29.08.2015
小地勤終於放假 , 可以繼續清埋個日記. 最近因無盡既 Delay 令人手極度不足 , 亦因為咁發生左好多麻煩事 , 等我清完曬依個遊記先再講 .
北海道既夏天除左花多之外 , 水果亦好多 . 日本水果出名好食又好貴 , 近排 Yen 跌 , 當然要把握時機買下貴價水果比屋企人試下 . 其實我真係好鍚屋企人架 !
北海道最出名既當然係佢又甜又多汁又好味既哈密瓜 . 小地勤去左 3 次北海道 , 每次都有買 , 而且係 2 個起 ... 太陽王係當地人介紹的 , 對上個次已經試過 , 超甜超好味 ! 價錢跟夕張差唔多 , 但因為未係香港出名 , 所以同一價錢 , 卻比夕張的大個 . 6800 Yen 2 個係札幌二條市場既價錢 .
其實試過夕張 , 太陽王及普通款 , 總結係都一樣咁甜咁好味 . 北海道的哈密瓜真係無得頂 , 小地勤都改買平的了 . 平價選擇就係開車去市集買 .
八月水果種類很多 , 水蜜桃好正 ! 可惜唔放得奈 . 小地勤買左一箱返香港分比屋企人食 , 約 10 蚊一個 , 比香港平好多 ! 最重要係賣貨既叔叔賣比你之前都會 Check 清楚有無爛或唔靚 , 叔叔發現當中有一個唔太靚 , 換左一個新的比我地 , 而唔靚果個都照送比我地食 , 賺左 !
依個月車厘子都當造 , 不過因為太貴了 , 所以只買了少少試下 .
西瓜都好想買黎試下 , 但諗諗下都係買多個哈密瓜仲好 , 所以放棄左 !
最後 , 我地買左三百幾蚊生果返香港 . 平價哈密瓜 3000 Yen 2 個 .
北海道好出名馬油 , 只要係香港唔出名既款都好平 , 所以小地勤都有買黎用下 . 狸小路頭同尾既價錢可以相差 100 Yen ... 有時間先格價 , 後再買 .
最近都醒目左 , 買零食都入機場先再買 . 過左關有免稅零食店 , 到時先買 , 又免稅又唔怕會超重 .
今次買左好少 , 因為屋企人都仲未食完我六月買個轉野食 , 最近去得有點密 . 沒法 , 難得有北海道 , 唔去多幾次 , 公司好快又 Cut Port , 到時要買貴飛去 , 我唔捨得 , 所以我要不停咁去北海道 , 直到我飛厭依個地方為此 .
今次真係無點買過野 , 40 kg 我地買得 30 kg , 所以 Check-in 完後 , 我地去左 內陸大樓 個邊行下 , 結果買左千五蚊蟹 . 只可惜我地只係買 , 無點食過 ... 哈哈 ! 不過屋企人食得開心 , 我就開心了 .
26.08.2015
小地勤最近兩次都有去近機場的 Rera Outlet , 今次就改去札幌市內的 Mitsui Outlet Park (+81-11-377-3200) , 本來只是路過吃飯, 結果每晚都有黎買野.
依到有個 Food Court, 唔太貴, 亦多選擇.
最後我試左天書推介既豬肉井. 賣 890 Yen .
男友就食魚生飯. 不過圖片與實物有少少出入.
好想食依個雪糕, 可惜每次都食唔落, 我相信, 總有機會試到的.
Food Court 既環境不錯.
仲有小朋友天地.
適合一家大細黎食飯 , 亦因選擇多, 可以你有你食生野 , 我有我搵熟食.
小地勤咁大個女只食過兩次迴轉壽司, 一次係大阪, 一次就係今次.
Yen 平左 , 食咩都平 .見到有熟食就即刻衝入去.
因為人地就快關門, 所以點餐後, 壽司坐船仔而黎, 而唔係轉出黎.
其實我唔太識分咩叫新鮮唔新鮮, 正係識分平唔平. 印象中食左 15-20 碟 , 約 HKD 200. 別奇怪食咁少 , 因為我要留肚食第二樣野.
除左食 , 都好多野買. 雖然比 Rera 貴少少, 但就比較新款, 都係大路品牌 Coach, Armani, Jimmy Choo, Vans, Levi's, UGG, Beans...
我比較鐘意睇小朋友野.
今次仲買左好多把刀. 每件都係百幾蚊 , 有退稅.
仲有波鞋都好抵 , 普通款 2999 Yen.
貴價款就 10000 Yen.
