比有意加入既新朋友知道 , 地勤工作的確好辛苦 , 而當中既價值係要自己去發掘出黎 . 我好討厭攪 Complaint , 我亦唔鐘意比客鬧 , 但我又真係好鐘意個種攪好曬成件事後既成功感 , 又真係好鐘意同本來話要投訴我既人做朋友 .
想入行 , 現實一句 , 人工唔多 , 亦好受氣 , 但學到既又的確一生受用 . 都係個句 , 加入前 , 停一停 , 想一想 . 想好了 , 就堅持幾年 , 感受下搵錢有幾咁辛苦 . 唔吃過苦既人 , 就總唔學懂珍惜 .
職業病發作 , 總係特別人地既 display , 哈哈 !
