澳門三日遊 2014 ( Part 1 )

星期六日及星期一二都放假 , 原本打算去沖繩 , 後來妹妹又話唔去 , 所以男友帶我返佢鄉下 - 澳門 .

其實我好怕坐船 , 所以好少去澳門 . 第一站係聚龍軒 , 樓上係酒樓 , 樓下係玩具店 . 男友話澳門唔太多人賣玩具 , 雖然舖頭好少開門 , 但都仲賺到少少零用錢 .

其實 , 店面比較細 , 但貨又多 , 真係有點混亂 . 坐係舖頭等客到 , 見到好多人入黎 , 但又唔買野 , 心裡面好膽心 . 我地每日返黎開一個鐘 , 但都有人買野 , 睇黎好多野係急唔黎 , 要買自然會買 .

不停有路過的人企係門口睇野 , 又不停聽到有人話依套好貴 , 要儲曬會破產 . 我心諗這些也是男友興趣 , 你肯出錢佢都唔會賣你 , Display only !

新八百伴 , 聽到個名就想去睇下 . 天氣熱 , 行下商場都幾好 , 買左幾罐辣魚比媽咪試下 , 但原來士多仔比較平 , 做左水魚 .

男友由細食到大既麵店 , 人老了特別鐘意回想當年 .

是一間老店 , 家庭經營 . 香港的老店就快消失掉 . 所以要支持老店經營下去 .
我的豬排麵配咖啡 . 每朝我無咖啡奶茶 , 就會心掛掛 . 

這是另一間店 , 吃緬甸食物 , 門未開 , 已經有人在等位 , 店一開 , 不停有外賣 . 應該好受當地人歡迎吧 !

男友姨媽推薦的三樣美食 - 咖哩雞湯麵 .

炸大腸撈麵 .

以及魚湯粉 , 每樣都很好味 .

 

屎上身的一天

14.08.2014
最近貴賓室人手很充足 , 時間多 , 我都無偷懶 . 有時 , 我都會好妒忌其他同事 , 當我月頭忙緊埋數交 Report , 計緊大家 OT . 月中忙緊追單 , 做單  . 月尾忙緊一堆 Excel 表時 , 佢地好得閒 , 可以同客吹下水 , 睇下雜誌 , take 下 break .

唔大唔細既我 , 係夾心階層 , 工作堆積如山 . 責任感係迫到我由月頭忙到月尾既凶手 . 每次我同客人有時間吹水 , 十居其八係同事送我的 投訴客 . Leader 作用就係返最早同最夜以及一堆投訴客 . 我寧願降一級 , 才二千蚊一個月 . 我無大志 !

話說口多多 , 講錯野 , 就出現小氣現象 ...

有位台灣人一到貴賓室就問 " 上次單投訴 , 你地跟進成點 ? " 我心諗咩投訴 , 問佢邊日發生 , 我再幫佢跟進 , 一睇事發當日無打 Report , 睇埋 E-Mail 都無發現有投訴 Case , 先不討論係唔係同事做少左野 , 我第一個反應係 " 點解又係我中獎 ... "

我不入地獄 , 誰入地獄 ? 當日我的拍檔係 " 獨樂 " , 佢又點會自動去送死 ? 衝出去 , 被個客鵝鵝鵝 ... 聽完佢講之後 , 我就講到上次個同事點樣用心咁幫佢跟進 , 但仍無消息 , 吹到個負責同事今日放左假 , 依加由我去跟進 .

結果 , 當日負責同事原來今日係要返工 , 最黑係個客班機 Delay 左 , 一定會見到個同事 , 咁就麻煩啦 . 我同當日負責既同事講 , 叫佢扮專登返黎跟進件事 . 個客見到個同事 , 第一反應係唔好意思 , 佢估唔到個同事為左佢單投訴要放假都返工跟進 , 仲話以後唔敢投訴啦 ! ( 我地都暗笑 ... )

另一單投訴又係唔關我事 ... 成日自認 Senior 既同事接左 , 我見佢對住個客十問九唔認 , 見個客開始燥底 , 問下咩事 , Senior 就掉個波比我 , 閃人 . 有時 , 我都覺得自己太多事 . 但我又怕個客燥左先 Pass 比我 , 我仲大鑊 , 所以只好怨自己 !