下次我會再黎買床上用品同衫 , 每晚行得幾個鐘係唔夠 , 要行大半日先得 !
25.08.2015
今年第三次到北海道 , 每次都係網上租車 , 真係好方便 之前兩次都係係 Honda 租車 , 兩次都係租 N-Box , 雖然架車比較慢 , 但內裡既空間好夠大 .
今次旺季租唔返依架車 , 所以改租 OTS 既車 , 其實旺季真係無選擇 , 得返最後一架車 , 唔租都唔知點玩北海道 . 小地勤唔識坐 JR 架 !
無論租邊間公司 , 一到左新千歲機場 , 都係要向小叮噹手拿屋仔既方向 , 再過便利店 , 落樓下.
再搵 Information Counter 報到. 再由 Information Counter 個姐姐幫你聯絡各間車行.
再等一陣 , 就會有車行既人黎接你.
車行會派架專車接走有 Booking 既人 , 帶你去到攞車既地方. 留意只限約左係新千歲攞車的人才有此服務.
OTS 旁邊就係 Rera Outlet, 好多野買, 但今次小地勤無再去依個 Outlet, 而轉戰另一 Outlet. 下篇再講. 依個 Outlet 既款比較舊, 但價錢就真係好平, 折完再折, 攪到我成日要再買多少少先夠數退稅!
自駕遊可以去好多地方, 成日行左去小路到, 會遇到小市集, 居民既超市, 連郵局既叔叔都得別好人, 可能少見遊客, 所以送野好豪爽! 小地勤今次又買明信片以及靚靚郵票.
買左咁少野, 但叔叔就送左把好靚既扇比我, 真係好鐘意. 係唔係好有日本 Feel, 仲要一睇就知有返咁上下質素.
18.08.2015
其實返左香港都成個星期 , 但最近好似好忙咁 , 所以都無咩時間打返個遊記 . 本來小地勤 8 月係打算去台北 , 結果打風 , 所以再去北海道 .
今次已經係 2015 年既第三次北海道之旅 , 而日子又得四日 , 所以都係近近地咁四圍遊下同食野 . 係出發前先訂酒店 , 竟然訂到一間好野 , 樓下就係狸小路同二条市場 , 所以日日都可以 Shopping.
扣左機程 , 其實得返兩日真真正正咁去玩 , 所以去唔到遠 , 而且今次亦花左好多時間係三井 Outlet . 每次都會到余市逛下影下相 .
余市就會順道去埋小樽 , 已經唔再去睇音樂盒 " 不用多 , 有就可以了 ". 只去了找傳說中的十層雪糕 , 可惜只找到八層的 , 價錢不貴 , 兩個人分吃剛剛好 . 印象中三十幾蚊 .
今次最特別的行程係睇 7 月到 8 月先開既太陽花 , 比上次睇既花田大好多好多 , 好壯觀 .
寫住咁多先 , 睇緊得閒先寫返曬出黎 .
09.08.2015
小地勤用打日記黎對抗眼訓 , 現在是 02:46 am , 正常人都已經訓到成隻豬咁 , 但小地勤卻在工作 . 依兩日我面對的是台北 / 福州打風 , Bali 火山灰以及上海 / 北京既空中管制 , 同一時間公司既 5 個航點出問題 , 我地一班地勤又點會有好日子過 ? 返工 , 慘過去打仗 !
05:30 am 放工 , 就開始我的四日假期 ! 本來約好了朋友到台北走一轉 , 結果台北遇上世紀巨風 , 朋友早係打風前已經出發 , 小地勤遇正個風 , 當然去唔成 . 幸好有呀姐幫忙 , 先可以出到北海道機票 . 無錯 , 小地勤又去北海道了 !
太突然 , 所以沒行程 , 到時再算 !
昨天 , 在漫長的 Delay 日子裡 , 掃把介紹了一個歐洲平機票網站過我 . 小地勤已經訂好了明年一月中到西班牙的來回機票 .
你們沒看錯 ! 兩個人連稅先 6976 !!! 七千蚊都唔洗 !! 小地勤出一折員工機票都要 3300 !! 今時今日既機票真係平到不能相信 . 如果大家有假期 , 都不妨走一轉歐洲 , 張機票同去一轉日本無咩分別 .
很久以前 , 已經想看看西班牙以下兩個出名景點 , 今次終於有機會了 ! 我男友仲話一定要睇一場波 , 價錢好似七百幾蚊一位 , 感受一下氣氛係佢既願望之一 . 唔知大家有無咩景點推介過我呢 ?
這是我想去參觀的兩個景點 ( 圖片來自 Google ) :