外國人係北京被知會原定航班取消 , 被改到遲 7 個鐘的另一航班 . 人地聽到會送 Upgrade 及貴賓室就答應了 , 結果黎到香港先知根本得 Upgrade , 其他咩都無 . 唔發火至奇 , 我唯一可以做就係好落力咁幫佢打電話 , 再無奈地收線 . 我成日覺得 , 一開口就 Reject 客 , 客人會覺得你唔 Helpful . 就算明知唔得 , 都要幫佢扮下打電話 .

最後 , 我幫佢 R 到一張餐卷 , 雖然無得坐貴賓室 , 但佢知我盡左力都無再為難我 . 走之前仲寫左張表揚信比我 .

呀姐笑話 : 你能夠攞到咁多表揚信都要多謝那些閃同避的同事 , 無佢地掉個波比你 , 你邊有機會處理投訴 ... 真係要講一句 " 多 x 謝曬 " !


地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 !
http://www.seewide.com/space-1379.html

2014 Best Service Award

14.08.2014
一直以來 , 都沒有太留意公司的員工網站 , 每次上員工網 , 都只為出機票 . 最近才開始留意 , 因為今年接二連三地得獎 !!!

無奈前 , 因為一篇遊記 , 所以在公司的 E-Letter 連載了三期 , 最開心係得到 4 日的五星芭峇酒店 , 為年尾大假節省一筆花費 . 上個月 , 公司推薦參加機管局的服務獎 , 當八年的地勤 , 得到第一張獎狀 , 亦因此再一次於 E-Letter 出現 .

最近公司員工網又有投票活動 . 貴賓室所有同事都為我投下神聖一票  , 但我明白一件事 , 自從我轉部門後 , 同事得幾位 , 即是手上有十多票 , 相信勝算不大 . 結果 , 我猜錯了 ! 我得到第二名 !!

原來每半年就有一次投票活動 , 只是我沒留意而已 !! 今次頭三名係有獎金分的 . 最近好事接二連三 , 令我有捱下去的動力 . 雖然我成日同同事講 , 我個人好假 , 但其實我大部份時間係真心待客的 ^^

兩個月得兩次獎 , 連扮獎比我的 Director 都笑講一句 " 又係你 !? 比 d 機會其他同事好唔好 ? " 今日真係好開心 , 再一次得到認同 . 在此 , 老土都要講一句 " 多謝大家投我神聖既一票 ! "

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 !
http://www.seewide.com/space-1379.html

香港一日遊

轉到花花航空後 , 小地勤我用盡機票優惠 , 基本上連放三日假就九成半在外地 . 我不是貪玩 , 是要減壓 ( 理由很充分及合理吧 ~ )

住新界區的我 , 算是宅女 ,不是在家就是在機場 , 很少出外 . 今天跟小學同學聚舊兼香港一日遊 .
昨天零晨兩點多才到家 , 三點多才睡覺 , 但晨早九點起床去唱 K . 對上一次去唱 K , 可能是兩三年前吧 ! 原來早一日訂位 , 可以免加一及無限唱 , 老朋友唔講 , 我真係唔知 , 我次次都係比正價 . 60 蚊唱左 3 個鐘 , 包一柸飲品及一個午餐 , 我 Order 左一個 85 蚊既午餐 , 最後也只收 60 蚊 , 我賺左 !! 

唱完 K , 我地決定到香港動植物公園行下 , 人大了 , 就會想去一些小時候去過既地方 . 我地一直上山 ...

 
沿途見到好多自遊行 , 我地同佢地一樣 , 見到靚野就停低影相 .

 亂行 , 唔知自己去左邊 . 其實我同朋友都唔識路 , 有時連我自己都唔明 , 平時去旅行都唔會好似係香港咁 , 成個路痴 . 決定落山 .

天氣好熱 , 買左支冰條食下 , 好懷念細個時候食既吱吱冰 . 最近發現 , 原來 Supermarket 早就無平平既雪糕買 , 以前細個食既大大盒三色雪糕 , 早就被淘汰了 .

之前見過 seewide 有人介紹過元創方依個地方 , 我無諗過自己都會有機會去 . 路過入去過冷河 .

聽到有舊街坊返黎參觀懷念一下 , 偷聽到佢話以前係公用厠所 , 一家人係走廊食飯 . 我同朋友仔都回想起以前細個住公屋 , 都係走廊玩 , 當時好熱鬧 , 唔似依加私人樓咁冷清 .

每次見到依個公仔都好鐘意 , 因為佢同我一樣 , 好鐘意去旅行 .

當中有間賣家居用品 , 好靚 . 不過因為係藝術 , 所以要諗下先知佢既用途 . 我地時間太多 , 所以就係到 hea 左好奈 .

原來坐船返尖沙咀只要 2.5 ... 同事成日笑我唔屬於依個年代既人 , 咩都唔知 . 坐船 , 除左去澳門之外 , 我 5 隻手指數得曬  , 哈哈 ! 

其實 , 維港既兩岸景色真係好靚 . 

好大隻 snoopy , 見人地影 , 我地又衝左過去影 .

貴賓室 selling point 之一係 lego 鐘樓 . 真實版 , 我從未同佢影過相 . 又影返張先 .

朋友介紹一間 tea time 到 1900 的小店食 tea . 我的是熱情果香橙雪葩及 opera 蛋糕 .

這是朋友的 , 大家都點了一壺花茶 . 每位只要 68 蚊 , 好抵 ! 轉飲品加 8 蚊 .

今日香港一日遊 , 很開心 ! 原來唔去旅行 , 係香港行下 hea 下都一樣可以減壓 !!

獨樂 , 何不眾樂 ?

29.07.2014
相信 , 每個地方總有些壞份子存在 . 幸運的可以因踩住別人而上位 , 不幸的卻會成為眾人背說三道四的話題 .

剛出來工作時 , 人事關係攪不懂 , 再加上我個外型 , 唉 ... 人地唔蝦我就奇啦 . 就係因為受過別人唔好既對待 , 所以我一向行好人路線 . 依加 , 人大了 , 更明白 , 唔攪人做好自己 , 人地會攪返你 , 要自保 . 背後一起說人好了 , 總之唔好做到出面 , 始終係同事 .

剛到貴賓室工作時 , 所有同事都志不在此 , 因此無發現有異樣 . 究竟是幾時開始 , 某同事開始有小動作 , 由忘恩負義到現在犯眾憎 . 不過 , 我們都是好人 , 沒有黑佢臉 , 亦沒有暗算佢 , 只係唔幫佢而已 .

一張表揚信值多少錢 ? 簡單來說 , 不值一文 . 大部份同事講 Team Work , 我們跑到一張表揚信會把所有當時在場的同事名字記在上面 , 再轉交公司 . 雖然說表揚信不值錢 , 但不可以沒有 . 因為它代表你整個人既服務能度可信性有幾高 .

經理常說假如有一天你被客投訴態度差 , 但卻成日有表揚信 , 外間的人又怎會相信你態度差呢 ? 只會覺得係乘客無牙理 , 公司不會相信 . 的確是有道理 .

平日我好少去跑數 , 但我條數卻唔差 , 無它 , 同事無施奉獻 . 每次跑到都會把我的名字寫上去 . 一個咁做 , 個個都咁做 . 我教新同事都會講表揚信不值一文 , 但不可沒有 , 要加入圈子就要寫埋其他同事個名落去 . 要知道你可以有咁多時間去做好 service , 再攞到表揚信都係多得身旁同事做埋你個 duty , 你先可以咁專心去跑數 . 我有道理嗎 ?

有位同事由始至終都唔明 " 獨樂 , 不如眾樂 " 的道理 . 人地跑到的是自己 , 自己跑到的也是自己 . 最令人討厭的是人地種了恩 , 她馬上去取果 . 這樣的人就算我再好戲也不想浪費精力假對佢 . 我現在係唔鬼理佢 .

每次別人因佢而 " 屎 " 上身 , 事後件事攪大左 , 投訴客卻寫表揚信 , 經理知道加以讚揚 " Well done " . 佢總係妒火中燒 . 點解大家都知 ? 因為佢每次事後都會去跑數 , 平日 in charge 好少會主動去跑數架 . 講真 , 一個 in charge 點會咁得閒去跑數呢 ? 亦因為咁先要靠班細既幫手 .

我剛寫了一篇 " 難以捉摸的乘客 " , 那個乘客就係佢送我的 , 當時我有把所有同事名字寫上去 , 包括佢 . 第二天 , 佢又好好命收左別人既果 , 卻要同事幫手打 report , 但卻沒有寫同事名 ( 我只是看不過眼 , 當天我是放假的 , 沒名也很正常 )

同事跟我分享了此事 , 我都係個句 , 根本不值錢 , 要攞就要攞一張有價值的 . 黑仔如我 , 此話一出 , 當天就食了兩單投訴 .... 下篇再跟大家分享

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 !
http://www.seewide.com/space-1379.html

難以捉摸的乘客

25.07.2014
某天 , 下班前 , 我遇上了一為麻煩友 .

麻煩友原本坐的航班 Delay 了 45 分鐘 , 細問下 , 他說要到當天做 Visa , 但航班 Delay , 會令他原本有機會趕到落地簽 , 到現在一定趕唔到落地簽 .

他要求坐早一班航班 , 那時候是 1755 , 而他想坐的航班是 1845 起飛 . 公司一向 40 分鐘前就不接受任何乘客 Check-in . 現在距離 Close 時間只有 10 分鐘 , 而他又有行李 Check-in 左 , 正係轉佢件行李 , 快極都要一個鐘 , 所以不用想也知道辦不到 .

貴賓室乘客就是口大 , 我地絕對要做場戲比佢睇 , 明知做唔到 , 都要幫幫佢 . 很簡單 , 就是打個電話問一下 Check-in Counter 的主管 . 電話接通一刻 , 距離 Close 時間只剩下 8 分鐘 . 我地係地勤 , 唔係超人 , 邊有可能 8 分鐘轉到件行李 , 再 Check-in 埋你 , 再換埋發機證呢 ?

一般乘客見到我地咁落力去打電話 , 之後又勁無奈咁話 " 做唔到 " , 見我地交足戲 , 一般都會比條生路我地行下 . 點知 , 今次依個客 , 真係超麻煩 ! 麻煩到我有一刻係到諗佢可能係 " 神秘人 "

1 . 佢堅持話 8 分鐘 , 係夠時間做 , 只係我地同事懶 , 唔肯做 .
( 明知做到唔洗對住你 , 做到又點會唔做 ? 想你投訴咩 ? )

2 . 根據 E-mail 通知 , 航班雖然 Delay 45 分鐘 , 但到達當地時間只係遲左 20 分鐘 , 佢唔信 , 不停話無可能做到 .
( 遲左開車 , 開返快少少 , 咪可以追到時間囉 , 唔通明知遲左 , 都專登開慢 D 咩 ? 最重要係 , 我又唔係機長 , 我點知條路線係點 , 點樣飛快發 , 我真係唔識答 .
你問個 Reception 點樣開飛機 , 我答到你就轉行做機師啦 , 洗坐係到 ? )

3 . 要求同事 Send 電報 , 要求我列印個電報比佢睇 .
( 我個部係普通電腦 , 唔係電報機 , 你唔信人地 Send 左電報 , 要求人地再 Send Email , 人地比埋 E-mail 你睇 , 你都仲係唔信 , 咁係究竟想點 ? )

我由 1800 對住佢到 1930 , Keep 住好笑容同解釋 , 佢就無啦啦問我點解唔去魚翅航空做 , 之後又問我攞表揚信 , 仲寫左一大堆好說話 , 又話我有耐性 , 又話我多次嘗試令佢冷靜 , 佢好多謝我咁幫佢 ...

令我諗唔明 ... 佢煩左我咁奈 , 目的係咩 ? 就係為左睇下我 EQ 有幾好 , 之後可以寫張表揚信過我嗎 ??

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 !
http://www.seewide.com/space-article-id-101737.html

我捨不得你 ...

23.7.2014

轉眼間就兩年多了 . 雖然一直以黎都覺得公司個貴賓室又細又唔靚 , 但當真係要轉用新開的貴賓室時 , 又十萬個唔捨得舊的那一個 .

還有一起工作了兩年多的清潔姐姐隨住舊貴賓室關門大吉 , 我地亦都要同佢地講 Bye Bye , 因為要轉新的清潔公司了  .

曾經在這裡跟同事渡過無數個晚上 , 夜更追早更時 , 這裡便成為我們的休息室 .

現在終於要跟它說 " 再見 " ! 我捨不得你 ...

地勤 , 的確是一份很不錯的工作 , 令我看到很多 , 學到很多 . 當中的辛酸也令我永遠難忘 , 想當地勤的 , 先看看我的日記吧 !
http://www.seewide.com/space-article-id-101737.html